Read Dogri लूका 22 Bible Online

लूका 22 - Dogri bible

लूका 22

¹खमीर रुट्टी दा त्यार जिसी फसह आखया जन्दा ऐ, कोल हा;

²ते प्रधान याजकें ते शास्त्री एस गल्ल दी टूंढ बेच हे के उसी कियां मारचै, लेकन ओ लोकें कोलां डरदे हे।

³पी शतान यहूदा इस्करियोती च समाया, जिसी इस्करियोती आखदे हे ते ओ बारें चेलें च गिनया जंदा हा।

⁴ओनें जाईयै प्रधान याजकें ते पैरेदारें दे प्रधानें कन्ने गल्ल-बात कित्ती, के उसी केस तरीके उन्दे अथ्थ च पड़काया जा।

⁵ओ खोश ओए, ते उसी रूपये देने दा वचन दिता।

⁶ओनें ए गल्ल मनी लेई, ते मौका तुपन लगया, के बिना दंगे दे उसी उन्दे अथ्थ च पड़का।

⁷पी खमीर रुट्टी दे त्यार दा धयाडा आया, जेस बेच फसह दा लैला बलि करना जरुरी हा।

⁸ते यीशु ने पतरस ते यूहन्ना गी ए आखीयै पेजया; “जाईयै साड़े खाणे लेई फसह त्यार करो।

⁹उनै उसी पूछया, तू कुत्थें चांना ऐ, के अस इसी त्यार करचै?”

¹⁰ओनें उनेंगी आखया, “दिखो, शैर च दाखल ओदे गै एक मनुक्ख पानी दा कड़ा लेते दा तुसेंगी मिलग; जेस कर च ओ जाग, तोस ओदे पिछें चली जायो,

¹¹ते ओस कर दे मालक गी आखयो; गुरु तुगी आखदा ऐ के ओ मैमाने आला कमरा कुत्थें ऐ जेदे च आऊँ अपने चेलें कन्ने फसह खां?”

¹²ओ तुसेंगी एक सजा-सजाया बड़ा कमरा दसी ओड़ग; उत्थें तोस त्यार करयो।

¹³उनै जाईयै, जियां ओनें उनेंगी गलाया हा, उयांगै उनै दिखया, ते फसह दा खाणा त्यार कित्ता।

¹⁴जेलै ओ कड़ी आई पूजी, तां ओ प्रेरित कन्ने पोजन करने गी बैठया।

¹⁵ते ओनें उनेंगी आखया, “मेरी बड़ी इच्छा ही, के दोख पोगने कोलां पैलैं ए फसह थुआड़े कन्ने खां।

¹⁶किके आऊँ तुसेंगी आखना ऐं, जेलै तकर ओ परमेसर दे राज च पूरा नेई ओग अतुं तकर आऊँ उसी कदें बी नेई खागा।”

¹⁷ओस बेलै ओनें कटोरा लेई यै शुकर कित्ता ते आखया, “एस गी लियो ते अप्पुं-पिछें बंडी लियो।

¹⁸किके आऊँ तुसेंगी आखना ऐं, कि जेलै तकर परमेसर दा राज नेई औग अतुं तकर आऊँ अंगुरें दा रस हुन थमां लेईयै कदें बी नेई पीगा।”

¹⁹पी ओनें रुट्टी लेई, ते शुकर करियै पन्नी, ते उनेंगी ए आखदे ओई दिती, “ए मेरी जेंद ऐ, जेड़ी थुआड़े लेई दिती जन्दी ऐ; मेरे याद लेई इयै करदे रवयो।”

²⁰इसै तरीके ओनें रुट्टी दे बाद कटोरा बी ए आखीयै दिता, “ए कटोरा मेरे ओस खून च जेड़ा थुआड़े लेई बगाया जंदा ऐ नमां बायदा ऐ।

²¹लेकन दिखो, मेरा पड़काने आले दा अथ्थ मेरे कन्ने मेज उपर ऐ।

²²किके मनुक्ख दा पुत्तर तां जियां ओदे लेई पक्का कित्ता गीया ऐ, के ओ मारया जा, पर बसोस ओस मानु उपर जेसदे अथ्थें ओ पड़काया जन्दा ऐ!”

²³ओस बेलै ओ अप्पुं पिछें पोछ-पड़ताल करन लगे, साड़े बिचा ओ कोन ऐ, जेड़ा ए कम करग?

