Read Dogri प्रकाशितवाक्य 15 Bible Online

प्रकाशितवाक्य 15 - Dogri bible

प्रकाशितवाक्य 15

¹पी आऊँ सोर्ग च एक ते बड़ा ते होर अद्भोद चेन्न दिखया, मतलब सत्त सोर्गदूत जिंदे कोल सत्त आखर बिपत्तियाँ हियां, किके उन्दे खत्म ओई जाने उपर परमेसर दे गुस्सै दा अन्त ऐ।

²ओस बेलै आऊँ अग्ग मिले दे कच्चे दा एक समुंद्र दिखिया; ते जेड़े लोक उस्स जानबर उपर ते उस्स दी मूरत उपर ते ओदे नां दे अंक उपर जीत आसल कित्ती हे, उनेंगी उस्स कच दे समुंद्र दे कोल परमेसर दी वीणें गी लेते दे खड़े दिखया।

³ओ परमेसर दे दास मूसा दा ते मेम्ने दा गाना गाइ-गाइयै आखदे हे, “हे सर्वशक्तिमान प्रभु परमेसर, तेरे कम बड़ा ते अद्भुत न; हे जुग जुग दे राजा, तेरी चाल ठीक ते सच्ची ऐ।”

⁴“हे प्रभु, कुन्न तेरे थमां नेई डरग? ते तेरे नां दी मैह्मा नेई करग? किके सिर्फ तू गै पवित्र ऐ। सारी जातीयां आईयै तेरे समुक मत्था टेकगन ओगन, किके तेरे न्याय दे कम परगट ओई गेदे न।”

⁵एस दे बाद आऊँ दिखया सोर्ग बिच गुआई दे तम्बू दा मंदर खोलया गीया;

⁶ते ओ सत्त सोर्गदूत जिंदे कोल सत्त बिपतियाँ हियां, मलमल दे साफ़ ते चमकदार कपड़े लाए दे ते छाती उपर सुने दी पट्टियां बन्ने दे मंदर बिचा निकले।

⁷ओस बेलै ओनें चोने प्राणियें बिचा एक ने ओनें सत्ते सोर्गदूतें गी परमेसर, जेड़ा जुगा जुग जिंदा ऐ, ओदे गुस्सै कन्ने परोचे दे सुने दे सत्त कटोरे दित्ते;

⁸ते परमेसर दी मैमा ते ओदी समर्थ दे कारन मंदर च तुंआ परोची गीया, ते जेस ले तकर ओनें सत्ते सोर्गदूतें दी सत्ते बिपतियाँ खत्म नेई ओई ओस बेलै तकर कोई बी मंदर च नेई जाई सकया।