Read Dogri लूका 15 Bible Online

लूका 15 - Dogri bible

लूका 15

¹सारे चुंगी लेने आले ते पापी ओदे कोल आंदे रौंदे हे के ओदीयां गल्लां सुनचै।

²ते फरीसी ते शास्त्री नराज ओईयै अप्पुं पिछें आखन लगे, “ए ते पापीऐं कन्ने मिलदा ऐ ते उन्दे कन्ने खन्दा ऐ।”

³ते ओनें उनेंगी ए मसाल बोली,

⁴“थुआड़े च कोन ऐ, जेस दियां सौ पिड्डां ओंन, ते उन्दे बिचा एक गुआची जा, ते निन्यानबे गी जंगल च छुड़ीयै, ओ गुआची दी पेड्ड जदूं तकर मिली नेई जा तुपदा नेई रवै?”

⁵ते जेलै मिली जन्दी ऐ, ओसलै ओ बड़ी खुशी कन्ने उसी अपने मुंड्डे उपर चुकी लेनदा ऐ;

⁶ते कर च आईयै दोस्त ते मल्लेदारें गी सदियै आखदा ऐ, मेरे कन्ने खुशी मनाओ, किके मेरी गुआची दी पेड्ड मिली गेई ऐ।

⁷“आऊँ थुआड़े कन्ने आखना ऐं के इयां गै एक मन फेरने आले पापी दे बारै च बी सोर्ग च इनी गै खुशी ओग, जियां के निन्यानबे ऐसे तर्मियें दे बारै च नेई ओंदी, जिन्नें गी मन फेरने दी जरुरत नेई।”

⁸“जां कोन ऐसी जनानी ओग, जेसदे कोल दस सिक्के ओन, ते उन्देचा एक गुआची जा, तां ओ दीया जलाईयै ते कर गी सोती-सातीयै, जेलै तकर मिली नेई जा, जान लेईयै तुपदी नेई रवै?

⁹ते जेलै मिली जन्दा ऐ, तां ओ अपनी सेलीयें ते पडोसनियें गी सदियै आखदी ऐ, मेरे कन्ने खुशी मनाओ, किके मेरा गुआचें सिक्का मिली गीया ऐ।

¹⁰आऊँ तुसेंगी आखना ऐं के इयां गै एक मन फेरने आले पापी दे बारै च परमेसर दे सोर्गदूतें दे सामने खुशी ओंदी ऐ।”

¹¹पी ओनें आखया, “कुसे मनुक्ख दे दो पुत्तर हे।

¹²उन्देचा निके ने पिता गी आखया, ए पिता जायदाद बिचा जेड़ा ऐसा मेरा ऐ ओ मिगी देई ओड़।” ओनें उनेंगी अपनी जायदाद बंडी देई ओड़ी।

¹³ते मते देन नेई बीते दे हे के निक्के पुत्तर ने सारा केछ किट्ठा करियै दूर देश च चली गीया, ते उत्थें गन्दे कम च अपने पैसा-तेला डुआई ओड़या।

¹⁴जेलै ओ सारा केछ खत्म करी चुकया, तां ओस देश च बड़ा काल पिया, ते ओ गरीब ओई गीया।

¹⁵ते ओ ओस देश दे वासियें चा एक दे कर जाई लगा। ओनें उसी अपने खेतरें च सूर चारने लेई पेजया।

¹⁶ते ओ चांदा हा के जेड़ा खाणा सूर खंदे न ओदे कन्ने गै अपना टेढ पराँ; किके उसी कोई केछ खाणे गी नेई दिन्दा हा।

¹⁷जेलै अपने आपे च आया ते पी बोलन लगया, “मेरे पिता दे कर किन्नें गै मजदूरें गी खाणे कोलां जादै रुट्टी-रुट्टी मिलदी ऐ, तां आऊँ इत्थैं पुखा मरा नां ऐं।

¹⁸मैं ऊन उठीयै अपने पिता दे कोल जागा ते उसी बोलगा के पिता जी, मैं तां सोर्ग दे खलाफ ते तेरी नजर च पाप कित्ता ऐ।

¹⁹ऊन आऊँ एस काबल नेई रिया के तेरा पुत्तर आख्या जां, मिगी अपने एक मजदूर आला लेखा रखी लै।”

²⁰पी ओ उठीयै, अपने पिता दे कोल गीया; ओ अजें दूर गै हा के ओसदे पिता ने उसी दिखियै तरस खादा, ते दौड़ीयै ओदे गल्लें लगाया, ते बड़ा गै चूमया।

²¹पुत्तर ने उसी आखया, “प्यो जी, मैं तां सोर्ग दे खलाफ ते थुआड़ी नजर च पाप कित्ता ऐ; ते ऊन एस काबल नेई रिया के तेरा पुत्तर आख्या जां।”

²²लेकन पिता ने अपने दासें गी आखया, “फोरन, छैल थमां छैल कपड़े उसी पुआओ, ते ओसदे अथ्थ च गूंठी, ते पैरें च नुकां पुआयो,

²³ते बड्डी धाम तयार करो, तां जे अस खाचै, ते खुशी मनाचै।

²⁴किके मेरा ए पुत्तर मरी गेदा हा, पी जिन्दा ओई गीया ऐ; गुआची गेदा हा, ऊन मिली गीया ऐ।” ते ओ खुशी मनान लगे।

²⁵“लेकन ओसदा जेठा पुत्तर खेतर च हा। जेलै ओ खेतर चा औंदे कर दे कोल पूजया, ते ओनें गाने-बजाने ते नचने दी बाज सुनी।

²⁶ते ओनें एक दास गी बुलाईयै पूछया, ‘ए के उआ करदा ऐ?’

²⁷ओनें उसी आखया, तेरा प्रा आया ऐ, ते तेरे पिता ने बड़ी धाम त्यार कित्ती ऐ, किके उसी पला चंगा दिखया ऐ।”

²⁸ए सुनीयै ओ गुस्सै च परी गीया ते कर दे अन्दर जाना नेई चाया, लेकन ओसदा पिता बार आईयै उसी मनान लगया।

²⁹ओनें पिता गी जबाब दिता, “देख्ख, आऊँ इन्नें बरें दा तेरी सेवा करा दा हा ते कदें बी तेरा उक्म नेई टालया, पी बी तो मिगी कदें बी एक बकरी दा बच्चा बी नेई दिता के आऊँ अपने दोस्तें कन्ने खुशी मनांदा।

³⁰लेकन जेलै तेरा ए पुत्तर, जेनें तेरी जायदाद गन्दे कम्म करने आले जनांनीयें पिछें डुआई दिती ऐ, ते आया, तां तो ओसदे लेई धाम त्यार कित्ती।

³¹ओनें उसी आखया, पुत्तर, तू मेशा मेरे कन्ने ऐ; ते जे केछ मेरा ऐ ओ सारा तेरा गै ऐ।

³²लेकन ऊन तू खुशी मना ते मगन ओना चाईदा ऐ, किके ए तेरा प्रा मरी गेदा हा, पी जिन्दा ओई गीया ऐ; गुआची गेदा दा हा, ऊन मिली गीया ऐ।”