Read Doyayo MATA 3 Bible Online

MATA 3 - Doyayo bible

MATA 3

¹A ɔ̧tɔ ge Yohana Doo Bɛtmɛm Hotingoya bɔ mid a Yahuduya a hɛtdɔŋ du a lɛl koot ha, dɔgɔ

²a Bɛt wáátɔ sɛ̧ɛ̧bɔ, zɛmrin kpoos nɛ!

³Bɛtya̧a̧kɛŋkya bɔ Esaya boo dɔgl ɔ̧ɔ̧n gi raa a hi kɛm za̧a̧n za gi ya̧a̧ɓoolik a hɛtdɔŋdu, a gɛmntsin Waar bɔ gbɔnɔ, gɛmntsinge gbɔnɔ wɔ hi er bɛttɔnɔ!

⁴Gii Yohana heg gbanyɔ hi gɔn gɛloba bɛntigi hi nahi̧i̧l see du. Gi za̧a̧nik leesɔ dagrɛ hi hɔ̧dkurumi.

⁵Yɔ anbɔ dood Urusali-maya wɔ hi dood Yahuduya wɔ sɛw hi dood waalya zaadɛ wɔ hi sɛ̧ɛ̧b a Urdum zɛɛ dɔŋdi sɛw hi zaak a ge.

⁶Yɔ hi walk hinha̧a̧lya̧, Yohana hotinihi Bɛtmɛm gɔ a Urdum zɛɛ du.

⁷Hɔnɛyɔ Yohana gbɛn Farisaya wɔ kittɔnɔ hi zaak a ge hi Sadukiya wɔ kittɔnɔ an hi loo Bɛtmɛmɛ, raahi a nɛɛ kpolumdɔ̧ɔ̧t wɛ, bɔ goksinɛ a nɛ nɔɔ Bɛt nɔɔtigɔ yɔ gi zaak nɔ?

⁸Yɔ anbɔ woon woos yɔ gɔ gi zuun a nɛ zɛmr kpoos nɛ nɛ ɔɔ woos nɛ amntɛ wɔ.

⁹Bɔnɛ mɔk an nɛ raa zul nɛ a baa wɛ Abraham gii gi baa wɛ. Yɔ anbɔ, be gisin raako a Bɛt ɗɛɛ an gi loo bet wɛrɛ gi gɔns Abraham waato.

¹⁰Yɛrɛ hi gbaa gaal a tɛ̧ɛ̧yɛ̧ɛ̧s wɔ hi muul da̧a̧da̧ ma an gi dɛ̧ɛ̧tiro; tɛ̧ɛ̧ wɔ hi hum rɔbtɔnɔ gɛ sɛw hi gboblihi hi yaahi laa du.

¹¹Bee be gin hotingo Bɛtmɛm hi mɛm tɔs an nɛ zuun a nɛ zɛmr kpoos nɛ, nɛ ɔɔ woos nɛ ha̧a̧l wɔ. Yɛrɛ za̧a̧nyɔ gi zaak be kuudu daaribdaarɔ hi tɛŋko, bee be tuur doo rɔb an be pid taalɔ gɛ. Gii gi hotinnɛ Bɛtmɛm hi Bɛt Mɔkilɔ hi laa.

¹²Gin dɛkilɔ naandu an gi fɛ totɔ gi gɛ̧ɛ̧ gaato hi zulɛ. Gi gaas daŋkɔ gi tuu tot bɔ gi tɔ̧ɔ̧ bil du, gi wɛɛ gi kpɔɔ kas wɔ a laa yɔ gɔ niŋ gɛ gedu.

¹³Yɔ anbɔ Yeesu fu̧u̧z a Galile zaa Yohana ge a Urdum zɛɛ du an gi hotinge Bɛtmɛmɛ. Raa Yohana a hotinbe Bɛtmɛmɛ.

¹⁴Yohana ha̧a̧g an gi iinɔ, raa Yeesu a bee ha̧a̧be an mɔɔ mɔ hotinbe Bɛtmɛm be, mɔɔ mɔ wɛɛ mɔ zaak a beege be ya?

¹⁵Yeesu wɛɛ raage a ta̧a̧mɔ an hinɔ gi wooy anbɔ ɓɔryɔ; bɛr an wɛ woo hinyɔ rii a Bɛt muutdu sɛw anbɔ. Yohana wɛɛ ta̧a̧ ma hotinge Bɛtmɛm bɔ gɔ ma si̧.

¹⁶Yɔ hi bɛɛ Yeesu Bɛtmɛm bɔ hotingo kaza mɛm bɔ gedu; a ya̧a̧gbun bɔ gedu, bɛtha kpɛ̧ɛ̧rɔ, wɛɛ gbɛn Bɛt Mɔkilɔ fu̧u̧z bɛtha gi sizig gi muulɛ an gutu buu.

¹⁷Wɛɛ ya̧a̧ za booyz bɛtha dɔgɔ a Za̧a̧n yɛrɛ gi waa be yɔ ha̧a̧be hi kpoos be sɛw, hat be sɛw gi a ge.