Read Doyayo MATA 22 Bible Online

MATA 22 - Doyayo bible

MATA 22

¹Yeesu wɛɛ dɔks dood dɔgl hi ya̧a̧daanik ɓɛ raahi

²a Bɛt wáátɔ riitin an waar za yɔ gi gɛmtsig waawal lottins lees gbɔɔlɛ.

³Yaa gbaarɛ ɔ̧ɔ̧ wɔ hi rek hi elz dood wɔ gɔ hi le lottins lees bɔ an hi zaa hi le hinɛ, dood wɔ be hi iin zaakɔ.

⁴Wɛɛ yaa gbaarɛ ɔ̧ɔ̧ zaadɛ dɔɔmɛ raahi a dɔksin dood a be gbɛɛr naabaadɛ be wɔ hi tam be wɔ, be gɛms lees sɛw da̧a̧da̧ ma ɓɔryɔ, zaan nɛ le lottins lees bɔ ma!

⁵Dood wɔ hi elihi ya̧nɛ dɔglya̧ taa du, hi rek woos ya̧a̧nɛ, zaadɛ hi re bako, zaadɛ be, hi rek wɔdya̧ riŋnik be.

⁶Dood zaadɛ wɔ be, hi wa̧a̧ waar bɔ gbaarɛ ɔ̧ɔ̧ wɔ hi niihi, hi wɛɛ hi gbɔ̧hi.

⁷Yɔ waar bɔ lag dɔglɔ gi nɔɔsig ha̧a̧ltɔnɔ, yaa laaya ɔ̧ɔ̧ wɔ hi rek hi wa̧a̧hi hi gbɔ̧hi, hi kpɔɔ waal gbɔɔlya̧ bɔ be.

⁸Kuudu wɛɛ raa gbaarɛ ɔ̧ɔ̧ wɔ a hi gɛms lottins lees bɔ da̧a̧da̧, wɛɛ dood wɔ hi elihi nɛ hí rı̄ı̄ an hi zaa hi le gɛ be.

⁹Yɔ anbɔ rekin a bɔrignɔɔ wɔ hi du nɛ elz dood wɔ gɔnɛ zɛmzihi sɛw hi zaa lottins lees bɔ.

¹⁰Gbaarɛ wɔ hi rek a bɔrignɔɔ wɔ hi du hi elz dood wɔ hi zɛ̧hi sɛw, dood bɔbtin wɔ hi dood rɔ́bɛ wɔ sɛw, hi kamzihi a lottins lɛl bɔ ge, lɛl hi̧i̧s gɔ deder.

¹¹Hɔnɛyɔ waar bɔ gul raa du gi see dood wɔ hi elzihi, gbɛn doo za gidu hegz lottins gban muul gɛ,

¹²warige a sa̧a̧ɔ mɔ guz ri hɛdi mɔ hegz lottins gban mɔ muul gɛ be? Wal bɔ kɔm hititi, tā̧ā̧ hinza gɛ.

¹³Waar bɔ raa lottins lees woosya wɔ a loozin ba̧a̧ni nɛ wɔmn wal yɛrɛ dɔɔɔ wɔ hi naanɔ wɔ nɛ gbalig lak di a lɛlwil du, gi kaa gi gboo nuŋgɔ a lak hɔ.

¹⁴Yeesu wɛɛ dɔgɔ a yɔ anbɔ, hi el dood kittɔnɔ, wɛɛ dood wɔ hi herihi hi kit gɛ.

¹⁵Kuudu Farisaya wɔ hi rek hi watin an hi ton Yeesu hi hinwarki hi dɔglɔyɔ gɔ gi booko.

¹⁶Farisaya wɔ hi wɛɛ hi yaa walɛsɛrɛ ya̧ hi Waar Hirudus doodɔ an hi warig hinɛ a Hingokya , wi mɛɛ a mɔ gi doo kpoosrɔbya, mɔ wɛɛ mɔ gok Bɛt gbɔnɔ hi rɔbo, hoobhā̧ā̧mɔ dood gɛ, mɔ taa seek dood bɛtig a muutdu be.

¹⁷Raasiwi hinyɔ mɔ mɔkig a dɔgl yɛrɛ hage: maak wɛ gaa gbɔnɔ an hi toos Waar gbɔɔl bɔ Kaysara toos ya, gaa gɛ ya ri?

¹⁸Yɔ Yeesu mɛɛ ha̧a̧lya̧, warihi a nɛɛ dood mɛlha̧a̧lya wɛ, nɛ gib tolik hi dɔgl nɔ?

¹⁹Zunsinbe tusyɔ nɛ toonik toosɛ. Hi kamsig tus gaat gbunu,

²⁰Yeesu wɛɛ warihi a bɔ muut yɛrɛ hi nuŋg yɛrɛ hi bi̧i̧ du yɔ nɔ?

²¹Hi ta̧a̧ a waar gbɔɔl mɔɔt bɔ Kaysara ɔ̧ɔ̧nɛ. Yeesu wɛɛ raahi gɔ a wɛɛnsin waar bɔ Kaysara hinyɔ ginɔ, wɛɛn nɛ wɛɛns Waar Bɛt hinyɔ gin be.

