Read Dogri कुलुस्सियों 1 Bible Online

कुलुस्सियों 1 - Dogri bible

कुलुस्सियों 1

¹पौलुस थमां, जेड़ा परमेसर दी मरजी कन्ने मसीह यीशु दा प्रेरित ऐ, ते प्रा तीमुथियुस थमां,

²मसीह च उनै पवित्र ते वश्वासजोग प्राऐं दे नां जेड़े कुलुस्से शैर च रौंदे न; साड़े पिता परमेसर कोलां तुसेंगी क्रपा ते शान्ति आसल ओंदी रवै।

³अस थुआड़े लेई लगातार प्रार्थना करियै, अपने प्रभु यीशु मसीह दे पिता, मतलब परमेसर दी शुक्रगुजारी करनयां न।

⁴किके असैं सुन्या ऐ, के मसीह यीशु उपर थुआड़ा विश्वास ऐ, ते सारें पवित्र लोकें कन्ने प्यार करदे ओ,

⁵ओस आस कित्ती दियां चीजें दे कारन जेड़ीयां थुआड़े आसतै सोर्ग च रखियां गेदियां न, जिन्दा बयान तोस ओस शोभ समाचार दी सच्चाई दे वचन च सुनी चुके दे ओ,

⁶जेड़ा थुआड़े कोल पूजया ऐ, ते जियां ओस शोभ समाचार दा फल पूरी दुनिया च, बददा जा करदा ऐ; उयांगै जेस देन थमां तुसें ए समाचार सुनयां, ते सच्चाई कन्ने परमेसर दी क्रपा गी पंछानया ऐ, थुआड़े च बी इयां गै बददा जन्दा ऐ।

⁷उसै शिखया गी तुसें साड़े कन्ने सेवा करने आले इपफ्रास कोलां सिखया, जेड़ा साड़े लेई मसीह दा वश्वासजोग सेवक ऐ।

⁸ओसने थुआड़े प्यार गी जेड़ा पवित्र आत्मा च ऐ साड़े उपर परकट कित्ता।

⁹एस लेई जेस देन असैं थुआड़े बारै च सुनया ऐ, असैं बी थुआड़े लेई ए प्रार्थना ते अर्ज करना नेई छुड़ी के तोस सारे आत्मिक ज्ञान ते समझ समेत परमेसर दी मरजी दी पंछान च परपुर ओई जाओ,

¹⁰तां जे थुआड़ा सारा चाल-चलन प्रभु दे योग उवै, ते ओ थुआड़े उपर सारें कम्में च खोश उवै, ते थुआड़े अर चाली दे पले कम्में दा फल लगे, ते तोस परमेसर दी पंछान च बददे जाओ,

¹¹ते ओदी मैमा दी शक्ति दे मताबक अर चाली दी शक्ति कन्ने तकड़े ओदे जाओ, इत्थैं तकर के खुशी कन्ने अर चाली च धीरज ते सबर दसी सको,

¹²ते पिता परमेसर दा शुक्र करदे रवो, जेस ने असेंगी एस जोग बनाया के लोई च पवित्र लोकें दे कन्ने परमेसर दी जैदाद च शामल ओचै।

¹³किके ओसने असेंगी गै सानु शतान दे न्हेरे दी ताकत चा छुडायै अपने प्यारे पुत्तर दे राज च साड़ा दाखला कराया,

¹⁴असेंगी मसीह दे लहू कन्ने छुटकारा, मतलब पापें दी माफी ओंदी ऐ,

¹⁵पुत्तर तां नेई दिखने आले परमेसर दा रूप ते सारी सृष्टि च जेठा ऐ।

¹⁶किके ओदे च सारीयां चीजां बनाई गेईयां, सोर्ग दियां ओंन जां तरती दियां, दिखने आलियां जां अनदिखयां, के सिंहासन, के राज, के प्रधानताएं, के अख्त्यार, सारीयां चीजां उसै थमां ते उसै लेई सेर्जी गेईयां न।

¹⁷मसीह सारी चीजें च पैला ऐ, ते सारीयां चीजां ओदे च टिकी दियां रौंदियां न।

¹⁸उवै जेंद, मतलब कलीसिया दा सेर ऐ; मसीह गै शुरुआत ऐ, ते मोड़दें चा जिन्दा ओनें आलें च जेठा के सारीयें गल्लें च मसीह गै प्रधान बनें।

¹⁹किके पिता परमेसर दी खुशी एदे च ऐ के ओदे च परमेसर दी सारी परपुरी वास करै,

²⁰ते ओदे सूली उपर रुडे दे खून थमां मेल-मलाप करियै, सारीयें चीजें दा मसीह थमां अपने कन्ने मेल करी लै, पवें ओ तरती दियां ओंन, पवें सोर्ग दियां।

²¹तोस जेड़े पैलैं बगाने हे ते अपने बुरे सलूक थमां मन छा परमेसर दे बैरी हे;

²²परमेसर ने ऊन मसीह दी शारीरिक जेंद च मौत थमां थुआड़ा बी मेल करी लेता तां जे तुसेंगी अपने सामने पवित्र ते बेधाग, ते बेकसुर बनाईयै आजर करै।

²³जेकर तोस मसीह पर विश्वास दी मनैद उपर टिके दे रौगे, ते ओस शोभ समाचार दी आस गी जिसी तुसें सुने दा ऐ नेई छुड़ो, जेसदा प्रचार अम्बर दे थल्लै दी सारी सृष्टि दे लोकें च कित्ता गीया, ते जेसदा आऊँ पौलुस सेवक बनया।

²⁴ऊन आऊँ उनै दुखें दे कारन जेड़े मैं थुआड़े आसतै चलै खुशी मनानां ऐं, जेड़े थुआड़े आसतै दोख चलना ऐं, मसीह जेंद दी खात्र अपनी जेंद च उनै दुखें गी पूरा करना, मतलब कलीसिया आसतै;

²⁵जेसदा आऊँ परमेसर दे ओस बंधोबस्त दे मताबक सेवक बनया, जेड़ा थुआड़े लेई मिगी सौम्पया गीया, तां जे आऊँ परमेसर दे वचन दा पूरा-पूरा प्रचार करां।

²⁶मतलब ओस पेद गी जेड़ा पराने बेले ते पीढ़ियें थमां गोप्त च रिया, लेकन ऊन ओदे पवित्र लोकें उपर परकट कित्ते दा ऐ।

²⁷जिन्दे उपर परमेसर ने परकट करना चाया, के उनेंगी जानकारी उवै के दुई जातीयें च ओस पेद दी मैमा दा मोल्ल के ऐ, ते ओ ऐ, के मसीह जेड़ा मैमा दी आस ऐ थुआड़े च रौंदा ऐ।

²⁸जेसदा प्रचार करियै अस अर एक मनुक्ख गी खबरदार करनयां न ते सारे ज्ञान कन्ने अर एक मनुक्ख गी सखानयां न, के अस अर एक मनुक्ख गी मसीह च सेध्द करियै पेश करचै।

²⁹ते इसै लेई आऊँ मसीह दी ओस शक्ति दे मताबक जेड़ी मेरे च अपनी शक्ति दे कन्ने असर पांदी ऐ, तन मन लाईयै मेंनत बी करना ऐं।