Read Doyayo MATA 23 Bible Online

MATA 23 - Doyayo bible

MATA 23

¹Yɔ anbɔ Yeesu boos dood saal wɔ hi walɛsɛrɛ ɔ̧ɔ̧ wɔ dɔgl raahi

²a Bɛtmaakdɔkya hi Farisaya gɔ hi wadil Muusa maakdɔglɔ wɔ.

³Yɔ anbɔ, kɛmsinɛhi tɔnɛ nɛ woo hinyɔ hi raasin sɛw, yɛrɛ bɔnɛ fɔ woosya̧ naandu ɔnɛ. Wɛɛ dɔgl yɔ hi dɔko, hí woo hinɔ du gɛ be.

⁴Hi wɔk hinɗɔmn ɗɔbtɛ hi gis dood gbaak zul ha; ha̧a̧hi naanwalya̧ ki̧i̧nik mɔɔti an hi yɛsihi hinɗɔmnya̧ bɔ gɛ be.

⁵Hi wook woosya̧ sɛw hi zulpɛɛki an dood hi gbɛnihi kpɔd. Bɛtmaakwɔdya̧ yɔ gɔ hi malk muutdu, zaabe a naanyɛ̧li, hi wɛɛnihi fɛɛtɛ hi daarlɛlɛ, hi wɛɛ hi zi̧bs gbanya̧ gbɔlɛ tɔlya̧ wɔ an dood hi seehi.

⁶Ha̧a̧hi ɗɔɔtillɛl rɔbɛ a lees gbɔlɛ leklɛlɛ, hi ɗɔɔtillɛl hɔɔtɛ wɔ daarlɛlɛ a mɔksilluk wɔ gedu.

⁷Ha̧a̧hi an dood hi hu̧u̧r di hi boohi a luum wɔ ha hi, an hi wɛɛ hi elihi a hingokya wɛ.

⁸Yɛrɛ nɛya, taa an hi elin a hingokya. Gɛ nɛ gin hingoknɛya gbun kpɔd: beeya, wɛɛ, nɛɛ sɛw, nɛ gitin yɛ̧ɛ̧dɛyɔ.

⁹Bɔnɛ el doo za hɛbtdi a baa be! Gɛ nɛ gin Baa nɛ Bɛt yɔ gi a bɛtha kpɔd.

¹⁰Bɔnɛ ɔɔ dood hi elin a waar i. Bee, Masihu bɔ, bee gi Waar nɛ kpɔd.

¹¹Za̧a̧nyɔ gi gbɔɔl gi daarlɛl a nɛ teesdu gi wɛɛ woosnɛya.

¹²Za̧a̧nyɔ tɔɔs zulɔ be hi tiisige, za̧a̧nyɔ tiis zulɔ wɛɛdis be hi dɔɔsige.

¹³Nɛɛ Bɛtmaakdɔkya wɛ hi Farisaya wɛ, mɛlya ha̧a̧l wɛ, ya̧a̧rhant gisinɛ! Nɛ gi dood Bɛt wáátɔ gbɔnɔ yɛ̧ktugo. Nɛɛ hi zul nɛ nɛ gul gɛ, wɛɛ nɛ ɔ̄s dood wɔ ha̧a̧hi Bɛt gbɔnɔ gulk an hi gul gɛ be. [

¹⁴Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ wɔɔlik hinyɔ kuurɛ nɛɛd wɔ hi gin sɛw, nɛ wɛɛ nɛ zɔ̧k Bɛt zi̧i̧tɔnɔ an hi seenɛ an dood rɔbɛ. Yɔ anbɔ nɛ́ dag dɔgl-gbaak gi daarlɛlɛ. ]

¹⁵Nɛɛ Bɛtmaakdɔkya wɛ hi Farisaya, mɛlya ha̧a̧l wɛ, ya̧a̧rhant gisinɛ! Nɛnɛ nɛ gbɛ̧ɛ̧kig a lɛlyɔ hɛbt gi ge sɛw, nɛ gbɛ̧ɛ̧kig a mɛmbal wɔ du sɛw a lɛmb du an nɛ dag doo gbunu gi zɛmr mɔkilɔ gi fɔnɛ, wɛɛ yɔ nɛ dagige nɛ wɛɛnig doo laazɛŋk gbɔnɔ fɔkya daar nɛɛ dɔɔ eerɛ.

