Read Dogri प्रेरितों के कम 6 Bible Online

प्रेरितों के कम 6 - Dogri bible

प्रेरितों के कम 6

¹उनै दिनें च जेलै चेलें दी गिनती बड़ी बदन लगी, ओस बेलै यूनानी पाषा बोलने आले विश्वासी इब्रानी पाषा बोलने आलें उपर कोड़कड़ाना लगे, के अर रोज दी सेवकाई च साड़ी विधवें दा खयाल नेई कित्ता जंदा।

²ओस बेलै उनै बारें चेलें दी मंडली गी अपने कोल सदियै आखया, “ए ठीक नेई के अस परमेसर दा वचन छुड़ीयै खलाने पलाने दी सेवा च रौचै।

³एसकरी, ए प्राओ, अपने बिचा सत पले मनुक्खें गी जेड़े पवित्र आत्मा ते बुद्धि कन्ने परपुर ओंन, चुनी लियो, के अस उनेंगी एस कम उपर लाचै।

⁴लेकन अस तां प्रार्थना च ते वचन दी शिखया देने च लगे रौगे।”

⁵ए गल्ल सारी मंडली गी खरी लगी, ते उनै स्तिफनुस नां दे मनुक्ख गी जेड़ा बश्वास ते पवित्र आत्मा कन्ने परपुर हा, ते फिलिप्पुस ते प्रुखुरुस, ते नीकानोर, ते तीमोन, ते परमिनास, ते अन्ताकिया वासी नीकुलाउस गी जेड़ा यहूदी मत च आई गेदा हा, चुनी लेता।

⁶ते इनेंगी प्रेरितें सामने लेई आए, ते उनै प्रार्थना करियै उन्दे उपर अथ्थ रखियै उनेंगी सेवा दित्ती।

⁷परमेसर दा वचन फैलदा गीया ते यरूशलेम च चेलें दी गिनती मती बददी गेई; ते यहूदी याजकें दा एक बड़ा समाज एस मत दे बेच आई गीया।

⁸स्तिफनुस क्रपा ते शक्ति कन्ने परपुर ओईयै लोकें च बड्डे-बड्डे चमत्कार दे कम ते चेन्न दसया करदा हा।

⁹ओस बेलै ओस प्रार्थनाकार चा जेड़े गलामी-मुक्त आखे जंदे हे, ते कुरेनी ते सिकन्दरिया ते किलिकिया ते आसिया दे लोकें बिचा एक उठीयै स्तिफनुस कन्ने बैस करन लगे।

¹⁰लेकन ओस ज्ञान ते ओस आत्मा दा जेस कन्ने ओ गल्लां करदा हा, ओ मकाबला नेई करी सके।

¹¹एस उपर उनै केई लोकें गी बकाया जेड़े आखन लगे, “असैं इनेंगी मूसा ते परमेसर दे वरोध च निंदया दियां गल्लां करदे सुना ऐ।”

¹²ते लोकें गी स्तेफनोस दे खलाफ प्राचीनें ते शास्त्रियें गी पड़काइयै महासभै च लेई आए।

¹³ते चुठे गवाह पेश कित्ते, जिनैं स्तेफनोस दे खलाफ आखया, “ए मनुक्ख एस पवित्र जगा ते मूसा दे कनून दे विरोध च गलाना नेई छुड़दा।

¹⁴किके असैं उसी ए आखदे सुनया ऐ, के इयै यीशु नासरी एस जगै गी टाई देग, ते उनै रीतियें गी बदली देग जेड़ीयां मूसा ने असेंगी सोंपियां न।”

¹⁵ओस बेलै सारें लोक जेड़े महासभा च बैठे दे हे, ओदे आली बखी ओदा मुं सोर्गदूत आला लेखा दिखया।