Read Doyayo MATA 27 Bible Online

MATA 27 - Doyayo bible

MATA 27

¹Yɔ lɛl gaa bi̧i̧ltɔnɔ Bɛtmaakwookya gbɔlɛ wɔ hi Yahuduya ɗɛntɛ wɔ sɛw hi mɔks hi wɔ̀ kɔlki a Yeesu zulha an hi gbɔŋge.

²Hi wa̧a̧ Yeesu hi wɔge hi wɛɛ hi kaŋge a hɛbtzulya bɔ Pilatu ge.

³Yɔ Yahuda, za̧a̧n yɔ rɛ̧ɛ̧ Yeesu gbɛn hi wa̧a̧ Yeesu hi rek hi gisig dɔgl-gbaak anbɔ, mɛɛ hinyɔ gɔ gi woo gɛ, wɛns Bɛtmaakwookya gbɔlɛ wɔ hi Yahuduya ɗɛntɛ wɔ tus bɔ hi toog nɛko tus gaat dumbili taarɛ,

⁴raahi a yɔ be rɛ̧ɛ̧ za̧a̧n yɔ taan hin-a̧a̧b gɛ, be gaag a wɔrk naan du, be woo hinha̧a̧lɛ! Wɔrɔ hi googe a dɔgl wi gidu ya? Dɔgl mɔɔnɛ.

⁵Yahuda yɔ lag anbɔ bis tus bɔ a Bɛtluk du dihɔ wa̧a̧ gbɔnɔ tuu rekɔ, da kar ba̧a̧n ɓɛyɔ.

⁶Bɛtmaakwookya gbɔlɛ wɔ hi sɛ̧ɛ̧k tus gaat wɔ bis hɛbtdi hi raa: a tus yɛrɛ ga̧a̧mtusɛ; maak wɛ gāaw gbɔnɔ an wɛ loo wɛ gbaa a Bɛtluk tusgbaaklɛl du gɛ.

⁷Yɔ hi watin dɔglɔ hi loo tus bɔ, hi zemn nám dɔnwɔŋkya bako an hi gbaas dood rɔ̀bɛ loorlɛlɛ.

⁸Yɔ anbɔ, tuur a ɔ̧ti gi zulɛ, hi elik bak bɔ a ga̧a̧mbako,

⁹an hinyɔ Bɛtya̧a̧kɛŋkya bɔ Zeremi dɔg amntɔnɔ gi wooyyɔ a hi loo tus gaat dumbili taarɛ

¹⁰hi zemn nám dɔnwɔŋkya bako anyɔ Waar Bɛt raasib dɔglɔ.

¹¹Yɔ hi kam Yeesu gi erk a hɛbtzulya bɔ Pilatu muutdu, warige a mɔɔ gi Yahuduya waar gbɔɔl ya? Yeesu goo a anyɔ mɔ raa.

¹²Hɔnɛyɔ Bɛtmaakwookya gbɔlɛ wɔ hi Yahuduya ɗɛntɛ wɔ hi gig hingɛ̧ɛ̧nik be, wɛɛ gōō hinza ma gɛ.

¹³Yɔ anbɔ, Pilatu warige a mɔ taa kɛŋk dɔgl kit wɔ hi gim gɛ̧ɛ̧nik ya?

¹⁴Yeesu kɔm hititi, gōō nɛ hinza gbun mɔɔt gɛ; bɛɛ anbɔ hin kɔms hɛbtzulya bɔ gɛrs gbɔɔltɔnɔ.

¹⁵Hɔnɛyɔ Paska naab gɔ rii, hɛbtzulya bɔ gɔ gi waasig dood saal wɔ luknɔya za gbun yɔ hi ɛrige bisigi.

¹⁶Doo za luknɔya giro nuŋgɔ a Barabas, dood sɛw hi mɛɛ gabsɔ dɔglɛ.

¹⁷Yɔ anbɔ, Pilatu war ma dood saal wɔ hi mɔksɔ a ha̧a̧nɛ an be bitsin bɔ? Barabas gii ya, Yeesu bɔ nuŋgɔ zaa a Kristu gii ya?

¹⁸Gii hɛbtzulya bɔ mɛɛ be a hi gaanib Yeesu naandu hi ka̧a̧syɔ.