¹⁶Nɛɛ yɔ̧ɔ̧rɛ wɔ nɛ tɛlik yɔ̧ɔ̧rɛ zaadɛ, ya̧a̧rhant gisinɛ! Nɛ raa a za̧a̧n za gi dɛŋglhin hi Bɛtluk nuŋgɔ, taa hindɛŋglik rɔbo; gi dɛŋglhin hi hɛɛlmɔtyɔ gi a Bɛtluk du, dɛŋglhin rɔb tuu gɔ ma ɓɔrɔ.

¹⁷Yoo wɛrɛ, yɔ̧ɔ̧rɛ wɛrɛ, nɔni gi hinɗɔbt nɔ? Hɛɛlmɔt gii ya, Bɛtluk yɔ wɛɛn hɛɛlmɔt hingaat gii ya ri?

¹⁸Nɛ wɛɛ nɛ raa a doo gi dɛŋglhin hi Bɛtmaak sɛŋk nuŋgɔ, taa hindɛŋglik rɔbo. Gid nɛ dɛŋglhin hi gaas yɔ hi gbaa a Bɛtmaak sɛŋk hage nuŋgɔ, hindɛŋglik rɔb tuu gɔ ma ɓɔrɔ.

¹⁹Yɔ̧ɔ̧rɛ wɛ! Nɔni gi hinɗɔbt nɔ? Gaas gii ya, Bɛtmaak sɛŋk gii ya ri? Nɛ Bɛtmaak sɛŋk gii ma mi?

²⁰Za̧a̧nyɔ dɛŋglhin hi Bɛtmaak sɛŋk bɔ nuŋgɔ, dɛŋglhin hi lɛl bɔ hi hinyɔ gi hage sɛw.

²¹Za̧a̧nyɔ dɛŋglhin hi Bɛtluk nuŋgɔ, dɛŋglhin hi Bɛtluk nuŋgɔ hi Bɛt nuŋgɔ yɔ gi waak gedu hɛw.

²²Za̧a̧nyɔ dɛŋglhin hi bɛtha nuŋgɔ, dɛŋglhin hi Bɛt waar ums ɗɔɔtillɛlɔ bɔ nuŋgɔ hi Bɛt yɔ ɗɔɔt hage.

²³Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Gɔ nɛ ha̧sig Bɛt gaasɔ a kalde kpas wɛ hi kumbe kpas wɔ nɛ zebtig gedu, nɛ gisig tusɔ gbaako an dimi. Yɛrɛ nɛ wɛɛ nɛ ɔɔ hinwɔ hi gogɔ hi ɗɔb hi daarlɛl a Bɛtmaak du, an hinwooki hi gbɔnɔ, ya̧a̧rmɛɛki, hi ɗɔbsigi. Hin wɛrɛ hii bɛrɔ an nɛ woo. Wɛɛ bɔnɛ ɔɔ wɔ hi zɛ̧ɛ̧r wookɔ.

²⁴Yɔ̧ɔ̧rɛ wɔ nɛ tɛlik yɔ̧ɔ̧rɛ zaadɛ! Nɛ dakig tɔmsir waat wɔ nɛ wɛɛ nɛ i̧i̧k gɛloba gii a buudu!

²⁵Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ nɛɛtig mɛmdak bɔ kuuɔ hi kokdak bɔ kuuɔ, nɛ wɛɛ nɛ ɔɔ buuya̧ du hi̧i̧s hi doolek nɛ wɔ hi ɗɔkum ha̧a̧l wɔ nɛ kpoos du.

²⁶Farisaya yɔ̧ɔ̧ri, nɛɛtum dakwaa bɔ buuɔ kete, ɓɔr kuuɔ bɔ gi gaa gɔ sɛw.

