Read Doyayo MATA 15 Bible Online

MATA 15 - Doyayo bible

MATA 15

¹Farisaya zaadɛ hi Bɛtmaakdɔkya zaadɛ wɔ hi fu̧u̧z a Urusalima hi zaa hi zɛm Yeesu hi warige

²a nɔ walɛsɛrɛ mɔ wɔ hi fɔ̄b maak yɔ ɗɛntɛ hi gog gɛ hi hinlek hi naan ɓi̧i̧lim nɔ?

³Yeesu wɛɛ goohi a nɛɛ be, nɔ nɛ fɔ̄b maakdɔgl yɔ Bɛt gaa gɛ, nɛ wɛɛ nɛ fɔk maakdɔgl yɔ ɗɛntɛ nɛ hi goksin giya?

⁴Bɛt raa be a ɗɔbsum baa mɔ hi nàà mɔ; wɛɛ za̧a̧nyɔ gɔ gi nii baatɔ zaabe nɔɔtɔ hi gbɔŋge.

⁵Yɛrɛ nɛ hinza goko a doo gi raa baatɔ, zaa lab gɛ nɔɔtɔ a rɔɔs yɔ gɔ be ɓeg nɛ an be ɗansumɔ hi gbaas Bɛt ga, za̧a̧nɔ gi raa anbɔ taa an gi ɗɔbs baatɔ hi nɔɔtɔ.

⁶Nɛ gɔ nɛ ha̧tirgo Bɛt dɔgl tɛŋkɔ anyɔ ro hi maakdɔgl nɛ bɔ.

⁷Nɛɛ dood mɛlya ha̧a̧l wɛ, Esaya dɔg rɔbo a nɛ zulha gi raa

⁸a Bɛt raa a dood wɛrɛ hi gib ɗɔbsig hi dɔgl tɔsyɔ, wɛɛ kpoosya̧ hɛml hi beya.

⁹Hi gib ɗɔbsig di tɔs, hi gok dɔgl yɔ dood hi ɔɔnihi gii an hinɔ gi Bɛt dɔgl ɔ̧ɔ̧nɛ.

¹⁰Yeesu wɛɛ el dood saal wɔ raahi a ɓaan tɔn nɛ nɛ kɛm hinyɔ be dɔko.

¹¹Hinyɔ gi gulk a doo ya̧a̧ du wɛɛnig ɓi̧i̧lumya gɛ, hinyɔ gi tuuzig doo kpoos du gii gig ɓi̧i̧luko.

¹²Walɛsɛrɛ wɔ hi sɔɔ Yeesu ge hi warige a mɔ́ mɛ̄ɛ̄ a Farisaya wɔ hi kɛm hin bɔrɔ anbɔ kpoosya̧ nɔɔhinɔ gɛ ya?

¹³Gii goo a Baa be yɔ gi a bɛtha tɛ̧ɛ̧ yɔ rɛɛ gɛ sɛw hi durige.

¹⁴Ɔɔnɛhi hɔ! Hi gi yɔ̧ɔ̧rɛ wɔ hi tɛlik yɔ̧ɔ̧rɛ zaadɛ hiya. Yɔ̧ɔ̧r gi gi tɛlik yɔ̧ɔ̧r za, hi mat eer sɛw a zɛŋk du.

¹⁵Piyɛr wɛɛ raage a wadsiwi ya̧a̧daanik bɔrɔ hinɔ.

¹⁶Yeesu wɛɛ raahi a nɛ taan zul an nɛ kɛm hin bɔrɔ te ya?

¹⁷Nɛ́ kɛ̄m a hinyɔ gi talik a ya̧a̧ du gii gi tiik a buudu gi wɛɛ gi tuuk a yaatillɛl du gɛ ya?

¹⁸Yɛrɛ hinyɔ gi tuuzig a doo ya̧a̧ du gi gi fu̧u̧zig a gi kpoos du gii gi gaak doo ɓi̧i̧limi.

¹⁹Mɔkil ha̧a̧l wɔ gi tuuk a doo kpoos du gɛrɛ: zulgbɔŋki, mansi, ɓi̧i̧limi, luurɛ, ya̧a̧gɔ̧ɔ̧nɛ hi mɛlbooki.

²⁰Hinwɔ hi gi dood ɓi̧i̧lik hii wɔ. Hinlek hi naan libto ɓı̧̄ı̧̄l doo gɛ.

²¹Yeesu ɗund hɔdi rek a Tirus hi Sidɔŋg hɛbto.