¹⁹Wɛɛ, yɔ Pilatu da gi ɗɔɔtig a dɔgl-gbaak luk du a gi ɗɔɔtillɛlɛ, nistɔ yaasig ramsɛ a bɔmɔ gɔs nɛ wal riit bɔrɔ hinza nɛ zaŋ. Hinɔ giya lel yɛms du yorum gi ha̧a̧nib ya̧a̧r gbɔɔltɔnɔ a gi dɔŋgo.

²⁰Hɔnɛ Bɛtmaakwookya gbɔlɛ wɔ hi Yahuduya ɗɛntɛ wɔ hi sɔmb dood saal wɔ an hi ɛr Pilatu gi bis Barabas gi ɔɔ Yeesu hi gbɔŋge.

²¹Hɛbtzulya bɔ wɛɛ warihi a dood eerɛ wɛrɛ ha̧a̧nɛ an be bitsin nɔni? Wɔrɔ hi ta̧a̧ a Barabas giya!

²²Wɛɛ warihi a Yeesu yɔ nuŋgɔ a Kristu be woosig nɔ? Dood sɛw hi ta̧a̧ a doomɔg dɔ̧ɔ̧r ha!

²³Pilatu wɛɛ warɔ a woo nɔ hinɔ ha̧a̧lɔ nɔ? Wɔrɔ hi wɛɛ hi ɓooya̧a̧ hi tɛŋko a doomɔg a dɔ̧ɔ̧r ha kpɔd!

²⁴Yɔ Pilatu ɗɛɛ hinza gɔk gɛ, gi wɛɛ gi gbɛn gabs gi ɗundig a dood teesdu loo mɛm nɛɛn naanɔ a dood saal wɔ hi lɔlgbar sɛw dɔgɔ a wal yɛrɛ wɔrkɔ dɔgl be taa du! Dɔgl nɛɛnɛ!

²⁵Dood saal wɔ sɛw hi ta̧a̧ a an ga̧a̧mɔ gi wɛɛz wi zulha hi waat wi zulha!

²⁶Bɛɛ anbɔ Pilatu bitsihi Barabas wa̧a̧ gbɔnɔ rek be. Wɛɛ raa dood zaadɛ hi lɛb Yeesu hi kpoot yɔ hi yɛɛn tusɛ, wɛɛ loo Yeesu gaa dood naandu an hi rek hi doog dɔ̧ɔ̧r ha.

²⁷Pilatu laaya ɔ̧ɔ̧ wɔ hi loo Yeesu hi kaŋg hɛbtzulya bɔ raaɔ bɔ ge du, laaya wɔ hi zɛɛr nɛ sɛw hi mɔks lɛlɔdi.

²⁸Hi hod gbandilɔ wɔ hi wɛɛ hi heksig dimnaan hob muulɛ.

²⁹Hi wɛɛ hi haŋg kal kobsya hi heksig zulha, hi wɛɛ hi gaag bɔ̧ɔ̧kkok wa̧a̧ a naanrɔbo. Hi zagl gi muutdu hi kpɛ̧ɛ̧lig hi raag anyɔ lɛ, a seko ya, Waar Yahuduya!

³⁰Hi tulsig set muulɛ, hi wɛɛ hi loo bɔ̧ɔ̧kkok bɔ hi gaag nɛ hi lɛmnig zulha.

³¹Yɔ hi kpɛ̧ɛ̧lig gi da̧a̧ anbɔ hi hod dimnaan hob bɔ, hi wɛɛ hi heksig gbandilɔ wɔ muulɛ, hi kaŋg ma gɔ an hi rek hi doog a dɔ̧ɔ̧rha.

³²Yɔ dood hi tuuzig hi Yeesu hi dagtin hi wal za Kirɛnɛya nuŋgɔ a Simɔŋ hi fɛ̧ɛ̧ge pɛɛ Yeesu dɔ̧ɔ̧rɔ bɔ kamɔ.

³³Yɔ hi rek hi tuur a lɛlyɔ gɔ hi el a Golgota (raakɔ a zullɛŋk lɛlɛ) ge,

³⁴hi gaa Yeesu bum yɔ hi ɔksin yɛ̧ɛ̧s zobtil an gi yɔ̧, hɔnɛ gii yɔ dag be iinɔ.