²⁷Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ riitin an looryɔ hi buusige gi bɛr a kuuha, wɛɛ a buu du hi̧i̧s hi wɔrkɛ lɛŋk wɛ hi hinza dokil wɛ sɛw.

²⁸Nɛɛ hɛw nɛ gbunɔ giya, nɛ bɛs doo a muulɛ, wɛɛ kpoos nɛ hi̧i̧s hi mɛlɛ hi ha̧a̧lɛ.

²⁹Nɛɛ Bɛtmaakdɔkya wɛ hi Farisaya mɛlya ha̧a̧l wɛ, ya̧a̧rhant gisinɛ! Nɛ wɔmsig Bɛtya̧a̧kɛŋkya wɔ hi wɔr nɛ loor bɛtɛ; nɛ wɛɛ nɛ bi̧i̧lik kɔ̧ɔ̧tig a dood riitɛ wɔ hi loor ha.

³⁰Nɛ wɛɛ nɛ dɔko a an wi gi nɛ a ɗɛntɛ waabil bɔ doos gedu, yɔ wi ɔks hi baa wi hii an wi gbɔm Bɛtya̧a̧kɛŋkya wɔ gɛ.

³¹Yɔ anbɔ nɛ book dɔgl nɛ nɛ ta̧a̧ko a nɛ gi dood wɔ hi gbɔm Bɛtya̧a̧kɛŋkya wɔ waat ya̧a̧nɛ.

³²Bɛrɔ! Nɛ yɛrɛ da̧a̧sin hinyɔ baa nɛ hi da hi baar nɛ wookɔ ma.

³³Nɛya, kpolumdɔ̧ɔ̧t wɛ! gi an nɛ nɔ̀ɔ̀ dɔgl yɔ gɔ gi matin laazɛŋk du ri nɔ?

³⁴Yɔ anbɔ, laginɛ, be gisin yaak Bɛtya̧a̧-kɛŋkyaadɛ hi dood hinmɛɛkya dubtɛ wɛ hi Bɛtmaakdɔk-yaadɛ. Nɛ gbɔm zaadɛ, nɛ doohi a dɔ̧ɔ̧r ha, nɛ lɛbt zaadɛ hi kpooti a mɔksilluk nɛ wɔ hi du be, nɛ wɛɛ nɛ tɛkihi a waal gbɔlɛ wɔ hi du sɔmsɔm an nɛ kɛtinihi ya̧a̧.

³⁵Kuudu dood riitɛ wɔ hi gbɔ̧hi nɛ sɛw ga̧a̧mya̧ gi wɛɛ nɛ zulha; gi baar a hinriitwookya bɔ Abɛl wɔrk muulɛ gi tuur a Barakiya waawal Zakariya yɔ nɛ gbɔŋg a Bɛtluk bɔ teesɔ gedu hi Bɛtmaaksɛŋk bɔ.

³⁶Be gisin raak rɔbo, wɔrkɛ wɔrɔ ya̧a̧r-hantya̧ bɔ sɛw gi wɛɛ a dood wɔ hi waak ɓɔryɔ hi zulha.

³⁷Urusalima! Urusalima! Mɔɔ yɔ mɔ gbɔŋk Bɛtya̧a̧-kɛŋkya wɔ mɔ wɛɛ mɔ gi duutingo dood wɔ Bɛt yaasimɔhi bet an hi wɔrɔ! Ha̧a̧b nɛ an be mɔks waat mɔ wɔ dɔɔ baari a be dɔŋdi an kɔɔnɔɔ gi buuk waatɔ a pakir du? Yɔ anbɔ da ha̧a̧n nɛ gɛ!

³⁸Bɛrɔ! Yɛrɛ hi ɔɔ raat nɛ wɛɛ beemɛ.

³⁹Yɛrɛ be gisin raako: gi baar ɓɔryɔ nɛ taab zaa gbɛniko gi tuur an nɛ dɔgɔ a an Bɛt gi rɔbs Za̧a̧nyɔ gi zaak a Waar Bɛt nuŋg du!