²⁴उन्दे च ए बैस-मूयासा ओया; के साड़े बिचा बड़ा कोन समझया जंदा ऐ।

²⁵ओनें उनेंगी आखया, “दुई जातीयें दे राजा उन्दे उपर राज करदे न, ते जेड़े उन्दे उपर अख्त्यार रखदे न, उनेंगी फायदा देने आले आखया जन्दा ऐ।

²⁶लेकन तोस इयै जिए नेई बनयो; मतलब जेड़ा थुआड़े च बड़ा ऐ, ओ निक्के आला लेखा ते जेड़ा प्रधान ऐ, ओ दास आला लेखा बनें।

²⁷किके बड़ा कोन ऐ, ओ जेड़ा रुट्टी करन बैठा, जां ओ जेड़ा रुट्टी खला दा ऐ? के ओ नेई जेड़ा रुट्टी खांन लेई बैठा ऐ? लेकन आऊँ थुआड़े बेच दास आला लेखा ऐं।

²⁸“लेकन तोस उवै ओं जेड़े मेरी परिखें च लगातार मेरे कन्ने रे;

²⁹ते जियां मेरे पिता ने मेरे लेई एक राज पक्का कित्ता ऐ, इयां गै मैं बी थुआड़े लेई राज पक्का कित्ता ऐ।

³⁰तां जे तोस मेरे राज बेच मेरी मेज उपर खाओ-पीयो; लेकन सिहांसनें उपर बेईयै इस्राएल दे बारां गोत्रें दा न्याय करो।

³¹“शमौन, ए शमौन! देख, शतान ने तुसें लोकें गी मंगी लेत्ता ऐ के कनक आला लेखा शटै।

³²लेकन मैं तेरे लेई अर्ज कित्ती, के तेरा बश्वास चली नेई जा; ते जेलै तू तोवा करियै फिरगा, तां अपने प्राऐं गी बश्वास च तकड़ा करयां।”

³³ओनें उसी आखया, “ए प्रभु, आऊँ तेरे कन्ने कैदी च जाने, मतलब मरने लेई बी त्यार ऐं।”

³⁴ओनें आखया, “ए पतरस, आऊँ तुगी आखना ऐं के अज्ज कुकड बांग देग जदूं तकर तू त्रै बार मेरा एन्कार नेई करी लैगा के आऊँ उसी नेई जानदा।”

³⁵ते ओनें उनेंगी आखया, “जेलै मैं तुसेंगी बटुए, ते चोल्ली, ते जूतें दे बगैर पेजया हा, ते के तुसेंगी किसे चीज दी कटी ओई ही?” उनै आखया, “किसे चीज दी नेई।

³⁶ओनें उनेंगी आखया, लेकन ऊन जेसदे कोल बटुआ ऐ ओ उसी लेई लै, ते इयां गै चोल्ली बी, ते जेसदे कोल तलवार नेई ऐ ओ अपने कपड़े बेचियै एक मुल्लें लेई लै।

³⁷किके आऊँ तुसेंगी आखना ऐं, के ए जेड़ा लिखे दा ऐ; ओ पापियें कन्ने गिनया गीया, ओसदा मेरे च पूरा ओना जरुरी ऐ; किके मेरे बारै च पवित्र शास्त्र च लिखी दियां गल्लां पूरीयां ओनें उपर न।

³⁸उनै आखया, ए प्रभु, देख, इत्थैं दो तलवारां न। ओनें उनेंगी आखया, मता ओया।”

³⁹ओसलै ओ बार निकलियै अपनी रीति दे मताबक जैतून दे पाड़ उपर गीया, ते चेलें ओसदे पिछें आई गै।

⁴⁰ओस जगा उपर पूजियै ओनें उनेंगी आखया, “प्रार्थना करो के तोस परिख्या च नेई पवो।”

⁴¹ते ओ अप्पुं उन्दे कोलां लग-पग त्री मीटर दी दूरी तकर अगें गीया ते गोढे टेकियै प्रार्थना करन लगया,

⁴²“ए पिता, जेकर तू चां तां एस कटोरे गी मेरे कोलां चुकी लै; पी बी मेरी मरजी नेई, लेकन तेरी मरजी पूरी उवै।

⁴³ओसलै सोर्ग चा एक दूत उसी लबया जेड़ा उसी शक्ति दिन्दा हा।

⁴⁴यीशु प्राण निकलने आला लेखा दुखी ओईयै प्रार्थना करन लगया, ते ओसदा पसीना समझो खून आला लेखा बढ़ीयां-बढ़ीयां फूंगाँ जमीना उपर पवा दियां हियां।

⁴⁵ओसलै ओ प्रार्थना चा उठया ते अपने चेलें दे कोल आईयै उनेंगी दुआसी दे मारे सुत्ते दें दिखया।

⁴⁶ओनें उनेंगी आखया, कि सौंदे ओ? उठो, प्रार्थना करो, के परिख्या च नेई पवो।”

⁴⁷ओ ऐ आखा गै करदा हा, के एक दिखो पीड आई, ते ओनें बारें चेलें बिचा एक जेसदा नां यहूदा इस्करियोती हा ओस पीड दे अगें-अगें आवा दा हा। ओ यीशु दे कोल आया, के उसी चूमा दे।

⁴⁸यीशु ने उसी आखया, “ए यहूदा इस्करियोती, के तू मनुक्ख दे पुत्तर गी चूमियै तोखे कन्ने पड़कानां ऐं?”