²²Nɛɛ za Kananaya yɔ gi waak a lɛl bɔ ge zaa a ge ɓooya̧a̧ a Waar i, Dawda Waawalɔ, mɛɛsibe ya̧a̧rɛ! Waa be siŋg gin loorɛha̧a̧l a gi muul du, gig ha̧a̧nik ya̧a̧r ha̧a̧ltɔnɔ.

²³Yɔ Yeesu goo hinza fɛŋ mɔɔt gɛ be, walɛsɛrɛ ɔ̧ɔ̧ wɔ hi zaa hi raage a yaamɔge gi rekɔ, giwɛ kaal fɔmnzugo.

²⁴Gii wɛɛ ta̧a̧ raa a hi yaazib an be tɛb tam wɔ hi wag a Israhila hii kpɔd.

²⁵Nis bɔ zaa zagl a Yeesu muutdu raa a Waar i, ɗaasibe!

²⁶Yeesu wɛɛ ta̧a̧ a bɛ̄r an hi loo ya̧a̧mwaat leesɛ hi bits kaa gɛ.

²⁷Nis bɔ wɛɛ goo a hɔɔ, Waar i, mɔ dɔg rɔbo! Yɛrɛ kaa wɔ hi lek lees rumnt wɔ hi mɛɛlik a ɗɛntya̧ silya̧ di gii hɛw.

²⁸Yeesu wɛɛ ta̧a̧ge a eh! Naadyɔ, ɗɔbsig mɔ daar lɛl gɔ! Hinyɔ mɔ ɛrɔ mɔ daagɔ. Nis bɔ waasiŋ za̧a̧ gɔ ɓɔrbɔ be.

²⁹Yɔ Yeesu ɗund hɔdi gi rek a Galile mɛmbalya̧ da kar ɗɔɔt a ga̧a̧t ha.

³⁰Dood saal gbɔlɛ hi zaa a ge hi kamsig gumtil kittɔnɔ, dɔɔ ɓɛrkilya wɔ be, yɔ̧ɔ̧rɛ wɔ be, dɔɔ duulya wɔ be, su̧u̧kɛ wɔ be hi gumtil zaadɛ sɔmsɔm hi zaa hi gihi gbaak a Yeesu dɔɔ dɔŋdi gihi za̧a̧sugo.

³¹Dood wɔ hi gbɛn su̧u̧kɛ wɔ hi ya̧a̧booko, dɔɔ wɔlya wɔ be dɔɔya̧ wɛɛ gɛmsɔ, dɔɔ gumtilya wɔ be hi wɛɛ hi ɛmbuko, yɔ̧ɔ̧rɛ wɔ be hi gbɛnik lɔl be. Yɔ hin kɔmsihi gɛrsɛ, hi baan Israhila Bɛtɔ gɔ.

³²Yeesu el walɛsɛrɛ ɔ̧ɔ̧ wɔ raahi a dood wɛrɛ hi ha̧a̧sib ya̧a̧rɛ, anyɔ hi gihi bee ɔ̧t taarɛ hi taan lees an hi le, wɛɛ hā̧ā̧be an be yaahi a̧a̧kil hi matil a gbɔnɔ di gɛ.

³³Walɛsɛrɛ ɔ̧ɔ̧ wɔ hi warige a gi an wi zɛm kokɔ ay wi gaa dood saalzanɔ yɛrɛ gi riihi a hɛt dɔŋdu hɛ nɔ?

³⁴Yeesu wɛɛ ɛrihi a nɛ gin kok kiml baari? Hi ta̧a̧ a nɔɔn-erɛ hi dut dɛɛt kaasi.

³⁵Wɛɛ raa dood saal wɔ hi ɗɔɔt a hɛbtdi.

³⁶Loo kok kiml nɔɔn-er wɔ hi dut wɔ baan Bɛto, ɓɛɛlɔ gaa walɛsɛrɛ ɔ̧ɔ̧ wɔ hi gɛ̧ɛ̧s dood saal wɔ.

³⁷Dood sɛw hi le kok bɔ hi hi̧i̧. Walɛsɛrɛ ɔ̧ɔ̧ wɔ hi mɔks kok ɓɛɛkil wɔ hí le gí zɛ̧ɛ̧r dɛl hi̧i̧sil nɔɔn-eerɛ.

³⁸Walɛ wɔ hi le kok wɔ sɛw kitigya̧ gi duk nasɔ. Hí ɓɛr nɛɛd wɔ hi waat wɔ kitigya̧ gɛ.

³⁹Yɔ Yeesu yaa saal wɔ gi da̧a̧, re kar lɛmb du da rek a Magadaŋ hɛbto.