Read Dogri रोमियो 9 Bible Online

रोमियो 9 - Dogri bible

रोमियो 9

¹आंऊँ मसीह च सच्च अखनां ऐं, चुठ नेई बोलदा ते मेरा अन्दर दा आत्मा बी पवित्र आत्मा च गवाई दिन्दा ऐ

²के मिगी बड़ा बसोस ऐ, ते मेरा मन मेशा मेरे लोकें आसतै तूखदा रौंदा ऐ,

³किके आंऊँ इत्थैं तकर चांदा हा, के अपने यहूदी प्राऐं आसतै जेड़े जाती प्राऐं चा मेरे अपने करे दे न, आंऊँ अप्पुं गै मसीह च श्रापित ओई जन्दा।

⁴ओ इस्राएली लोक न, ते गोदी पुत्रें दा आक्क ते मैमा ते बायदे ते परमेसर दा कनून थोना ते परमेसर दी अराधना ते बाचांऐं उन्दिआं न।

⁵साड़े बुजुर्ग बी उन्देगै न, ते मसीह बी जाती पाव चा उन्दे बिचा आया। जेड़ा सारें दे उपर परम परमेसर योग-योग तन्न ऐ। आमीन।

⁶लेकन ए नेई, के परमेसर दा बायदा टली गीया, एसकरी के जेड़े इस्राएल दी औलाद न, ओ सारे इस्राएली नेई;

⁷ते नां अब्राहम दे बैंश ओनें दे कारन सारे ओदी औलाद ओए न, लेकन पवित्र शास्त्र च लिख्या ऐ “जेड़ा इसहाक दे बैंश च जन्‍म लैंदा, उवै तेरा बैंश मन्नया जाग।”

⁸मतलब शरीरक पुत्तर परमेसर दे पुत्तर नेई, लेकन बायदा दे बच्चे औलाद गिने जंदे न।

⁹किके बायदा दा वचन ए ऐ; “आंऊँ इसै बेलै अगलै साल औगा, ते सारा गी एक पुत्तर ओग।”

¹⁰ते सेर्फ इयै नेई, लेकन जिंदु रिबका बी एक कन्ने मतलब साड़े पिता इसहाक छा गर्भवती ही,

¹¹ते अजें तकर नां ते बच्चे जम्मे हे, ते नां उनै केछ पला जां बुरा कित्ता हा; एस लेई के परमेसर दे मन मर्जी जेड़ी ओदे चुनी लेने दे मताबक ऐ, करमें दे कारन नेई लेकन बलाने आले दे मताबक बनी दी रवै;

¹²परमेसर ने रिबका गी आखया, “जेठा निके दा दास ओग।”

¹³जियां पवित्र शास्त्र च लिखे दा ऐ, “मैं याकूब कन्ने प्यार कित्ता, लेकन एसाव गी रद्द कित्ता।”

¹⁴एस आसतै अस के आखचै? के चुनने च परमेसर दे कर बेन्यायी ऐ? कदें बी नेई।

¹⁵किके परमेसर मूसा गी आखदा ऐ, “आंऊँ जेदे उपर दया करना चां, ओदे उपर दया करगा, ते जेस कुसे उपर तरस करना चां ओदे उपर तरस करगा।”

¹⁶आखर च; ए नां तां चाने आले दी, नां दौड़ने आले दी लेकन दया करने आले परमेसर दी गल्ल ऐ।

¹⁷किके पवित्र शास्त्र च फिरौन राजा गी आखया गीया, “मैं तुगी इसै लेई राजा बनाया ऐ, के तेरे थमां अपनी शक्ति परकट करां, ते मेरे नां दा प्रचार सारी तरती उपर उवै।”

¹⁸तां पी ओ जिसी चांदा ऐ, ओदे उपर दया करदा ऐ, ते जिसी चांदा ऐ, उसी टीठ करी दिन्दा ऐ।

¹⁹पी तो मिगी आखगा, “ओ पी कि दोष लांदा ऐ? कोन ओदी इच्छया दा मकाबला करी सकदा ऐ?”

²⁰ए मनुक्ख, पला तू कोन ऐ, जेड़ा परमेसर दा मकाबला करी सकना ऐ? के रची दी चीज रचने आले गी आखी सकदी ऐ, “तो मिगी ऐसा कि बनाया ऐ?”

²¹के कुम्हार गी मिट्टी उपर अख्त्यार नेई, के एक गै चक बिचा एक पांढा आदर लेई, ते दुए गी अनादर लेई बना? एदे च केड़ी ओचन गल्ल ऐ

²²के परमेसर ने अपना गुस्सा दसने ते अपनी शक्ति परकट करने दी इच्छया च नाश करने आले पांढे गी, जेड़े नाश दे लेई त्यार कित्ते गेदे हे, मते सबर क्न्ने जरया;

²³ते दया दे लोकें उपर, जिनेंगी ओनें मैमा दे लेई पैलैं कोलां त्यार कित्ता, अपनी मैमा दे तन्न गी परकट करने दी इच्छया च कित्ता?

²⁴मतलब साड़े उपर जिनेंगी ओनें नां सेर्फ यहूदीयें बिचा, वरन दुई जातीयें बिचा बी चुनयां।

²⁵जियां ओ होशे पविख्ब्कते दी कताब च आखदा ऐ, “जेड़े मेरे अपने लोक नेई ऐ न, उनेंगी आंऊँ अपने लोक आखगा; ते जिसी आंऊँ प्यार नेई करदा हा, उसी प्यार करगा।”

²⁶“ते ऐसा ओग के जेस जगा च मैं उनेंगी आखया हा, के तोस मेरे लोक नेई ओ, उसै जगै ओ जिंदे परमेसर दे पुत्तर खुआए जागन।”

²⁷ते यशायाह पविख्वक्ता इस्राएल दे लोकें दे बारै च पकारीयै आखदा ऐ, “पवें इस्राएल दे बच्चें दी गेनती समुंदर दे रेत् दे बराबर उवै, पी बी उन्देचा थुड़े गै बचगन।

²⁸किके प्रभु अपना वचन तरती उपर पूरा करियै, तार्मिकता कन्ने फोरन उसी साबत करग।”

²⁹जियां यशायाह पविख्वक्ता ने पैलैं बी गलाया हा, “जेकर सर्वशक्तिमान प्रभु साड़े आसतै केछ बैंश नेई छुड़दा, तां अस सदोम दे शैर आला लेखा ओई जंदे, ते अमोरा दे जिए आखे जन्दे।”

³⁰एसकरी अस के बोलचै? के दुई जातीयां जेड़ीयां तार्मिकता दी तलाश नेई करदे हे, उनै परमेसर दी तार्मिकता आसल कित्ती मतलब ओस तार्मिकता गी जेड़ी विश्वास क्न्ने ऐ;

³¹लेकन इस्राएल दे लोक, जेड़े तरम दे कनून दी तलाश करदे ओई ओस मूसा दे कनून तकर नेई पूजे।

³²कियां नेई पूजे? एसकरी के ओ परमेसर उपर विश्वास कन्ने नेई, लेकन समझो अच्छे कर्मे कन्ने ओदी तलाश करदे हे। उनै ओस ठोकर दे पत्थर उपर ठोकर खादी,

³³जियां लिखे दा ऐ, “दिखो, आऊँ सिय्योन च एक ठेल लगने दा पत्थर ते ठोकर खाणे दी चट्टान रखना ऐ, ते जेड़े ओदे उपर विश्वास करगन ओ शर्मिदा नेई ओगन।”