Read Dogri प्रेरितों के कम 8 Bible Online

प्रेरितों के कम 8 - Dogri bible

प्रेरितों के कम 8

¹शाऊल स्तेफानॉस दी अत्या च पूरा सहमत हा। उसै देन यरूशलेम शैर दी कलीसिया दे उपर बड़ा सताव ओना लगया ते प्रेरितें गी छुड़ीयै सारे दे सारे यहूदीया ते सामरिया लाकें च तितर-बितर ओई गे।

²ते केछ पक्तैं स्तिफनुस गी कब्र च रखया; ते ओस आसतै मता वलाप कित्ता।

³लेकन शाऊल कलीसिया गी नाश करदा दा हा; ते कर-कर जाईयै विश्वासी मरदें ते जनांनीयें गी कसीटी-कसीटी जेले च सुट्टे दा हा।

⁴पर जेड़े विश्वासी तितर-बितर ओए दे हे, ओ शोभ समाचार सुनांदे ओई कुमदे रे।

⁵ते फिलिप्पुस सामरिया दे शैर च जाईयै लोकें गी मसीह दा परचार करन लगया।

⁶जेड़ीयां गल्लां फिलिप्पुस ने बोलियां उनेंगी लोकें सुनीयै ते जेड़े चेन्न ओ दसदा हा उनेंगी दिखी-दिखियै, एक चेत ओईयै मन लाया।

⁷जेलै फिलिप्पुस उक्म दिंदा हा मतें बिचा अशोद्ध आत्मा बड़ी बाज कन्ने करलांदी निकली गेई, ते मते सारे लकवे दे रोगी ते लंगड़े बी चंगे कित्ते गै।

⁸ते ओस शैर च मते सारे लोकें दे बेच खुशी दी लैर छाई गेई।

⁹एस शैर च शमौन नां दा एक मनुक्ख हा, जेड़ा जादू टोना करियै सामरिया दे लोकें गी रांन करदा ते अपने आप गी एक बडा मरद आखदा हा।

¹⁰ते सब निके थमां लेईयै बड्डे तकर सारे ओसदा आदर करियै आखदे हे, “ए मनुक्ख परमेसर दी ओ शक्ति ऐ, जेदी बड़ी आखी जंदी ऐ।”

¹¹ओसने मते दिनें थमां उनेंगी अपने जादू टूने दे कम्में कन्ने रांन करियै रखे दा हा, एसकरी उसी बडे मनदे हे।

¹²लेकन उनै जेसलै फिलिप्पुस दे परचार दा बश्वास कित्ता जेड़ा परमेसर दे राज ते यीशु मसीह दे नां दा शोभ समाचार सुनांदा हा तां लोग, के मरद, के जनांनीयां, पवित्रशनांन लैंन लगे।

¹³ओस बेलै शमौन ने अप्पुं बी बश्वास कित्ता ते पवित्रशनांन लेईयै फिलिप्पुस कन्ने रौना लगया ते चेन्न ते बड्डे-बड्डे चमत्कार दे कम ओदे दिखियै रांन ओंदा हा।

¹⁴जेसलै प्रेरित जेड़े यरूशलेम च हे, सुनया के सामरिया दे लोकें परमेसर दा वचन मनी लेता ऐ तां पतरस ते यूहन्ना गी उंदे कोल पेजया।

¹⁵ते उनै उत्थें पूजियै उंदे आसतै प्रार्थना कित्ती के ओ पवित्र आत्मा पांन।

¹⁶किके पवित्र आत्मा अजें तकर उंदेचा कुसे दे उपर नेई उतरा हा; उनै सेर्फ प्रभु यीशु दे नां दा पवित्रशनांन लेता हा।

¹⁷ओस बेलै पतरस ते यूहन्ना ने उंदे उपर अथ्थ रखे ते उनै पवित्र आत्मा पाया।

¹⁸जेसलै शमौन दिखया के प्रेरितें दे अथ्थ रखने कन्ने पवित्र आत्मा दित्ता जंदा ऐ, तां ओ उंदे कोल पैसे आनीयै आखया,

¹⁹“ए शक्ति मिगी बी दियो, के जेस कुसे दे उपर आंऊँ बी अथ्थ रखां, ओ पवित्र आत्मा पा।”

²⁰पतरस ने ओस कन्ने आखया, “तेरे रपे तेरे कन्ने नाश ओंन, किके तो परमेसर दा दान पैसे कन्ने खरीदने दा वचार कित्ता।

²¹एस सेवा च नां तेरा ऐसा ऐ, नां पाग; किके तेरा मन परमेसर दे अगें सच्चा नेई।

²²एसकरी अपनी एस बराई थमां मने गी फेरीये प्रभु अगें प्रार्थना कर, ओई सकदा ऐ के तेरा मन दा बुरा वचार माफ़ कित्ता जाग।