³⁵Hi looge hi doog a dɔ̧ɔ̧r bɔ hage hi wɛɛ hi gɛ̧ɛ̧tin gbandilɔ wɔ hi len subudyɔ.

³⁶Hi wɛɛ hi ɗɔɔt dihɔ hi ooge.

³⁷Hi bi̧i̧ hinza a tɛ̧ɛ̧hɛɛk fɛɛt ha a ZA̧A̧N YƐRƐ GI YEESU , YAHUDUYA WAAR YƆ, hi doo gi zullɛl ha a dɔ̧ɔ̧r muulɛ, an hi zuun dɔglɔ.

³⁸Hi wɛɛ hi doo luurɛ ha̧a̧l eerɛ a dɔ̧ɔ̧r zaadɛ ha a gi dɔŋdi: gbunu a gi naanrɔbo, zaa gbunu a gi naanyɛ̧li.

³⁹Dood wɔ hi daak hɔdi hi namsig zulya̧ hi Yeesu niiko,

⁴⁰a mɔɔ Bɛtluk-ɛ̧brikya bɔ, wɔŋkya bɔ ɔ̧t taarɛ! Za̧a̧sum zul mɔ ma! Gid mɔ gi Bɛt waayɔ, sizum dɔ̧ɔ̧r bɔ hage ma!

⁴¹Bɛtmaakwookya gbɔlɛ wɔ hi Bɛtmaakdɔkya wɔ hi Yahu-duya ɗɛntɛ wɔ hi gig kpɛ̧ɛ̧lik an hin gbun bɔ hɛw, hi raako:

⁴²a woy! za̧a̧s dood zaadɛ be, yɛrɛ ɗɛɛ an gi za̧a̧s zulɔ ma gɛ ya? Nɛ gii gi Israhilaya waar i ma. Sizig ma ɓɔri a dɔ̧ɔ̧r bɔ hage, wɛɛ be, wɛ ɗɔbsig ma!

⁴³Gbaa kpoosɔ sɛw a Bɛt ge, dɔg a bee be Bɛt waayɔ. Bɛrɔ! Yɛwɛ see kinsa Bɛt ha̧a̧g gi muulɛ an gi za̧a̧sig ɓɔri be!

⁴⁴Wɛɛ luurɛ ha̧a̧l wɔd wɔɔlikya wɔ hi doohi dɔ̧ɔ̧r ha a gi dɔŋdi hi gig niik lab be.

⁴⁵A lurk teesdu der, lɛlwil a waal bɔ gedu sɛw, am tuur a naaba̧a̧n du.

⁴⁶Yɔ ɔ̧t gi a naaba̧a̧n du Yeesu ɓooya̧a̧ ha̧a̧ltɔnɔ el hinɛ a ꞌꞌEli, Eli, laama sabaktani? ꞌꞌ Raakɔ a Bɛt be, Bɛt be, mɔ ɔɔb nɔ?

⁴⁷Dood zaadɛ wɔ hi erk nɛ lɛlɔdi hi lag anbɔ hi raa a za̧a̧n yɛrɛ gi elik Eliya giya!

⁴⁸Ɓɔrbɔ zaaya̧ gbun nɔɔ da looz bɔɔm tɔ̧ɔ̧z mɛm haatil gedu sa̧a̧ a bɔ̧ɔ̧kkok mɛs ha dɔns Yeesu ya̧a̧gbarɔ an gi yɔ̧.

⁴⁹Hɔnɛ dood zaadɛ wɔ hi raa a erum kete, kinsa Eliya gi zaa gi za̧a̧sig be!

⁵⁰Yeesu wɛɛ ɓooya̧a̧ ha̧a̧ltɔnɔ wɔr gɔ.

⁵¹Yɔ anbɔ gbandil fɛɛt bɔ hi mal a Bɛtluk du taar tees du der, yɛɛl taarik wɛɛha had wɛɛdisɛ. Hɛbt namɔ, hɛɛl gbɔlɛ wɔ hi ɓɛɛlɔ.

