Read Dogri 1 कुरिन्थियों 7 Bible Online

1 कुरिन्थियों 7 - Dogri bible

1 कुरिन्थियों 7

¹उनै सुयालें दे बारै च जेड़े तो चिट्ठी च लिखे दे न, ए ठीक ऐ, के मर्द विवाह नेई करै।

²लेकन परिख्या थमां बचने लेई अर एक मर्द दी पत्नी, ते अर जनांनी दा पति उवै।

³पति अपनी पत्नी दा फर्ज पूरा करै; ते उयांगै पत्नी बी पति दा फर्ज।

⁴पत्नी गी अपनी जेंद उपर कोई अख्त्यार नेई लेकन ओदे पति दा अख्त्यार ऐ; उयांगै पति गी बी अपनी जेंद उपर अख्त्यार नेई, लेकन पत्नी दा।

⁵तोस एक दुए थमां बक्ख नेई रवो; लेकन सेर्फ केछ बेलै तकर अप्पुं बिचें दी सैमति कन्ने के प्रार्थना आसतै मौका मिलै, ते पी किट्ठे रवो; ऐसा नेई उवै, के अपना आप काबू नेई ओनें थमां शतान तुसेंगी परखै।

⁶लेकन आऊँ जेड़ा ए आखना ऐ ओ सलहा ऐ नां के उक्म।

⁷आऊँ ए चानां ऐ, के जियां मैं विहा नेई कित्ते दा ऐ, उयांगै सारे मनुक्ख ओन; लेकन अर एक गी परमेसर थमां खास-खास वरदान मिले न; कुसे गी कुसे चाली दा, ते कुसे गी कुसे ओर चाली दा।

⁸लेकन आऊँ कवारें ते विधवां दे बारै च ए आखना ऐं, के उन्दे आसतै इयां गै रौना ठीक ऐ, जियां आऊँ ऐं।

⁹लेकन जेकर ओ अपने आप गी काबू नेई करी सकन, तां विवाह करन; किके विवाह करना चूअरनें थमां पला ऐ।

¹⁰जिन्दा विवाह ओई गेदा ऐ, उनेंगी आऊँ नेई आखदा, वरन प्रभु उक्म दिन्दा ऐ, के पत्नी अपने पति कोलां बक्ख नेई उवै।

¹¹ते जेकर बक्ख बी ओई जांन, तां बगैर दुए विवाह कित्ते दे रवै; जां पी अपने पति कन्ने मेल करी लैंन ते नां पति अपनी पत्नी गी छुड़ै।

¹²दुए कन्ने प्रभु नेई, लेकन आऊँ गै आखना ऐं, जेकर कुसे विश्वासी प्रा दी पत्नी विश्वास नेई करदी उवै, ते ओदे कन्ने रौने आसतै खोश उवै, तां ओ उसी नेई छुड़ै।

¹³ते जेस जनांनी दा पति विश्वास नेई करदा उवै, ते ओदे कन्ने रौने आसतै खोश उवै; ओ पति गी नेई छुड़ै।

¹⁴किके ऐसा पति जेड़ा विश्वास नेई करदा उवै, ओ पत्नी थमां पवित्र बनग; ते ऐसी पत्नी जेड़ी विश्वास नेई करदी, पति थमां पवित्र बनग; नेई तां थुआड़े बाल-बच्चे परमेसर दे नेई ओगन, लेकन ऊन परमेसर दे ओई जागन।

¹⁵लेकन जेड़ा मनुक्ख विश्वास नेई करदा, जेकर ओ बक्ख उवै, तां उसी बक्ख ओना दियो, ऐसी आलत च कोई विश्वासी पति जां विश्वासी पत्नी बंधन च नेई ऐ। लेकन परमेसर ने असेंगी मेल-मलाप आसतै बलाया ऐ।

¹⁶किके ए विश्वासी पत्नी, तू के समझनी ऐं, के तू अपने पति दा उद्धार कराई लेगी? ते ए विश्वासी पति, तू के समझना ऐं, के तू अपनी पत्नी दा उद्धार कराई लैगा?

¹⁷जियां प्रभु ने अर एक गी जेस आलत बेच रखे दा ऐ, जेलै परमेसर ने तुसेंगी बलाया ऐ, उसै दे मताबक चलो। ते आऊँ सारी कलीसिया च इयां गै करना ऐं।

¹⁸जेड़ा खतना कित्ते दा बलाए दा उवै, ओ बगैर खतने दा नेई बनें। जेड़ा बगैर खतने बलाया गेदा उवै, ओ खतना नेई करा।

¹⁹नां खतना केछ ऐ ते नां बिना खतने आला, लेकन परमेसर दे उक्में गी मननां सबनी कोल जरुरी ऐ।

²⁰अर एक मनुक्ख जेस आलत च बलाए दा उवै, उसै च रवै।

²¹जेकर तू दास दी आलत च बलाए दा उवै तां चेंता नेई कर; लेकन जेकर मालक तुगी आखदा ऐ के तू अजाद ऐं, तां ऐसा गै कम कर।

