Read Doyayo MATA 25 Bible Online

MATA 25 - Doyayo bible

MATA 25

¹Yɛrɛ Bɛt wáátɔ riitin an nɛɛdsɛrɛ kooblɛ hi loo pitilaya̧ hi tuuk an hi rek hi dagtin hi wal nislookya a gbɔnɔ du.

²Zaadɛ nɔɔnɛ hi gi yooyɔ, wɛɛ nɔɔn zaadɛ wɔ be hi gi nɛɛdsɛrɛ kɛ̧ɛ̧tɛ.

³Yɔ yoo wɔ nɔɔnɛ hi look pitilaya̧ hi kām kurum za tik du gɛ.

⁴Wɛɛ nɔɔn zaadɛ kɛ̧ɛ̧tɛ wɔ be hi loo tik hi tɔ̧ɔ̧ kurumya̧ du hi kam hi pitilaya̧.

⁵Anyɔ nislookya bɔ gi amzugo, nɛɛdsɛrɛ wɔ koobl hi tuur hi gig ook be hi yoyo hi sɛw.

⁶A yɛms teesdu der ya̧a̧ɓooyyɔ a nislookya bɔ gi zaak gɛrɛ, tuuzinɛ nɛ rek nɛ dagige!

⁷Hɔnɛ nɛɛdsɛrɛ koobl wɔ hi rɛmɔ hi ɗund hi gɛms pitilaya̧.

⁸Zaadɛ yoo wɔ hi war kɛ̧ɛ̧tɛ wɔ hi kamz nɛ kurumya̧ a gaanwi kurum nɛ bɔ kaasi, pitila wi wɔ hi niŋknimɔ.

⁹Kɛ̧ɛ̧tɛ wɔ hi ta̧a̧ a kurum bɔ yɔ riiwɛ wɛ sɛw gɛ. Rekin a dood kurumzebtigya wɔ hi nɛ zebz nɛnɛ.

¹⁰Yɔ nɛɛd yoo wɔ hi rek kurum bɔ zebzig luumha be, nislookya bɔ zaa gɔ be. Nɛɛdsɛrɛ zaadɛ nɔɔn wɔ hi gin nɛ kurumya̧ hi gutin lɛlgbun hi nislookya bɔ a lootinslɛl bɔ gedu hi wɛɛ hi kpɛ̧ɛ̧ lukgbɔnɔ bɔ hi daksɔ.

¹¹Kuudu yɔ nɛɛdsɛrɛ zaadɛ wɔ hi wɛɛza hi rek a lootinslɛl bɔ ge hi elik hinɛ a ɗɛnti, ɗɛnti! gborsuwi gbɔnɔ wi talɔ!

¹²Hɔnɛ ɗɛnt bɔ goozɔ a be raasin rɔbo, be mɛɛn gɛ.

¹³Yeesu wɛɛ raa a yɔ anbɔ, oonɛ anyɔ nɛ mɛɛ ɔ̧tɔ gɔ be zaa du gɛ. Kinsa lɛlli, nɛ mɛɛ gɛ.

¹⁴Hinza gi tuur an walza gi rɔbs reko gi el gbaarɛ ɔ̧ɔ̧ an gi gaahi rɔɔsɔ wɔ naan du hi woon hinɛ.

¹⁵Yɛɛl gaa gbaar biitir bɔ tus gaat duk nɔɔnɛ, zaa bɔ gaag tus gaat duk eerɛ, zaa bɔ be tus gaat duk gbunu; gaa doo gbunu anyɔ tɛŋkɔ gɔ gi ɗɛɛ, wɛɛ ɗund rek rɔbsɔ bɔ.

¹⁶Gbaar biitir bɔ hi yɛɛl hi gaag nɛ duk nɔɔnɛ rek ɓɔrbɔ zemn wɔd hi tus bɔ riŋnɔ wɛɛ dag duk za kar ha nɔɔn be.

¹⁷Zaabɔ dag nɛ duk eer be, wɛɛ woo an gbun bɔ wɛɛ dag zaa karha duk eer be.

