Read Dogri 1 कुरिन्थियों 14 Bible Online

1 कुरिन्थियों 14 - Dogri bible

1 कुरिन्थियों 14

¹एक दुए कन्ने प्रेम करने दी पूरी कोष्ट करो, ते आत्मिक वरदानें दी इच्छ्यां च रवो खास करियै ए, के पविखवाणी करो।

²किके जेड़ा दुई पाषें च गल्लां करदा ऐ; ओ मनुक्खें कन्ने नेई, लेकन परमेसर कन्ने गल्लां करदा ऐ; एस लेई के ओस दियां गल्लां कोई नेई समझदा; किके ओ पेद दियां गल्लां आत्मा च ओईयै बोलदा ऐ।

³लेकन जेड़ा पविखवाणी करदा ऐ, ओ वश्वासीयें दे विश्वास दी तरकी, ते औसला, ते तसली दियां गल्लां आखदा ऐ।

⁴जेड़ा दुई पाषा च गल्लां करदा ऐ, ओ अपने गै विश्वास दी तरकी करदा ऐ; लेकन जेड़ा पविखवाणी करदा ऐ, ओ कलीसिया दे वश्वासीयें दी विश्वास दी तरकी करदा ऐ।

⁵आऊँ चानां ऐं, के तोस सारे दुई पाषें च गल्लां करो, लेकन एस थमां जादै ए चानां ऐं के पविखवाणी करो; किके जेकर दुई पाषा बोलने आला कलीसिया दी तरकी आसतै तरजमा नेई करै तां पविखवाणी करने आले ओस थमां बद ऐ।

⁶एस आसतै ए विश्वासी प्राओ, जेकर आऊँ थुआड़े कोल आईयै दुई पाषें च गल्लां करां, ते परमेसर दियां परकट कित्तियां गल्लां, जां ज्ञान, जां पविखवाणी, जां शिखया दियां गल्लां थुआड़े कन्ने नेई करां, तां मेरे थमां तुसेंगी के फायदा ओग?

⁷इसै चाली जेकर गानें-बजानें आलियां चीजें चा बाज निकलदी ऐ, जियां बैंसली, जां बीन, जेकर उन्दे सूरें च पेद नेई उवै तां जेड़ा बाजा ओ बजाया जंदा ऐ, ओ कियां पनछानयां जाग?

⁸ते जेकर तुतडी दी बाज साफ़ नेई उवै, तां कोन योद्द आसतै त्यारी करग?

⁹इयां गै तोस बी जेकर जिभ थमां साफ़-साफ़ पाषा नेई आखो, तां जे केछ आखया जंदा ऐ ओ कियां समझया जाग? तोस तां अवा च गल्लां करने आले बनें।

¹⁰दुनिया च मतीयां सारीयां पाषां न मगर सबनी दा केछ न केछ मतलब जरुर ऐ।

¹¹एस आसतै जेकर आऊँ कुसे पाषा दा मतलब नेई समझां, तां बोलने आले दी नजर च परदेसी ओगा; ते बोलने आला मेरी नजर च परदेसी ओग।

¹²एस आसतै तोस बी जेलै आत्मिक वरदानें दी इच्छ्यां च ओं, तां ऐसे वरदान पानें दी इच्छ्यां करो जेस थमां कलीसिया दे वश्वासीयें दे विश्वास दी तरकी उवै।

¹³एस कारन जेड़ा दुई पाषा बोलै, तां ओ प्रार्थना करै, के ओसदा तरजमा बी करी सकै।

¹⁴एस लेई जेकर आऊँ दुई पाषा च प्रार्थना करां, तां मेरी आत्मा प्रार्थना करदी ऐ, लेकन मेरी बुद्धि कम नेई करदी।

¹⁵तां के करना चाईदा? आऊँ आत्मा थमां बी प्रार्थना करगा, ते बुद्धि थमां बी प्रार्थना करगा; आऊँ आत्मा थमां बी गागा, ते बुद्धि थमां बी गागा।

¹⁶नेई तां जेकर तू आत्मा कन्ने गै शुक्र करगा, तां अज्ञानी तेरे शुक्र उपर आमीन कियां आखघ? किके ओ तां नेई जानदा, के तू के आखे करना ऐ?