⁵²Loor wɔ hi mibtir be Bɛt doodɔ wɔ hi wɔr nɛ kittɔnɔ hi rɛmlɔ hi ɗund

⁵³hi tuuz a loor wɔ gedu be. Yɔ hi ɗund a Yeesu rɛmtigɔ kuu, hi gul a waal gbɔɔl gaat bɔ Urusalima gedu, dood kittɔnɔ hi gbɛnihi be.

⁵⁴Laaya gbɔɔl Romaya bɔ gi erk di hi laaya dɛɛt wɔ hi ook nɛ an bɔhi loo Yeesu muulɔ bɔ dɔ̧ɔ̧r ha luurɛ, yɔ hi gbɛn hɛbt bɔ beekɔ anbɔ hi hinyɔ tuur sɛw hoob gi ha̧a̧hi ha̧a̧ltɔnɔ hi dɔgɔ a hi rɔbo, wal yɛrɛ gi nɛ Bɛt waayɔ!

⁵⁵Nɛɛd zaadɛ kittɔnɔ hi gi erk nɛ hɛmltɔnɔ hi lɔl seezugo. Hii da fɔbz nɛ Yeesu a Galile hi gaag nɛ leesɛ.

⁵⁶A hi teesdu Mariyama Magdalaya bɔ giro, Mariyama yɔ gi Yakuba hi Yusufu nàaya̧ hi Zebede waatɔ wɔ naaya̧ hi ginɛ du be.

⁵⁷Yɔ ɔ̧t legɔ doo rɔɔsya zayɔ fu̧u̧ a Arimate waal gbɔɔl du tuurɔ, nuŋgɔ a Yusufu; gi Yeesu fɔkya ɔ̧ɔ̧n hɛw,

⁵⁸rek zɛm Waar Pilatu warig Yeesu muulɔ bɔ. Yɔ anbɔ Pilatu raa a hi rek hi gaa Yusufu Yeesu muulɔ bɔ.

⁵⁹Yusufu rek loo Yeesu muulɔ bɔ, wɛɛ da loo gbandil buu fɛr fɛɛti wɔbtinge,

⁶⁰kam i̧i̧ a loor seg ɔ̧nɛ yɔ su̧u̧ hi naanɔ a hɛɛl gbɔɔl du gedu. Wɛɛ kibl hɛɛl fɛɛti mibtin loor bɔ ya̧a̧gbarɔ rekɔ.

⁶¹Mari-yama Magdalaya bɔ hi Mariyama zaa bɔ hi gidi hi ɗɔɔt hi riitin hi loor bɔ ya̧a̧gbarɔ der.

⁶²Yoosugɔ holum-ɔ̧tyɔ hi gɛms wɔd gedu talɔ, Bɛtmaak-wookya gbɔlɛ wɔ hi Farisaya wɔ hi rek hi mɔks a Pilatu muutdu,

⁶³hi raage a ɗɛntyɔ, be mɔk be mɛɛ a Yeesu , wal ya̧a̧gɔ̧ɔ̧nya bɔ ginɛ za̧a̧til da dɔg nɛ a kuudu ɔ̧t taarɛ be rɛmlɔ be ɗundɔ.

⁶⁴Yɛrɛ, raam laaya wɔ hi rek hi oo loor bɔ gi tuur ɔ̧t taasimɛ, an bɔ walɛsɛrɛ ɔ̧ɔ̧ wɔ hi rek hi loo wɔrkɔ bɔ luur an hi wɛɛ hi raas dood kuudu: a Yeesu wɛɛ rɛmlɔ ɗuundɔ. Kuudu ya̧a̧gɔ̧ɔ̧nɔ yɔ tɔɔ yɔ daar doos bɔ hɛw.

⁶⁵Yɔ Pilatu lag anbɔ wɛɛ raahi a nɛ loon layaadɛ lɛl-ookyaadɛ gɛrɛ, nɛ da nɛ rek nɛ oo loorlɛl bɔ bɛttɔnɔ anyɔ nɛ ɗɛɛ.

⁶⁶Yɔ anbɔ hi re gɔ. Yɔ hi rekɔ hi see loorbet bɔ, hi wɛɛ hi loo ba̧a̧ni hi wɔmn loorbet bɔ hi wɛɛ hi gbaa laaya wɔ hi oo gɔ.