Read Doyayo MATA 26 Bible Online

MATA 26 - Doyayo bible

MATA 26

¹Yɔ Yeesu da̧a̧s dɔglɔ wɔrɔ sɛw raa walɛsɛrɛ ɔ̧ɔ̧ wɔ

²a nɛ mɛɛ a Paska naab zɛ̧ɛ̧r yɛms eerɛ an gi tuurɔ, wɛɛ Za̧a̧n Waa bɔ gi gaay ma a dood naandu an hi dooge dɔ̧ɔ̧r ha.

³A ɔ̧t gbun bɔ gedu Bɛtmaakwookya gbɔlɛ wɔ hi dood Yahuduya ɗɛntɛ wɔ hi rek hi mɔks a Bɛtmaakwookya gbɔɔl mɔɔt bɔ Kayafas raadu.

⁴Hi wɔya̧a̧ an hi rek hi wa̧a̧ Yeesu hi kɛ̧ɛ̧tigi hi gbɔŋge.

⁵Hi wɛɛ hi raa a taa an wɛ wa̧a̧g naab teesdu, à labɔ, gabs yɔ ɗund a doodsaal teesdu.

⁶Anyɔ Yeesu gi a Betani a Simɔŋ ɗobtilya bɔ gi raa du,

⁷nis za kamz kurum ki̧i̧l hɛmntya tik gbunu tusɔ sa̧a̧ttɔnɔ. Tikɔ hi wɔmn bet za rɔb yɔ gɔ hi el a albaatreyɔ. Yɔ Yeesu ɗɔɔt an gi lehinɛ, nɛɛ bɔ sɔɔ gubsig kurum bɔ zulha.

⁸Yɔ walɛsɛrɛ ɔ̧ɔ̧ wɔ hi gbɛn nɛɛ bɔ gub kurum bɔ anbɔ nɔɔhi, hi wɛɛ hi raa a hinhatirgo bɔrɔ gɔ hi dag nɔ du!

⁹À hi zebr nɛ kurum bɔrɔ tusɔ gbɔɔltɔnɔ hi gɛ̧ɛ̧s ya̧a̧rya wɔ gɔ nɔ?

¹⁰Yɔ Yeesu mɛɛ hin bɔrɔ warihi a nɛ mɔɔsig nɛɛ bɔ a nɔ dɔŋ nɔ? Benɛ woosib hinrɔb a be gbaŋgi.

¹¹Nɛ gin ya̧a̧rya wɔ nɛ teesdu faa, yɛrɛ beya, be taa waak hi nɛɛ faa.

¹²Nɛɛ bɔ gubsib kurum yɛrɛ be muul an gi gɛmntsib i̧i̧k beenɛ a loor du.

¹³Be raasin rɔbo, a lɛlyɔ gɔ hi dɔk Dɔgl Rɔb bɔ ge a waal du sɛw hí fɔ̀k hinyɔ nis bɔ woosib gii an hi mɛksinge.

¹⁴Hɔnɛ walɛsɛrɛ wɔ koobl daa eer zaaya̧ gbun bɔ nuŋgɔ a Yahuda Iskaryudi rek a Bɛtmaakwookya gbɔlɛ wɔ hi,

¹⁵warihi a an be gaan Yeesu naan du, nɛɛ be nɛ gaab nɔ? Wɔrɔ hi ɓɛr tus gaat dumbili taarɛ hi gaage.

¹⁶Bɛɛ anbɔ ma Yahuda yɛɛl gbɔnɔ ɓɛɛki an gi gaahi Yeesu naan du.

¹⁷A Paska naab-ɔ̧t biitir bɔ kok gɔ taan hɛ̧ɛ̧t gɛ gedu, walɛsɛrɛ wɔ hi zaa hi war Yeesu a ha̧a̧mɔ an wi rek wi gɛmntsum Paska naab lees ay nɔ?

¹⁸Yeesu raahi a rekin a waal gbɔɔl du a nɔɔkin ge nɛ raage a Hingokya bɔ raa a ɔ̧t be sɛ̧ɛ̧bɔ, be nab Paska naab a mɔ lɛl du hi walɛsɛrɛ be.

