Read Dogri इफिसियों 5 Bible Online

इफिसियों 5 - Dogri bible

इफिसियों 5

¹एस लेई परमेसर दे प्यारे बच्चें आला लेखा ओदी रिस करो,

²ते एक दुए कन्ने प्यार करो जियां मसीह ने बी थुआड़े कन्ने प्यार कित्ता, ते साड़े लेई अपने आप गी बलि दी खशबु आसतै परमेसर दे अगें बलि दी पेंट करियै चाढ़ी दिता।

³जियां पवित्र लोकें जोग ऐ, उयांगै थुआड़े च ब्यभिचार, ते कुसे चाली दे अशोद्ध कम, जां लालच दी चर्चा तकर नेई उवै;

⁴ते नां बशर्म पुना, नां मुढ़ता दियां गल्लां, नां मजाक कित्ता जा; किके ए गल्लां शोभा नेई दिन्दीयां, वरन परमेसर दी गै शुक्रगुजारी करो जे केछ ओसने थुआड़े लेई कित्ता।

⁵किके तोस ए पक्का जांनदे ओ के कुसे व्यभिचारी, जां अशोद्ध जन, जां लालची मनुक्ख गी, जेड़ा मूरतपूजा दे बराबर ऐ, मसीह ते परमेसर दे राज च जायदाद नेई।

⁶कोई तुसेंगी बेकार गल्लें च तोखा नेई दियै, किके इनें कम्में कारन गै परमेसर दा गुस्सा उक्म नेई मनने आलें उपर पड़कदा ऐ।

⁷एस आसतै तोस ऐसे पाप करने आले लोकें च शामल नेई ओयो।

⁸किके तोस पैलैं नेरे च हे, लेकन ऊन प्रभु च लोई च ओ, एस आसतै लोई दे बच्चें आला लेखा चलो।

⁹किके लोई दा फल सारे चाली दी पलाई, ते तार्मिकता, ते सचाई ऐ,

¹⁰ते ए परखो, के प्रभु गी के शैल लगदा ऐ।

¹¹न्हेरे दे पैड़े कम्में च शामल नेई ओयो, वरन उन्दी गलत गल्लें गी सामनें अनो।

¹²किके उन्दे गोप्त कम्में दी चर्चा बी शर्म दी गल्ल ऐ।

¹³लेकन जिनैं गलत कम्में गी सामनें आन्यां जन्दा ऐ ओ सारे लोई कन्ने परकट ओदे न, किके जेड़ा सारे दे सारे गी परकट करदा ऐ, ओ लो ऐ।

¹⁴एस कारन ओ आखदे न ऐ, “ए सौने आलया बेज, ते मुड़दें चा जिंदा ओई जा; तां मसीह दी लो तेरे उपर चमकग।”

¹⁵एस आसतै त्यान कन्ने दिखो, के कनेई चाल चलदे ओ; निर्बुद्धियें आला लेखा नेई लेकन बुद्धिमानें आला लेखा चलो।

¹⁶ते हर बेलै गी कीमती समझो, किके देन पैड़े न।

¹⁷एस कारन निर्बुद्धि नेई बनयो, लेकन त्यान कन्ने समझो के प्रभु दी मर्जी के ऐ।

¹⁸अंगुरें दा रस दे नशेडी नेई बनयो, किके ए थुआड़ी जिंदड़ी नाश करदा ऐ, लेकन पवित्र आत्मा कन्ने परोंदे जायो,

¹⁹ते अप्पुं बिचें पजन ते स्तुति दे गीत ते आत्मिक गीत गांदे रवो, ते अपने-अपने मने च प्रभु दे सामने गांदे ते स्तुति करदे रवो।

²⁰ते मेशा सारीयें गल्लें लेई साड़े प्रभु यीशु दे नां कन्ने परमेसर पिता दी शुक्रगुजारी करदे रवो।

²¹मसीह दे डर कन्ने एक दुए दे ताबे च रवो।

²²ए पत्नियों, अपने-अपने पति दे ताबे च रवो, जियां प्रभु दे।

²³किके पति ते पत्नी दा सिर ऐ जियां के मसीह कलीसिया दा सिर र ऐ; ते मसीह अप्पुं गै अपनी जेंद दा उद्धार करने आला ऐ।

²⁴जियां कलीसिया मसीह दे ताबे च ऐ, उयांगै पत्नियां बी अर गल्ल च अपने-अपने पति दे ताबे च रौन।

²⁵ए पतियो, अपनी-अपनी कन्ने प्यार करो जियां मसीह ने बी कलीसिया कन्ने प्यार करियै अपने आप गी ओस आसतै देई दिता।

²⁶के उसी वचन थमां पानी दे स्नान कन्ने शोद्ध करियै पवित्र बना।

²⁷ते उसी एक ऐसी मैमा आली कलीसिया बनाईयै अपने कोल आजर करै, जेस च नां कलंक, नां चुर्री, नां कोई ऐसी चीज उवै, वरन पवित्र ते बेकसुर उवै।

²⁸एस चाली ठीक ऐ, के पति अपनी-अपनी पत्नी कन्ने अपनी गै जेंद आला लेखा प्यार करै। जेड़ा अपनी पत्नी कन्ने प्यार करदा दा ऐ, ओ अपने आप कन्ने प्यार करदा ऐ।

²⁹किके कुसे कदें बी अपनी जेंद कन्ने बैर नेई कित्ती वरन ओसदा पालन-पोषण करदा ऐ, जियां मसीह बी कलीसिया कन्ने प्यार करदा ऐ।

³⁰एस लेई अस मसीह दी जेंद दे अंग न।

³¹जियां पवित्र शास्त्र आखदा ऐ “एस कारन मनुक्ख अपने माता-पिता गी छुड़ीयै अपनी पत्नी कन्ने मिला दा रौग, ते ओ दुए एक तन ओगन।”

³²ए पेद ते बड़ा ऐ, लेकन आऊँ मसीह ते कलीसिया दे बारै च अखनां ऐं।

³³लेकन थुआड़े चा अर एक मनुक्ख अपनी पत्नी कन्ने अपने आला लेखा प्यार करै, ते पत्नी बी अपने पति दा आदर मांन करै।