Read Dogri प्रेरितों के कम 7 Bible Online

प्रेरितों के कम 7 - Dogri bible

प्रेरितों के कम 7

¹ओस बेलै महायाजकें आखया, “के ए दोष सच न?”

²स्तिफनुस ने आखया, “ए प्राओ, ते पिताओ सुनो, साड़ा पिता अब्राहम हारान च बसने थमां पैलैं जेसलै मेसोपोटामिया च हा; तां मैमा योकत परमेसर ने उसी दर्शन दिता,

³ते उसी आखया, तू अपने देश ते अपने खानदान थमां निकलियै ओस देश च जा, जेड़ा आंऊँ तुगी दसगा।

⁴ओस बेलै ओ कसदियें दे देश चा निकलियै हारान च जाई बसया जिसी मेसोपोटामिया बी आखया जंदा हा; ते ओदे पिता दी मौत थमां बाद परमेसर ने उसी उत्त्थुआं दा एस देश च आनीयै बसाया जेदे च ऊन तोस बसदे ओ।”

⁵ते परमेसर ने उसी केछ वरासत नेई दिती, बरना पैर रखने पर दी बी ओस च जगा नेई दिती, आलां के ओस बेलै ओदा कोई पुत्तर बी नेई हा। पी बी बादा कित्ता, के आंऊँ ए देश, तेरे ते तेरे थमां बाद तेरे वंश दे अथ्थ करी देगा।

⁶ते परमेसर ने ए आखया, तेरी खानदान दे लोग पराये देश च परदेसी ओगन, ते ओ उनेंगी दास बनागन, ते चार सौ साल तकर दोख देगन।

⁷पी परमेसर ने आखया, जेस जाती दे ओ दास ओगन, ओस जाती गी आंऊँ सजा देगा; ते एस दे बाद ओ ओस देश चा निकलियै इसै जगा मेरी सेवा करगन।

⁸ते परमेसर ने अब्राहम कन्ने खलड़ी दे खतने बादा कित्ता के तेरे कर दा अर एक मर्द ए खतना करै; ते इसै चाली च इसहाक ओस थमां पैदा ओया; ते अठमें देन ओसदा खतना कित्ता गीया, ते इसहाक थमां याकूब ते याकूब थमां बारां कोलपति पैदा ओए।

⁹“ते कोलपतियें युसूफ कन्ने जलन करने दे कारन उसी मिस्र देश च जाने आलें दे बेचीं ओडया; लेकन परमेसर ओदे कन्ने हा,

¹⁰ते परमेसर ने युसूफ गी ओदे सारे कलेशें कोलां छुड़ाईयै मिस्र दे राजा फिरौन दे क्रपा ते अक्ल दिती, ओदे कारन उसी मिस्र देश च ते फिरौन राजा ने अपने सारे कर उपर राजपाल रखी लेत्ता।

¹¹ओस बेलै मिस्र ते कनान दे सारै देश च काल पिया; जेस कन्ने बड़ा कलेश ओया, ते साड़े बजुर्गें गी पोजन नेई मिलदा हा।

¹²लेकन याकूब ने ए सुनीयै के मिस्र देश च नाज ऐ, साड़े बजुर्गें (अपने पुत्रें गी) पैली बार मिस्र च पेजया के उत्थें जाईयै नाज लेई औन।

¹³ते दुई बार युसूफ ने अपने आप गी प्राऐं उपर परकट कित्ता, ते युसूफ दी जाती दा फिरौन राजा गी पता लगी गया।

¹⁴ओस बेलै युसूफ ने अपने पिता याकूब ते अपने सारे खानदान गी, जेड़े पचतर मनुक्ख हे, बलाई पेजया के मिस्र च आई जाओ।

¹⁵ओस बेलै याकूब मिस्र च गीया; ते उत्थें ओ ते साड़े बजुर्ग मरी गै।

¹⁶अपने-अपने बेलै च उंदीयां लाशां शकेम च पजाईयै ओस कब्र च रखियां, जिसी अब्राहम ने चांदी देईयै शकेम च हमोर दी खानदान थमां खरीदी लेता हा।

¹⁷“लेकन जेलै ओस बादा दा पूरा ओनें दा बेला कोल आया, जेड़ा परमेसर ने अब्राहम कन्ने कित्ते दा हा, ते मिस्र च ओ लोग गिनती बेच बदी गै; ते मते ओई गै।

¹⁸ओस बेलै मिस्र च दुआ राजा हा जेड़ा युसूफ गी नेई जानदा हा।

¹⁹ओसने साड़ी जाती कन्ने चलाकी करियै साड़े बजुर्गें कन्ने इत्थैं तकर पैड़ा सलूक कित्ता, के उनै अपने जम्दे-जम्दे बच्चें गी सुटना पिया के ओ जिंदे नेई रौन।

²⁰ओस बेलै मूसा जमया; ओ परमेसर दी नजर च बड़ा गै सोना हा; ओ त्रै मिने तकर अपने पिता दे कर पलया।

