Read Dogri यूहन्ना 17 Bible Online

यूहन्ना 17 - Dogri bible

यूहन्ना 17

¹यीशु ने ए गल्लां बोलियां ते अपनीयां अखीयाँ सोर्ग आली बखी चुकियै आखया, “ए प्यो, ओ कड़ी आई पूजी दी ऐ; अपने पुत्तर दी मैमा कर, के पुत्तर बी तेरी मैमा करै।

²किके तो उसी सारे लोकें उपर अख्त्यार दिता ऐ, कि जिनेंगी तो उसी दिता ऐ, उनै सारे गी ओ मेशा दी जिंदड़ी दे।

³ते मेशा दी जिंदड़ी ए ऐ, के ओ तुकी गै सच्चे परमेसर गी ते यीशु मसीह गी, जिसी तो पेजा ऐ, जांनन।

⁴जेड़ा कम तो मिगी करने लेई दिता हा, उसी पूरा करियै मैं तरती उपर तेरी मैमा कित्ती ऐ।

⁵ते ऊन, ए प्यो, तू अपने कन्ने मेरी मैमा ओस मैमा कन्ने कर जेड़ी दुनिया पैदा ओनें थमां पैलैं, मेरी मैमा तेरे कन्ने ही।”

⁶मैं तेरा नां उनै मनुक्खें च परकट कित्ता ऐ जिनेंगी तो दुनिया चा मिगी दिता ऐ। ओ तेरे हे, ते तो उनेंगी मिगी दिता ते उनै तेरे वचन गी मनी लिया ऐ।

⁷ऊन ओ जानी गै न, के जे केछ तो मिगी दिता ऐ, ओ सब तेरे थमां दा ऐ;

⁸किके जेड़ीयां गल्लां तो मिगी पुजाई ओड़ीयां न, मैं ओ उनेंगी पुजाई ओड़ीयां ते उनेंगी कबूल कित्ता ते सच-सच जानी लिया ऐ, के आऊँ तेरे थमां ऐं, ते बश्वास कित्ता ऐ के तो गै मिगी पेजा ऐ।

⁹आऊँ उन्दे लेई अर्ज करना ऐं, दुनिया लेई अर्ज नेई करदा लेकन उन्दे लेई जिनेंगी तो मिगी दिता ऐ, किके ओ तेरे न,

¹⁰ते जे केछ मेरा ऐ ओ सब तेरा ऐ, ते जे केछ तेरा ऐ ओ मेरा ऐ; ते एदे कोलां मेरी मैमा परकट ओई ऐ।

¹¹मैं जादै चेर दुनिया च नेई रौना ऐ, लेकन दुनिया च रौगन ते आऊँ तेरे कोल आवा नां ऐं। ए पवित्र प्यो, अपने ओस नां थमां जेड़ा तो मिगी दिता ऐ, उन्दी रखया कर, के ओ साड़े आला लेखा एक ओंन।

¹²जेलै आऊँ उंदे कन्ने हा, तां मैं तेरे ओस नां कन्ने, जेड़ा तो मिगी दिता ऐ, उन्दी रखया कित्ती, मैं उन्दी देख-पाल कित्ती, ते वनाश दे पुत्तर गी छुड़ीयै उन्देचा कोई नाश नेई ओया, एसकरी के पवित्र शास्त्र दी ए गल्ल पूरी उवै।

¹³लेकन ऊन आऊँ तेरे कोल औना ऐं, ते ए गल्लां दुनिया च आखना ऐं, के ओ मेरा नन्द अपने च पूरा लैंन।

¹⁴मैं तेरा वचन उनेंगी दिता ऐ, ते दुनिया ने उन्दे कन्ने बैर कित्ती, किके जियां आऊँ दुनिया दा नेई, उयांगै ओ बी दुनिया दे नेई।

¹⁵आऊँ ए अर्ज नेई करदा, के तू उनेंगी बिचा चुकी लै; लेकन ए के तू उनेंगी ओस दुष्ट शतान कोलां बचाईयै रख।

¹⁶जियां आऊँ दुनिया दा नेई, इयां गै ओ बी दुनिया दे नेई।

¹⁷सच्च दे कन्ने उनेंगी पवित्र कर; तेरा वचन सच्च ऐ।

¹⁸जियां तुसें मिगी दुनिया च पेजे दा ऐ, उयांगै मैं बी उनेंगी दुनिया च पेजया।

¹⁹ते उन्दे लेई आऊँ अपने आप गी पवित्र करना ऐं, तां जे ओ बी सच्च दे कन्ने द पवित्र कित्ते जान।

²⁰आऊँ सेरफ इन्दे लेई अर्ज नेई करदा, लेकन उन्दे आसतै बी जेड़े उन्दे वचन सनानें थमां मेरे उपर बश्वास करगन,

²¹के ओ सब एक ओन। जियां तू ए पिता मेरे च ऐं, ते आऊँ तेरे च ऐं, इयां गै ओ बी साड़े च ओन, एसकरी के दुनिया बश्वास करै के तो गै मिगी पेजा ऐ।

²²ते ओ मैमा जेड़ी तो मिगी दिती ऐ, मैं उनेंगी दिती ऐ, के ओ इयां गै एक ओन जियां के अस एक न,

²³आऊँ उन्दे च ते तू मेरे च, के ओ सेध ओईयै एक ओई जान, ते दुनिया जानें के तो गै मिगी भेजे दा ऐ, ते जियां तो मेरे कन्ने प्यार कित्ता, उयांगै मैं बी उन्दे कन्ने प्यार कित्ता।

²⁴ए प्यो, आऊँ चांना के जिनेंगी तो मिगी दिता ऐ, जिथें आऊँ ऐं, उत्थें ओ बी मेरे कन्ने ओंन, के ओ मेरी ओस मैमा गी दिखन जेड़ी तो मिगी दिती ऐ, किके तो दुनिया गी पैदा ओनें कोलां पैलैं मेरे कन्ने प्यार कित्ता।

²⁵ए तार्मिक प्यो, दुनिया ने मिगी नेई जानया, लेकन मैं तुगी जानया, ते उनै बी जानया के तो गै मिगी पेजे दा ऐ,

²⁶ते मैं तेरा नां इनेंगी दसया ते दसदा रौगा के जेड़ा प्यार तुगी मेरे कन्ने हा, ओ प्यार उन्दे च रवै, ते आऊँ उन्दे च रवां।