Read Dogri यूहन्ना 13 Bible Online

यूहन्ना 13 - Dogri bible

यूहन्ना 13

¹फसह दे त्यार थमां पैलैं, जेलै यीशु ने समझी लिया, के मेरी ओ कड़ी आई पूजी दी ऐ के दुनिया गी छडीयै पिता दे कोल जां, तां अपने लोकें कन्ने, जेड़े दुनिया च हे, जियां प्यार ओ करदा आया हा, खीरी तकर उयांगै प्यार करदा रिया।

²ते जेलै शतान शमौन दे पुत्तर यहूदा इस्करियोती दे मन च ए गल्ल पाई बैठा हा, के ओ उसी पड़का, तां पोजन दे बेलै

³ते यीशु ने, ए समझीयै के पिता ने सारा केछ मेरे अथ्थ च करी दिता ऐ, ते आऊँ परमेसर त्र्फुं आया ऐं ते परमेसर कोल जनां ऐं,

⁴यीशु ने पोजन छडीयै अपने कपड़े तुआरी ओड़े, ते प्रना लेईयै अपना लक्क बन्नयां।

⁵ते पांढे च पानी परियै चेलें दे पैर तोना ते जेड़ा प्रना ओनें लक्क च बन्ने दा हा उसै कन्ने उन्दे पैर पुंजन लगया।

⁶जेलै ओ शमौन पतरस कोल आया तां पतरस आखया, “ए प्रभु, के तू मेरे पैर तोना ऐं?”

⁷यीशु ने जबाब दिता, “जे आऊँ करा नां ऐं, तू उसी अजां नेई जानदा ऐ, लेकन एदे बाद समझ गा।”

⁸पतरस ने उसी आखया, “आऊँ अपने पैर कदें नेई तोना देगा! ए सुनीयै यीशु ने आखया, जेकर आऊँ तेरे पैर नेई तुयाँ, तां मेरे कन्ने तेरा केछ बी सांझा नेई।”

⁹शमौन पतरस ने उसी आखया, “ए प्रभु, तां छड़े मेरे पैर गै नेई, पर मेरे अथ्थ ते सेर बी तोई ओड़।”

¹⁰यीशु ने उसी आखया, “जेड़ा नाई चुक्या ऐ उसी पैर तोने दे सवा ते केश तोने दी जरुरत नेई, लेकन सब दे सब शोद्ध नेई।”

¹¹ओ तां अपने पड़काने आले गी जानदा हा एसकरी ओनें बोलया, “तोस सब दे सब शोद्ध नेई।”

¹²जेलै ओ उन्दे पैर तोई चुकया, ते अपने कपड़े पी पाईयै बैठी गीया, ते उनेंगी आखन लगया, “के तोस समझे के मैं थुआड़े कन्ने के कित्ता?

¹³तोस मिगी गुरु, ते प्रभु, आखदे ओ, ते ठीक आखदे ओ, किके आऊँ उवै आं।

¹⁴जेकर मैं प्रभु ते गुरु ओईयै थुआड़े पैर तोते, तां तुसेंबी एक दुए दे पैर तोना चाईदे।

¹⁵किके मैं तुसेंगी नमूना दसया ऐ, के जियां मैं थुआड़े कन्ने कित्ता ऐ, तोस बी इयां गै करो।

¹⁶आऊँ तुसेंगी सच-सच आखना ऐं, दास अपने मालक कोलां बड़ा नेई; ते न पेजे दा अपने पेजने आले कोलां बड़ा ऐ।

¹⁷तोस तां ए गल्लां जांनदे ओ, ते जेकर इन्दे उपर चलो तां तन्न ओ।

¹⁸आऊँ थुआड़े सारें दे बारै च नेई आखदा, लेकन जिनेंगी मैं चुनी लेत्ता ऐ, उनेंगी आऊँ जानना ऐं; लेकन ए एस करियै ऐ, के पवित्र शास्त्र दा ओ वचन पूरा उवै, जेड़ा मेरे क्न्ने रुट्टी खादी ऐ, ओ मेरे खलाफ ओईया।

¹⁹ऊन आऊँ एदे ए ओनें कोलां पैलैं तुसेंगी दसी दिना ऐं के जेलै ए होई जा तां तोस बश्वास करो के आऊँ उवै आं।

