Read Doyayo MATA 20 Bible Online

MATA 20 - Doyayo bible

MATA 20

¹Yɔ anbɔ be, Bɛt wáátɔ riitin an wal za raatya yɔ tuu bi̧i̧ltɔnɔ an gi tɛb doodɛ gi loohi woosɛ hi basig tɛ̧ɛ̧huml bakɔ.

²Yɔ dag dood wɔ hi watin gi da̧a̧ a tus gaat gbunu gbunu ha an gi toohi ɔ̧t nuŋgo yaahi bak du an hi rek hi balɔ.

³Za̧a̧n bakya bɔ wɛɛ tuu bi̧i̧l du a kusaal ɓaat du, gbɛn dood zaadɛ hi erkig a luumha tɔs.

⁴Raahi a nɛya, rekin be bak du nɛ basib hin be toon anyɔ. Wɔrɔ hi rek woos bɔ a bak bɔ gedu hi wooko.

⁵Za̧a̧n bakya bɔ wɛɛ tuu a lurk teesdu, wɛɛ tuu ɓɛ a naaba̧a̧n du, woo anbɔ ɓɛ.

⁶Yɔ̧ɔ̧sumɔ wɛɛ tuu a lɛɛsig-gbarya̧ di zɛm dood zaadɛ hi erkig a luumha ɓɛ, warihi a nɔ nɛ erkig dihɛ lurknɔ gbɔɔl tɔs nɔ?

⁷Wɔrɔ hi ta̧a̧ a nɛ doo za loowi woos gɛ be, wi gɔ nɔ? Gii goohi a nɛ bɛɛrɔ! Nɛ yɛrɛ rekin be bak du nɛ woosib hin hɛw.

⁸Yɔ ɔ̧t legɔ, bakya bɔ raa gbɔɔlɔ zaa bɔ fɔg di a rekum mɔ elz woosya wɔ bak du mɔ toohi tusya̧ ma. Mɔ bààr mɔ too wɔ hi zaa woos kuudu, mɔ wɛɛ mɔ too wɔ hi doz woos du.

⁹Dood wɔ hi baar woos a lɛɛsigya̧ di hi zaa hi toohi tus gaat gbunu gbunu.

¹⁰Wɔ hi doz nɛ woos du hi zaa be, hi mɔk a ya̧nɛ hi dag gi daarɔ. Yɔ anbɔ hi toohi, bɔbe dag tus gaat gbunu gbunu.

¹¹Yɔ hi look tus bɔ hin nɔɔhi a za̧a̧n bakya bɔ ge,

¹²hi raage a dood wɔ mɔ loozihi woos kuudu hi woo kaasi, wɛɛ mɔ toohi an wii yɔ wi mɔm ɔ̧t haalnɔ bɔ gi leguw geha, bɔ lab gi ri nɔ?

¹³Bakya bɔ ta̧a̧ zaa gbunu a sa̧a̧ɔ, bé gɔ̄sum ha̧a̧l gɛ. Yɔ wɛ watinu mɔ ta̧a̧ a be woo ɔ̧t nuŋg sɛw a tus gaat gbun ha gɛ ya, taa lab ya?

¹⁴Loom tus mɔ mɔ rekɔ. Yɛrɛ ha̧a̧be an be too wal yɔ be loozig woos kuudu an mɔɔ hɛw.

¹⁵Be taan gbɔnɔ an be woo hinyɔ ha̧a̧be hi tus be ya? Yɔ be gi doo rɔb gii mɔ gin kubl be zulha ya ri?

¹⁶Yeesu wɛɛ dɔgɔ a yɔ anbɔ, wɔ hi gi kuudɛ hi wɛɛ doosɛ, doosɛ wɔ be hi wɛɛ kuudɛ be.

¹⁷Anyɔ Yeesu gi dɔɔk a Urusalima, loo walɛsɛrɛ wɔ koobl daa eer mukya̧ raahi gbɔnɔ di:

¹⁸a yɛrɛ wɛ dɔɔk gɛrɛ a Urusalima, Za̧a̧n Waa bɔ gi gaay ma a Bɛtmaakwookya gbɔlɛ wɔ hi Bɛtmaakdɔkya wɔ hi naandu an hi gbaasig dɔgl gi wɔrɔ,

¹⁹hi wɛɛ hi gaage dood wɔ hi mɛɛ Bɛt gɛ hi naandu hi kpɛ̧ɛ̧lige, hi lɛge hi wɛɛ hi dooge a dɔ̧ɔ̧r ha; gi wɛɛ gi rɛml a wɔrk du gi ɗund a ɔ̧t taasimɛ.