¹⁷तू तां सचें गै शुक्र करै करना ऐ, लेकन दुए दे विश्वास दी तरकी नेई ओंदी।

¹⁸आऊँ अपने परमेसर दा शुक्र करना ऐ, के आऊँ थुआड़े सारें थमां जादै दुई पाषा च बोलना ऐ।

¹⁹लेकन कलीसिया च दुई पाषा च दस जार गल्लां आखने थमां ए मिगी ओर बी छैल लगदा ऐ, के दुए गी सखाने आसतै ऐसीयां गल्लां बोलां जिनेंगी लोक समझी सकन।

²⁰ए विश्वासी प्राओ, तोस समझ च बच्चें आला लेखा नेई बनो; पी बी बराई च तां बच्चे रवो, लेकन समझ च सयानें बनो।

²¹पवित्र शास्त्र च लिखे दा ऐ, के प्रभु आखदा ऐ, “आऊँ दुई पाषा बोलने दे थमां, ते बगाने मुंह थमां इनें लोकें कन्ने गल्लां करगा तां बी ओ मेरी नेई सुनगन।”

²²एस आसतै दुई पाषां वश्वासीयें आसतै नेई, लेकन अविश्वासीयें आसतै नशांनी ऐ; ते पविखवाणी अविश्वासीयें आसतै नेई, लेकन वश्वासीयें आसतै नशांनी ऐ।

²³जेकर कलीसिया एक जगा उपर किट्ठी उवै, ते सारें दे सारे दुई पाषा बोलन, ते बार आले जां अवश्वासी लोक कोल आई जांन तां के तुसेंगी ओ पागल नेई आखघन?

²⁴लेकन जेकर सारे पविखवाणी करन लगन, ते कोई अवश्वासी जां बार आले मनुक्ख कोल आई जांन, तां ओ जानी लैगन के ओ अप्पुं पापी न ते थुआड़े बोलनें दे कारन ओ अपनी जिंदड़ी दे रस्तें गी बदलने दी इच्छ्यां करगन।

²⁵एस चाली ओसदे मन दे पेद परकट ओई जागन, ते ओस बेलै ओ मुंह दे पार पेईयै परमेसर गी मत्था टेकया, ते मन्नी लैग, के सच्चें गै परमेसर थुआड़े बेच ऐ।

²⁶एस आसतै ए विश्वासी प्राओ, के करना चाईदा? जेसलै तोस राधनां लेई किट्ठे ओदे ओ, तां अर एक दे एर्दें च पजन जां प्रचार, जां दुई पाषा, जां परमेसर थमां परकट कित्ती दी गल्ल, जां दुई पाषा दा मतलब सनाना रौंदा ऐ। सारा केछ आत्मिक तरकी आसतै ओना चाईदा।

²⁷जेकर दुई पाषा च गल्लां करनयां ओंन, तां दो-दो, जां मते ओंन तां त्रै-त्रै जनें बारी-बारी बोलन, ते एक मनुक्ख तरजमा करै।

²⁸लेकन जेकर तरजमा करने आला नेई उवै, तां दुई पाषा बोलने आला कलीसिया च चोप्प रवै, ते अपने मन थमां, ते परमेसर कन्ने गल्लां करै।

²⁹पविख्ब्तें चा दो जां त्रै बोलन, ते बाकी लोक उन्दे वचन गी परखन के ओ पवित्र शास्त्र दे मताबक ऐ जां नेई।

³⁰लेकन जेकर दुए उपर कोई गल्ल जेड़ा थुआड़े च बैठे दा ऐ, केछ परमेसर दी गल्ल परकट उवै, तां पैला चोप्प ओई जा।

³¹किके तोस सारे एक-एक करियै पविखवाणी करी सकदे ओ, तां जे सारे सीखन ते सारे औसला पांन।

³²पविख्ब्क्तें चोप्प रौने दी इच्छ्यां करनी चाईदी के ओ दुए गी बी बोलने दा मौका दियै।

³³किके परमेसर गड़बड़ी दा नेई, लेकन शान्ति दा परमेसर ऐ। जियां पवित्र लोकें दी सारी कलीसिया च ऐ।

³⁴जनांनीयां कलीसिया दी सभा च चोप्प रौन, किके उनेंगी गल्लां करने दा उक्म नेई, लेकन दीन रौने दा उक्म ऐ, जियां कनून च लिखे दा बी ऐ।

³⁵जेकर ओ केछ सीखना चांन, तां कर च अपने-अपने पति थमां पूछन, किके जनांनी दा कलीसिया च गल्लां करना शर्म आली गल्ल ऐ।

³⁶के परमेसर दा संदेश थुआड़े छा गै नेई शुरू ओया ते सेर्फ थुआड़े तकर गै नेई पूजया।

³⁷जेकर कोई मनुक्ख अपने आप गी पविखवक्ता जां आत्मिक जना समझै, तां ए जानी लै, के जेड़ीयां गल्लां आऊँ तुसेंगी लिखना ऐं, ओ प्रभु दे उक्म न।

³⁸लेकन जेकर कोई इनें मेरीयें गल्लें उपर विश्वास नेई करदा तां ओदे उपर बी विश्वास मत करो।

³⁹एस आसतै ए विश्वासी प्राओ, पविखवाणी करने दी इच्छ्यां च रवो ते दुई पाषा बोलने आसतै मन्ना नेई करो;

⁴⁰लेकन सारीं गल्लां सेई ते तरीके कन्ने कित्तियां जांन।