Read Doyayo MATA 14 Bible Online

MATA 14 - Doyayo bible

MATA 14

¹A ɔ̧tɔ ge waar gbɔɔl bɔ Hirudus a Galile yɔ lag hi book Yeesu nuŋgɔ lɛl sɛwi,

²raa walɛsɛrɛ ɔ̧ɔ̧ wɔ a Yohana Bɛtmɛm Hotingoya bɔ ga! Rɛml a wɔrkɛ tees du! Hinɔ gii tɛŋk wɛrɛ hi midig lab a gi naan du.

³Yɔ anbɔ, Hirudus da raa nɛ dood hi wa̧a̧ Yohana hi wɔge hi yaage a luknɔ du a yɛ̧ɛ̧tɔ Filib nistɔ Hiruduya dɔŋgɔ,

⁴anyɔ da Yohana raa Hirudus a rı̄ı̄ an mɔ loo yɛ̧ɛ̧ mɔ nisɔ an nis mɔ gɛ.

⁵Yɔ Hirudus ha̧a̧g nɛ an gi gbɔm Yohana be, yɔ mɛɛ a dood hi gig seek an Bɛtya̧a̧kɛŋkya yɔ hoobha̧a̧gha̧ naan yaak gi muulɛ.

⁶Yɔ Hirudus naab wɛlɔ yɔ hi mɔɔg gedu tuurɔ, nis bɔ Hiruduya waasiŋ zaa nabhin a dood rɔ̀bɛ wɔ hi lɔlgbar sɛw. Yɔ Hirudus gbɛn anbɔ kpoosɔ gi harige,

⁷raa hi hindɛŋgliki a be gaag hinyɔ gɔ gi warib sɛw.

⁸An hinyɔ nɔɔtɔ sɔmbinge wawa bɔ rek warige a gaabe Yohana zulɔ bɔ gii a hɛb du.

⁹Yɔ waar bɔ lag anbɔ kpoosɔ ɗɔɔbɔ; hɔnɛ a hinyɔ dɛŋgl geha sɛwi, hi a dood rɔ̀bɛ wɔ hi dɔŋgo, raa dood an hi gaage.

¹⁰Yaa doo za rek dɛ̧ɛ̧z Yohana zulɔ bɔ a luknɔ du,

¹¹hi kamz hɛb du hi zaa hi gaa wawa bɔ kam a nɔɔtɔ ge.

¹²Yɔ Yohana walɛsɛrɛ ɔ̧ɔ̧ wɔ hi lag anbɔ hi zaa hi loo Yohana wɔrkɔ bɔ hi rek hi i̧i̧ gɔ. Hi rek hi raas Yeesu dɔglɔ be.

¹³Yɔ Yeesu kɛm dɔgl bɔrɔ ɗun hɔdi rek a mɛmbalya̧, da kar lɛmb du rek lɛlza dɔɔmi gi gbunu. Hɔnɛyɔ dood saal wɔ hi kɛm anbɔ hi tuuz a waal gbɔlɛ wɔ hi du hi ren dɔɔ hi daa gbɔnɔ a mɛmbalya̧ hi fɔ Yeesu.

¹⁴Yɔ sil a lɛmb du gi gbɛn saal kitɛ wɔrɔ, mɛɛsihi ya̧a̧rɛ za̧a̧s gumtilya̧ wɔ hi kamsig nɛ be.

¹⁵Yɔ ɔ̧t legɔ, walɛsɛrɛ wɔ hi zaa Yeesu ge hi raage a nɛ lɛl gi bulik be, wɛɛ lɛlyɔ di hɛtdɔŋ be, yaam dood saal wɛrɛ hi rek a raat dɛɛt wɔ du an hi zebz leesɛ.

¹⁶Yeesu raahi a taa an hi rekɔ; nɛɛ hi zul nɛ gaanɛhi leesɛ.

¹⁷Wɔrɔ hi wɛɛ hi googe a gɛ wi gin kok kiml nɔɔn dihɛ hi dut eerɛ.

¹⁸Yeesu wɛɛ raahi a kamsinbe kok bɔ hi dut bɔ hɛdi.

