Read Dogri रोमियो 14 Bible Online

रोमियो 14 - Dogri bible

रोमियो 14

¹जेड़ा विश्वास च कमजोर ऐ, उसी अपनी संगति च ग्रेण करी लियो, लेकन ओदे शक उपर बैस करने लेई नेई।

²एक गी विश्वास ऐ, के सब केछ खाणा बाजब ऐ, लेकन जेड़ा विश्वास च कमजोर ऐ, ओ साग-पत गै खंदा ऐ।

³ते सब केछ खाणे आला, नेई-खाणे आले गी तोच्छ नेई समझै, ते नेई खाणे आला खाणे आले उपर दोष ला; किके परमेसर ने दौनी गी ग्रेण कित्ता ऐ।

⁴तू कोन ऐ जेड़ा दुए दे सेवक उपर दोष लाना ऐ? ओदा टिके दा रौना जां डिगी जाना ओदे मालक कन्ने गै मतलब रखदा ऐ; वरन ओ पक्का करी दिता जाग, किके प्रभु उसी मजबूत रखी सकदा ऐ।

⁵कोई ते एक देन गी दुए कोलां जादै मनदा ऐ, ते कोई सारे दिनें गी इको जियां मनदा ऐ। अर एक अपने गै मने च पक्का करी लै।

⁶जेड़ा कुसे देन गी मनदा ऐ, ओ प्रभु दे लेई मनदा ऐ। जेड़ा खंदा ऐ, ओ प्रभु दे लेई खंदा ऐ, किके ओ परमेसर दा शुक्र करदा ऐ, ते जेड़ा नेई खन्दा, ओ प्रभु दे लेई नेई खन्दा ते परमेसर दा शुक्र करदा ऐ।

⁷किके साड़े बिचा नां तां कोई अपने लेई जिंदा ऐ, ते नां कोई अपने लेई मरदा ऐ।

⁸जेकर अस जिंदे न, तां प्रभु दे लेई जिंदे न; ते जेकर मरनयां न, तां प्रभु दे लेई मरनयां न; आखर अस जीचै जां मरचै, अस प्रभु दे गै न।

⁹किके मसीह एस लेई मरया ते जिंदा बी ओया के ओ मोड़दें ते जिंदे दौनी दा प्रभु ऐ।

¹⁰तू कि अपने साथी प्रा उपर दोष लाना ऐं? जां तू पी कि अपने साथी प्रा गी तोच्छ समझना ऐं? अस सारे दे सारे परमेसर दे न्याय सिंहासन दे समने खडोगे।

¹¹“किके पवित्र शास्त्र च लिखे दा ऐ, प्रभु आखदा ऐ, मेरी जिंदु दी सघंद ऐ, के अर एक गोढे मेरे सामने टिकग, ते अर एक जिभ परमेसर गी कबूल करग।”

¹²तां पी, साड़े बिचा अर एक परमेसर गी अपने-अपने करमें दा लेखा देग।

¹³एस लेई अगें आसतै अस एक दुए उपर दोष नेई लाचै, लेकन तोस ए पक्का करी लियो के कोई अपने प्रा दे अगें ठोकर जां ठोकर देने दा कारन नेई बनें।

¹⁴आऊँ जाननां ऐं, ते प्रभु यीशु थमां मिगी पक्का ओया ऐ, के कोई खाणे आली चीज अपने आप च अशोद्ध नेई, लेकन जेड़ा उसी अशोद्ध समझदा ऐ, ओ ओदे लेई आशोद ऐ।

¹⁵जेकर तेरा प्रा तेरे खाणे कन्ने दुखी ओंदा ऐ, तां पी तू प्यार दी रीति कन्ने नेई चलदा; जेदे आसतै मसीह मरया, उसी तू अपनी रुट्टी थमां नाश नेई कर।

¹⁶आखर थुआड़े लेई जे केछ बाजब ऐ ओदी निंदया नेई ओना चाईदी।

¹⁷किके परमेसर दा राज खाणा-पीन नेई, लेकन तर्म ते मेल-मलाप ते ओ खुशी ऐ जेड़ी पवित्र आत्मा थमां ओंदी ऐ।

¹⁸जेड़ा कोई एस रीति कन्ने मसीह दी सेवा करदा ऐ, ओ परमेसर गी खोश करदा ऐ ते मनुक्खें च ग्रेण जोग बनदा ऐ।

¹⁹एसकरी अस उनै गल्लें दी कोष्ट करचै जेदे कन्ने मेल-मलाप, ते एक दुए दा सुधार उवै।

²⁰रुट्टी दे लेई परमेसर दा कम नेई बगाड़। सारा केछ शोद्ध तां ऐ, लेकन ओस मनुक्ख दे लेई बुरा ऐ, जिसी ओदी रुट्टी कन्ने ठोकर लगदी ऐ।

²¹पला तां ए ऐ, के तू नां मीट खां ते नां अंगुरें दा रस पियें, नां ओर केछ ऐसा करें, जिदे कन्ने तेरा साथी प्रा ठोकर खा।

²²तेरा जेड़ा विश्वास ऐ, उसी परमेसर दे अगें अपने गै मन च रख। तन्न ऐ ओ, जेड़ा ओस गल्ल च, जिसी ओ ठीक समझदा ऐ, अपने आप गी दोषी नेई खुआन्दा।

²³लेकन जेड़ा शक करियै खंदा ऐ, ओ सजा दे काबल ओई चुके दा, किके ओ विश्वास कन्ने नेई खंदा; ते जे केछ बश्वास कन्ने नेई, ओ साड़े लेई पाप ऐ।