Read Dogri 1 कुरिन्थियों 12 Bible Online

1 कुरिन्थियों 12 - Dogri bible

1 कुरिन्थियों 12

¹ए विश्वासी प्राओ, आऊँ नेई चानां के तोस आत्मिक वरदानें दे बारै च अनजांन रवो।

²तोस जांनदे ओ, के जेसलै तोस दुई जाती हे, तां गूंगी मूरतयें दे पिछें जियां चलाए जंदे हे उयांगै चलदे हे।

³एस आसतै आऊँ तुसेंगी चतावनी दिना ऐं के जेड़ा कोई परमेसर दी आत्मा दी अगुआई कन्ने बोलदा ऐ, ओ नेई आखदा के यीशु श्रापित ऐ; ते नां कोई पवित्र आत्मा दे बगैर आखी सकदा ऐ के यीशु प्रभु ऐ।

⁴वरदान तां केई किसम दे न, लेकन आत्मा एक गै,

⁵ते सेवा बी केई किसम दी ऐ लेकन प्रभु एक गै;

⁶ते परमेसर थमां असरदार दे कम केई किसम दे न, लेकन परमेसर एक गै, जेड़ा सबनी च अर किसम दा असर पैदा करदा ऐ।

⁷लेकन सबनी गी फायदा पजाने आसतै अर एक गी आत्मा दी लो दित्ती जंदी ऐ।

⁸किके एक गै आत्मा थमां बुद्धि दियां गल्लां दित्तियां जंदियां न, ते दुए गी उसै आत्मा दे मताबक ज्ञान दियां गल्लां।

⁹ते कुसे गी उसै आत्मा कन्ने विश्वास; ते कुसे गी उसै आत्मा कन्ने चंगा करने दा वरदान दित्ता जंदा ऐ।

¹⁰पी कुसे गी चमत्कार दे कम करने दी शक्ति, ते कुसे गी पविखवाणी दी, ते कुसे गी आत्मा दी परख, ते कुसे गी मती किसम दी पाषा, ते कुसे गी पाषें दा मतलब सनाना।

¹¹लेकन ए सब असरदार कम उवै एक आत्मा करांदा ऐ, ते जिसी जेड़ा चांदा ऐ ओ बंडी दिन्दा ऐ।

¹²किके जेस चाली जेंद ते एक ऐ ते ओदे अंग मते सारे न, ते ओस जिंदु दे सारे अंग मते ओनें उपर बी सारे मिलीयै एक गै जेंद ऐ, उसै चाली सब विश्वासी मिलीयै मसीह च एक जिंदु आला लेखा न।

¹³किके असैं सारे के यहूदी, के दुई जाती, के दास, के अजाद, एक गै आत्मा थमां एक जेंद ओनें आसतै पवित्रशनांन लेता, ते असैं सारें गी एक गै आत्मा मिले दा ऐ।

¹⁴एस आसतै जिंदु च एक गै अंग नेई, लेकन मते सारे न।

¹⁵जेकर पैर आखन, “आऊँ अथ्थ नेई, एस लेई जिंदु दा अंग नेई,” तां के ओ एस कारन जिंदु दा अंग नेई?

¹⁶जेकर कन आखे, “आऊँ आख नेई, एस लेई जिंदु दा अंग नेई,” तां के ओ एस कारन जिंदु दा अंग नेई?

¹⁷जेकर सारी जेंद आख गै ओंदी तां सुनना कुथुंआं दा ओंदा? जेकर सारी जेंद कन गै ओंदी, तां सूंघना कुथुंआं दा ओंदा?

¹⁸लेकन सच्चें गै परमेसर ने अंगें गी अपनी मर्जी दे मताबक एक-एक करियै जेंद च रखे दा ऐ।

¹⁹जेकर ओ सारे एक गै अंग ओदे, तां जेंद नेई ओदी।

²⁰लेकन ऊन अंग मते सारे न, पर जेंद एक गै।

²¹आख अथ्थ गी नेई आखी सकदी, “मिगी तेरी जरुरत नेई,” तां नां सिर पैरें गी आखी सकदा ऐ, “मिगी तेरी जरुरत नेई।”

²²लेकन जिंदु दे ओ अंग जेड़े दुए थमां कमजोर लगदे न, ओ मते गै जरुरी न,

²³ते जिंदु दे जिनैं अंगें गी अस आदर दे जोग नेई समझनयां न उनेंगी गै अस मता आदर दिनयां न; ते साड़े शैल नेई लबने आले अंग ओर बी मते शैल ओई जंदे न,

²⁴पी बी साड़े शैल अंगें गी एस दी जरुरत नेई। लेकन परमेसर ने जेंद गी ऐसा बनाई दिते दा ऐ, के जेस अंग गी आदर दी कमी ही उसै गी ओर बी मता आदर दिता।

²⁵तां जे जिंदु च फोट नेई पवै, लेकन अंग एक दुए दी बराबर चेंता करन।

²⁶एस आसतै जेकर एक अंग गी दोख लगा दा ऐ, तां सारे अंग ओदे कन्ने दोख करदे न; ते जेकर एक अंग दी बड़ाई ओंदी ऐ, तां ओदे कन्ने सारे अंग नंद मनांदे न।

²⁷इसै चाली तोस सारे मिलीयै मसीह दी जेंद ओ, ते लग-लग ओदे अंग ओ;

²⁸ते परमेसर ने कलीसिया च लग-लग मनुक्ख पक्के कित्ते दे न; पैलैं प्रेरित, दुए पविख्व्क्ते, त्रिये शिख्या देने आले, पी चमत्कार दे कम करने आले, पी चंगा करने आले, ते उपकार (सेवा ते मदद करने आले), ते परबंध करने आले, ते लग-लग किसम दी पाषा बोलने आले।

²⁹के सारे प्रेरित न? के सारे पविखवक्ता न? के सारे शिखया देने आले न? के सारे चमत्कार दे कम करने आले न?

³⁰के सारें गी चंगा करने दा वरदान मिले दा ऐ? के सारे लग-लग किसम दी पाषा बोलदे न?

³¹के सारे तरजमा करदे न? तोस बड्डे थमां बड्डे वरदानें दी इच्छ्यां च रवो। लेकन आऊँ तुसेंगी ओर बी सारें शा छैल रस्ता दसना ऐं।