Read Dogri मरकुस 14 Bible Online

मरकुस 14 - Dogri bible

मरकुस 14

¹फसह ते खमीर रुट्टी दे त्यार लेई सेर्फ दो देन रेई गेदे हे, प्रधान याजकें ते शास्त्री एस गल्ल दी टूंढ च हे के उसी कियां छल कन्ने पकड़ीऐ मारी ओड़चै;

²लेकन ओ बोलदे हे, “के त्यार दे देन नेई, कुदै ऐसा नी ऊऐ के लोकें च पंगा पेई जा।”

³जदूं बैतनिय्याह शैर च शमौन जिसी कोढ़ हा ते चंगा ओई गेदा हा यीशु ओदे कर च रुट्टी खाणे गी बैठे दे हे, ते उत्थें एक जनांनी संगमरमर दे शीशी च जटामासी दा मैंगा शोद्ध इत्र लेईयै आई; ते ओनें शीशी तोड़ीयै इत्र गी ओदे सिर च पाया।

⁴लेकन केछ लोग गुस्सै ओईयै अपने मन च बोलन लगे, “एस इत्र दा कि सत्यनाश कित्ता गीया?

⁵किके ए इत्र ते त्रै सौ दीनार (त्रै सौ देन दी कमाई) कोलां मैंगा बेचियै गरीबें गी बंडी सकदे हे।”

⁶यीशु ने आखया, “उसी छुड़ी ओड़ो, ते कि सतानदे ओ? ओनें ते मेरे कन्ने पलाई कित्ती ऐ।

⁷किके गरीब ते थुआड़े कन्ने मेशा रोंदे न, ते तोस जदू चाओ ओसलै गै उन्दे कन्ने पलाई करी सकदे ओ; लेकन मैं थुआड़े कन्ने मेशा नेई रौना ऐ।

⁸“जे केश ओ करी सकदी ही, ओनें कित्ता, ओनें मेरे गाड़े जाने दे लेई पैलैं गै मेरी दे उपर इत्र डोलया ऐ।

⁹“आऊँ थुआड़े कन्ने सच आखना ऐ के सारी दुनिया च जिथें बी शोभ समाचार दा प्रचार कित्ता जाग, उत्थें ओदे कम दी चर्चा बी याद कित्ती जाग।”

¹⁰ओस बेलै यहूदा इस्करियोती ने जेड़ा बारें चेलें चा एक हा, प्रधान याजकें दे कोल गीया के उसी उन्दे अथ्थ पडकाई ओड़े।

¹¹ओ ए सुनीयै खोश ओए, ते उसी पैसे देना उनै मनी लेत्ता; ते ओ मौका तुपन लगा के उसी केस चाली पडका।

¹²खमीर रुट्टी दे त्यार दे पैले देन, जेलै फसह दे लेले दी अवन बलि कित्ती जन्दी ही ते ओदे चेलें उसी पूछया, “तू कुत्थें चांना ऐ के अस जाईयै तेरे लेई फसह खाणे दी त्यारी करचै?”

¹³ओनें अपने चेलें बिचा दों गी ए बोलिऐ पेजया, “शैर च जाओ, ते एक मनुक्ख पानी दा कड़ा चुके दा तुसेंगी मिलग, ओदे पिछें चली जायो;

¹⁴ते ओ जेस कर च जाग, ओस कर दे मालके गी बोलेयो, गुरु बोलदा ऐ के मेरी मेजबानी जिदे च आऊँ अपने चेलें कन्ने फसह खां ओ कुत्थें ऐ?

¹⁵“ओ तुसेंगी एक सजी सजाई, ते तयार कित्ती दी बड़ी अटारी दसी ओड़ग, ते उत्थें साड़े लेई तयारी करयो।”

¹⁶चेलें निकलियै शैर च आए, ते जियां ओनें उनेंगी गलाया हा, उनै उयांगै ओ लबा; ते फसह दा खाणा तयार कित्ता।

¹⁷जेलै शाम ओई, तां ओ बारें चेलें दे कन्ने आया।

¹⁸जेलै ओ बेईयै पोजन करा दे हे, ते यीशु ने आखया, “आऊँ तुसेंगी सच आखना ऐं के थुआड़े बिचा एक, जेड़ा मेरे कन्ने रुट्टी खा करदा ऐ, ओ मिगी पड़काई ओड़ग।”

¹⁹उन्दे बेच दुआसी छाई गेई ते ओ एक-एक करियै उसी पूछन लगे, “के ओ आऊँ ऐं।”

²⁰ओनें उनेंगी आखया, “ओ बारें बिचा एक ऐ, जेड़ा मेरे कन्ने थाली च अथ्थ पांदा ऐ।

²¹किके आऊँ मनुक्ख दा पुत्तर, जियां ओदे बारै च लिखे दा ऐ, जनदा गै; लेकन बसोस ओस मनुक्ख उपर जेदे दवारा आऊँ मनुक्ख दा पुत्तर पड़काया जन्दा ऐ! जे ओस मनुक्ख दा जन्म गै नेई ओंदा, ते ओसदा पला ओंदा।”

