Read Dogri 2 कुरिन्थियों 1 Bible Online

2 कुरिन्थियों 1 - Dogri bible

2 कुरिन्थियों 1

¹पौलुस थमां जेड़ा परमेसर दी मर्जी क्न्ने मसीह यीशु दा प्रेरित ऐ, ते मसीह प्रा तीमुथियुस थमां परमेसर दी ओस कलीसिया दे नां, जेड़ी कुरिन्थुस शैर च ऐ, ते साड़े अखाया दे लाकें दे सारें पवित्र लोकें दे नां,

²साड़े पिता परमेसर ते प्रभु यीशु मसीह थमां तुसेंगी क्रपा ते शान्ति मिलदी रवै।

³साड़े प्रभु यीशु मसीह दे पिता, ते परमेसर दा शुकर ऊऐ, जेड़ा क्रपा दा पिता, ते अर चाली दी शान्ति दा पिता ऐ।

⁴ओ साड़े सारें संकटें च शान्ति दिंदा ऐ; तां जे अस ओस शान्ति दे कारन जेड़ी परमेसर असेंगी दिंदा ऐ, उनेंगी बी शान्ति देई सकचै, जेड़े कुसे केसम दे संकट च ओंन।

⁵किके जियां अस मसीह दे दुखें च मते शामल ओनयां न, उयांगै साड़ी शान्ति बेच बी मसीह थमां मते शामल ओनयां न।

⁶जेकर अस संकट पोगनयां न, तां ए थुआड़ी शान्ति ते मुक्ति आसतै ऐ; ते जेकर असेंगी शान्ति मिलदी यै, तां ओ थुआड़ी शान्ति आसतै ऐ; जेसदे असर कन्ने तोस सबर दे कन्ने उनै संकटें गी जरी लैंदे ओ, जिनेंगी अस बी जरनयां न।

⁷ते साड़ी आस थुआड़े बारै च पक्की ऐ; किके अस जाननयां न, के तोस जियां साड़े दुखें च शामल ओ, उयांगै शान्ति च बी शामल ओ।

⁸ए मसीह विश्वासी प्राओ, अस नेई चानयां के तोस साड़े ओस संकट थमां अनजांन रवो, जेड़ा आसिया दे लाकें च साड़े उपर पिया; के अस इनें पारे बोझ कन्ने दबोई गेदे हे, जेड़ा साड़े बर्दाश कोलां बार हा, इत्थैं तकर के अस जीनें दी मेंद बी छुड़ी बैठे दे हे।

⁹लेकन असैं अपने मन च समझी लेता हा, के असैं मरी जाना ऐ, तां बी असैं अपना परोसा ओस परमेसर च रखया जेड़ा मोदें गी जिन्दा करदा ऐ।

¹⁰उसै असेंगी मौत दे इनें बड्डे संकट थमां बचाया, ते बचाग; ते ओस थमां साड़ी ए आस ऐ, के ओ अगें बी असेंगी बचांदा रौग।

¹¹ते तोस बी मिलीयै प्रार्थना च साड़ी मदद करगे, के जेड़ा वरदान मतें सारें थमां असेंगी मिलया, ओदे कारन मते लोग साड़ी बक्खी दा शुकर करन।

¹²किके अस अपनी अन्तर आत्मा दी एस गवाई उपर कमंड करनयां न, के दुनिया च ते खास करियै थुआड़े बेच साड़ा चाल चलन परमेसर दे काबल ऐसी पवित्र ते सच्चाई कन्ने हा, जेड़ा इन्सान दी अक्ल कन्ने नेई लेकन परमेसर दी क्रपा दे कन्ने हा।

¹³अस तुसेंगी ओर केछ नेई लिखदे, सेर्फ उवै जेड़ा तोस पढ़दे जां समझदे बी ओ, ते मिकी आस ऐ के, खीरी तकर बी समझदे रौगे।

¹⁴जियां थुआड़े चा किन्नें गै मन्नी लेता ऐ, के अस थुआड़े कमंड दा कारन ओ, उयांगै तोस बी प्रभु यीशु दे बापस औने दे देन साड़े आसतै कमंड दा कारन बनगे।

¹⁵इसै परोसे कन्ने आंऊँ चांना ऐं, के पैलैं थुआड़े कोल अवां; के तुसेंगी एक ओर दान मिलै;

¹⁶मैं ए सोचा हा के थुआड़े कोलां आईयै मकिदुनिया दे लाकें गी जां, ते पी मकिदुनिया दे लाकें थमां थुआड़े कोल अवां, ते तोस मिकी यहूदीया दे लाकें आली बखी दूर तकर पजागे।

¹⁷एस आसतै मैं ए जेड़ी इच्छा कित्ती ही तां के मैं चलाकी दसी? जां जे करना चांना ऐं के शरीर दे मताबक करना चांना ऐं, के आंऊँ गल्ल च आं, आं बी करां ते नां, नां बी करां?

¹⁸लेकन परमेसर मानदार ऐ, के साड़े ओस वचन च जेड़ा थुआड़े कन्ने आखया आं, ते नां दुए नेई पाए जंदे।

¹⁹किके परमेसर दा पुत्तर यीशु मसीह जेसदा साड़े थमां मतलब मेरे ते सिलवानुस ते तीमुथियुस थमां थुआड़े बेच परचार ओया, मसीह यीशु च आं ते नां दुए नेई हे; लेकन ओदे च आं गै आं ओई।

²⁰किके परमेसर दे जिन्नें बायदे न, ओ सारे मसीह च ओंदे कन्ने न। इसै आसतै ओदे थमां आमीन बी ओई, के साड़े थमां परमेसर दी मैमा उवै।

²¹ते जेड़ा असेंगी थुआड़े थमां मसीह च पक्का करदा ऐ, ते जेस ने साड़ा अभिषेक कित्ता ओ उवै परमेसर ऐ,

²²जेस ने साड़े उपर मोर बी लाई दित्ती ऐ ते पेशगी च आत्मा गी साड़े मन च दित्ता।

²³आंऊँ परमेसर गी गवाह करियै बोलाना ऐं, के आंऊँ परतियै कुरिन्थुस शैर च एस आसतै नेई आया, के मिकी थुआड़े उपर तरस ओंदा हा।

²⁴ए नेई, के अस विश्वास दे बारै च थुआड़े उपर राज जताना चानयां न; लेकन थुआड़े नन्द च मददगार ओं, किके तोस विश्वास कन्ने गै मजबूत रौंदे ओ।