Read Dogri इफिसियों 3 Bible Online

इफिसियों 3 - Dogri bible

इफिसियों 3

¹एस कारन आऊँ पौलुस जेड़ा थुआड़े दुई जातीयें आसतै मसीह यीशु दी सेवा दे कारन कैदी ऐं।

²जेकर तुसें परमेसर दी ओस क्रपा दे बंधोबस्त दा समाचार सुना ऐ, जेड़ी थुआड़े आसतै मिकी परमेसर कोलां दिती गेई,

³मतलब ए के ओ पेद मेरे उपर परमेसर दे प्रकाशन थमां परकट ओया, जियां आऊँ पैलैं गै नचोड़ च लिखी चुके दा ऐं,

⁴जिसी तोस पढ़ीयै जानी सकदे ओ के आऊँ मसीह दा ओ पेद कुत्थें तकर समझना ऐं।

⁵जेड़ा परमेसर ने पैलैं बेले च मनुक्खें दी औलादें गी इयै जियां परकट नेई कित्ता गीया हा, जियां के आत्मा थमां ऊन ओदे पवित्र प्रेरितें ते पविख्ब्क्तें उपर परकट कित्ता गीया ऐ।

⁶मतलब ए के मसीह यीशु च शोभ समाचार थमां दुई जातीयें दे लोग जायदाद च सांझीदार, ते एक गै जेंद दे ते बायदे दे पागीदार न।

⁷ते आऊँ परमेसर दी क्रपा दे ओस दान दे मताबक, जेड़ा ओसदी शक्ति दे असर दे मताबक मिकी दिता गीया, ओस शोभ समाचार दा सेवक बनया।

⁸मेरे उपर जेड़ा सारें पवित्र लोकें चा निके थमां बी निका ऐं, ए क्रपा ओई के आऊँ दुई जातीयें गी मसीह दे नेई मुकने आले तन दा शोभ समाचार सनां,

⁹ते सारें उपर ए गल्ल प्रकाशित करां के ओस पेद दा बंधोबस्त के ऐ, जेड़ा सबनी दे सृजने आले परमेसर च पैलैं थमां गोप्त हा।

¹⁰तां जे ऊन कलीसिया थमां, परमेसर दी लग्ग-लग्ग किसम दा असीम ज्ञान, उनै प्रधानें ते अख्त्यार रखने आलें उपर, जेड़े न दिक्खी जान आली जगें च न, परकट कित्ता जा।

¹¹ओस मेशा दे वचार दे मताबक जेड़ा परमेसर ने साड़े प्रभु मसीह यीशु च कित्ता ऐ।

¹²जेस च असेंगी ओस उपर विश्वास करने कन्ने इम्त ते परोसे कन्ने परमेसर दे कोल औने दा अख्त्यार ऐ।

¹³एस आसतै आऊँ अर्ज करना ऐं के जेड़े कलेश थुआड़े आसतै मिकी ओआ करदे न, उन्दे कारन तोस इम्त नेई छुड़यो, किके उन्दे च थुआड़ी नफा ऐ।

¹⁴आऊँ एस कारन ओस परमेसर पिता दे अगें प्रार्थना करना ऐं,

¹⁵जेस कन्ने सोर्ग ते तरती उपर, अर एक कराने दा नां रखया जंदा ऐ।

¹⁶मैं प्रार्थना करना ए के ओ अपनी मैमा दे तन दे मताबक तुसेंगी ए दान दियै के तोस ओदी आत्मा कन्ने अपने अन्दर आले मनुक्ख च शक्ति पाईयै तकड़े ओदे जाओ;

¹⁷ते विश्वास थमां मसीह थुआड़े एर्दें च बसे के तोस प्यार च जड़ पकड़ीयै ते नीं सुट्टीयै,

¹⁸सारे पवित्र लोकें दे कन्ने पली-पांती समझने दी शक्ति आसल करो; के ओसदी चढ़ांई, ते लमाई, ते उचाई, ते गराई किन्नी ऐ।

¹⁹मैं प्रार्थना करना ए ते मसीह दे ओस प्यार गी जानी सको जेड़ा ज्ञान थमां परे ऐ के तोस परमेसर दी सारी परपुरी तकर परोई जाओ।

²⁰ऊन जेड़ा ऐसा शक्ति आला ऐ, के साड़ी अर्ज ते समझ थमां केई गुणा जादै कम करी सकदा ऐ, ओस शक्ति दे मताबक जेड़ी साड़े च कम करदी ऐ,

²¹कलीसिया च ते मसीह यीशु च ओसदी मैमा पीढ़ी थमां पीढ़ी तकर योग-योग ओंदी रवै। आमीन।