Read Dogri 1 थिस्सलुनीकियों 4 Bible Online

1 थिस्सलुनीकियों 4 - Dogri bible

1 थिस्सलुनीकियों 4

¹ए प्राओ, अस थुआड़े कन्ने ए अर्ज करनयां न, ते तुसेंगी प्रभु यीशु च समझानयां न, के जियां तुसें साड़े थमां जोग चाल चलना, ते परमेसर गी प्रसन्न करना सिखया ऐ, ते जियां तोस चलदे बी ओ, उयांगै ओर बी बददे जाओ।

²किके तोस जानदे ओ, के असैं प्रभु यीशु दे अधिकार थमां तुसेंगी केड़े-केड़े उक्म पजाए।

³किके परमेसर दी मर्जी ए ऐ, के तोस पवित्र बनो; मतलब ब्यभिचार कोलां दूर रवो।

⁴ते थुआड़े बिचा अर एक अपनी करेआली कन्ने पवित्रता ते आदर च रौना सीखै।

⁵ते ए कम जिंदु दी इच्छया दे गलाम ओईयै नेई, ते नां दुई जातीयें आला लेखा, जेड़ीयां परमेसर गी नेई जनदीयां।

⁶के एस गल्ल च कोई अपने विश्वासी प्रा गी नेई ठगै, ते ओदे कोलां नां जायज फायदा नेई लै, किके प्रभु यीशु इनें सारीयें गल्लें दा बदला लेने आला ऐ; जियां के असैं पैलैं गै थुआड़े कन्ने गलाया, ते मना कित्ता हा।

⁷किके परमेसर ने असेंगी अशोद्ध ओनें आसतै नेई, लेकन पवित्र जिंदड़ी जीनें आसतै बलाया ऐ।

⁸एस आसतै जेड़ा इनें गल्लें गी तोच्छ जानदा ऐ, ओ मनुक्खें गी नेई, लेकन परमेसर गी तोच्छ जानदा ऐ, जेड़ा अपना पवित्र आत्मा तुसेंगी दिंदा ऐ।

⁹पर विश्वासी पाईचारे दे प्रेम दे बारै च ए जरुरी नेई, के आऊँ तुसेंगी केछ लिखां, किके अप्पुं बिचें प्रेम करना तुसें अप्पुं गै परमेसर थमां सिखे दा ऐ;

¹⁰ते सारे मकिदुनिया लाके दे सब विश्वासी प्राऐं कन्ने तोस ऐसा प्रेम करदे बी ओ। लेकन ए प्राओ, अस थुआड़े अगें अर्ज करनयां न, के ओर बी एस च बददे जाओ,

¹¹ते जियां असैं तुसेंगी उक्म दिता ऐ, उयांगै चोप्प-चाप रौने गी ते अपना-अपना कमकाज करने किदै, ते अपने-अपने हत्थें थमां कमाने दी कोष्ट करो;

¹²तां जे जेड़े विश्वासी नेई ऐ न, ओ थुआड़े रौने दे तरीके गी दिखियै थुआड़ी इज्जत करन, ते तुसें कुसे दे सारै रौने दी नोबत नेई पवै।

¹³ए विश्वासी प्राओ, अस नेई चांदे, के तोस उन्दे बारै च जेड़े मसीही विश्वास च पैलैं दे मरी गेदे न, अनजांन रवो; ऐसा नेई उवै, के तोस दुए आला लेखा बसोस करो जिनेंगी मरने कोलां बाद आस नेई।

¹⁴किके जेकर अस विश्वास करनयां न, के यीशु मरया, ते जिंदा बी ओई गीया, तां उयांगै परमेसर उनेंगी बी जेड़े यीशु च सेई गेदे न, ओदे कन्ने गै बापस लेई औग।

¹⁵किके अस प्रभु यीशु दे वचन दे मताबक थुआड़े कन्ने ए आखनयां न, के अस जेड़े जिंदे न, ते प्रभु यीशु दे बापस औने तकर बचे दे रौगे, तां सुत्ते दें (जेड़े मरी गेदे न) थमां कदें बी अगें नेई बदगे।

¹⁶किके प्रभु यीशु अप्पुं गै सोर्ग थमां उतरग; ओस बेलै ओदे उक्म दी ललकार, ते प्रधान दूत दी बाज सनाई देग, ते परमेसर दा नरसिंगा बजाया जाग; ते जेड़े मसीह च मरे दे न, ओ पैलैं जिंदे ओई जागन।

¹⁷ओस बेलै अस जेड़े जिंदे ते बचे दे रौगे, उन्दे (जेड़े चुकी लेते गै दे न) कन्ने बदले उपर चुकी लेते जागन, के अवा च प्रभु कन्ने मिलन; ते एस रीति कन्ने अस कन्ने प्रभु कन्ने मेशा रौगे।

¹⁸एस चाली इनें गल्लें थमां एक दुए गी तसल्ली दिन्दे रवा करो।