Read Dogri प्रेरितों के कम 23 Bible Online

प्रेरितों के कम 23 - Dogri bible

प्रेरितों के कम 23

¹पौलुस ने महासभा गी तरोईयै दिखया ते आखया, “ए प्राओ, मैं अज्ज तकर परमेसर आसतै सच्ची अन्तर आत्मा क्न्ने जेंद बताई ऐ।”

²एस उपर हनन्याह महायाजक ने उनेंगी जेड़े ओदे कोल खड़ोते दे हे, ओदे मुंह उपर चांड मारने दा उक्म दित्ता।

³ओस बेलै पौलुस ने उसी आखया, “ए चूना फिरे दे दवार, परमेसर तुगी मारग। तुं मूसा दे कनून दे मताबक मेरा न्याय करने गी बैठे दा ऐं, ते पी के कनून दे खलाफ मिकी मारने दा उक्म दिना ऐ?”

⁴जेड़े कोल खड़ोते दे हे, उनै आखया, “के तू परमेसर दे महायाजक गी माड़ा आखन ऐं?”

⁵पौलुस ने आखया, “ए प्राओ, आंऊँ नेई जानदा हा, के ए महायाजक ऐ; किके शास्त्र च लिखे दा ऐ अपने लोकें दे प्रधान गी माड़ा नेई आखन।”

⁶ओस बेलै पौलुस ने ए समझीयै के एक चोंड सदूकी लोकें दा ते दुआ फरीसियें दा ऐ, महासभा च पकारीयै आखया, “ए प्राओ, आंऊँ फरीसी ते फरीसियें दी औलाद बिचा ऐं, मरें दी आस आसतै जिंदा ओनें दे बारै च मेरा चगड़ा ओआ करदा ऐ।”

⁷जेसलै ओस ए गल्ल बोली तां फरीसियें ते सदूकियें दा चगड़ा ओना लगया; ते सभा च फोट पेई गेई।

⁸किके सदूकिया दा विश्वास ऐ, के नां मरें दे बिचा जिंदा ओना ऐ, नां सोर्गदूत ते नां आत्मा ऐ; लेकन फरीसी इनें सबनीं गल्लें च विश्वास करदे न।

⁹ओस बेलै मता शोर मचया ते केछ शास्त्री जेड़े फरीसियें दे हे, उठी खड़े ओए ते ए आखीयै बैस करन लगे, “अस एस मनुक्ख च कोई बराई नेई दिखनयां, ते जेकर कोई आत्मा जां सोर्गदूत ओस कन्ने बोला दा ऐ तां पी के ऐ?”

¹⁰जेसलै मता चगड़ा ओया, तां पलटन दे प्रधान ने एस डर कन्ने के ओ पौलुस दे टुकड़े-टुकड़े नेई करी देंन, पलटन गी उक्म दित्ता के तुआरीयै पौलुस गी सभा दे लोकें बिचा जबरदस्ती कढन, ते अवालात च लेई जांन।

¹¹उसै राती प्रभु यीशु ने पौलुस कोल खड़ोईयै आखया, “ए पौलुस, इम्त रख; किके जियां तो यरूशलेम च मेरी गुआई दिती, उयांगै तुगी रोम शैर बेच बी मेरी गुआई देनी ओग।”

¹²जेसलै देन ओया, तां यहूदीयें साजश रची ते कसम खादी के जेसलै तकर अस पौलुस गी मारी नेई देचै, ओस बेलै तकर खाचै जां पीचै तां साड़े उपर लानत ऐ।

¹³जिनैं अप्पुं बिचें ए कसम खादी ही, ओ चाली लोकें थमां बद हे।

¹⁴उनै प्रधान याजकें ते प्राचीनें दे कोल जाईयै आखया, “असैं ए कसम खादी ऐ के जेसलै तकर अस पौलुस गी मारी नेई देचै, ओस बेलै तकर केछ चखगे बी तां साड़े उपर लानत ऐ।

¹⁵एस आसतै ऊन महासभा समेत पलटन दे प्रधान गी समझाओ, के पौलुस गी थुआड़े कोल लेई अवै, मन्नो के तोस ओदे बारै च ओर बी सेई जांच करना चांदे ओ; ते अस ओदे पुजने थमां पैलैं गै उसी मारने आसतै त्यार रौगे।”

¹⁶लेकन पौलुस दे पांजे ने सुनया के ओ उसी मारी देनें च न, तां ओस कमरे च जाईयै पौलुस गी सनिया दिता।