¹⁹Walɛsɛrɛ wɔ hi rek hi woo hinyɔ Yeesu raahi nɛko, hi wɛɛ hi gɛms Paska naab lees bɔ gɔ.

²⁰Yɔ ɔ̧t legɔ Yeesu zaa ɗɔɔt gɔ hi walɛsɛrɛ ɔ̧ɔ̧ wɔ koobl daa eerɛ an hi lehinɛ.

²¹Yɔ hi gi hinleko Yeesu raahi a be raasin rɔbo: zaa nɛ gbun gi rɛ̧ɛ̧be.

²²Yɔ walɛsɛrɛ ɔ̧ɔ̧ wɔ hi kɛm anbɔ hi mim ha̧a̧ltɔnɔ hi wɛɛ hi warig gbunu gbunu a Waar i, nɛ bee ma gɛ mi?

²³Yeesu wɛɛ goo a za̧a̧nyɔ yaa naan hi bee lɛlgbunu a kokdak du gii gi rɛ̧ɛ̧sibya̧a̧.

²⁴Za̧a̧n Waa bɔ gi wɔr an hinyɔ Bɛt ɗɛɛrwol dɔg gi zulha, yɛrɛ ya̧a̧rhant gis za̧a̧nyɔ gɔ gi rɛ̧ɛ̧ Za̧a̧n Waa bɔ! À hi mɔɔnɛ za̧a̧nɔ gɛ yɔ riisige.

²⁵Yahuda, za̧a̧n bɔ gɔ gi rɛ̧ɛ̧ge warige a Hingokya , nɛ bee ma gɛ mi? Yeesu googe a anyɔ mɔ dɔgɔ, mɔya!

²⁶Yɔ hi gi hinleko Yeesu loo kok kiml bɔ baan Bɛto, ɓɛɛlɔ gaa walɛsɛrɛ ɔ̧ɔ̧ wɔ raahi a loonɛ nɛ le, yɛrɛ gi muul beenɛ.

²⁷Wɛɛ loo dakwaa bɔ bumhob gi du, baan Bɛto wɛɛ gaahi raahi a yɔ̧nɛ nɛ sɛw,

²⁸yɛrɛ gi ga̧a̧m beenɛ, ga̧a̧m yɔ gi zuunik Bɛt ya̧a̧wɔkɔ hi doodɛ. Gi gub a dood kit dɔŋgo an Bɛt gi bitsihi hinha̧a̧lya̧.

²⁹Be dɔgsinɛ: yɛɛl ɓɔryɔ, be taa bumhob yɛrɛ zaa yɔ̧ko gi tuur a ɔ̧tyɔ gɔ be yɔ̧k zaa sekt hi nɛɛ a Baa be wáát du.

³⁰Hi wɛɛ hi ɛɛ Paska hin-ɛɛnɛ, hi tuu hi re gɔ a Kɔ̧ɔ̧b Ga̧a̧t ha.

³¹Yɔ anbɔ Yeesu raa walɛsɛrɛ ɔ̧ɔ̧ wɔ: a yɛms yɛrɛ gedu nɛ simdɔɔ a be dɔŋg nɛ sɛw nɛ nɔɔ nɛ ɔɔbe. Ya̧a̧nɛ Bɛt ɗɛɛrwolɔ raa a be gbɔm nɛɛra bɔ, tam maas wɔ hi gig fɔk sɛw hi hɛksɔ.

³²Yɛrɛ kuudu gɔ be rɛml wɔrk du be ɗundɔ, be dosin a Galile.

³³Piyɛr goo raage a an nabeza nɔɔ hi ɔɔmɔ si̧, benɛ be taam nɔɔk ɔɔk nɛ zaŋ!

³⁴Yeesu raage a be raasum rɔbo: a yɛ̧ms yɛrɛ gedu mɔ faab dɔɔ taarɛ a mɔ mɛɛbe gɛ, kɔba gi ɔɔ kekugo.

³⁵Piyɛr raage a gi gi nɛ an be wɔr hi mɔɔ si̧, be taa nɛ hinɔ faak nɛ zaŋ a be mɛɛmɔ gɛ. Walɛsɛrɛ zaadɛ wɔ hi ta̧a̧ anbɔ sɛw.

