Read Dogri प्रेरितों के कम 20 Bible Online

प्रेरितों के कम 20 - Dogri bible

प्रेरितों के कम 20

¹जेसलै राउला थमोई गीया तां पौलुस ने चेलें गी बलाया ते इम्त देईयै समझाया, ते उन्दे थमां विदा ओईयै मकिदुनिया लाके आली बखी चली गीया।

²ओस सारे लाकें च ओदे ओई ते चेलें गी मती सारी इम्त देईयै ओ यूनान दे लाके च आया।

³जेसलै त्रै मिने रेईयै ओ उत्त्थुआं दा चाज उपर सीरिया लाके आली बखी जाने आला हा, तां यहूदी उसी मारने च लगे, एस आसतै ओसने ए फैसला कित्ता के मकिदुनिया दे लाके थमां ओदे ओई बापस जा।

⁴बिरीया दे पुर्रुस दा पुत्तर सोपत्रुस ते थिस्सलुनीके शैर बिचा अरिस्तर्खुस ते सिकुन्दुस, ते दिरबे शैर दा गयुस, ते तीमुथियुस, ते आसिया लाके दा तुखिकुस ते त्रुफिमुस आसिया तकर ओदे कन्ने आए।

⁵ओ अगें जाईयै त्रोआस च असेंगी बलगदे रे।

⁶ते अस खमीर रुट्टी दे त्यार दे बाद फिलिप्पी शैर थमां चाज उपर चढ़ीयै पंज देन च त्रोआस च उन्दे कोल पूजे, ते सत देन तकर उत्थें गै रे।

⁷अफ्ते दे पैले देन जेसलै अस रुट्टी तोड़ने आसतै किट्ठे ओए, तां पौलुस ने जेड़ा दुए देन चली जाने आला हा, उन्दे कन्ने गल्लां कित्तियां; ते अध्दी रातीं तकर गल्लां करदा रिया।

⁸जेस उपरली कोठी अस किट्ठे ओए दे हे, ओस च मते दीया जला दे हे।

⁹ते यूतुखुस नां दा एक जवान खिड़की उपर बैठे दा गैरी निंदर च डुबा दा हा। जेसलै पौलुस चेर तकर गल्लां करदा रिया तां ओ निंदर दी चपकी च त्री कोठी उपरा डिगी गीया, ते मरे दा चुकया।

¹⁰लेकन पौलुस उतरीयै ओदे उपर लेटी गीया, ते गल्लें क्न्ने लाईयै आखया, “कबराओ नेई; किके ओसदा प्राण उसै च गै।”

¹¹ते उपर जाईयै रुट्टी तोड़ी ते खाईयै इन्नें चेर तकर उन्दे कन्ने गल्लां करदा रिया के सबेरा ओई गयी। पी ओ चली गीया।

¹²ते ओ ओस जवान गी थलै दा जिंदा लेई आए ते मती शान्ति पाई।

¹³अस पैलैं गै चाज उपर चढ़ीयै अस्सुस शैर गी एस वचार कन्ने गै, के उत्त्थुआं दा अस पौलुस गी चाज उपर चढ़ाई लेचै, किके ओसने ए एस आसतै फैसला कित्ता हा, के ओ अप्पुं गै पैदल जाने आला हा।

¹⁴जेसलै ओ अस्सुस शैर च असेंगी मिलया तां अस उसी चढ़ाईयै चाज उपर मितुलेने शैर गी आए।

¹⁵किके उत्त्थुआं दा चाज खोलियै अस दुए देन खियुस शैर दे सामने पूजे, तां अगलै देन सामुस दे टापू च जाई लगे; पी दुए देन मीलेतुस शैर च आए।

¹⁶किके पौलुस ने इफिसुस दे शैर थमां ओदे ओई जाने दा फैसला कित्ता हा, के कुत्ते ऐसा नेई ऊऐ, के उसी आसिया च चेर लगे; किके ओ जल्दी च हा, के जेकर ओई सकै तां ओ पिन्तेकुस्त दे त्यार च यरूशलेम च रवै।

¹⁷ते ओसने मीलेतुस शैर थमां इफिसुस शैर च आखी पेजया, ते कलीसिया दे अगबें गी बलाया।

¹⁸जेलै ओ ओदे कोल आए, तां उनेंगी आखया; “तोस जांनदे ओ, के पैले गै देन थमां जेसलै आंऊँ आसिया लाके च पूजया, आंऊँ अर बेलै थुआड़े कन्ने केस चाली रिया।

