Read Dogri 1 कुरिन्थियों 11 Bible Online

1 कुरिन्थियों 11 - Dogri bible

1 कुरिन्थियों 11

¹तोस मेरी जेई चाल चलो जियां आऊँ मसीह आला लेखा चाल चलना ऐं।

²ए विश्वासी प्राओ, आऊँ थुआड़ी तरीफ करना ऐं, के सारीयें गल्लें च तोस मेरी शिखयें गी याद करदे ओ; ते जेड़ीयां शिखयां मैं तुसेंगी सौमपियां न, उंदा पालन करदे ओ।

³लेकन आऊँ चानां ऐं, के तोस ए जानी लियो, के अर एक मर्द दा सिर मसीह ऐ, ते जनांनी दा सिर मर्द ऐ, ते मसीह दा सिर परमेसर ऐ।

⁴जेड़ा मर्द कलीसिया च सिर खटीयै प्रार्थना जां पविखवाणी करदा ऐ, ओ अपने सिर दा अनादर करदा ऐ।

⁵लेकन जेड़ी जनांनी सिर गुआड़े दे प्रार्थना जां पविखवाणी करदी ऐ, ओ अपने पति दा अनादर करदी ऐ, किके ओ सिर दे बाल कटने दे बराबर ऐ।

⁶जेकर जनांनी दपटा नेई ओड़े, बाल बी कटाई लै; जेकर जनांनी आसतै बाल कटाना जां मुनन कराना शर्म दी गल्ल ऐ, तां दपटा ओड़े।

⁷आं, मर्द गी अपना सिर खटना बाजब नेई, किके ओ परमेसर दा रूप ते मैमा ऐ; लेकन जनांनी मड़द दी शोभा ऐ।

⁸किके मर्द जनांनी थमां नेई ओया, लेकन जनांनी मर्द थमां ओई ऐ;

⁹ते मर्द जनांनी आसतै नेई बनाया गीया, लेकन जनांनी मर्द आसतै बनाई गेई ऐ।

¹⁰एस आसतै सोर्गदूतें दी अजुरी दे कारन जनांनी गी बाजब ऐ, के अपनी दीनगी दी नशांनीं दी शकल बेच अपने सिर गी खट्टे।

¹¹तां बी प्रभु च नां ते जनांनी मर्द थमां, ते नां मर्द जनांनी थमां अजाद ऐ।

¹²किके जियां जनांनी मर्द थमां ऐ, उयांगै मर्द जनांनी थमां ऐ; लेकन सारीयां चीजां परमेसर थमां न।

¹³तोस अप्पुं गै वचार करो, के जनांनी गी गुआड़े सिर परमेसर अगें प्रार्थना करना बाजब लगदा ऐ?

¹⁴आम तौर उपर तोस जांनदे ओ, जेकर मर्द लम्मे बाल रखै, तां ओस आसतै शर्म दी गल्ल ऐ।

¹⁵लेकन जेकर जनांनी लम्मे बाल रखै, तां ओस आसतै शोभा ऐ, किके बाल उसी सिर खटने आसतै दिते गेदे न।

¹⁶लेकन जेकर कोई बैस करना चा, तां ए जानी लै के साड़ी ते परमेसर दी कलीसिया दी ऐसी गै रीति ऐ।

¹⁷ए चतावनी दिन्दे ओई, आऊँ थुआड़ी तरीफ नेई करदा, एस लेई के थुआड़े किट्ठे ओनें कन्ने पलाई नेई, लेकन नुक्सान ओंदा ऐ।

¹⁸किके पैलैं ते आऊँ ए सुनना ऐ, के जेसलै तोस कलीसिया च किट्ठे ओदे ओ, तां थुआड़े च बखेडे ओदे न ते आऊँ एस उपर थुड़ा-थुड़ा विश्वास बी करना ऐ।

¹⁹किके बखेड़े बी थुआड़े च जरुर ओगन, एस लेई के जेड़े लोग थुआड़े च खरे ओंन ओ परकट ओई जांन।

²⁰जेसलै तोस एक जगा च किट्ठे ओदे ओ तां ए प्रभु पोज खाणे आसतै नेई,

²¹किके खाणे दे बेलै एक दुए थमां पैलैं अपना पोजन खाई लैंदे ओ, ओस बेलै कोई पुखा दा रौंदा ऐ, ते कोई नशे च मस्त ओई जंदा ऐ।

²²के खाणे-पीने आसतै थुआड़े कर नेई? जां परमेसर दी कलीसिया गी तोच्छ समझदे ओ, ते जिंदे कोल नेई ऐ उनेंगी टीठ करदे ओ? आऊँ तुसेंगी के आखां? के एस गल्ल च थुआड़ी तरीफ करां? नेई, आऊँ तरीफ नेई करदा।

²³किके ए गल्ल मिगी प्रभु थमां पूजी, ते मैं तुसेंगी बी पजाई दित्ती; के प्रभु यीशु ने जेस राती ओ पड़काया गीया, रुट्टी लेई,

²⁴ते शुक्र करियै उसी तोड़या ते गलाया, “ए मेरी जेंद ऐ, जेड़ी थुआड़े आसतै ऐ; मेरी याद लेई इयै खंदे रवयो।”

²⁵इसै चाली ओसने बियारी दे पिछें कटोरा बी लेता, ते गलाया, “ए कटोरा मेरे खून च नमां करार ऐ; जेसलै कदें तोस पीओ, तां मेरी याद लेई इयै करदे रवयो।”

²⁶किके जेसलै कदें तोस ए रुट्टी खंदे, ते एस कटोरे थमां पींदे ओ, तां प्रभु दी मौत गी जेसलै तकर ओ बापस नेई अवै, प्रचार करदे ओ।

²⁷एस आसतै जेड़ा कोई नाजायज रीति कन्ने प्रभु दी रुट्टी खा, जां ओदे कटोरे थमां पीऐ, ओ प्रभु दी जेंद ते खून दा पराधी बनग।

²⁸एस आसतै मनुक्ख अपने आप गी जाची लै ते इसै चाली एस रुट्टी बिचा खा, ते एस कटोरे बिचा पीऐ।

²⁹किके जेड़ा खंदे-पींदे बेलै प्रभु दी जेंद गी नेई पनछांने, ओ एस खाणे ते पीने च अपने उपर सजा आंनदा ऐ।

³⁰इसै कारन थुआड़े बेच मते कमजोर ते रोगी न, ते मते सारे मरी बी गै।

³¹जेकर अस अपने आप गी जाचचै तां परमेसर थमां सजा नेई लिंदे।

³²लेकन प्रभु असेंगी सजा देईयै सधारदा ऐ, एस आसतै के अस दुनिया दे कन्ने कसुरबार नेई ठैरचै।

³³एस आसतै, ए मेरे विश्वासी प्राओ, जेसलै तोस प्रभु पोज आसतै किट्ठे ओदे ओ, तां एक दुए गी बलगा करो।

³⁴जेकर कोई पुखा उवै तां अपने कर खाई लै, जेस छा थुआड़ा किट्ठा ओना सजा दा कारन नेई उवै। बाकी गल्लें गी आईयै सखागा।