²⁰आऊँ तुसेंगी सच-सच आखाना ऐं, के जेड़ा मेरे पेजने आले गी कबूल करदा ऐ, ओ मिगी कबूल करदा ऐ; ते जेड़ा मिगी कबूल करदा ऐ, ओ मेरे पेजने आले गी कबूल करदा ऐ।”

²¹“ए गल्लां करने दे बाद यीशु आत्मा च दुखी ओया ते ए गवाही दिती के, आऊँ थआड़े कन्ने सच-सच आखना ऐं, के थुआड़े बिचा गै एक मिगी पड़काग।”

²²चेलें शक करन लगे, के ए कोदे बारै च बोलदा ऐ, एक दुए गी दिखन लगे।

²³ओदे चेलें बिचा एक जिसी यीशु प्यार करदा हा, ओ यीशु दी छाती दे कोल चुकियै बैठे दा हा।

²⁴शमौन पतरस ने उसी शारा करियै पूछया, “असेंगी दस, के ओ कोदे बारै च आखादा ऐ?”

²⁵ओनें पी उसै चाली यीशु दी छाती दे कोल चुकियै उसी पूछया, ए प्रभु, “ओ कोन ऐ?”

²⁶यीशु ने जबाब दिता, “जिसी आऊँ ए रुट्टी दा टुकड़ा डोबियै देगा, ओ उवै ऐ।” ते ओनें टुकड़ा डोबियै शमौन इस्करियोती दे पुत्तर यहूदा गी दिता।

²⁷टुकड़ा लैंदे गै ओदे च शतान बस्सी गीया; ओसलै यीशु ने उसी आखया, “जे केछ तू करने आला ऐ, फोरन कर।

²⁸लेकन उत्थें बैठनें आलें कुसे गी बी पता नेई चलया के ओनें ए गल्ल कि आखी।

²⁹यहूदा इस्करियोती दे कोल रपें दी थैली ओंदी ही एसकरी कुसे-कुसे समझया, के यीशु उसी आखादा ऐ, के जे केछ असेंगी त्यार लेई चाईदा ऐ खरीदी लेई आ, जां के गरीबें गी केछ दे।

³⁰ओस बेलै ओ टुकड़ा लेईयै फोरन बार चली गीया; ते ए राती दा बेला हा।”

³¹जेलै ओ बार चली गीया तां यीशु ने आखया, “ऊन मनुक्ख दे पुत्तर दी मैमा ओई ऐ; ते परमेसर दी मैमा ओदे च ओई;

³²ते परमेसर बी अपने च ओदी मैमा करग, मतलब फोरन करग।

³³ए बच्यो, आऊँ ओर थुड़े चेर थुआड़े कन्ने आं; तोस मिगी तुपगे, ते जियां मैं यहूदीयें गी गलाया हा, जिथें आऊँ जा करना, उत्थें तोस नेई आई सकदे, उयांगै आऊँ ऊन तुसेंगी बी आखना ऐं।

³⁴आऊँ तुसेंगी एक नमां उक्म दिना ऐं के एक दुए कन्ने प्यार करो; जियां मैं थुआड़े कन्ने प्यार कित्ता ऐ, इयां गै तोस बी एक दुए कन्ने प्यार करो।

³⁵जेकर तोस अप्पुं बिचें प्यार करगे, तां एदे कोलां गै सारें गी पता चलग के तोस मेरे चेलें ओ।”

³⁶शमौन पतरस ने उसी आखया, “ए प्रभु तू कुत्थें जाना ऐ?” यीशु ने जबाब दिता, “जिथें आऊँ जा नां ऐं, उत्थें तू अजें मेरे पिछें आई नेई सकदा; लेकन एदे बाद तू मेरे पिछें औगा।”

³⁷पतरस ने उसी आखया, “ए प्रभु, ऊन आऊँ तेरे पिछें कि नेई आई सकदा? आऊँ तां तेरे लेई अपना प्राण बी देगा।”

³⁸यीशु ने जबाब दिता, के तू मेरे आसतै अपना प्राण देगा? आऊँ तुगी सच-सच आखना ऐं के कुकड बांग तकर तू मेरा तरै बारी एन्कार करगा।