Read Doyayo MATA 28 Bible Online

MATA 28 - Doyayo bible

MATA 28

¹Yɔ holum-ɔ̧t talɔ, yɔ lɛl gɔ gi gaa a dimaas ɔ̧t bi̧i̧l du, Mariyama Magdalaya bɔ hi Mariyama zaa bɔ hi rek Yeesu loorɔ bɔ seeko.

²Yaala Bɛtwalsɛr za siz bɛtha zaa kibl loorbet bɔ bɛrko ɗɔɔt hage. Hɛbt nam gɔ ha̧a̧ltɔnɔ.

³Bɛt-walsɛr bɔ muulɔ gaa an bɛlya̧bsɛ, gbandilɔ wɔ hi buu an bɛlɓatiri.

⁴Yɔ loor-ookya wɔ hi gbɛn anbɔ hoobha̧a̧hi ha̧a̧l-tɔnɔ, hi bee hi kɔm di an wɔrko.

⁵Hɔnɛ Bɛtwalsɛr bɔ raa nɛɛd wɔ a bɔ hoob gi ha̧a̧nɛ, be mɛɛ a nɛ ɓɛɛk Yeesu yɔ hi doog a dɔ̧ɔ̧r ha giya.

⁶Taa hɛdi, rɛmla ɗund anyɔ da raasinɛ, zaan nɛ see lɛl yɔ da kus nɛ gɛrɛ,

⁷nɛ wɛɛ nɛ rek nɔɔko nɛ raas walɛsɛrɛ ɔ̧ɔ̧ wɔ a Yeesu rɛmla ɗund wɔrkɛ teesdu, wɛɛ gisin dork a Galile, nɛ rek nɛ gbɛnig hɔ. Hinyɔ gi nɛ an be dɔgsinɛ gii ma bɔ.

⁸Nɛɛd wɔ hi ɔɔ loorlɛl bɔ nɔɔktɔnɔ hi rek hi hoobo hi hat gbɔɔltɔnɔ, hi nɔɔ hi ren ramsɔ an hi fɔks walɛsɛrɛ ɔ̧ɔ̧.

⁹Yaala Yeesu zaa dagtin hi nɛɛd wɔ raahi a seko! Nɛɛd wɔ hi sɔɔz gi dɔŋdi hi zaglɔ hi wa̧a̧ dɔɔɔ hi ɗɔbsige.

¹⁰Yeesu wɛɛ raahi a bɔ hoob gi ha̧a̧nɛ, rekin nɛ raas yɛ̧ɛ̧ be hiya hi rek a Galile hi gbɛnib hɔ.

¹¹Yɔ nɛɛd wɔ hi reko, laaya wɔ zaadɛya̧ hi ook nɛ loor bɔ hi rek a waal gbɔɔl du, hi fɔks Bɛtmaakwookya gbɔlɛ wɔ hinyɔ daa sɛw.

¹²Bɛtmaakwookya gbɔlɛ wɔ be, hi mɔks hi Yahuduya ɗɛntɛ wɔ hi wɔya̧a̧ hi loo tus gbɔɔltɔnɔ hi gaa laaya wɔ,

¹³hi sɔmbihi a nɛ dɔgɔ a yɔ nɛ gi yoko, Yeesu walɛsɛrɛ ɔ̧ɔ̧ wɔ hii zaa yɛms du hi loo wɔrkɔ bɔ luurɛ.

¹⁴Hɛbtzulya bɔ gi lagɔ, wi mɛɛ dɔglyɔ gɔ wi ɗɛɛnige an wi tuusin ya̧a̧rhant du.

¹⁵Laaya wɔ hi loo tus bɔ hi woo an hinyɔ hi raahi nɛ be. Dɔgl bɔrɔ ɛmb gɔ a Yahuduya wɔ hi teesdu tuur ɔ̧tigi zulɛ.

¹⁶Yeesu walɛsɛrɛ ɔ̧ɔ̧ wɔ koobl daa gbun hi rek a Galile, a ga̧a̧t yɔ da raa nɛ a hí dagtin lɛlɔge.

¹⁷Yɔ hi tuur hi gbɛn Yeesu hi zagl di hi ɗɔbsige. Zaadɛ hi tees du hi faak hi kpoos du a gii gɛ, doo za dɔɔmyɔ.

¹⁸Yeesu sɔɔzɔ dɔksihi a Bɛt gaab tɛŋk sɛw a bɛtha hi hɛbtdi.

¹⁹Yɔ anbɔ, rekin nɛ wɛɛn dood dɔ̧ɔ̧t waal du sɛw walɛsɛrɛ benɛ. Hotinnɛhi Bɛtmɛmɛ hi Baa nuŋgɔ, hi waaɔ hi Bɛt Mɔkilɔ.

²⁰Goksinɛhi hinyɔ be dɔgsin sɛw hi fɔb dɔglɔ. Yɛrɛ mɛɛn a be gi hi nɛɛ ɔ̧t nuŋg sɛw gi tuur a waalda̧a̧ki. Anbɔ.