¹⁸Hɔnɛ zaabɔ dag nɛ duk gbun be rek da zɛɛ lɛl hɛbtdi i̧i̧ ɗɛntɔ tusɔ bɔ gedu.

¹⁹Kuudu yɔ am ha̧a̧ltɔnɔ gbaarɛ wɔ ɗɛntya̧ bɔ wɛɛ zaa elihi an gi baks tusɔ bɔ hi hiya.

²⁰Gbaar biitir bɔ hi gaag nɛ tus gaat duk nɔɔnɛ kamz duk nɔɔn bɔ hi gaag nɛ hi nɔɔn zaa bɔ dagɔ, dɔgɔ a ɗɛntyɔ, mɔ gaab nɛ duk nɔɔnɛ, yɛrɛ seemɔ, be wɛɛ be dag zaa gɛrɛ ha duk nɔɔn be.

²¹Ɗɛntɔ bɔ raage a bɛɛrɔ, gbaar hinwookya rɔbo, mɔ fɔ woos mɔ rɔbtɔnɔ a hin fɛŋwaayɔ be gaam gedu. Be gaamɔ zaa gbɔɔl naan du. Yɛrɛ zaam mɔ dag hat hi ɗɛnt mɔ beya.

²²Zaabɔ dag nɛ tus gaat duk eer be zaa raa a ɗɛntyɔ, mɔ gaab nɛ duk eer be, yɛrɛ seemɔ, be wɛɛ be dag zaa gɛrɛ ha eer be.

²³Ɗɛnt bɔ raage a gbaar hinwookya rɔbo, bɛɛrɔ, mɔ fɔ woos mɔ rɔbtɔnɔ a hin fɛŋwaa yɔ be gaam gedu, be gaamɔ zaa gbɔɔl naan du, yɛrɛ zaamɔ mɔ dag hat hi ɗɛnt mɔ beya.

²⁴Yɔ̧ɔ̧sumɔ, gbaar bɔ dag nɛ tus gaat duk gbun be zaa raage a ɗɛntyɔ, be mɛɛnmɛɛ a mɔ doo ɓaatilyɔ, mɔ ɓɛrk tot mɔ a lɛlyɔ mɔ lug ge gɛ, mɔ mɔksig tot mɔ a lɛlyɔ mɔ fɛb ge gɛ.

²⁵Yɔ hoobha̧a̧be, be rek be i̧i̧ tus mɔ bɔ gɔ hɛbtdi; yɛrɛ loom tus mɔ bɔ gɛrɛ.

²⁶Ɗɛntɔ bɔ ta̧a̧ge a mɔɔ gbaar ha̧a̧l namri! Mɔ mɛɛ nɛ a be ɓɛrk tot be a lɛlyɔ be lug ge gɛ, be mɔksig tot be a lɛlyɔ be fɛb ge gɛ mi?

²⁷Bɛrɔ! Ginɛ an mɔ gbaa tus be bɔ a tusgbaakya wɔ hi, yɔ be zaa nɛko be zɛm tus be bɔ zaa yɔ kar ha.

²⁸Wɛɛ raa doodɔ a wɔɔzin tus gaat duk gbun bɔ gi naan du nɛ gaa zaan bɔ gin duk kooblɛ.

²⁹Yɔ anbɔ, za̧a̧nyɔ ginɔ hi loo zaa hi goktsig ha gi gin gbɔɔltɔnɔ; za̧a̧nyɔ taan gɛ be hi wɛɛ hi loo fɛŋwaa bɔ da gin nɛ hɛw.

³⁰Wa̧a̧n gbaar namr bɔ nɛ bisig a lakdi a lɛlwil du a lɛlyɔ dood gɔ hi kaa hi gboo nuŋgya̧ gedu.

³¹Za̧a̧n Waa bɔ gɔ gi zaa gi gbɔlums du hi Bɛt walɛsɛrɛ wɔ sɛw an waar gbɔɔlɛ, gi ɗɔɔt a gi waar ums ɗɔɔtillɛlɛ.

