Read Dogri 1 यूहन्ना 3 Bible Online

1 यूहन्ना 3 - Dogri bible

1 यूहन्ना 3

¹दिखो, पिता परमेसर ने साड़े के जियां प्यार कित्ता ऐ, के अस परमेसर दे बच्चे आखे जाचै; ते अस ऐ न बी। एसकरी दुनिया असेंगी नेई जानदी, किके ओसने उसी बी नेई जानया।

²ए प्यारो, ऊन अस परमेसर दे बच्चे न, ते ऊन तकर ए परकट नेई ओया, के अस के केछ ओगे। इनां जानदे न, के जेसलै यीशु मसीह परकट ओगन तां अस बी ओदे आला लेखा ओगे, किके अस उसी उयांगै दिखगे जियां ओ ऐ।

³ते जेड़ा कोई मसीह उपर ए आस रखदा ऐ, ओ अपने आप गी उयांगै पवित्र करदा ऐ जियां ओ पवित्र ऐ।

⁴जेड़ा कोई पाप करदा रौंदा ऐ, ओ परमेसर दे कनून दा वरोध करदा ऐ; ते पाप तां परमेसर दे कनून दा वरोध ऐ।

⁵ते तोस जांनदे ओ, के यीशु मसही एसकरी करी आया के पापें गी अपने उपर चुकी लै; ते ओदे च कोई पाप नेई।

⁶जेड़ा कोई ओदे च बने दा रौंदा ऐ, ओ पाप नेई करदा; जेड़ा कोई पाप करदा ऐ, ओनें नां गै मसीह गी दिखया ऐ ते नां उसी जानया ऐ।

⁷ए प्यारे बच्च्यो, कुसे दे पुआने च नेई आयो। जेड़ा तर्म दे कम करदा ऐ, उवै मसीह आला लेखा तर्मी ऐ।

⁸जेड़ा कोई पाप करदा ऐ, ओ शतान थमां ऐ, किके शैतान शुरू थमां पाप करदा आया ऐ। परमेसर दा पुत्तर एसकरी आया करे शतान दे कम्में गी नाश करै।

⁹जेड़ा कोई परमेसर दा बच्चा ऐ, ओ पाप करदा नेई रौंदा; किके परमेसर दी जान ओदे च बनी दी रौंदी ऐ, ते ओ पाप करी गै नेई सकदा, किके परमेसर थमां जमया ऐ।

¹⁰एदे कोलां परमेसर दे बच्चे ते शतान दे बच्चे लबदे न; जेड़ा कोई तर्म दे कम नेई करदा, ओ परमेसर थमां नेई, ते नां ओ जेड़ा अपने प्रा कन्ने प्यार नेई करदा।

¹¹किके जेड़ा समाचार तुसें शुरू थमां सुनया, ओ ए ऐ, के अस एक दुए कन्ने प्यार करचै;

¹²ते आदम दा पुत्तर कैन आला लेखा नेई बनयो, जेड़ा ओस दुष्ट शतान थमां हा, ते जेनें अपने प्रा दी अत्या कित्ती। ते ओदी अत्या केस कारन कित्ती? एस कारन के ओदे कम पैड़े हे, ते ओदे प्रा दे कम तर्म दे हे।

¹³ए विश्वासी प्राओ, जेकर दुनियां दे लोक थुआड़े कन्ने बैर करदे न तां रांन नेई ओयो।

¹⁴अस जांनदे आं, के अस मौत बिचा निकलियै जिंदड़ी बेच पूजे दे न; किके अस विश्वासी पराऐं कन्ने प्यार करने न। जेड़ा प्यार नेई करदा, ओ मौत दी आलात च रौंदा ऐ।

¹⁵जेड़ा कोई अपने प्रा कन्ने बैर करदा ऐ, ओ अत्या करने आला ऐ; ते तोस जांनदे ओ, के कुसे अत्या करने च मेशा दी जिंदड़ी नेई रौंदी।

¹⁶असैं प्यार एदे थमां जानया, के यीशु मसीह ने साड़े लेई अपने प्राण देई दिते; ते असैं बी विश्वासी पराऐं लेई प्राण देना चाईदे।

¹⁷लेकन जेस कुसे कोल दुनिया दी तान दौलत उवै, ते ओ अपने प्रा गी जरुरत च दिखियै ओदे उपर तरस नेई खाणा चा, ते ओदे च परमेसर दा प्यार कियां बनी रेई सकदा ऐ?

¹⁸ए मेरे प्यारे बच्च्यो, अस वचन ते जिभ थमां गै नेई, लेकन कम ते सच्चाई थमां प्यार करचै।

¹⁹अस जेलै एक दुए कन्ने प्यार करगे, एदे छा गै अस जानगे के अस सच्चाई दे आं; ते जेस गल्ल च साड़ा मन असेंगी कसुरबार समझग, ओदे बारै च अस परमेसर दे सामने अपने-अपने मन गी थमी सकगे;

²⁰किके परमेसर साड़े मन थमां बड़ा ऐ, ते सारा केछ जानदा ऐ।

²¹ए प्यारो, जेकर साड़ा मन असेंगी दोष नेई दियै, तां अस परमेसर दे सामने इम्त च बने रेई सकनयां न;

²²ते जे केछ अस मंगदे आं, ओ असेंगी ओदे थमां मिलदा ऐ; किके अस ओदे उक्में गी मननयां न; ते जेड़ा केछ उसी छैल लगदा ऐ, उवै करनयां न।

²³ते परमेसर दा उक्म ए ऐ के अस ओदे पुत्तर यीशु मसीह दे नां च विश्वास करचै, ते जियां ओसने असेंगी उक्म दिता ऐ ओदे मताबक गै अप्पुं-बिचें प्यार करचै।

²⁴ते ओ जेड़ा परमेसर दे उक्म गी मनदा ऐ, ओ ओदे च, ते परमेसर ओदे च बना रौंदा ऐ; ते एदे छा, मतलब ओस पवित्र आत्मा थमां जेड़ा ओसने असेंगी दिता ऐ, अस जांनदे आं, के ओ साड़े च बने दा रौंदा ऐ।