³⁶Yɔ anbɔ Yeesu wɛɛ zaatin hi walɛsɛrɛ ɔ̧ɔ̧ a lɛlza bɔ nuŋgɔ a Gɛsɛmanɛ ge, yɔ hi tuurɔ raahi a ɗɔɔtin hɛdi, bee be da be zɔ̧bs Bɛto.

³⁷Yɔ gi reko kam Piyɛr hi Zebede waatɔ wɔ eerɛ, Yohana hi Yakuba. Yaala yɛɛl miŋki hi koltuunɛ.

³⁸Wɛɛ raahi gɔ a kpoos be gisib wɔtigi hurko. Kɔmbin hɛdi nɛ za̧a̧lɔl hi beya.

³⁹Wɛɛ rek hɛml kaasi gbuut a hɛbtdi zɔ̧ Bɛt an yɛrɛ lɛ: a Baaba, hinɔ gi ɗɛɛ, hɛmlinmɔ dakwaa ya̧a̧rhantya yɛrɛ be muutdu, hinza gɛ, taa anyɔ ha̧a̧be, gi anyɔ ha̧a̧ mɔya.

⁴⁰Wɛɛ wɛɛz a walɛsɛrɛ ɔ̧ɔ̧ taarɛ wɔ hi, zɛ̧hi yoom du. War Piyɛr a yɛrɛ ma nɛ́ ɗɛ̄ɛ̄ an nɛ za̧a̧lɔl hi bee kaasi gɛ ya?

⁴¹Za̧a̧nlɔlɛ nɛ zɔ̧ Bɛto an bɔnɛ mat a maatil du. Doo bɔ mɔkilɔ ha̧a̧g an gi woo rɔbo, wɛɛ muulɔ hɔ̧nighɔ̧nɔ.

⁴²Wɛɛ rek hɛml dɔɔ eesimɛ, wɛɛ zɔ̧ Bɛt an yɛrɛ lɛ: a Baaba, gi taa an dakwaa ya̧a̧rhantya yɛrɛ gi ha̧sa be yɔ̧g gɛ gɛ, woom anyɔ ha̧a̧mɔ!

⁴³Wɛɛ wɛɛz a walɛsɛrɛ ɔ̧ɔ̧ wɔ hi, wɛɛ zɛ̧hi yoom du ɓɛ, yoom bɔ ɓɛrihi be hi ɗɛ̄ɛ̄ an hi za̧a̧lɔl gɛ be.

⁴⁴Yeesu wɛɛ hɛml ɔɔhi dɔɔ taasimɛ, rek zɔ̧ Bɛto dɔghin an ya̧a̧ gbuna bɔ.

⁴⁵Kuudu wɛɛ wɛɛz a walɛsɛrɛ ɔ̧ɔ̧ wɔ hi raahi a nɛ yok nɛ holikhol ma ya? Yɛrɛ ɔ̧tɔ tuur ma, Za̧a̧n Waa bɔ gi gaayyik ma gɛrɛ a hinha̧a̧lya wɔ hi naandu.

⁴⁶Ɗukinɛ wɛ rekɔ! Yɛrɛ za̧a̧n bɔ gib rɛ̧ɛ̧ko gi gɛdi!

⁴⁷Yɔ Yeesu gi ya̧a̧boosig te walɛsɛrɛ ɔ̧ɔ̧ koobl daa eer wɔ zaaya̧ gbun bɔ nuŋgɔ a Yahuda zaa, hi dood saal kittɔnɔ. Dood saal kit wɔ hi gig fɔbzugo hi kamzig daŋbɛsim wɛ, hi sɔɔl wɛ. Bɛtmaakwookya gbɔlɛ wɔ hi Yahuduya ɗɛntɛ wɔ hii yaazihi.

⁴⁸Yahuda, za̧a̧n bɔ gi rɛ̧ɛ̧k Yeesu goks nɛ dood saal wɔ hinyɔ gɔgi re gi gɔs Yeesu anyɔ lɛ: a za̧a̧nyɔ gɔ be re be zɔm wɛktɔ, za̧a̧nɔ giya, wa̧a̧nɛge.