²²किके जेड़ा दास दी आलत च प्रभु च बलाया गेदा ऐ, ओ प्रभु च अजाद कित्ते गेदा ऐ। उयांगै जेड़ा अजाद दी आलत च बलाया गेदा ऐ, ओ मसीह दा दास ऐ।

²³तोस कीमत देईयै खरीदे गेदे ओ; मनुक्खें दे दास नेई बनयो।

²⁴ए विश्वासी प्राओ, जेड़ा कोई जेस आलत च बी बलाए दा उवै, ओ उसै आलत च परमेसर दे कन्ने रवै।

²⁵कुँवारियें दे बारै च प्रभु दा कोई उक्म मिगी नेई मिलया, लेकन विश्वासजोग ओनें आसतै जेड़ी, दया प्रभु ने मेरे उपर कित्ती ऐ, उसै दे मताबक सलहा दिनां ऐं।

²⁶एस लेई मेरी समझ च ए ठीक ऐ, के अज्ज बेलै दे कलेश दे कारन, मनुक्ख जेस आलत च बलाया गेदा ऐ, उयांगै रवै।

²⁷जेकर तेरी पत्नी उवै, तां ओस थमां बक्ख ओनें दी कोष्ट नेई कर; ते जेकर तेरी पत्नी नेई, तां पत्नी दी टूंढ नेई कर।

²⁸लेकन जेकर तू विवाह बी करें, तां पाप नेई; ते जेकर कुँवारी वियाई जा तां कोई पाप नेई; मगर विहा कित्ते दे लोकें गी बड़े दोख चलना पौंदे न एसकरी आऊँ तुसेंगी उनै दुखें कोलां बचानां चांना ऐं।

²⁹ए विश्वासी प्राओ, आऊँ ए आखना ऐं, के मसीह दा दवारा औने लेई बेला कहट रेई गीया ऐ, एस आसतै चाईदा के जिन्दियाँ पत्नियां ओंन, ओ इयां ओंन मन्नो उन्दिआं पत्नियां नेई।

³⁰ते रोने आले इयां ओंन, मन्नो रोंदे नेई; ते नंद करने आले इयां ओंन, मन्नो नंद नेई मनांदे; ते खरीदने आले इयां ओंन, मन्नो उन्दे कोल केछ ऐ गै नेई।

³¹ते जेड़े दुनिया दी चीजें च लग्गे दे न, ओ दुनिया कन्ने लगन नेई लांन, किके दुनिया ते दुनिया दियां चीजां तौलीयां नाश ओनें आलियां न।

³²आऊँ चानां ऐं, के तुसेंगी चेंता नेई उवै। कुँवारा मनुखक प्रभु दे कम दी चेंता च रौंदा ऐ, के प्रभु गी कियां खोश रखै।

³³लेकन वियाए दा मनुखक दुनिया दी गल्लें दी चेंता च रौंदा ऐ, के अपनी पत्नी गी केस चाली कन्ने खोश रखै।

³⁴वियाई दी ते बगैर वियाई दी बेच बी फर्क ऐ; बगैर वियाई दी प्रभु दी चेंता च रौंदी ऐ, के ओ जेंद च ते आत्मा च प्रभु गी कियां खोश रखै, लेकन वियाई दी दुनिया दी चेंता च रौंदी ऐ, के अपने पति गी कियां खोश रखै।

³⁵आऊँ ए गल्ल थुआड़े गै फायदे आसतै आखना ऐं, नां के तुसेंगी फसाने आसतै, वरन एस लेई के जियां बाजब ऐ; तां जे तोस एक मन ओईयै प्रभु दी सेवा च लगे रवो।

³⁶जेकर कोई ए समझै, के आऊँ अपनी ओस कुँवारी दा आक्क माराना, जेसदी जवानी टला करदी ऐ, ते विवाह दी लोड बी उवै, तां ओ जियां चा उयांगै करै, एस च पाप नेई, ओ ओसदा विवाह ओना दियै।

³⁷लेकन जेकर ओ मन च फैसला करदा ऐ, ते उसी विवाह दी जरुरत नेई ऐ, वरन अपनी इच्छ्यें गी काबू करी सकदा ऐ, तां ओ विवाह नेई करियै ठीक करदा ऐ।

³⁸एस आसतै जेड़ा अपनी कुँवारी दा विवाह करी दिन्दा ऐ, ओ ठीक करदा ऐ, ते जेड़ा विवाह नेई करदा ऐ, ओ ओर बी ठीक करदा ऐ।

³⁹जेसलै तकर कुसे जनांनी दा पति जिंदा ऐ, ओसलै तकर ओ ओस कन्ने बंधन च ऐ; लेकन जेसलै ओसदा पति मरी जा, तां जेस कन्ने चा विवाह करी सकदी ऐ, लेकन सेर्फ प्रभु च।

⁴⁰लेकन जियां ऐ, उयांगै रवै, तां मेरी सोच बेच ओर बी तन्न ऐ; ते आऊँ समझना ऐं, के परमेसर दा आत्मा मिगी ए सलहा बोलने लेई आखे करदा ऐ।