Read Doyayo MATA 16 Bible Online

MATA 16 - Doyayo bible

MATA 16

¹Farisaya wɔ hi Sadukiya wɔ hi zaa a Yeesu ge an hi tolige hi dɔglɛ; hi zɔ̧ge an gi woo hinmɛksingoya gi zuun a tɛŋkɔ fu̧u̧z a Bɛt ge.

²Yeesu goohi a ɔ̧t gɔ gi leko, nɛ raako a bɛtha hoobɔ, yoosig lɛl gi bɛrɔ.

³Gɔ gi bi̧i̧ltɔnɔ, nɛ dɔko a nɛɛk ha̧a̧g naŋkyɔ, bɛtha hoobɔ, wɛɛ kuus gi bɛtha ɓilkumɓilkum. Nɛya nɛ mɛɛ hinyɔ bɛtha woosɔ gɛ̧ksugo, nɛ wɛ̄ɛ̄ nɛ ɗɛ̄ɛ̄ hinwɔ hi tuurik a ɔ̧ti gi zul woosya̧ gii gɛ̧ksig gɛ ya?

⁴Nɛ dood ha̧a̧l wɔ nɛ waak ɔ̧ti gi zulɛ nɛ ɔɔ Bɛto an nis yɔ gi naakmansi nɛ ɛrk gɛrsɛ, gɛrs za taasin tuuko, gɛ Zonas gɛrsɔ bɔ zunsin kpɔd. Wɛɛ ɔɔhi dihɔ wa̧a̧ gbɔnɔ reekɔ.

⁵Yɔ walɛsɛrɛ ɔ̧ɔ̧ wɔ hi tal hi tuur a mɛmbal kasiŋ zaabɔ ge, hi mɛks a hi zɛ̧ɛ̧n kokya̧ looko.

⁶Yeesu raahi a oon zul nɛ hi Farisaya wɔ hɛ̧ɛ̧tya̧ hi Sadukiya wɔ hɛ̧ɛ̧tya̧.

⁷Walɛsɛrɛ wɔ hi wɛɛ hi watin hi teesdu a yɔ gi dɔk anbɔ yɔ wɛ zɛn kok wɛ loozig giya.

⁸Yɔ Yeesu mɛɛ gi kpoos du anbɔ warihi a nɔ nɛ watingo a nɛ teesdu a nɛ taan kok nɔ? Nɛɛ dood ɗɔbsigya kaasiya wɛ!

⁹Nɛ́ kɛ̄m hinza gɛ te ya? Nɛ́ mɔ̄k nɛ mɛɛ kok kiml nɔɔn wɔ be ɓɛls dood duk nɔɔn wɔ hi kok ɓɛɛkil dɛl hi̧i̧sil kit wɔ nɛ tuut gɛ ya?

¹⁰Nɛ́ mɔ̄k nɛ mɛɛ kok kiml nɔɔn-er wɔ be ɓɛls dood duk nas wɔ hi kok ɓɛɛkil dɛl hi̧i̧sil kit wɔ nɛ tuut gɛ ya?

¹¹Ri nɛ kɛms nɛ hinɔ a be taasin book kok kiml dɔgl gɛ? Yɛrɛ oon zul nɛ hi Farisaya wɔ hi Sadukiya wɔ hɛ̧ɛ̧tya̧.

¹²Kuudu walɛsɛrɛ wɔ hi kɛm gɔ a Yeesu raahi a hi oo zulya̧ hi Farisaya wɔ hi Sadukiya wɔ hingokya̧ bɔ. Ya̧nɛ hi mɔk nɛ a raahi a hi oo hɛ̧ɛ̧t rɔb yɔ hi gɔnik kok giya.

¹³Yɔ Yeesu re gi tuurik a Kaysariya-Filipi waal gbɔɔl dɔŋdi war walɛsɛrɛ ɔ̧ɔ̧ wɔ a dood hi raak nɔ a Za̧a̧n Waa bɔ gi zulha nɔ?

¹⁴Hi goo a dood zaadɛ hi raako a mɔɔ Yohana Bɛtmɛm Hotingoya bɔ, zaadɛ hi raak be a mɔ Eliya giya, zaadɛ hi wɛɛ hi raak a mɔɔ Zeremi, zaadɛ be a gi lab gɛ mɔ gi Bɛtya̧a̧kɛŋkya wɔ zaaya̧ gbunyɔ.