³²Dood hɛbtdi sɛw hi mɔks gi muutdu, gi gɛ̧ɛ̧ dood an oora gi gɛ̧ɛ̧k tam hi isɛ.

³³Gi wɛɛn tam wɔ gi naanrɔbo, isɛ wɔ be a gi naanyɛ̧li.

³⁴Gɔ gi anbɔ waar gbɔɔl bɔ gi raa wɔ hi gi a naanrɔbo a zaanɛ, nɛɛ dood wɔ Baa be Bɛt rɔbsinɛ, talin a Bɛt wáát yɔ hi gɛmtsin a waalyɛɛliki an hi gaanɛ gedu.

³⁵Yɔ anbɔ, be da be gi nɛ a̧a̧kili nɛ gaab leesɛ; mɛm da gib ha̧a̧ko nɛ gaab be yɔ̧; be gi nɛ rɔ̀bi nɛ dagib rɔbtɔnɔ nɛ lɛl du.

³⁶Be gi nɛ ɔ̧lɛ nɛ heksib gbandili; be gi nɛ gumtili nɛ re nɛ boobe; be gi nɛ luknɔ du nɛ zaa nɛ sɔ̧ɔ̧be.

³⁷Dood riitɛ wɔ hi ta̧a̧ge a Waar i, be gbɛnum a̧a̧kilɔ bili be gaam lees nɔ? Mɛmɔ ha̧a̧m bili be gaam mɔ yɔ̧ nɔ?

³⁸Be gbɛnum rɔ̀bɔ bili be dagim be lɛl du rɔbtɔnɔ nɔ? Mɔ ginɛ ɔ̧lɔ bili be heksum gbandil nɔ?

³⁹Be gbɛnum gumtilɔ bili be re be sɔ̧ɔ̧m nɔ? Be gbɛnum luknɔ du bili be re be boom nɔ?

⁴⁰Waar gbɔɔl bɔ gi gòòhi gɔ a be raasin rɔbo; hinwɔ nɛ woo sɛw a yɛ̧ɛ̧dɛ be wɛrɛ zaa wansɔ gbun muulɛ, nɛ̍ wòòs bee hin wɔrɔ sɛw ma bɔ.

⁴¹Kuudu waar bɔ gi wɛɛ gi raa dood wɔ hi gi a gi naanyɛ̧li a hɛmlin hi beya, nɛɛ dood wɔ nɛ gin Bɛt booto! Rekin a laazɛŋk yɔ hi gɛmnts Saydanu hi walɛsɛrɛ ɔ̧ɔ̧ gedu!

⁴²Yɔ anbɔ, a̧a̧kil gib nɛ ha̧a̧ko, nɛ gāab lees gɛ; mɛm gib nɛ ha̧a̧ko nɛ gāab be yɔ̧ gɛ.

⁴³Be gi nɛ rɔ̀bi nɛ dagib nɛ lɛl du gɛ; be gi nɛ gumtili nɛ re nɛ sɔ̧ɔ̧b gɛ, be gi nɛ a luknɔ du nɛ re nɛ boob gɛ.

⁴⁴Hi wɛɛ hi ta̧a̧ge a Waar i, wi gbɛnum a̧a̧kilɔ bili, mɛmɔ gim ha̧a̧k bili, mɔ gi rɔ̀bɔ bili, mɔ gi ɔ̧lɔ bili, mɔ gi gumtilɔ bili, mɔ gi a luknɔ du bili wi ɗaasum gɛ?

⁴⁵Waar gbɔɔl bɔ gi ta̧a̧hi a be raasin rɔbo, hinwɔ nɛ woos dood wɛrɛ zaa wansɔ gbun gɛ, bee hɛw nɛ woosib gɛ.

⁴⁶Doodya̧ hí rek a laazɛŋk ya̧a̧rhantya faa bɔ gedu; wɛɛ dood wɔ hi woo hin riit be hi rek a za̧a̧tig faa lɛl bɔ a bɛtha gedu be.