²¹लेकन जेलै उसी सुट्टी दित्ता गीया तां फिरौन राजा दी कुड़ी ने उसी चुकी लेत्ता, तां अपने पुत्तर आला लेखा उसी पालया।

²²ते मूसा गी मिस्रीयें दी सारी विध्या पढ़ाई गेई, ते ओ ग्ल्लें च ते कम्में च समर्थमान हा।

²³“जेलै मूसा चालीयें सालें दा ओया, तां ओदे मन च आया के आंऊँ अपने इस्राएली प्राऐं कन्ने मुलाकात करां।

²⁴ते ओनें एक अपने इस्राएली मानुऐं उपर बेन्यायी ओदे दिखियै, उसी बचाया, ते मिस्री गी मारीयै सताए जानें आले दा बदला लेत्ता।

²⁵ओनें सोचया, के ओदे प्रा ए इस्राएली लोक समझगन के परमेसर ओदे अथ्थें कन्ने उनेंगी गुलामी चा उन्दा उद्धार करग, लेकन उनै ए गल्ल नेई समझी।

²⁶दुए देन जेलै इस्राएली अप्पुं बिचै लड़ा करदे हे, तां ओ उत्थें आई निकलया; ते ए आखीयै उनेंगी मेल मलाप करने गी समझाया, के ए मरदो, तोस तां प्रा-प्रा ओ, एक दुए उपर कि बेन्यायी करदे ओ?”

²⁷लेकन जेड़ा अपने गबांडी उपर बेन्यायी करा दा हा, ओसने उसी ए आखीयै पिछें कित्ता, तुगी कोने साड़े उपर न्याय करने आला रख्या ऐ?

²⁸के जेस चाली कल तो मिस्री गी मारी दिता मिगी बी मारना चांना ऐ?

²⁹ए गल्ल सुनीयै, मूसा नसया ते मिघान देश च परदेसी ओईयै रौन लगया: ते उत्थें ओदे दो पुत्तर पैदा ओये।

³⁰“जेसलै पूरे चाली साल बीती गै, तां एक सोर्गदूत ने सीनै पाड़ दे सुनसान जगै उपर उसी जलदी चुअड़ी दी अग्गी बिचा दर्शन दिता।

³¹मूसा ओस दर्शन गी दिखियै रांन ओया, के चुअड़ी जला दी तां ऐ पर पसम नेई ओंदी; तां प्रभु दी ए बाज सोनची,

³²आंऊँ तेरे बजुर्ग, अब्राहम दा परमेसर, ते इसहाक दा परमेसर, ते याकूब दा परमेसर ऐं” ओस बेलै मूसा कम्बी गीया, इत्त्थैं तकर के उसी बोलने दी इम्त नेई रेई।

³³ओस बेलै प्रभु ने उसी आखया, अपने पैरें थमां जूती तुआरी लै, किके जेस जगा उपर तू खड़ोते दा ऐं, ओ पवित्र ऐ।

³⁴मैं सचें गै अपने लोकें दी आलत जेड़े मिस्र देश च न, दिखी लेत्ती ऐ; ते उन्दे सा सुकनें ते उन्दा रौन सुनी लेत्ता ऐ; एसकरी उनेंगी छुड़ाने आसतै सोर्ग चा उतरा ऐं। ऊन आंऊँ तुगी मिस्र देश च पेजगा।

³⁵“जेस मूसा गी उनै ऐ आखीयै नकारया हा, तुगी कोस ने साड़े उपर राजपाल ते न्याय करने आला रखया ए? उसी गै परमेसर ने राजपाल ते छड़ाने आला रखियै, ओस सोर्गदूत थमां जेस उसी चुअड़ी बिचा दर्शन दिता हा, पेजया।

³⁶इयै मनुक्ख मिस्र देश ते लाल समुंद्र ते जंगल बेच चाली साल तकर अद्भोद कम ते चेन्न दसी-दसियै उनेंगी बार कढी लेई आया।

³⁷ए उवै मूसा ऐ, जेसनें इस्राएलियें कन्ने आखया, परमेसर थुआड़े प्राऐं बिचा थुआड़े आसतै एक मेरे आला लेखा एक पविखवक्ते गी खड़ेरग।

³⁸ए उवै मूसा ऐ, जेस ने जंगल च इस्राएली समाज दे बेच ओस सोर्गदूत कन्ने सीनै पाड़ उपर ओस कन्ने गल्लां कित्तियां, ते साड़े बजुरगें दे कन्ने हा, उसी गै परमेसर दे जिंदे वचन मिले, के ओ वचन साड़े तकर पुजाए।

³⁹लेकन साड़े बजुरगें ओसदी मनना नेई चाई; बरना उसी तोच्छ समझीयै अपने मन मिस्र देश आली बखी फेरे,

⁴⁰ते हारून गी आखया, साड़े लेई ऐसा देवता बना, जेड़ा साड़े अगें-अगें चलै; किके ए मूसा जेड़ा असेंगी मिस्र देश बिचा लेई आया, अस नेई जानदे के उसी के ओया?