²⁰Yɔ anbɔ Zebede nistɔ zaa Yeesu ge hi waatɔ walɛ wɔ elo, zagl gi muutdu zɔ̧g hinɛ.

²¹Yeesu warige a ha̧a̧mɔ nɔ? Nis bɔ goo raage: a raamɔ an waat be eerɛ wɛrɛ, gbunu gi ɗɔɔt a mɔ naanrɔbo, zaa gbunu gi ɗɔɔt a mɔ naanyɛ̧li, a mɔ wáát du.

²²Yeesu wɛɛ ta̧a̧ a nɛ́ mɛ̄ɛ̄ hinyɔ nɛ ɛrk gɛ. Nɛ ɗɛɛ an nɛ yɔ̧ ya̧a̧rhant a dakwaa ya̧a̧rhantya bɔ gɔ be yɔ̧ gedu ya? Hi goo a wi ɗɛɛɗɛ.

²³Yeesu goohi a oo, nɛ yɔ̧ ya̧a̧rhant bɔ a dakwaa be bɔ gedu. Yɛrɛ bé dāg gbɔnɔ an be gaa dood ɗɔɔtillɛl a be naanrɔbo hi a be naanyɛ̧l gɛ. Ɗɔɔtillɛl wɔrɔ, Baa be Bɛt gii gɛmsihi, gi wɛɛ gi gaa dood wɔ sɛ̧ɛ̧hi.

²⁴Yɔ walɛsɛrɛ koobl wɔ hi kɛm dɔgl bɔrɔ kpoosya̧ nɔɔhinɔ a Zebede waatɔ eerɛ wɔ hi muulɛ.

²⁵Hɔnɛ Yeesu wɛɛ elihi raahi a nɛ mɛɛ a dood wɔ hi mɛɛ Bɛt gɛ hi teesdu waar ɛ gbɔlɛya̧ wɔ hi gisihi waar ums zuunuko, dood gbɔlɛya̧ wɔ hi gisihi tɛŋk zuunik be.

²⁶Taa an hinɔ gi gi anbɔ nɛ teesdu; yɛrɛ za̧a̧nyɔ ha̧a̧ge an gi wɛɛ gbɔɔl a nɛ teesdu, gi wɛɛsin woosya̧ nɛ.

²⁷Za̧a̧nyɔ ha̧a̧ge an gi wɛɛ zul a nɛ teesdu be gi wɛɛsin gbaar nɛ walɔ.

²⁸Yɔ anbɔ, Za̧a̧n Waa bɔ zāā an dood hi woosigwoos gɛ, gii ɔnɛ zaa an gi woohinɛ gi wɛɛ gi gaa kolɔ gi wɔr an i̧i̧nisɛ an gi za̧a̧s dood kit a hinha̧a̧l du be.

²⁹Yɔ Yeesu gi tuuzig a Zeeriko hi walɛsɛrɛ ɔ̧ɔ̧ wɔ, dood saal kittɔnɔ hi fɔbzige.

³⁰Yɔ yɔ̧ɔ̧rɛ eerɛ wɔ hi ɗɔɔt a gbɔnɔya̧ hi lag a Yeesu gi daako, hi ɓooya̧a̧ a Hingokya , Dawda Waawalɔ, mɛɛsiwi ya̧a̧rɛ!

³¹Dood saal wɔ hi ya̧a̧l yɔ̧ɔ̧rɛ wɔ an hi waks ya̧a̧ya̧ɓoolik bɔ. Hii be hi wɛɛ hi ɓoolya̧a̧ ha̧a̧ltɔnɔ a Hingokya , Dawda Waawalɔ, mɛɛsiwi ya̧a̧rɛ.

³²Yɔ anbɔ, Yeesu erɔ elihi warihi hinɔ a ha̧a̧nɛ an be woosin nɔ?

³³Hi googe a Hingokya gɔsuwi an lɔl wi gi gaa wi gbɛnɔ.

³⁴Yɔ wɔrɔ hi ha̧a̧s Yeesu ya̧a̧rɛ ki̧i̧ lɔlya̧ bɔ; ɓɔrbɔ dood eerɛ wɔ hi gbɛnlɔlɛ hi wɛɛ hi fɔge.