⁴⁹Yahuda yɔ sɛ̧ɛ̧bɔ sɔɔ Yeesu dɔŋdi nɔɔktɔnɔ raage a seko, Hingokya! Wɛɛ zɔm wɛktɔ feed.

⁵⁰Yeesu wɛɛ ta̧a̧ raa a sa̧a̧ɔ, nɛ woom hinyɔ mɔ zaa wook ma mi! Yɔ anbɔ, dood zaadɛ wɔ hi zaanɛ di hi yu̧u̧ hi wa̧a̧g gɔ.

⁵¹Doo za gbun bɔ gi waatingo nɛ hi Yeesu hɔ̧b daŋ-bɛsim a saŋk du dɛ̧ɛ̧rin Bɛtmaakwookya gbɔɔl mɔɔt bɔ gbaarɔ tɔnɔ.

⁵²Yeesu wɛɛ raa wal bɔ a wɛɛnum daŋbɛsim mɔ bɔ saŋk du. Ya̧a̧nɛ, dood wɔ hi gbɔ̧mnik dood daŋbɛsimi, hi gbɔ̧mnihi daŋbɛsim be.

⁵³Mɔ́ mɛ̄ɛ̄ a be ɗɛɛ an be ɛr Baa be Bɛt gi yaasib walɛsɛrɛ ɔ̧ɔ̧ layaadɛ gi daar duk koobl daa eerɛ an hi ɗaasib gɛ ya?

⁵⁴Nɛ à be gɔ nɛ anbɔ, hinyɔ gi Bɛt ɗɛɛrwol du yɔ da̧a̧ ri nɔ? Bɛt ɗɛɛrwol bɔ raa a gi an hinɔ gi wooy gi da̧a̧ anyɔ lɛ.

⁵⁵A yɛmsɔ gedu, Yeesu wɛɛ raa dood saal wɔ a gi an nɛ zaan daŋbɛsim wɔ hi sɔɔl wɔ nɛ wa̧a̧be an be gi nɛ luur ha̧a̧l wɔdwɔɔlikya ya? Ɔ̧t nuŋg sɛw be ɗɔɔtig nɛ a Bɛtluk du be hingoko, wɛɛ nɛ zāā nɛ wa̧a̧b gɛ be.

⁵⁶Yɛrɛ hin wɔrɔ hi tuur an hinyɔ Bɛtya̧a̧kɛŋkya wɔ hi bi̧i̧ a Bɛt ɗɛɛrwol du gi wooyyɔ . Yɔ anbɔ walɛsɛrɛ ɔ̧ɔ̧ sɛw hi nɔɔ hi ɔɔge hi reekɔ.

⁵⁷Dood wɔ hi wa̧a̧ Yeesu hi kaŋg a Bɛtmaakwookya gbɔɔl mɔɔt bɔ Kayafas ge a lɛlyɔ Bɛtmaakdɔkya wɔ hi Yahuduya ɗɛntɛ wɔ hi mɔks ge.

⁵⁸Hɔnɛ Piyɛr gi fɔbzig Yeesu kuudu hɛmltɔnɔ be, zaa tuur a Bɛtmaakwookya gbɔɔl mɔɔt bɔ gi raa du, da gul raa teesdu, gi ɗɔɔtig hi walɛsɛrɛ lɛl-ookya wɔ lɛlgbunu an gi see hinyɔ gɔ gi wooy gi da̧a̧.

⁵⁹Bɛtmaakwookya gbɔlɛ wɔ hi Yahuduya ɗɛntɛ wɔ hi Yahuduya dɔglyɛ̧ɛ̧kya wɔ sɛw hi gis Yeesu ya̧a̧gɔ̧ɔ̧mik muul an hi wa̧a̧nig dɔglɛ hi gbɔŋge.

⁶⁰An dood zaadɛ kittɔnɔ hi gisig ya̧a̧wɔk si̧, hí zɛ̄m dɔgl za yɔ rii an hi gbaasig dɔgl ha gi wɔr gɛ be. Kuudu dood eerɛ hi sɔɔz gɔ ma ɓɔrɔ,

⁶¹hi raa a za̧a̧n yɛrɛ dɔgɔ a be ɗɛɛ an be ɛ̧br Bɛtluk bɔ be wɛɛ be wɔŋge ɔ̧t taarɛ.