⁴¹उनै दिनें च उनै एक दांदे दी मूर्ति बनाईयै, ओस मूरत दे अगें बलि चढ़ांई; ते अपने अथ्थ दे कम उपर खुशी मनान लगे।

⁴²“एस लेई परमेसर ने मुंह मोड़ीयै उनेंगी छुड़ी दिता, के अम्बर दियां चीजां चण, तारे, सूरज गी पुजन, जियां पविखवक्तें दी कताब च लिखे दा ऐ, ए इस्राएल दे लोकों, के तोस जंगल च चाली साल तकर पशु बलि ते अन्न बलि मिगी गै चढ़ांदे रे?

⁴³“ते तोस ओ तम्बू लेई फिरदे ओ जेदे च मोलेक दी मूर्तियाँ ते रिफान देवता दे तारें गी लेई फिरदे हे, मतलब उनै मुरते गी जिनेंगी तुसें मत्था टेकन आसतै बनाए दा हा। एस लेई आंऊँ तुसेंगी बेबीलोन देश दे परे लेई जाईयै बसागा।

⁴⁴“गवाई दा तम्बू जंगल च साड़े बजुरगें दे बेच हा; जियां परमेसर ने पक्का कित्ते दा हा, जेस ने मूसा कन्ने आखया, जेड़ा रूप तो दिखे दा ऐ, ओदे आला लेखा इसी बना।

⁴⁵उसै तम्बू गी साड़े बजुर्गें पैले जमाने थमां लेईयै यहोशू दे कन्ने इत्त्थैं लेई आए; जेस बेलै के उनै दुई जातीयें उपर अख्त्यार रखया, जिनेंगी परमेसर ने साड़े बजुर्गें सामने थमां कढी दिता हा, ते ओ तम्बू राजा दाऊद दे बेलै तकर रिया।

⁴⁶दाऊद उपर परमेसर ने क्रपा कित्ती; एस आसतै ओसने अर्ज कित्ती, के आंऊँ याकूब दे परमेसर आसतै रौने दी जगा बना।

⁴⁷लेकन ओसदे पुत्तर सुलैमान ने ओदे आसतै मन्दर बनाया।

⁴⁸लेकन परमप्रधान परमेसर अथ्थ दे बनाए दे मन्दर च नेई रौंदा, जियां के यशायाह पविखवक्तें लिखे दा ऐ,

⁴⁹“प्रभु आखदा ऐ, सोर्ग मेरा सिहांसन ते तरती मेरी पैरें दे तलें दी पीढ़ी ऐ, मेरे आसतै तोस केस चाली दा कर बनागे? ते मेरे बसां आसतै केड़ी जगा ओग?

⁵⁰के ए चीजां सब मेरे अथ्थें दियां बनाई दियां ऐंन?

⁵¹“ए अहठ करने आलयो, ते मन कन्ने नेई मननें आलयो ते कन्ने थमां नेई सुनने आले लोको, तोस मेशा पवित्र आत्मा दा वरोध करदे ओ। जियां थुआड़े बजुर्ग करदे हे, उय्यां गै तोस बी करदे ओ।

⁵²पविखवक्तें बिचा कुसी थुआड़े बजुर्गें नेई सताया? उनै ओस तरमी (यीशु मसही) दे औने दा पराने जमाने थमां ओदा सनिया देनें आलें गी मारी दिता; ते ऊन तोस बी उसी पड़कानें आले ते मारी देने आले ओए।

⁵³तुसेंगी सोर्गदूत थमां बनाए दे कनून तां थोए, लेकन ओसदा पालन नेई कित्ता।”

⁵⁴ए गल्लां सुनीयै यहूदी अगबें जली गै ते स्तेफ़नुस उपर दंद पीना लगे।

⁵⁵पर स्तेफानॉस ने पवित्र आत्मा कन्ने परोईयै सोर्ग आली बखी दिखया ते परमेसर दी मैमा ते यीशु गी परमेसर दी सज्जी बखी खडोते दे दिखियै।

⁵⁶यीशु ने आखया, “दिखो, आंऊँ सोर्ग गी खुले दा, ते मनुक्ख दे पुत्तर गी परमेसर दी सज्जी बखी, ते खडोते दे दिखना ऐं।”

⁵⁷ओस बेलै उनै बड़ी बाज कन्ने करलाईयै कन बंद करी लेते, ते एक्का करियै ओस उपर त्रुटी पे।

⁵⁸ते यरूशलेम शैर दे बार कढीयै ओस उपर पथराव करन लगे, ते गुवाऐं अपने कपड़े शाऊल नां दे जवान दे पैरें कोल तुयारियै रखी दित्ते।

⁵⁹ते ओ स्तिफनुस उपर पथराव करदे रे, ते ओ ए आखदे प्रार्थना करदा रेया, “ए प्रभु यीशु, मेरी आत्मा गी लेई लै।”

⁶⁰पी ओ गोडें पार चुकियै उच्ची बाज कन्ने पकारया, “ए प्रभु, ए पाप उंदे उपर मत ला।” ते ए आखीयै ओ मरी गीया।