⁴⁹ओसदे साथियें जेलै दिखया के के ओनें आला ऐ, तां आखया, “ए प्रभु, के अस तलवार चलाचै?”

⁵⁰ते उन्देचा कुसे एक ने महायाजक दे दास उपर तलवार चालाईयै ओदा सजा कन बड़ी ओड़या।

⁵¹एस गल्ल उपर यीशु ने आखया, “ऊन बस करो!” ते ओनें ओदा कन छुईयै ठीक करी ओड़या।

⁵²ओस बेलै यीशु ने प्रधान याजकें ते मंदर दे पैरेदारें दे प्राचीन ते बजुरगें गी जेड़े उसी पकड़ने गी आए दे हे, आखया, “के तोस मिगी डाकू समझीयै तलवारां ते डंडे लेईयै निकले ओ?

⁵³जेलै आऊँ अर देन मंदर च थुआड़े कन्ने हा, तां तुसें मिगी अथ्थ नेई पाया; लेकन ए थुआड़ी कड़ी ऐ, ते न्हेरे दी शक्ति ऐ।”

⁵⁴पी ओ उसी पकड़ीयै लेई गै, ते महायाजक दे कर लेई आए; लेकन पतरस बड़ा गै दूर ओदे पिछें-पिछें चलीयै आवा दा हा।

⁵⁵ते जेलै ओ बेड़े च अग्ग बालीईयै किट्ठे बैठे, तां पतरस बी उन्दे बेच बैठी गीया।

⁵⁶ते एक दासी ने उसी अग्गी दी लोई च बैठे दे दिखियै ते उसी तकीयै बोलन लगी, “एबी तां ओदे कन्ने हा।”

⁵⁷लेकन ओनें ए आखीयै एन्कार कित्ता, “ए नारी, आऊँ उसी नेई जानदा।”

⁵⁸थुड़े चेर बाद कुसे ओर ने उसी दिखियै आखया, “तू बी तां उन्दे बिचा एक ऐं।” पतरस ने आखया, “ए मानु, आऊँ नेई ऐं।”

⁵⁹कोई लग-पग एक कैंटे बाद एक ओर मानु जोर देईयै आखन लगया, “पक्का एबी तां ओदे कन्ने हा, किके ए गलील दा रौने आला ऐ।”

⁶⁰पतरस ने आखया, “ए मानु, आऊँ नेई जानदा के तू के बोला दा ऐं? ओ बोला दा गै हा के फोरन कुकडै बांग दिती।

⁶¹ओस बेलै यीशु ने मुड़ीयै पतरस आली बखी दिखया, ते पतरस गी प्रभु दी ओ गल्ल याद आई जेड़ी ओनें बोली ही; अज्ज कुकड बांग देने कोलां पैलैं, तू त्रै बार मेरा एन्कार करगा।”

⁶²ते ओ बार निकलियै फूटी-फुटीयै रौन लगया।

⁶³जीनें मनुक्खें यीशु गी पकड़े दा हा, ओ ओसदा मजाक करियै उसी डंडे मारन लगे;

⁶⁴ते ओदीयां अखां बनियै उसी पूछन लगे, “पविखवाणी करियै बोल के तुगी कोस ने मारया!”

⁶⁵ते उनै मतीयां सारीयां ओर बी निंदया आलियां गल्लां ओदे खलाफ च बोलियां।

⁶⁶“जेलै धयाडा चढ़या तां लोकें दे प्राचीन ते प्रधान याजकें ते शास्त्री किट्ठे ओए ते उनै उसी अपनी महासभा बेच आनीयै पूछ्या;

⁶⁷जेकर तू मसीह ऐं, तां असेंगी दस।” ओनें उनेंगी आखया, “जेकर आऊँ बोलां, तां तुसें बश्वास नेई करना,

⁶⁸ते जेकर आऊँ पूछां तां तोस जबाब नेई देगे।

⁶⁹लेकन ऊन थमां मनुक्ख दा पुत्तर समर्थमान परमेसर दी सजी बखी बैठा रौग।”

⁷⁰एस गल्ल उपर सारें आखया, “तां के तू परमेसर दा पुत्तर ऐं?” ओनें आखया, तोस अप्पुं गै आखा दे ओ, किके आऊँ ऐं।

⁷¹ओस बेलै उनै आखया, “ऊन असेंगी गवाही दी के लोड ऐ? किके असैं अप्पुं गै ओदे मुहं चा सुनी लेत्ता ऐ।”