Read Dogri रोमियो 2 Bible Online

रोमियो 2 - Dogri bible

रोमियो 2

¹एस आसतै ए दोष लाने आले, तू कोई कि नेई ओगा, तू दोषी ऐं; किके जेस गल्ल च तू दुए उपर दोष लाना ऐं, उसै गल्ल च तू अपने आप गी बी दोषी खुआना ऐं, एसकरी के तू जेड़ा दोष लाना ऐं, अप्पुं उवै कम करना ऐं।

²ते अस जांनदे न के ऐसे-ऐसे कम करने आले उपर परमेसर तर्फुं ठीक-ठीक सजा दा उक्म ओंदा ऐ।

³ए मनुक्ख, तू जेड़ा ऐसे-ऐसे कम करने आले उपर दोष लाना ऐं, ते अप्पुं गै उवै कम करना ऐं; के ए जानना ऐ के तू परमेसर दी सजा दे उक्म कोलां बची जागा?

⁴के तू ओदी पलाई, ते सेंन करने दी शक्ति, ते स्बर करने आला तन्न गी तोच्छ जानना ऐं? के ए नेई समझदा के परमेसर दी पलाई तुगी मन फराव गी सखांदी ऐ?

⁵पर तू अपनी कठोरता ते जिद्दी मन दे मताबक ओदे गुस्सै दे देन लेई, जेदे च परमेसर दा सच्चा न्याय परकट ओग, अपने लेई गुस्सा कमा करना ऐं।

⁶परमेसर अर एक गी ओदे कम्में दे मताबक बदला देग;

⁷जेड़े छैल कम च मजबूत रेईयै मैमा, ते आदर, ते अमरता दी खोज च न, उनेंगी परमेसर मेशा दी जिंदड़ी देग;

⁸लेकन जेड़े खोदगरजी न ते सच्च गी नेई मनदे, लेकन ओ अतर्म गी मनदे न, उन्दे उपर गुस्सा ते कोप पौग।

⁹ते कलेश ते संकट अर एक मनुक्ख दे प्राण उपर जेड़ा बराई करदा ऐ औग, पैलैं यहूदी पर पी यूनानी उपर

¹⁰लेकन मैमा ते आदर ते शांति अर एक गी मिलग, जेड़ा पला करदा ऐ, पैलैं यहूदी गी पी यूनानी गी।

¹¹किके परमेसर कुसे दी तरफदारी नेई करदा।

¹²एसकरी के जिन्नें बिना कनून पाएदे पाप कित्ता, ओ बिना कनून दे नाश ओई जागन; ते जिन्नें कनून पाईयै पाप कित्ता, उन्दी सजा कनून दे मताबक ओग;

¹³किके परमेसर दे उत्थें कनून दे सुनने आले तरमी नेई, लेकन कनून उपर चलने आले तरमी खुआए जागन।

¹⁴पी जेलै दुई जाती दे लोक जिन्दे कोल कनून नेई, अपनी अन्तर आत्मा दे कनून दी गल्लें उपर चलदे न, ते कनून उन्दे कोल नेई ओनें उपर बी ओ अपने आसतै अप्पुं गै कनून न

¹⁵ओ कनून दीया गल्लां अपनी-अपनी अन्तर आत्मा च लिखी दियां दसदे न ते उन्दे मन बी गवाई दिंदे न, ते उन्दे वचार उनेंगी दोष लांदे, यां उनेंगी निर्दोष खुआंदे न;

¹⁶जेस देन परमेसर ओस शोभ समाचार दे मताबक जेड़ा मैं प्रचार कित्ता यीशु मसीह दे अथ्थें मनुक्खें दी गोप्त गल्लें दा न्याय करग।

¹⁷जेकर तू अपने आप गी यहूदी खुआना ऐं, ते कनून उपर परोसा रखना ऐं, ते परमेसर दे बारै च कमंड करना ऐं,

¹⁸ते ओदी मरजी गी जानना ते कनून दी शिखया पाईयै छैल-छैल गल्लें गी पयारीयें जानना ऐं,

¹⁹जेकर तू अपने उपर परोसा रखना ऐं के आंऊँ आत्मा दे अन्नें लोकें दा अगुआ, ते नेरे च पेदे लोकें दी लो,

²⁰ते बेबकूफे गी समझाने आला, ते बच्चें गी शिखया देने आला ऐं, ते ज्ञान, ते सचाई दा नमूना, जेड़ा परमेसर दे कनून च ऐ, मिगी मिलया ऐ

²¹के जेड़ा तू दुए गी सखाना ऐं, अपने आप गी नेई सखांदा? के तू जेड़ा चोरी नेई करने दी शिखया दिना ऐं, अप्पुं गै चोरी करना ऐं?

²²तू जेड़ा अखनां ऐं “ब्यभिचार नेई करना,” के अप्पुं गै ब्यभिचार करना ऐ? तू जेड़ा मूरतें क्न्ने बैर करना ऐं, के अप्पुं गै मंदरें गी लूटना ऐ?

²³तू जेड़ा कनून उपर कमंड करना ऐ, के कनून दी नेई मनियै, परमेसर दा अनादर करना ऐं?

²⁴किके पवित्र शास्त्र च लिखे दा बी ऐ, “थुआड़े कारन परमेसर दे नां दी निंदया दुई जातीयें च कित्ती जन्दी ऐ।”

²⁵जेकर तोस कनून उपर चलदे ओ, तां खतने कोलां फायदा तां ऐ, लेकन जेकर तू कनून गी नेई मनें, तां तेरा खतना, बिना खतने आला लेखा ओग।

²⁶तां जेकर बिना खतना आला मनुक्ख कनून दे नियम दा पालन करै, तां के ओसदी बिना खतने दी आलत खतने आला लेखा नेई गिनी जाग?

²⁷ते जेड़ा मनुक्ख शारीर च बिना खतना रिया ऐ, जेकर ओ कनून उपर चालदा ऐ, तां के ओ तुगी जेड़े लिखे दे कनून पाने ते खतना कित्ते जाने उपर बी कनून दा पालन नेई करदा ऐ, दोषी नेई मनया जागा?

²⁸किके जेड़ा बारें द्सने च यहूदी ऐ, ओ यहूदी नेई; ते नां गै ओ खतना, खतना ऐ जेड़ा दखाबटी या शरीर च ऐ।

²⁹लेकन यहूदी उवै ऐ, जेड़ा दिले थमां परमेसर क्न्ने सेई ऐ; ते खतना उवै गै, जेड़ा एर्दें दा ते आत्मा दा ऐ, नां के कनून दे लेख दा; ते ऐसे लोकें दी तरीफ मनुक्खें थमां नेई, पर परमेसर थमां ओंदी ऐ।