²³किके आंऊँ दिखना ऐ के तू पित्त आला लेखा कौड़ा ते अतर्म दी गलामी च पेदा ऐ।”

²⁴शमौन ने जबाब दिता, “तोस मेरे आसतै प्रभु अगें प्रार्थना करो के जेड़ीयां गल्लां तुसें बोलियां, उंदे बिचा कोई बी सजा मेरे उपर नेई आई पवै।”

²⁵इसै आसतै पतरस ते यहून्ना गुवाई देईयै ते प्रभु यीशु दा वचन सनाईयै यरूशलेम गी बापस गै, ते सामरियें दे मते सारे ग्रांऐं च शोभ समाचार सनांदे गै।

²⁶पी प्रभु दे एक सोर्गदूत ने फिलिप्पुस गी आखया, “उठ ते दक्षिण आली बखी ओस रस्ते उपर जा, जेड़ा यरूशलेम दा गाजा नगर गी जंदा ऐ।” ए रेगिस्तानी रस्ता ऐ।

²⁷ओ उठीयै चली पिया, ते दिखो, कूश देश दा एक मनुक्ख आ करदा हा जेड़ा ईजडा ते कूशियें दी रानी कन्दाके दा मंत्री ते खजांची हा। ओ अराधना करने गी यरूशलेम आया हा।

²⁸ओ अपने रथ उपर बैठा दा हा, ते यशायाह पविखवक्ता दी कताब जोरियै पढ़दे ओई बापस अपने देश च जा करदा हा।

²⁹ओस बेलै पवित्र आत्मा ने फिलिप्पुस गी आखया, “कोल जाईयै एस रथ दे कन्ने-कन्ने जा।”

³⁰फिलिप्पुस ओसदी बखी दौड़या ते रथ दे कोल पूजया ते उसी यशायाह पविखवक्ता दी कताब गी पढ़दे सुनया, ते पूछ्या, “तू जे पढ़ा करना ऐ के उसी समझना बी ऐं?”

³¹ओसने आखया, “जेसलै तकर कोई मिगी नेई समझाग तां आंऊँ कियां समझां?” ते ओसने फिलिप्पुस अगें अर्ज कित्ती के ओ चढ़ीयै ओदे कोल रथ च बैठे।

³²पवित्र शास्त्र दा जेड़ा ऐसा ओ पढ़ा करदा हा, ओ ए हा; “ओ पिड्ड आला लेखा वध ओनें आसतै पजाया गीया, जेलै लोक उसी सतांदे हे ते जियां लैला अपने ऊन कतरने आलें अगें चोप्प चाप रौंदा ऐ, उय्यां गै ओसने अपना मुंह नेई खोलया।

³³ओसदी लीमंगी च ओसदा न्याय नेई ओई सकया। ओदे बेलै दे लोकें दा खलास कोन करग? किके तरती थमां ओसदा प्राण लेत्ता जंदा ऐ।”

³⁴एस गल्ल उपर खोजे ने फिलिप्पुस गी पूछ्या, “आंऊँ तेरे अगें अर्ज करना ऐं, ए सना के पविखवक्ता ए कोस दे बारै च आखदा ऐ, अपने यां कुसे दुए दे बारै च?”

³⁵ओस बेलै फिलिप्पुस ने बोलन शुरू कित्ता, ते इसै पवित्र शास्त्र गी शुरू थमां उसी यीशु दा शोभ समाचार सनाया।

³⁶रस्ते च जंदे-जंदे ओ कुसे तलाब (पनासे) दे उपर पूजे। ओस बेलै खोजे ने आखया, “देख इत्थैं पानी ऐ, ऊन मिकी पवित्रशनांन लेने आसतै के रोक ऐ।”

³⁷फिलिप्पुस ने आखया, “जेकर तू सारे मने कन्ने बश्वास करना ऐ तां लेई सकना ऐ।” ओसने जबाब दिता, “आंऊँ बश्वास करना ऐ के यीशु मसीह परमेसर दा पुत्तर ऐ।”

³⁸ओस बेलै ओसने रथ गी खड़ेरने दा उक्म दिता, ते फिलिप्पुस ते खोजे दमै तलाब च उतरी गै, ते ओसने खोजा गी पवित्रशनांन दिता।

³⁹जेसलै ओ पानी बिचा निकलियै उपर आए, तां प्रभु दा आत्मा फिलिप्पुस गी चुकी लेई गीया, ते खोजे उसी पी नेई दिखया, ते ओ खुशी मनांदे अपने देश चली गीया के परमेसर ने उनेंगी बचाई लेता।

⁴⁰फिलिप्पुस अशदोद च आई निकलिया, ते जेसलै तकर कैसरिया च नेई पूजया, ओस बेलै तकर घरां च परमेसर दे राज दा शोभ समाचार सनांदा गीया।