¹⁹Wɛɛ raa dood saal wɔ hi ɗɔɔt a hɛtyɛ̧s ha. Wɛɛ loo kok kiml nɔɔn wɔ hi dut eerɛ wɔ pɛɛ lɔl wɛɛha baan Bɛto. Ɓɛɛl kok kiml wɔ gaa walɛsɛrɛ ɔ̧ɔ̧ wɔ hi gɛ̧ɛ̧s dood saal wɔ.

²⁰Dood wɔ sɛw hi le kok wɔ hi hi̧i̧. Walɛsɛrɛ wɔ hi mɔks kok ɓɛɛkil wɔ hi zɛ̧ɛ̧r dɛl koobl daa eerɛ.

²¹Walɛ wɔ hi le kok wɔ sɛw kitigya̧ gi an duk nɔɔnɛ. Nɛɛd wɔ hi waat wɔ hi ɓɛrihi gɛ.

²²Kuudu Yeesu wɛɛ fɛ̧ɛ̧ walɛsɛrɛ ɔ̧ɔ̧ wɔ hi kar lɛmb du hi dor a mɛmbal kasiŋ zaa bɔ ge an gii gi yaak saal wɔ kuudu be.

²³Yɔ yaa saal wɔ gi da̧a̧, gii wɛɛ da dɔɔ a ga̧a̧t ha gi gbunu an gi zɔ̧ Bɛto. Yɔ yɛ̧ms bulɔ gi a ga̧a̧t bɔ hage gi gbunu.

²⁴Lɛmb bɔ hɛmlɔ gi a mɛmbal teesdu, yɔ zɛk gi fɛko, gi a̧a̧nik lɛmb rekɔ doosɛ, mɛmɗukil wɔ hi gig zɛksig be.

²⁵A bi̧i̧l ɗɔbt du Yeesu ɛmz a mɛm bɔ hage zaa a walɛsɛrɛ ɔ̧ɔ̧ wɔ hi a lɛmb du.

²⁶Yɔ walɛsɛrɛ ɔ̧ɔ̧ wɔ hi gbɛnig gi zaak a mɛm bɔ hage kol tuuhitu, hi raa a ɗoodyɔ. Yɔ hoobha̧a̧hi ha̧a̧ltɔnɔ, hi ɓoo kaalɛ.

²⁷Hɔnɛ ɓɔrbɔ Yeesu raahi a beya, ɓaasin kpoos nɛ, bɔ hoob gi ha̧a̧nɛ!

²⁸Piyɛr wɛɛ raage a Waar i, gid mɔya, raabe be re be dagumɔ a mɛm bɔ hage.

²⁹Yeesu ta̧a̧ a nɛ zaamɔ. Piyɛr sil a lɛmb bɔ gedu ɛmb rek a Yeesu ge a mɛm bɔ hage.

³⁰Hɔnɛyɔ gbɛn zɛk gi fɛk ha̧a̧ltɔnɔ hoobha̧a̧gha̧, wɛɛ baar iŋk a mɛm du, ɓoo kaalɛ a Waar i, za̧a̧sibe!

³¹Ɓɔrbɔ Yeesu yɔd naanɔ wa̧a̧ge raage a hey! mɔɔ doo ɗɔbsigkaasiya, nɔ mɔ faa nɔ?

³²Hi wɛɛ hi kar a lɛmb du hi eer sɛw zɛk bɔ wɛɛ erɔ.

³³Yɔ anbɔ walɛsɛrɛ zaadɛ wɔ hi gi a lɛmb bɔ gedu hi wɛɛ hi zagl a Yeesu muutdu hi ɗɔbsige hi raage a hi rɔbo mɔ gi Bɛt Waayɔ!

³⁴Yɔ Yeesu hi walɛsɛrɛ ɔ̧ɔ̧ wɔ hi kar mɛmbal bɔ gi da̧a̧ hi tuur a Gerezanɛ hɛbt du, hi silɔ.

³⁵Dood wɔ hi gi a lɛl bɔ ge hi bɛɛ Yeesu gbɛnik hi mɛɛge, hi rek hi raam ramsɔ a lɛl sɛw. Yɔ dood wɔ hi lag anbɔ hi kamsig gumtil kit wɔ,

³⁶hi zɔ̧ge an gi ɔɔhi hi ki̧i̧ gbandilɔ tɔlya̧ bɔ mɔɔti an hi za̧a̧. Dood wɔ hi gig ki̧i̧k sɛw hi za̧a̧za̧.