Read Dogri इब्रानियों 2 Bible Online

इब्रानियों 2 - Dogri bible

इब्रानियों 2

¹एस कारन चाईदा, के अस उनै गल्लें उपर जेड़ीयां असैं सुनी दियां न जादै त्यान देचै, ऐसा नेई उवै के पडकीयै उन्दे थमां दूर चली जाचै।

²किके जेड़ा वचन सोर्गदूत थमां आखया गीया हा। जेसलै ओ टिके दा रिया ते अर एक पाप ते उक्म नेई मनने दी परमेसर ने उनेंगी सज्जा दिती,

³तां अस लोग ऐसे बड्डे उद्धार थमां परचेंत ओईयै कियां बची सकदे आं? जेसदी चर्चा पैलो-पैल प्रभु थमां ओई, ते सुनने आलें थमां असेंगी एस दे बारै च पक्का ओया।

⁴ते कन्ने गै परमेसर बी अपनी मर्जी दे मताबक चैन, ते चम्तकारी कम, ते लग-लग केसम दी शक्ति दे कम, ते पवित्र आत्मा दे वरदान बंडने थमां एस दी गुआई दिन्दा रिया।

⁵परमेसर ने ओस औने आली दुनिया गी जेसदी चर्चा अस करा करनयां न, सोर्गदूतें दे दीन नेई कित्ती।

⁶वरन कुसे कदें ए गुआई दिती ऐ, “मनुक्ख के ऐ, के तुं ओसदी चेंता कित्ती ऐ? जां मनुक्ख दा पुत्तर के ऐ, के तू ओसदा खयाल करना ऐ?

⁷तो उसी सोर्गदूतें थमां केछ गै घट कित्ता; तो ओस उपर मैमा ते आदर दा मोकट रखया, ते उसी अपने अथ्थें दे कम उपर अख्त्यार दिता।

⁸तो सारा केछ ओदे पैरें दे थलै करी दिता।” एस आसतै जेसलै के ओसने सारा केछ ओदे दीन करी दिता, तां ओसने केछ बी नेई रख छुड़या, जेड़ा ओदे दीन नेई ऐ। लेकन अस अयें तकर सारा केछ ओदे दीन नेई दिखदे।

⁹लेकन अस यीशु गी जेड़ा सोर्गदूतें थमां केछ गै घट कित्ता गीया हा, मौत दा दोख चेलने दे कारन मैमा ते आदर दा मोकट पाए दा दिखनयां न, तां जे परमेसर दी क्रपा दे कन्ने ओ अर एक मनुक्ख आसतै मौत दा सुआद चखै।

¹⁰किके जेस आसतै सारा केछ ऐ, ते जेस थमां सारा केछ ऐ, उसी इयै अच्छा लगया के जेसलै ओ मते पुत्रें गी मैमा च पेज्जे, तां उन्दे उद्धार दे कर्ता गी दोख चेलने थमां सेध करै।

¹¹किके पवित्र करने आला ते जेड़े पवित्र कित्ते जन्दे न, सारे एक गै पिता परमेसर थमां न; एसकरी यीशु उनेंगी प्रा, पैने आखने लेई नेई शर्मान्दा।

¹²पर ओ आखदा ऐ, “आऊँ तेरा नां अपने प्राऐं गी सुनागा; सभा दे बेच आऊँ तेरा पजन गागा।”

¹³ते पी आखया, “आऊँ उन्दे उपर परोसा रखगा।” ते पी ए, “देख आऊँ उनै बच्चें समेत जेड़े परमेसर ने मिकी दिते दे न।”

¹⁴एस आसतै जेलै के बच्चे मास ते खून दे पागी न, ते ओ अप्पुं बी उन्दे आला लेखा उन्दे च शामल ओई गीया, तां जे मौत थमां उसी जिसी मौत उपर शक्ति मिली हे, मतलब शतान गी नकम्मा करी दे;

¹⁵ते जिन्नें मौत दे डर दे मारे जिंदड़ी पर गलाम च फसे दे हे, उनेंगी छुड़ाई लै।

¹⁶किके प्रभु यीशु तां सोर्गदूतें गी नेई वरन अब्राहम दे औलाद गी संभालदा ऐ।

¹⁷एस कारन उसी चाईदा हा, के सारीयें गल्लें च अपने साथी प्रांऐं आला लेखा बनें; जेस कन्ने ओ उनै गल्लें च जेड़ीयां परमेसर कन्ने सम्बन्ध रखदियां न, एक दयालु ते वश्वासयोग महायाजक बनें तां जे लोकें दे पापें आसतै अपनी कुर्बानी दे।

¹⁸किके जेसलै ओसने परिख्या दी आलात च दोख चेलया, तां ओ उन्दी बी मदद करी सकदा ऐ, जिंदी परिख्या ओंदी ऐ।