⁶²Bɛtmaakwookya gbɔɔl mɔɔt bɔ ɗuk war Yeesu a mɔ taa hinza gook ya? Dood wɛrɛ hi gim nɔ gɛ̧ɛ̧niko?

⁶³Yɔ anbɔ Yeesu gōō hinza gɛ kɔms sɔsɔg. Bɔrɔ wɛɛ warige a be gim raak an mɔ dɛŋglsib hin a Bɛt Za̧a̧til bɔ gi nuŋg du, mɔɔ gi Masihu bɔ, Bɛt waaɔ ya? Raasiwi hinɔ, wi mɛɛ.

⁶⁴Yeesu googe a anyɔ mɔ dɔgɔ . Yɛrɛ be raasinɛ yɛɛl ɓɔryɔ, nɛ gbɛn Za̧a̧n Waa bɔ gi ɗɔɔt a Bɛt Tɛŋkya Sɛw naanrɔbo. Nɛ wɛɛ nɛ gbɛnig zaakɔ a kuus ha a bɛtha hɛw.

⁶⁵Bɛɛ anbɔ Bɛtmaakwookya gbɔɔl mɔɔt bɔ taar gbandilɔ gɔ kpa̧s wɛɛ dɔgɔ a yɛrɛ boo ya̧a̧ha̧a̧l a Bɛt zulha da̧a̧da̧, ha̧a̧wɛ dɔgl segya ma gɛ! Nɛ lag ya̧a̧ha̧a̧lɔ yɔ boo a Bɛt zulha be!

⁶⁶Nɛ mɔk nɔ? Wɔrɔ hi ta̧a̧ a nɛ dɔgl wa̧a̧gwa̧, ɔɔ gbɔŋkyɔ.

⁶⁷Bɛɛ ma anbɔ hi yɛlsig set tulsig a muutdu, hi wɛɛ hi zɔ̧ɔ̧ge,

⁶⁸zaadɛ hi dɛŋg be, hi wɛɛ hi raage a mɔɔ Masihu, Bɛtya̧a̧kɛŋkya gbɔɔlɛ, taamɔ, mɔ dɔgsiw za̧a̧nyɔ dɛ̧mɔ!

⁶⁹Piyɛr rek ɗɔɔt nɛ raa du a luk dɔŋya̧ di be, nis za gbaar zaa raage a nɛ mɔɔ da gitin nɛ hi Yeesu Galileya bɔ hɛw ma mi?

⁷⁰Piyɛr faag a dood lɔlgbar sɛw raa a bé mɛ̄ɛ̄ hinyɔ ha̧a̧mɔ dɔk gɛ.

⁷¹Yɔ wɛɛ gi rek a tutin-gbar bɔ ge, nis za wɛɛ gbɛnige, raas dood wɔ hi gidi a za̧a̧n yɛrɛ da gitin hi Yeesu Nazarɛdya bɔ elo.

⁷²Piyɛr wɛɛ faag dɔɔ eesimɛ a be dɛŋglɔ, be mɛɛ walɔ gɛ.

⁷³Kuudu kaasi wɔ hi ginɛ dihɔ hi wɛɛ hi sɔɔz a Piyɛr ge hi raage a hi rɔbo, mɔ gi zaaya̧ gbunyɔ. Ya̧a̧boon mɔ bɔ gii zunsiw anbɔ be.

⁷⁴Yɔ anbɔ Piyɛr wɛɛ yɛɛl dɔki a be dɛŋglɔ, bé gi ya̧a̧gɔ̧ɔ̧ko Bɛt gí ha̧a̧nib ya̧a̧rɛ! Bé mɛ̄ɛ̄ wal yɛrɛ gɛ! Ɓɔrbɔ kɔba kek gɔ gbɔŋ... !

⁷⁵Piyɛr wɛɛ mɔk mɛɛ hinyɔ Yeesu da raag nɛ be a an kɔba gɔ gi kekɔ, mɔɔ mɔ faabe gi dor dɔɔ taarɛ a mɔ mɛɛbe gɛ. Wɛɛ tuu lak di kaa ha̧a̧ltɔnɔ.