Read Dogri प्रेरितों के कम 25 Bible Online

प्रेरितों के कम 25 - Dogri bible

प्रेरितों के कम 25

¹फेस्तुस यहूदीया लाके च पुजने दे त्रै देन बाद कैसरिया थमां यरूशलेम गी गीया।

²ओस बेलै प्रधान याजकें ते यहूदीयें दे अगबें लोकें ओदे सामने पौलुस गी कसुरबार आखन लगे;

³ते पौलुस कन्ने अर्ज करियै ए वर चाया के ओ उसी यरूशलेम च बला, किके ओ उसी रस्ते च गै मारी ओड़नें च लगे दे हे।

⁴फेस्तुस ने जबाब दिता, “पौलुस कैसरिया च पैरे च ऐ, ते आंऊँ अप्पुं उत्थें तौला जागा।”

⁵पी आखया, “थुआड़े बेच जेड़े अख्त्यार रखने आले न ओ कन्ने चलन, ते जेकर एस मनुक्ख ने केछ गलत कम कित्ता ऐ तां ओस उपर कसुर लाओ।”

⁶फेस्तुस यरूशलेम च कोई अट्ठ दस देन रेईयै कैसरिया चली गीया; ते दुए देन न्याय दी गदी दे सामने बैठीयै पौलुस गी आनने दा उक्म दिता।

⁷जेसलै ओ आया ते जेड़े यहूदी अगबें यरूशलेम बिचा आए दे हे, उनै आसे-पासे खड़ोईयै ओस उपर बडे गैरें लजाम लाए, जिंदा सबूत ओ नेई देई सकदे हे।

⁸लेकन पौलुस ने जबाब दिता, “मैं नेई तां यहूदीयें कनून दा ते नां मंदर दे, ते नां गै कैसर दे वरोध कोई गुनाह कित्ता ऐ।”

⁹ओस बेलै फेस्तुस ने यहूदीयें दे अगबें गी खोश करने दी इच्छया च पौलुस गी पूछया, “के तू चांना ऐ के यरूशलेम गी जा; ते उत्थें मेरे सामने तेरा ए मकदमा तय कित्ता जा?”

¹⁰पौलुस ने आखया, “आंऊँ कैसर दे न्याय दी गदी दे सामने खड़ोते दा ऐ; मेरे मकदमे दा इत्थैं गै फैसला ओना चाईदा। जियां तू खरी चाली जानना ऐ, यहूदीयें दा केछ पाप नेई कित्ता।

¹¹जेकर आंऊँ पापी ऐं ते मारने जोग कोई कम कित्ता ऐ, तां मरने थमां नेई मुकरगा; लेकन जिनैं गल्लें दा ए मेरे उपर कसुर लांदे न, जेकर उन्दे बिचा कोई बी गल्ल सच नेई उवै, तां कोई मिकी उन्दे अथ्थ नेई सौंपी सकदा। आंऊँ कैसर दी दुआई दिना ऐ।”

¹²ओस बेलै फेस्तुस ने मंत्रीयें दी सभा कन्ने गल्लां करियै जबाब दिता, “तो कैसर बादशाह दी दुआई दिती ऐ, तू कैसर दे गै कोल जागा।”

¹³केछ देन बीतने दे बाद अग्रिप्पा राजा ते ओसदी निकी पैन बिरनीके ने कैसरिया शैर च आईयै फेस्तुस कन्ने पेंट कित्ती।

¹⁴उन्दे मते देन उत्थें रौने दे बाद फेस्तुस ने पौलुस दे बारै च राजे गी सनाया “एक मनुक्ख ऐ, जिसी फेलिक्स राजपाल कैद च छुड़ी दा ऐ।

¹⁵जेसलै आंऊँ यरूशलेम च हा, तां प्रधान याजकें ते यहूदीयें दे प्राचीनें ओस उपर कसुर लाए ते चाया के उसी सजा दा उक्म दिता जा।

¹⁶लेकन मैं उनेंगी जबाब दिता, के रोमियें दी ए रीति नेईयैं के कुसे मनुक्ख गी सजा आसतै सौपी देंन, जेसलै तकर कसुरबार गी अपने मुदईयें दे सामने खड़ोईयै कसुर दे जबाब देने दा मौका नेई मिलै।

¹⁷एस आसतै यहूदी अगबें कैसरिया शैर च किट्ठे ओए, तां मैं केछ चेर नेई लाया, लेकन दुए देन गै न्याय दी गदी उपर बैठीयै मैं पौलुस गी दालत च आनने दा उक्म दिता।

¹⁸जेसलै ओदे मुदई खड़े ओए, तां उनै ऐसी गलत गल्लें दा कसुर नेई लाया, जियां आंऊँ समझदा हा।

¹⁹लेकन ओ अपने मत दे, ते यीशु नां दे कुसे मनुक्ख दे बारै च, जेड़ा मारी दिता गीया हा, ते पौलुस उसी जिंदा सनांदा हा, बैस करदे हे।

²⁰ते आंऊँ ओलझन बेच हा, के इनें गल्लें दा पता कियां करां? एस आसतै मैं पौलुस गी पूछ्या, के तू यरूशलेम जागा, के उत्थें इनें गल्लें दा फैसला ऊऐ?

²¹लेकन जेसलै पौलुस ने दुआई दिती के ओदे मुकदमे दा फैसला बादशाह दे अथ्थें ऊऐ, तां मैं उक्म दिता के जेसलै तकर उसी कैसर बादशाह कोल नेई पेजां, उसी कब्जे च रखया जा।”

²²ओस बेलै अग्रिप्पा ने फेस्तुस गी आखया, “आंऊँ बी ओस मनुक्ख दी सुनना चांना ऐ।” ओसने आखया, “तू कल सुनी लैगा।”

²³एस आसतै दुए देन, जेसलै अग्रिप्पा ते बिरनीके बड़ी खुशी कन्ने आए तां पलटन दे प्रधान ते शैर दे मशूर लोकें कन्ने दरवार च पूजे। ओस बेलै फेस्तुस ने उक्म दिता के ओ पौलुस गी लेई औन।

²⁴फेस्तुस ने आखया, “ए राजा अग्रिप्पा, ते ए सब मनुक्खो जेड़ा इत्थैं साड़े कन्ने उआ, तोस एस मनुक्ख गी दिखदे ओ, जेसदे बारै च सारे यहूदीयें यरूशलेम च ते इत्थैं बी करलाई-करलाई मेरे अगें अर्ज कित्ती के एस दा जिंदा रौना ठीक नेईयैं।

²⁵लेकन मैं जानी लेता के एस ने ऐसा केछ नेई कित्ता के मारी दिता जा; ते जेसलै के ओसने अप्पुं गै बादशाह दी दुआई दिती, तां मैं उसी रोम शैर पेजने दा फैसला कित्ता।

²⁶मैं ओदे बारै च कोई खास गल्ल नेई दिखी के अपने स्वामी दे कोल लिखां। एस आसतै मैं उसी थुआड़े सामने ते खास करियै ए राजा अग्रिप्पा, तेरे सामने आंदा ऐ, के जाचने दे बाद मिकी केछ लिखने गी मिलै।

²⁷किके कैदी गी पेजना ते जेड़े कसुर ओस उपर लाए गै, उनेंगी गी नेई सनानां, मिगी सेई नेई लगा दा ऐ।”