¹⁹मतलब बड़ी दीनगी कन्ने, ते अथरू कढी-कढी यै, ते उनै परिखें च जेड़ीयां यहूदीयें दी साजश दे कारन मेरे उपर आई पेईयां, आंऊँ प्रभु दी सेवा करदा गै रिया;

²⁰ते जेड़ीयां-जेड़ीयां गल्लां थुआड़े फायदे दी हियां, उनेंगी सनाने ते लोकें दे सामने ते कर-कर सखाने आसतै कदें बी नेई चकया,

²¹वरन यहूदी ते यूनानियें गी चतान्दा रिया के परमेसर आले पासेगी मन फेरो ते साड़े प्रभु यीशु मसीह उपर विश्वास करो।

²²ते ऊन दिखो, आंऊँ पवित्र आत्मा दा बझे दा यरूशलेम गी जाना ऐं, ते नेई जानदा के उत्थें मेरे क्न्ने के के बितग;

²³सेर्फ ए के पवित्र आत्मा अर शैर च गुआई देई-देईयै मेरे कन्ने आखदा ऐ के बंधन ते कलेश तेरे आसतै त्यार न।

²⁴लेकन आंऊँ अपने प्राण गी केछ नेई समझना के उसी प्यारा समझां, बरना ए के आंऊँ अपनी दौड़ गी ते ओस सेवा गी पूरा करां, जेड़ी मैं परमेसर दी क्रपा दे शोभ समाचार उपर गुआई देने आसतै प्रभु यीशु थमां पाई दी ऐ।

²⁵ते ऊन दिखो, आंऊँ जानना ऐं के तोस सब जिंदे च आंऊँ परमेसर दे राज दा प्रचार करदा फिरया, मिग्गी पी नेई दिखगे ओ।

²⁶एस आसतै आंऊँ अज्ज दे देन थुआड़े कन्ने गुआई देईयै आखन ऐ, थुआड़े चां कोई प्रभु यीशु मसीह उपर विश्वास करने दे पैलैं मरी जा तां ए अत्या च मेरा कसुर नेई ओग।

²⁷किके आंऊँ परमेसर दी सारे मर्जी गी तुसेंगी पूरी रीति कन्ने सनाने आसतै नेई चकया।

²⁸एस आसतै अपनी ते पूरे चोण्ड दी रखया करो; जेस कलीसिया च पवित्र आत्मा ने तुसेंगी अगबें बनादा ऐ, के तोस परमेसर दी कलीसिया दी रखया करो, जिसी ओनें अपने खून कन्ने खरीदी लेते दा ऐ।

²⁹आंऊँ जानना ऐं, के मेरे जाने थमां बाद गलत शिक्षा देने आले औगन, ते थुआड़ा बड़ा नकसान करगन जेड़े फाड़ने आले पेड़िऐ जिए ओगन।

³⁰थुआड़े गै बिचा बी ऐसे-ऐसे मनुक्ख निकलगन, जेड़े चेलें गी अपने पिछें खीचने आसतै तरेडीयां गल्लां आखघन।

³¹एस आसतै बिजे दे रवो, ते जाद करो के मैं त्रै साल तकर रात देन रोई-रोई अर एक गी चताना देना नेई छुड़या।

³²ते ऊन आंऊँ तुसेंगी परमेसर गी, ते ओदे क्रपा दे वचन गी सौपी दिना ऐं; जेड़ा थुआड़ी तरक्की करी सकदा ऐ, ते सब पवित्र कित्ते दे लोकें च सांझी करियै जे परमेसर ने थुआड़े आसतै रखे दा ऐ देई सकदा ऐ।

³³मैं कुसे दे चांदी, सुन्ने जां कपड़े दा लालच नेई कित्ता।

³⁴तोस अप्पुं गै जांनदे ओ के इनें अथ्थें गै मेरी ते मेरे साथियें दियां जरुरतां पूरायां कित्तियां।

³⁵मैं तुसेंगी सब केछ पूरा करियै दसया, के एस रीति कन्ने मेंनत करदे ओई कमजोरें गी संभालना ते प्रभु यीशु दे वचन याद रखना जरुरी ऐ, जेड़ा ओनें अप्पुं गै आखे दा ऐ; लेने थमां देना तन्न ऐ।”

³⁶ए आखीयै ओसने घुटने टेके ते उन्दे सारें कन्ने प्रार्थना कित्ती।

³⁷ओस बेलै ओ सब रोई उठे ते पौलुस दे गल्लें लगियै उसी चूमना लगे।

³⁸ओ खास करियै एस गल्ल आसतै बसोस करदे हे, जेड़ी गल्ल ओसने आखी ही, के तोस मिगी पी नेई दिखगे। ते ओस बेलै उनै उसी चाज तकर पजाया।