¹⁷पौलुस ने सूबेदारें बिचा एक गी अपने कोल बलाईयै आखया, “एस जवान गी पलटन दे प्रधान दे कोल लेई जाओ, ए ओस कन्ने केछ आखन चांदा ऐ।”

¹⁸एस लेई ओसने उसी पलटन दे प्रधान दे कोल लेईयै आखया, “बन्नें दे पौलुस ने मिकी बलाईयै अर्ज कित्ती के ए जवान पलटन दे प्रधान कन्ने केछ आखन चांदा ऐ; इसी ओदे कोल लेई जा।”

¹⁹पलटन दे प्रधान ने ओसदा अथ्थ पकड़ीयै ते लग्ग लेईयै पूछ्या, “तू मेरे कन्ने के आखन चांना ऐ?”

²⁰ओसने आखया, “यहूदी अगबें साजश रची दी ऐ, के तेरे कन्ने अर्ज करन के कल पौलुस गी महासभा च लेई औन, मन्नो तू तां ठीक चाली ओसदी जांच करना चांदा ऐं।

²¹लेकन कृपा करियै उन्दी एस अर्ज गी त्यांन नेई दियो, किके उन्दे बेच चालीयें थमां उपर मनुक्ख पौलुस गी मारने च न, जिनैं ए फैसला करी लेता दा ऐ के जेसलै तकर ओ पौलुस गी नेई मारी देंन, ओस बेलै तकर नां खागन ते नां पिगन। ते ओ ऊन त्यार न ते तेरे वचन गी बलगा करदे न।”

²²ओस बेलै पलटन दे प्रधान ने जवान गी ए उक्म देईयै विदा कित्ता, “कुसे कन्ने नेई आखयां के तो मिकी ए गल्लां सनाईयां न।”

²³ओस बेलै पलटन दे सरदार ने दो सूबेदारें गी बलाईयै आखया, “दो सौ सपाई, सत्तर सवार, ते दो सौ समान चुकने आले सपाई, रातो रात कैसरिया शैर गी जाने आसतै त्यार रखो।

²⁴ते पौलुस दी सवारी आसतै घोड़े त्यार रखो, के उसी फेलिक्स राजपाल दे कोल कुशल कन्ने पजाई देंन।”

²⁵सरदार ने एस चाली दी चिट्ठी बी राजपाल गी लिखी,

²⁶“महामहिम फेलिक्स राजपाल गी क्लौदियुस लूसियास दा नमश्कार।

²⁷एस मनुक्ख गी यहूदीयें मारना चाया, लेकन जेसलै मैं जानयां के ए रोमी ऐ, ते पलटन लेईयै छुड़ाई दिता।

²⁸आंऊँ जानना चांदा हा, के ओ एस उपर केस कारन कसुर लाना चांदे न, एस आसतै उसी उन्दी महासभा च लेई गीया।

²⁹ओस बेलै मैं जानी लेता के ओ अपने यहूदी कनून दी बैसें दे बारै च ओस उपर कसुर लांदे न, लेकन मारी ओड़ने जां बन्नी जाने दे जोग ओस च कोई कसुर नेईयैं।

³⁰जेसलै मिकी पता लगया के ओ एस मनुक्ख गी मारनें च लगे दे न तां मैं फोरन उसी तेरे कोल पेजी दिता; ते मुदईयें गी बी उक्म दित्ता के तेरे सामने ओस उपर कसुर लान।”

³¹एस आसतै जियां सपाईयें गी उक्म दिता गीया हा, उयांगै पौलुस गी लेईयै रातो रात अन्तिपत्रिस च आए।

³²दुए देन ओ सवारें गी ओदे कन्ने जाने आसतै छुड़ीयै अप्पुं येरूसलम बापस गै।

³³उनै कैसरिया शैर पूजियै राजपाल गी चिट्ठी दिती; ते पौलुस गी बी ओदे सामने खड़ा कित्ता।

³⁴राजपाल ने चिट्ठी पढ़ीयै पूछ्या, “ए केस लाकें दा ऐ?”

³⁵ते जेसलै जानी लेता के किलिकिया लाके दा ऐ तां पौलुस गी आखया, “जेसलै तेरे दोष लाने आले बी औगन, तां आंऊँ तेरा मुकदमा करगा।” ते ओसने उसी हेरोदेस राजा दे कीले च पैरे च रखने दा उक्म दिता।