²²Yɔ hi lag dɔgl bɔrɔ anbɔ hin kɔmsihi gɛrs hi ɗund hi ɔɔge hi rek be.

²³A ɔ̧t gbun bɔ gedu Sadukiya zaadɛ wɔ gɔ hi dɔk a wɔrkɛ hi taa zaa rɛmluko hi zaa a Yeesu ge hi warige

²⁴a Hingokya , Muusa raa a walza gi gin nisɛ, wal bɔ gi wɔrɔ gi ɔɔ waat gɛ, yɛ̧ɛ̧tɔ gi yɛr kuur bɔ an hi daks hindaɔ waato.

²⁵Ɔ̧tza walɛ zaadɛ hi ginɛ wi teesdu, hi mɔɔhi hi nɔɔn-erɛ, gbɔɔl bɔ wɔr ma ɔs yɛ̧ɛ̧tɔ gii kuurɔ bɔ.

²⁶Yɛ̧ɛ̧tɔ bɔ wɛɛ wɔrɔ, taasum bɔ wɔrɔ, wɔrk da̧a̧sihi hi nɔɔn-er sɛw. Hi nɔɔn-er sɛw hi yɛtin nɛ kuur bɔ gbunu gbunu be.

²⁷Gɔ yɔ̧ɔ̧sumɔ nis bɔ wɛɛ wɔr be.

²⁸Gɔ gi rɛmtig ɔ̧ti, yɔ hi nɔɔn-er sɛw bɔ, nis bɔ gi er bɔ ɔnɛ tir nɔ? Hii sɛw, hi waatin hi gii be!

²⁹Yeesu wɛɛ ta̧a̧ raahi a anyɔ nɛ mɛɛ Bɛt ɗɛɛrwol hi Bɛt gbɔlumsɔ gɛ, nɛ hɛɛ gbɔnɔyɔ.

³⁰Yɔ anbɔ, a rɛmtig ɔ̧ti dood hi taa lootingo, hi wɛɛ an Bɛt walɛsɛrɛ ɔ̧ɔ̧ a bɛtha.

³¹Yɛrɛ nɛ́ záŋga rɛmtig dɔgl a ɗɛɛrwol du yɔ Bɛt raasinɛ

³²a bee gi Abraham Bɛtɔ hi Isaaku Bɛtɔ, hi Yakuba Bɛtɔ gɛ ya? Bɛt ɔnɛ taa wɔrkɛ Bɛto, gi dood za̧a̧til wɔ Bɛt ya̧a̧nɛ.

³³Yɔ dood saal wɔ hi kɛm Yeesu hingokɔ bɔ anbɔ hin kɔmsihi gɛrs ha̧a̧ltɔnɔ.

³⁴Yɔ Farisaya wɔ hi lag a Yeesu ɗɛɛn Sadukiya wɔ dɔglɛ, hi eltin hi mɔksɔ.

³⁵Doo za Bɛtmaakdɔkyayɔ gi hi teesdu yɔ ha̧a̧ge an gi tɛmn Yeesu ya̧a̧ɗantigi, war Yeesu

³⁶a Hingokya , maakdɔglyɔ ɗɔb gi daarlɛl gɛ nɔni?

³⁷Yeesu ta̧a̧ raa a maakdɔgl yɔ ɗɔb gi daarlɛl gɛ a gi ha̧a̧mɔ Waar mɔ Bɛt hi kpoos mɔ sɛw, hi kol mɔ sɛw, hi mɔkil mɔ sɛw.

³⁸Maakdɔgl biitir yɔ ɗɔb gi daarlɛl nɛ zaŋ giibɔ.

³⁹Maakdɔgl eesim bɔ riitin zaaɔ gɛrɛ a gi ha̧a̧mɔ a namɔza ge an zul mɔ.

⁴⁰Muusa maakdɔglɔ wɔ sɛw, hi Bɛtya̧a̧kɛŋkya wɔ hingokya̧ wɔ sɛw hi fu̧u̧ a maakdɔgl eerɛ wɛrɛ gedu.

⁴¹Anyɔ Farisaya wɔ hi mɔks lɛlgbunu Yeesu warihi hin raahi

⁴²a nɛ mɔkig nɔ a Masihu bɔ gi zulha nɔ? Fu̧u̧ a bɔ zaŋgd du nɔ? Hi ta̧a̧ge a Masihu bɔ fu̧u̧ a Dawda zaŋgd du.

⁴³Yeesu goo a nɛ à anbɔ Bɛt Mɔkilɔ yɔ daas Dawda kpoos du, ri gi elig a Waar be nɔ? Raa

⁴⁴a Waar Bɛt raa Waar be a ɗɔɔtum be naanrɔbo, gi tuur an be gbàà yɔ̧lhɛ̧ɛ̧nikya mɔ wɔ hi wɛɛ dɔɔ mɔ ɗa̧a̧klɛlɛ.

⁴⁵Nɛ an Dawda el Masihu bɔ a Waar be, Masihu bɔ yɔ wɛɛ waaɔ ri be?

⁴⁶Doo za gbun ɗɛɛ dɔglɔ bɔ ta̧a̧k gɛ. Hi sɛw hi kɔm hititi. Baar a ɔ̧tɔge, an bɔnɛ ɓɛ hoobha̧a̧gha̧ Yeesu hinwark ma.