Read Dogri 1 यूहन्ना 5 Bible Online

1 यूहन्ना 5 - Dogri bible

1 यूहन्ना 5

¹जेसदा ए विश्वास ऐ के यीशु गै मसीह ऐ, ओ परमेसर थमां पैदा ओया ऐ; ते जेड़ा अपने कोई पैदा करने आले पिता परमेसर कन्ने प्यार करदा ऐ, ओ ओदे कन्ने बी प्यार करदा ऐ, जेड़ा ओदा बच्चा ऐ।

²जेलै अस परमेसर कन्ने प्यार करनयां न, ते ओदे उकमें गी मननयां न, तां एदे थमां अस जांनदे आं, के अस परमेसर दे बच्चें कन्ने प्यार करनयां न।

³किके परमेसर कन्ने प्यार करना ए ऐ, के अस ओदे उक्में गी मनचै; ते ओदे उक्म कठोर नेई।

⁴किके जेड़ा केछ परमेसर थमां पैदा ओया ऐ, ओ दुनिया उपर जै आसल करदा ऐ; ते ओ जै जेस कन्ने दुनिया उपर जै आसल ओंदी ऐ साड़ा बश्वास ऐ।

⁵दुनिया उपर जै पाने आला कोन ऐ? सेर्फ ओ जेसदा ए बश्वास ऐ, के यीशु गै परमेसर दा पुत्तर ऐ।

⁶ए उवै यीशु मसीह ऐ, जेड़ा परमेसर थमां एस दुनिया च पेजया गीया, ते पानी कन्ने पवित्रशनांन लेता, ते जेसलै ओ मरया ओसदा खून रुडया गीया; ओ नां सेर्फ पवित्रशनांन लेने आया, लेकन पानी दे ते खून सूली उपर मरने थमां अपना खून रुडानें आसतै आया पवित्र आत्मा एस गल दी गवाई दिन्दा ऐ। ते जेड़ा गवाई दिन्दा ऐ, ओ आत्मा ऐ; किके आत्मा सच्च ऐ।

⁷गवाई देने आले त्रै न,

⁸आत्मा, ते पानी, ते खून; ते त्रवै एक गै गल्ल उपर सैमत न।

⁹जेलै अस मनुक्खें दी गवाई मनी लीनयां न, तां परमेसर दी गवाई ओदे थमां खरी ऐ; ते परमेसर दी गवाई ए ऐ, के ओनें अपने पुत्तर दे बारै च गवाई दिती ऐ।

¹⁰जेड़ा परमेसर दे पुत्तर उपर विश्वास करदा ऐ, ओ अपने दिले च गै गवाई रखदा ऐ। जेस ने परमेसर उपर विश्वास नेई कित्ता, ओसने उसी चुट्ठा आखया, किके ओसने ओस गवाई उपर विश्वास नेई कित्ता, जेड़ी परमेसर ने अपने पुत्तर दे बारै च दिती ऐ।

¹¹ते ओ गवाई ए ऐ, के परमेसर असेंगी मेशा दी जिंदड़ी दिती ऐ, ते ए जिंदड़ी ओदे पुत्तर च ऐ।

¹²जेसदा पुत्तर कन्ने गुडा रिश्ता ऐ, ओदे कोल मेशा दी जिंदड़ी ऐ; ते जेसदे कोल परमेसर दा पुत्तर नेई, ओदे कोल मेशा दी जिंदड़ी बी नेई ऐ।

¹³मैं तुसेंगी, जेड़े परमेसर दे पुत्तर दे नां उपर विश्वास करदे ओ, एसकरी लिखया ऐ के तोस जानी लिओ के मेशा दी जिंदड़ी थूआडी ऐ।

¹⁴ते असेंगी परमेसर दे सामने जेड़ी इम्त ओंदी ऐ, ओ ए ऐ; के जेकर अस ओदी मर्जी दे मताबक लेखा केछ मंगने न, तां ओ साड़ी सुनदा ऐ।

¹⁵ते जेलै अस जांनदे न, के जे केछ अस मंगने न परमेसर साड़ी सुनदा ऐ, तां एबी जांनदे न, के जेड़ा केछ असैं ओदे कोलां मंगया, ओ थोया ऐ।

¹⁶जेकर कोई अपने विश्वासी प्रा गी ऐसा पाप करदे दिखै, जेसदा नतीजा मौत नेई उवै, तां अर्ज करो, ते परमेसर उसी उन्दे लेई, जिनैं ऐसा पाप कित्ता ऐ जेदा फल मौत नेई उवै, परमेसर उनेंगी जिंदड़ी देग। पाप ऐसा बी ओंदा ऐ, जेसदा नतीजा मौत ऐ; एदे बारै च आऊँ अर्ज करने लेई नेई आखदा।

¹⁷सब केसम दा अतर्म तां पाप ऐ, लेकन ऐसा पाप बी ऐ, जेदा नतीजा मौत नेई।

¹⁸अस जांनयां न, के जेड़ा कोई परमेसर च पैदा ओया ऐ, ओ पाप नेई करदा रौंदा; लेकन परमेसर दा पुत्तर यीशु, उसी ओ बचाई रखदा ऐ, ते ओ दुष्ट शतान उसी छुई नेई सकदा।

¹⁹अस जांनदे न, के अस परमेसर दे न, ते सारी दुनिया ओस दुष्ट शतान दे कब्जे च ऐ।

²⁰अस एबी जांनयां न, के परमेसर दा पुत्तर एस तरती उपर आई गेदा ऐ ते ओसने असेंगी समझ दिती ऐ, के अस ओस सच्चे गी पछांनयां न, ते अस ओदे च जेड़ा सच्चा ऐ, मतलब ओदे पुत्तर यीशु मसीह च रौंदे न। सच्चा परमेसर ते मेशा दी जिंदड़ी उवै गै ऐ।

²¹ए बच्चयो, अपने आप गी ऐसी सारीयें मूरतीयें छा बचायो जेड़ीयां परमेसर दी जगा लेंदीयां न।