Read Dogri मरकुस 9 Bible Online

मरकुस 9 - Dogri bible

मरकुस 9

¹यीशु ने चेलें गी आखया, “आऊँ थुआड़े कन्ने सच सच आखना के जेड़े इत्थैं खडोते दे न, उन्दे बिचा कई लोक इनें तकर नेई मरगन जिंदु तकर परमेसर दे राज गी समर्थ कन्ने नेई दिखी लैंन!”

²छें धयाडें दे बाद यीशु ने पतरस ते याकूब ते यूहन्ना गी कन्ने लेता ते सनसान जगह च कुसे उच्चे पाड़ उपर लेई गीया; उत्थें उंदे सामने ओसदा रूप बदली गीया

³ओदे कपड़े ऐसे चमकन लग्गे, गी तरती उपर कोई तां बी नेई चमकाई सकदा।

⁴ते उनेंगी मूसा दे कन्ने एलिय्याह लबया, ते दुए यीशु दे कन्ने गल्लां करदे हे।

⁵एस लेई पतरस ने यीशु गी आखया, “ए गुरु, साड़े लेई इत्थैं रौना ठीक ऐ; एसकरी आसे त्रै डेरा गीं बनाचै एक तेरे लेई, एक मूसा लेई ते एक एलिय्याह लेई।”

⁶किके ओ नेई जानदा हा के अस के जबाब देचै, एसकरी के ओ मते डरी गेदे हे।

⁷पी एक बदल गरजया जेनै उनेंगी केरी लेया, ते ओस बदल बिचा ए बाज आई, “ए मेरा प्रिय पुत्तर ऐ, एस दी सुनो।”

⁸पी ओनें चौनें पासे नजर फेरी, ते यीशु गी छुड़ीयै अपने कन्ने कुसे गी बी नेई दिखया।

⁹पाड थमां उतरदे ओई ते ओनें उनेंगी उक्म दिता, के जदू तकर मनुक्ख दा पुत्तर मरें बिचा जिन्दा नेई ओग अतुं तकर जेड़ा केछ तुसें दिखया ऐ उसी कुसे गी नेई दसयो।

¹⁰उनै एस गल्ल गी चेते रख्या; ते अप्पुं बिचें च बैस करन लगे के मरें दे बिचा जिन्दा ओनें दा के मतबल ओई सकदा ऐ।

¹¹ते उनै उसी पूछया, “शास्त्री कि आखदे न के एलिय्याह दा पैलैं औना जरुरी ऐ?”

¹²ओनें उनेंगी जबाब दिता, “एलिय्याह सचें पैलैं आईयै सब केश सधारी देग। पर मनुक्ख दे पुत्तर दे बारै च ए कि लिखे दा ऐ के ओ मते दोख चेलग ते तोछ समझया जाग?

¹³लेकन आऊँ थुआड़े कन्ने आखना ऐ के एलिय्याह ते आई चुके दा ऐ, ते जियां ओदे बारै च लिखे दा ऐ लोकें जे केछ चाया ओदे कन्ने कित्ता।”

¹⁴ते जेसलै ओ चेलें दे कोल आया, ते ओसने दिखया के उन्दे आले दूआले बड़ी पीड लगी दी ऐ ते केछ शास्त्री उन्दे कन्ने बैस करै क्रदे हे।

¹⁵लेकन जेसलै पीड ने उसी दिखया तां सारे लोक रांन ओए ते दौड़ीयै उनै उसी नमस्ते कित्ते।

¹⁶ओसने पूछया, “तोस उन्दे कन्ने के बैस करा दे ओ?”

¹⁷पीड बिचा एक ने उसी जबाब दिता, “ए गुरु, आऊँ तेरे कोल अपने पुत्तर गी, जेदे च ऐसी आत्मा समाई दी ऐ ते ओनें उसी गूंगा करी ओड़ा ऐ;

¹⁸जिथें कुतै उसी पकड़दी ऐ तां जमीन उपर तराटी ओड़दी ऐ; ते ओदे मुंह च कफ-कचुड परोई जन्दी ऐ ते ओ दंद केल्डदा ते अकड़ी जांदा हा। ते मैं तेरे चेलें कन्ने आखया, गी ओ उसी कढन, लेकन ओ उसी कढी नेई सके।”

¹⁹ओनें जबाब दिंदे होए आखया, “ए जकीन नेई करने आले लोको, आऊँ कदुं तकर थुआड़े कन्ने रौगा? आऊँ कदुं तकर थूआडी बरदाश करगा? उसी मेरे कोल लेई आओ।”

²⁰उनै ओस जागते गी ओदे कोल लेई अन्दा। ते जेसलै दोष्टआत्मा ने यीशु गी दिखया ते तौलै ओस आत्मा ने उसी मरोड़या ते ओ जमीन उपर किरीयै मुंह च कफ कढदे ओई बिलन लगया।

²¹ते ओनें ओदे प्यो गी पूछया, “एदी ए आलत कदुं दी ऐ?” ओनें जबाब दिता, “बचपन थमां।

²²एनें इसी खत्म करन आसतै कदें अग्गी च ते कदें पानी च सुटया। लेकन जेकर तू केछ करी सकदा ऐं तां साड़े उपर तरस खाईयै साड़ी मदत कर।”

²³यीशु ने उसी आखया, “ऐ के गल्ल ऐ के आऊँ ठीक नेई करी सकना ऐं? जेकर तू बश्वास करी सकना ऐं! तां बश्वास करने आलें आसतै सारा केछ ओई सकदा ऐ।”