¹⁵Yeesu wɛɛ warihi a nɛɛ be, nɛ raak a bee bɔ?

¹⁶Simɔŋ yɔ nuŋgɔ zaa a Piyɛr wɛɛ goo a mɔɔ Masihu bɔ, mɔɔ gi Bɛt Za̧a̧til bɔ bɛtha Waawalɔ.

¹⁷Yeesu wɛɛ raage a hat gi a mɔɔ, Zonas waawal Simɔŋ; Baa be yɔ bɛtha gii goksum hinɔ, doo a hɛbtdi goksum hinɔ gɛ.

¹⁸Yɛrɛ bee be gisum raak a nuŋg mɔ gi a Piyɛr. Wɛɛ a hɛɛl bɔ geha bé wɔm fɔkya be wɔ ɔksilya̧ yɔ wɛɛsib an luko. Wɔrk hi zulɔ tɛŋkɔ taag ɗɛɛk nɛ zaŋ.

¹⁹Bé gaamɔ Bɛt wáát gboorinsɔya. Hinyɔ gɔ mɔ wɔb a hɛbtdi hinɔ gi wɔy a bɛtha be, hinyɔ gɔ mɔ pid a hɛbtdi sɛw hinɔ gi pid a bɛtha be.

²⁰Kuudu Yeesu wɛɛ naa walɛsɛrɛ ɔ̧ɔ̧ wɔ a bɔhi raas doo za a bee gi Masihu bɔ.

²¹Yɔ a ɔ̧tɔ ge anbɔ Yeesu yɛls ma walɛsɛrɛ ɔ̧ɔ̧ wɔ dɔgl gaasigyɔ, a gi an be rek a Urusalima an be yɔ̧ ya̧a̧rhant gbɔɔltɔnɔ a Yahuduya ɗɛntɛ wɔ hi Bɛtmaakwookya gbɔlɛ wɔ hi Bɛtmaakdɔkya wɔ hi naandu. Hi gbɔ̧be, be wɛɛ be rɛmlɔ be ɗund a ɔ̧t taasimɛ.

²²Yɔ anbɔ Piyɛr tɔrig aakil du da biglige raage a kay! Waar i, an Bɛt gi a̧a̧nɔ an bɔ hinɔ gi tursum nɛ zaŋ!

²³Yeesu wɛɛ zɛmrɔ raa Piyɛr a wɛɛm be kuudu, Saydanu! Mɔ ɓɛɛk an mɔ matib a hinha̧a̧l du. Mɔ́ mɔ̄khin an Bɛt gɛ, mɔ mɔkig an dood her.

²⁴Wɛɛ zɛmr raa walɛsɛrɛ ɔ̧ɔ̧ wɔ: a za̧a̧nyɔ ha̧a̧ge an gi fɔbzibe gi ɔs zulɔ hinmɔkugɔ gi pɛɛ dɔ̧ɔ̧rɔ gi fɔbzibe.

²⁵Yɛrɛ za̧a̧nyɔ ha̧a̧g kolɔ za̧a̧sugo gi wagsige; za̧a̧nyɔ wags kolɔ a be dɔŋg be, gi zolige.

²⁶À za̧a̧nza dag nɛ waal sɛw ɔnɛ gi wɛɛ gi waks kolɔ, yɔ ɗaasig nɔ? Doo yɔ gàà nɔ an kolɔ gi za̧a̧ nɔ?

²⁷Gɔ gi anbɔ Za̧a̧n Waa bɔ gi zaa gɔ a Baatɔ Bɛt gbɔlums du lɛlgbun hi Bɛt walɛsɛrɛ ɔ̧ɔ̧ gi wɛns za̧a̧nyɔ woo hinɔ dɔɔrɔɔsɔ gbunu gbunu anyɔ woo nɛ be.

²⁸Be gisin raak rɔbo, dood zaadɛ wɔ hi erk dihɛ hi taa wɔrko, hi gbɛn Za̧a̧n Waa bɔ zaakɔ a gi waar ums du ketgba̧.