Read Doyayo MATA 7 Bible Online

MATA 7 - Doyayo bible

MATA 7

¹Bɔnɛ gbaas doo dɔgl an bɔ Bɛt gi gbaas nɛɛ dɔgl be.

²Bɛt gi gbaas nɛɛ dɔgl anyɔ nɛ gis dood gbaak be. Bɛt gi goosin hin hi goonis yɔ nɛ gis dood hin goonik be.

³Nɔ mɔ seek betwaa yɔ gi a namɔza yɔ̧l du mɔ gbɛ̄n ga̧a̧t yɔ gi a mɔ yɔ̧l du gɛ?

⁴Mɔɔ yɔ mɔ gin ga̧a̧t yɔ̧l du, gi an mɔ raa namɔza ri a ɔbe ha̧tsum betwaa mɔ yɔ̧l du, nɔ?

⁵Mɛlya ha̧a̧lɛ! Ha̧sum ga̧a̧t bɔ gi mɔ yɔ̧l du kete, ɓɔr yɔ̧l mɔ gi ɔɔ gaak rɔbtɔnɔ an mɔ ha̧ts namɔza betwaa ɔnɛ bɔ gi yɔ̧l du.

⁶Bɔnɛ gaa kaa wɔ hin gaatyɔ fu̧u̧z a Bɛt ge an bɔhi zɛmrzɔ hi lɔmtinɛ. Bɔnɛ bits hab wɔ root nɛ rɔbɛ wɔ, an bɔhi ɗa̧a̧k dɔɔ du tɔs.

⁷Ɛrinɛ hi gaanɛ, tɛnɛ nɛ zɛmɔ, ɓàànɛ hi gborsinɛ.

⁸Yɔ anbɔ, za̧a̧nyɔ zɔ̧bɔ gi dagɔ, za̧a̧nyɔ tɛbɔ gi zɛmɔ, za̧a̧nyɔ ɓaa luk gbɔnɔ hi kpɛ̧rsige.

⁹Bɔ za̧a̧nɔ a nɛ teesdu waaɔ gi ɛrig koko gi gaag bet nɔ?

¹⁰Gi ɛrig dutu, gi gaag beks nɔ?

¹¹Nɛɛ yɔ nɛ gi ha̧a̧lɛ nɛ́ mɛɛ waat nɛ hii hinrɔb gaako, gi gis Baa nɛ yɔ bɛtha gii gi ɔs dood wɔ hi ɛrig hinrɔb gaak ya?

¹²Yɔ anbɔ hinyɔ ha̧a̧nɛ an dood hi woosin sɛw, nɛɛ be woosinɛhi anbɔ be; Bɛtmaakdɔglɔ hi hinyɔ Bɛtya̧a̧kɛŋkya wɔ hi dɔg nɛ giibɔ.

¹³Guzin a gbɔnɔ ɓɔ̧ɔ̧yyik bɔ gedu! Gbɔnɔ za fɛɛt giro, hi gbɔnɔ zayɔ bɛr daaki, gii gi kaŋk laa du, wɛɛ dood kittɔnɔ hi fɔk gedu.

¹⁴Yɛrɛ gbɔnɔ yɔ gi kaŋk a za̧a̧tig du daakɔ ɓaaɓa, wɛɛ daaklɛl bɔ ɓɔ̧ɔ̧yyɔ. Wɔ hi gi fɔk gedu hi kit gɛ.

¹⁵Oon zul nɛ hi Bɛt-ya̧a̧kɛŋkya ya̧a̧gɔ̧ɔ̧nya wɔ hi zaak a nɛɛge hi wɛɛnik muulya̧ an tamɔ. Wɛɛ a hi kpoos du be hi gi ler-gumyɔ.

¹⁶Nɛ́ mɛɛhi a hi woos du. Nɛ̍ mɛɛ be a gɔ hí ha̧b inaboohi a tɛ̧ɛ̧-kobsya muul gɛ. Wɛɛ gɔ hí ha̧b yɔmntnɔɔ huml a gaŋzaŋ muul gɛ.

¹⁷Tɛ̧ɛ̧ rɔb sɛw gɔ hum huml rɔbo, tɛ̧ɛ̧ ha̧a̧l be gɔ hum huml ha̧a̧l be.

¹⁸Tɛ̧ɛ̧ rɔb dɛɛ̄ an gi hum huml ha̧a̧l gɛ, wɛɛ tɛ̧ɛ̧ ha̧a̧l be ɗɛɛ an gi hum huml rɔb gɛ be.

¹⁹Tɛ̧ɛ̧ yɔ gi sɛw gí hum huml rɔb gɛ hi gboge hi yaag laa du.

²⁰Yɔ anbɔ, nɛ mɛɛnihi woosya̧ bɔ giya.

²¹Dood wɔ gɔ hi elib a Waar i, Waar i, hii taa gulik hi sɛw a Bɛt wáát du. Gɛ dood wɔ gɔ hi woo hinyɔ Baa be bɛtha ha̧a̧ge.

²²A dɔgl gbaak ɔ̧ti dood kittɔnɔ hi raabe a Waar i, Waar i, nɛ wi kɛm dɔgl a mɔ ya̧a̧ du wi dɔg a mɔ nuŋg du mi? Nɛ wi nin loorɛha̧a̧l a mɔ nuŋg du mi? Nɛ wi woo gɛrs kittɔnɔ a mɔ nuŋg du mi? Ri mɔ giw ɔɔk kaŋkɔ a Bɛt wáát du nɔ?

²³Bee be wɛɛ be raahi a be mɛɛn nɛ gɛ zaŋ, nɛɛ dood hinha̧a̧l wookya wɛ, hɛmlin hi beya!

²⁴Yɛrɛ za̧a̧n yɔ gi lak dɔgl yɛrɛ be dɔko, gi wɛɛ gi woo hinɔ, riitin an doo yɔ mɛɛhin gi zul du gi wɔm lukɔ a hɛɛlkpar ha.

²⁵Bɛl naŋgɔ, mɛm tuu zɛɛ du, zɛk ha̧a̧l fɛb a luk bɔ muulɔ ge hi tɛŋko, anyɔ hi wɔŋg a hɛɛlkpar ha be, ɛ̧b gɛ.

²⁶Yɛrɛ za̧a̧nyɔ lag dɔgl wɛrɛ be dɔko gi wɛɛ gi wōō hinɔ gɛ, riitin an za̧a̧nyɔ taan zul gɛ gi wɔm lukɔ a hɔ̧ɔ̧l ha.

²⁷Bɛl naŋgɔ, mɛm tuu zɛɛ du, zɛk ha̧a̧l fɛb a luk bɔ muulɔ ge, luk bɔ ɛ̧btir hɛbt di sɛw.

²⁸Yɔ Yeesu da̧a̧s dɔglɔ, dood saal wɔ hi kɛmɔ, hinɔgok bɔ kɔmsihi gɛrsɛ.

²⁹Anyɔ gii bōō dɔglɔ an Bɛtmaakdɔkya wɔ gɔ hi book gɛ, gisihi hingok an dooyɔ gin tɛŋko.