²²जेलै ओ रुट्टी खा दे गै हे, यीशु ने रुट्टी लेई ते शीर्वाद मंगीयै तोड़ी ते उनेंगी देईयै आखया, “इसी लेयो; ए मेरी देह ऐ।”

²³पी ओनें प्याला लेता शुक्र करियै उनेंगी दिता ते उनै सारे ओदे चा पीता।

²⁴पी ओनें उनेंगी आखया, “ए बायदे दा मेरा ओ खून ऐ जेड़ा मतें दे लेई बगया जन्दा ऐ।

²⁵आऊँ थुआड़े कन्ने सच आखना ऐं, आऊँ दाख दा रस ओस देन तकर कदें बी नेई पीगा, जदू तकर परमेसर दे राज च नमां नेई पीगा।”

²⁶पी ओ पजन गाइयै बार जैतून दे पाड़ उपर गै।

²⁷पी यीशु ने उनेंगी आखया, “तोस सारे ठोकर खागे, किके लिखे दा ऐ; आऊँ गुआल गी मारगा, ते पिड्डां तितर-बितर ओई जागन।

²⁸लेकन आऊँ अपने जिन्दे ओनें दे बाद थुआड़े थमां पैलैं गलील जिले गी जागा।”

²⁹पतरस ने उसी आखया, “जेकर सारे ठोकर खांन तां खांन, लेकन आऊँ ठोकर नेई खागा।”

³⁰यीशु ने ओस कन्ने आखया, “आऊँ तेरे कन्ने सच आखना के अज्ज गै रातीं दो बार कुकड बांग देने थमां पैलैं, तू त्रै बारी मेरे लेई मुकरी जागा।”

³¹पर ओनें ओर बी जोर देईयै आखया, “जेकर मिगी तेरे कन्ने मरना बी पौग, तां बी आऊँ तेरा एनकार कदें बी नेई करगा।”

³²पी यीशु ते चेलें गतसमनी नां दे एक जगह च आए, ते ओनें अपने चेलें गी आखया, “इत्थैं बैठी रवो, जदू तकर आऊँ प्रार्थना करा।”

³³ते ओ पतरस ते याकूब ते यूहन्ना गी अपने कन्ने लेई गीया; ते बड़ा गै परेशान ओन लगा,

³⁴ते ओनें आखया, “मेरा मन बड़ा दूआस ऐ, इत्थैं तकर के आऊँ मरने उपर आं; तोस इत्थैं ठैरो ते बिजे दे रवो।”

³⁵पी ओ थोड़ा अगें गीया ते तरती च पेयिये प्रार्थना करन लगा के जेकर ओई सके ते ए कड़ी मेरे उपरा टली जा।

³⁶ते आखया, “ए अब्बा, ए प्यो, तेरे लेई सब केछ ओई सकदा ऐ; एस दुख दे कटोरे गी मेरे कोलां चुकी लै; तां बी जियां आऊँ चांना इयां नेई, लेकन जेड़ा तू चानां ऐ उवै होवे।”

³⁷पी ओ आया ते ओनें उनेंगी सुत्तें दे दिखयै ते पतरस गी आखया, “शमौन, तू सवे करना ऐ? के तू एक कड़ी बी नेई बीजी सकदा?

³⁸बिजे दे ते प्रार्थना करदे रवो के तोस परिख्या च नेई प्यो। आत्मा ते तयार ऐ, पर जिंद कमजोर ऐ।”

³⁹ते पी ओ चली गै ते उच्ची बाज च प्रार्थना कित्ती।

⁴⁰पी आईयै उनेंगी सुते दें दिखया, किके उंदी अख्खीं िनंदर कन्ने परोची दीहां; ते नेई जांनदे हे के, के जबाब देचै।

⁴¹पी ओनें त्री बार आईयै उनेंगी आखया, “के तोस सुते दे, ते बसां करो, बस ओ घड़ी आई पूजी ऐ। दिखो, मनुक्ख दा पुत्तर पापियें दे अथ्थ पड़काया जा दा ऐ।

⁴²उठो, चलो! दिखो, मेरा पडकाने आला कोल आई पूजया ऐ!”

⁴³ओ आखादा गै हा, इन्नें तकर यहूदा इस्करियोती, जेहड़ा बारै बिचा एक हा, अपने कन्ने प्रधान याजकें ते शास्त्रियें ते प्राचीन थमां पेजे दे पीड, तलवारां ते डंडे लेईयै तौलै आई पूजे,

⁴⁴ओदे पड़काने आले ने उनेंगी ए पता दिते दा हां कि जिसी आऊँ चूमगा उवै ऐ; उसी पकड़ीयै ओशयारी कन्ने लेई जाए ओ।

⁴⁵ओ आया, ते एकदम ओदे कोल जाईयै आखया, “हे गुरु!” ते उसी बड़ा गै चूमया।

⁴⁶पी उनै ओदे उपर अथ्थ पाईयै उसी पकड़ी लिया।

⁴⁷उन्देचा जेड़े कोल खडोते दे हे, एक ने तलवार खिचीये महायाजक दे दास उपर चालाई, ते ओदा कन बड़ी दिता।

⁴⁸यीशु ने उनेंगी आखया, “के तोस डाकू समझीयै मिगी पकड़ने लेई तलवारां ते लाठियाँ लेईयै निकले ओ?