²⁴जागत दे प्यो ने तौलै करलाईयै आखया, “ए प्रभु, आऊँ बश्वास करदा ऐं, पर मेरा बश्वास तकड़ा नेई ऐ, मेरे बश्वास गी तकड़ा करो ते मेरी मदद करो।”

²⁵जेसलै यीशु ने दिखया के पीड बडी बददी जा दी ऐ पी ओनें अशोद्ध आत्मा गी ए आखीयै डांटया, “ए गूंगी ते बोली आत्मा, आऊँ तुगी उक्म दिना ऐ एदे बिचा निकली जा ते पी कदें बी एदे च नेई आयां।”

²⁶ओसबेलै ओ करलाईयै, ते उसी बड़ा मरोड़ीयै, ओदे बिचा निकली गेई; ते जागत मरें आला लेखा ओई गीया, इत्थैं तकर के मते लोक आखन लगे के, “ओ मरी गीया ऐ।”

²⁷लेकन यीशु ने ओदा अथ्थ पकड़ीऐ उसी चुकया ते ओ उठी गीया।

²⁸जेसलै यीशु ते ओदे चेलें कर च आए तां चेलें कल्ले उसी पूछन लगे, “अस उसी कि नेई कढी सके?”

²⁹ओसने उनेंगी आखया, “ए जाती बिना प्रार्थना ते उपवास कन्ने नेई निकली सकदी।”

³⁰पी यीशु ते ओदे चेलें ओस जिले चा निकले ते गलील जिले बिचें ओईयै जान लगे। ओ नेई चांदा हा के कुसे गी ओदा पता लगे।

³¹किके ओ अपने चेलें गी शिखया दिंदा ते उनेंगी दसदा हा, “आऊँ मनुक्ख दा पुत्तर, मनुक्खें दे अथ्थ च पड़काया जागा, ते मिगी मारी ओड़गन; ते तरें दिनें च पी जिन्दा ओई जागा।”

³²ए गल्ल उंदी समझ बेच नेई आई, ते ओ उसी पूछने लेई डरदे हे।

³³यीशु ते ओदे चेलें कफरनहूम पूजियै, ते जेसलै कर च आए ओनें उनेंगी पूछया, “रस्ते च तोस के बैस करा दे हे?”

³⁴लेकन ओ चुप रे, किके रस्ते च उनै अप्पुं बिचें बैस कित्ती ही, के साड़े बिचा बड़ा कोन ऐ।

³⁵पी ओनें बैठीयै बारें गी अपने कोल बलाया ते उनेंगी आखया, “जेकर कोई बड़ा होना चा, ते ओ सारें कोलां निक्का ते सबनी दा सेवक बने।”

³⁶पी ओनें एक बच्चे गी लेईयै उन्दे बेच खडेरया ते उसी गोदी च लेईयै आखया,

³⁷“जेड़ा कोई मेरे नां च कुसे ऐसे बच्चे गी ग्रहण करदा ऐ ओ मिगी ग्रहण करदा ऐ, ते जेड़ा मिगी ग्रहण करदा ऐ ओ मिगी नेई, लेकन उसी ग्रहण करदा ऐ जेनें मिगी पेजे दा ऐ।”

³⁸यूहन्ना ने उसी आखया, “ए गुरु, असैं एक मनुक्ख गी तेरे नां कन्ने दोष्टआत्मायें गी कढदे दिखया ते असैं उसी मना कित्ता, किके ओ थुआड़ा चेला नेई ऐ।”

³⁹लेकन यीशु ने आखया, “उसी नेई रोको! किके ऐसा कोई नेई जेड़ा मेरे नां च चमत्कार करग ते बाद बेच मिगी बुरा बोली सकै।

⁴⁰किके जेड़ा साड़े खलाफ च नेई ओ साड़े कन्ने ऐ।

⁴¹जेड़ा कोई तुसेंगी मसीह दे ओनें दे कारन एक लोटा पानी पिलाग, आऊँ थुआड़े कन्ने सच आखना ऐं ओ किसे बी आलत च अपना फल नेई गुआग।”

⁴²जेड़ा कोई इनें निकें बिचा जेड़े मेरे उपर बश्वास करदे न, कुसे गी ठोकर खला तां ओस आसतै पला ए ऐ, के एक बड़ी चक्की दा पटा ओदे गल्लें च टंगया जा ते ओ समुद्र च सुटया जा।

⁴³जेकर तेरा अथ्थ तुगी ठोकर खला तां उसी कटी ओड़। टुंडा ओईयै जीनें च दाखल ओना तेरे आसतै इयै पला ऐ के दो अथ्थ रोंदे ओई नरक दी अग्गी च सुटया जां जेड़ी कदें बुझदी नेई।

⁴⁴जेकर तेरा पैर तुगी ठोकर खला तां उसी कटी ओड़। लींञा ओईयै जिंदु च दाखल ओना तेरे लेई ए पला ऐ के दो पैर रोंदे ओई नरक च सुटया जां।

⁴⁵

⁴⁶ते जे तेरी आख तुगी ठोकर खला तां उसी कटी ओड़। काना ओईयै परमेसर दे राज च दाखल ओना तेरे लेई ए पला ऐ के दो अखीयाँ रोंदे ओई तू नरक च सुटया जां।

⁴⁷

⁴⁸जिथें कीड़ा नेई मरदा ते अग्ग नेई बुझदी।

⁴⁹“किके अर एक जन अग्गी कन्ने नमकीन (शोद्ध) कित्ता जाग।

⁵⁰लून छैल ऐ, लेकन जेसलै लून दा सुवाद बिगड़ी जा, तां उसी केस चीज कन्ने लुनका करगे? अपने च लुनें दा सुवाद रखो, ते अप्पुं बिचें मेल मलाप च रवो।”