Read Dogri 2 कुरिन्थियों 4 Bible Online

2 कुरिन्थियों 4 - Dogri bible

2 कुरिन्थियों 4

¹एसकरी जेलै साड़े उपर परमेसर दी ऐसी दया ओई, के असेंगी ए प्रचार दी सेवा मिली, तां अस इम्त नेई छुडदे।

²लेकन असैं शर्म दे गोप्त कम्में गी त्यागी दित्ता, ते नां चलाकी कन्ने चलनयां, ते नां परमेसर दे वचन च मलावट करनयां न; लेकन सच्चाई गी परकट करियै, परमेसर दे सामने अर एक मनुक्ख दी अन्तर आत्मा च अपनी पलाई बठानयां न।

³लेकन जेकर साड़े शोभ समाचार उपर पड़दा पेया ऐ, तां ए नाश ओनें आलें आसतै गै पेदा ऐ।

⁴ते ऊन अविश्वासीयें आसतै, जिन्दे दमाग गी एस दुनिया दे ईश्वर शतान ने अन्नां करी दिते दा ऐ, तां जे मसीह जेड़ा परमेसर आला लेखा ऐ, ओदी तेज शक्ति आले शोभ समाचार दी लो उन्दे उपर नेई चमके।

⁵किके अस अपने आप दा परचार नेई, लेकन मसीह यीशु दा परचार करनयां न, के ओ प्रभु ऐ; ते अपने बारै च ए आखनयां न, के अस यीशु दे कारन थुआड़े सेवा कार ओं।

⁶एसकरी के परमेसर गै, जेस ने आखया, “न्हेरे चा लो चमके,” ते उवै साड़े एर्दें च चमंकी, के परमेसर दी मैमा दी पनछान दी लो यीशु मसीह दे मुंहे थमां चमके।

⁷लेकन साड़े कोल ए तन मिट्टी दे कमजोर पांढे च रखे दा ऐ, के ए ऐसी बड़ी शक्ति साड़े तरफुं नेई, बरना परमेसर थमां गै साड़े उपर उतरे।

⁸अस चौनी बक्खीं थमां कलेश तां पोगनयां न, लेकन दुखें च नेई पोनयां; लचारी दी आलत च तां ऐ न, लेकन नराश नेई ओनयां;

⁹सताए तां जनयां, लेकन त्यागे नेई जनयां; टाए तां जनयां, लेकन नाश नेई ओनयां।

¹⁰अस यीशु दी मौत गी अपने जिंदु च अर बेलै लेई फिरनयां न, के लोक यीशु दी जेंद बी साड़ी जेंद च परकट ओए दा दिखन।

¹¹किके अस जिंदे जी मेशा यीशु दे कारन मौत दे अथ्थें च सोंपे जनयां न के यीशु दी जेंद बी साड़े मरने आली जेंद च परकट उवै।

¹²एस कारन मौत तां साड़े उपर असर पांदी ऐ ते जिंदड़ी थुआड़े उपर।

¹³ते एसकरी के साड़े च उवै विश्वास दी आत्मा ऐ, जेसदे बारै च पवित्र शास्त्र च लिखे दा ऐ “के मैं विश्वास कित्ता, एस आसतै मैं बोलया।” मतलब अस बी विश्वास करनयां न, एस आसतै बोलनयां न।

¹⁴किके अस जाननयां न, के जेस ने प्रभु यीशु गी जिन्दा कित्ता, उवै असेंगी बी यीशु च शामल समझीयै मौत चा जिन्दा करग, ते थुआड़े कन्ने अपने सामने पेश करग।

¹⁵किके सारीयां चीजां थुआड़े आसतै न, तां जे क्रपा मती थमां मती ओईयै परमेसर दी मैमा आसतै शुकर गजारी बी बदै।

¹⁶एस लेई अस इम्त नेई छुडदे; आलां के साड़ा बारला शरीर नाश बी ओंदा जंदा ऐ, तां बी साड़ा अन्दरूनी शरीर अर रोज नमां ओंदा जन्दा ऐ।

¹⁷किके साड़ा पल पर दा अल्का जियां कलेश साड़े आसतै मता गै जरुरी ते मेशा दी मैमा पैदा करदा जन्दा ऐ; जेदा मकाबला किसे क्न्ने नेई करी सकदे,

¹⁸ते अस तां दिखने आली चीजें नेई लेकन बगैर दिखीं चीजें गी दिखदे रौनयां न; किके दिखने आलियां चीजां थुड़े गै दिनें दियां न, लेकन बगैर दिखे दियां चीजां मेशा बनियाँ रौंदियां न।