⁴⁹आऊँ ते अर देन मंदर च थुआड़े कन्ने रेईयै शिखया दिंदा हा, ते ओसलै तुसें मिगी नेई पकड़या; लेकन ए एसकरी ओया ऐ के पवित्र शास्त्र दियां गल्लां पूरीयां ओन।”

⁵⁰एस गल्ल उपर उसी सारे चेलें छुड़ीयै नसी गै।

⁵¹एक जवान ओदे पिछें चला दा हा। ओनें अपने नंगी जिंद उपर सेर्फ मलमल दी चादर ओढ़ी दी ही। ते लोकें उसी पकड़या,

⁵²पर ओ मलमल दी चादर छुड़ीयै नंगा गै नसी गीया।

⁵³पी ओ यीशु गी महायाजक दे कोल लेई गै; ते सारे प्रधान याजकें, प्राचीन ते शास्त्री किट्ठे ओई गै।

⁵⁴पतरस दूरे दा गै महायाजक दे बेड़े तकर ओदे पिछें-पिछें चली गीया हा। ओ पैरेदार कन्ने बैठीयै उत्थें अग्ग सेकन लगा।

⁵⁵प्रधान याजकें ते सारी महासभा यीशु गी मारी ओड़ने बासतै ओदे विरोध च गवाही दी खोज च हे, लेकन नेई मिली।

⁵⁶किके मते गै ओदे खलाफ च चुठी गवाही देआ करदे हे, लेकन उन्दी गवाही इकै जेई नेई ही।

⁵⁷ओलै केछ लोकें उठीयै ओदे खलाफ ए चुठी गवाही दिती,

⁵⁸“असैं इसी ए आखदे सुनया ऐ, ‘आऊँ एस अथ्थ दे बनाए दे मंदर गी टाई ओड़गा, ते त्रै धयाडें च दूसरा बनाई ओड़गा, जेड़ा अथ्थ कन्ने नेई बना ओग।’”

⁵⁹एदे उपर बी उन्दे गवाही इकै जेई नेई निकली।

⁶⁰पी महायाजक ने बिच खड़े ओईयै यीशु गी पूछया, “तू कोई जबाब कि नेई दिता? ए लोक तेरे खलाफ च के गवाही दिंदे न?”

⁶¹लेकन ओ चुप रिया ते ओनें कोई जबाब नेई दिता। महायाजक ने उसी पी पूछया, “के तू ओस परमप्रधान दा पुत्तर मसीह ऐ?”

⁶²यीशु ने आखया, “हां आऊँ ऐं; ते तोस मनुक्ख दे पुत्तर गी समर्थमान दे सजे पासे बैठे दे, ते अम्बर दे बादलें दे कन्ने आंदे दिखगे।”

⁶³पी महायाजक ने अपने चोगा फाड़ियै आखया, “हुन असेंगी गुआईयें दी के लोड़

⁶⁴तोस ए निंदया सुनी चुके ओ। हुन इंदे उपर थुआड़ी के राय ऐ?” ते उनै सारें उसी प्राण-दण्ड दे योग कसुरबार आखया।

⁶⁵पी केछ लोक ओदे उपर थूकन लगे, ते ओदी अखीयाँ उपर पट्टी बनियै मुके मारन लगे ते उसी आखन लगे, “औने आली गल्लां सना!” ते पैरेदार पकड़ीऐ ओदे मुंह उपर चंढा मारीयां।

⁶⁶जेलै पतरस थल्लै बेड़े च हा, ते महायाजक दी दासी बिचा एक उत्थें आई,

⁶⁷ते पतरस गी अग्ग सेकदे दिखया ते कुरियै उसी दिखियै आखया, “तू बी तां ओस यीशु नासरी दे कन्ने हा।”

⁶⁸लेकन ओनें मुक्रदे आखया, “आऊँ नां ते जानदा ते नां गै समझदा के तू के बोला दी ऐं पी कुकडै त्री बांग दिती।”

⁶⁹उसी दिखियै ते कोल खडोईयै लोकें गी ओ दासी पी आखन लगी, “ए तां उन्दे चेलें चा एक ए!”

⁷⁰लेकन ओ पी मुकरी गीया। थुड़े चेर बाद जेड़े कोल खड़ोते दे हे उनै पी पतरस गी आखया, “पक्का तुं उन्देचा एक ओना ऐ; किके तू गलीली बी ऐं।”

⁷¹ओस बेलै ओ अपने आप गी कोसना ते कसमां खाणा लगया; “कि आऊँ ओस मनुक्ख गी जेदी तोस चर्चा करा दे ओ नेई जानना!”

⁷²ते तौलै गै कुकडै दुई बार बांग दिती। पी पतरस गी ओ गल्ल जेड़ी यीशु ने उसी बोली ही, याद आई गेई, “कुकडै दी दो बार बांग देने थमां पैलैं तू त्रै बार मेरा एनकार करगा।” ते ओ फूटी-फूटी रौन लगा।