Read Doyayo MATA 8 Bible Online

MATA 8 - Doyayo bible

MATA 8

¹Yɔ Yeesu gi sizig a ga̧a̧t bɔ hage, dood saal kittɔnɔ hi fɔbzige.

²Yaala ɗobtilya za zaa zagl gi muutdu raage a hingokya , gi ha̧a̧mɔ, mɔ ɗɛɛ an mɔ za̧a̧sibe ɗobtil be bɔ gi da̧a̧.

³Yeesu yɔd naanɔ ki̧i̧ge, wɛɛ raage a ha̧a̧be, ɗobtil mɔ bɔ da̧a̧ge! Ɓɔrbɔ wal bɔ ɗobtilɔ bɔ da̧a̧ gi muulɛ.

⁴Yeesu wɛɛ raage a lagum bɛttɔnɔ, bɔmɔ raas doo za hinza. Wɛɛm mɔ rek a Bɛtmaakwookya bɔ ge mɔ zunsig muul mɔ; wɛɛm mɔ da mɔ gɔs Bɛt maak anyɔ Muusa dɔgɔ, an hinɔ gi wɛɛs dood hinmɛksingoya a mɔ za̧a̧za̧.

⁵Anyɔ Yeesu gul a waal gbɔɔl bɔ nuŋgɔ a Kapɛr-nayum gedu, laya za gbɔɔl Romaya sɔɔz Yeesu dɔŋdi,

⁶zɔ̧ge raage a Waar i, walsɛr be gi gumtil gi kusig raa du gi zaŋgdyɔ, gi ya̧a̧rha̧a̧k ha̧a̧ltɔnɔ.

⁷Yɔ dɔg gi da̧a̧ anbɔ Yeesu raage a be rekɔ an be za̧a̧sige.

⁸Hɔnɛ laaya gbɔɔl bɔ wɛɛ ta̧a̧ge a Waar i, bé rı̄ı̄ an mɔ zaa mɔ gul be raa du gɛ; dɔgum hin gbun kpɔd, walsɛr be bɔ gi za̧a̧.

⁹Yɔ anbɔ, bee hi zul be, be gi a gbɔlɛ be wɛɛdisɛ, be gin laya dɛɛt a be dɔɔ di be; gɔ be raa zaa a rekumɔ! Rekɔ. Gɔ be wɛɛ be raa zaa bɔ a zaamɔ! za̧a̧n bɔ zaaza. Gɔ be raa walsɛr be bɔ a woom hin lɛ! Woo hinɔ.

¹⁰Yɔ Yeesu kɛm dɔgl wɔrɔ hin gi wɛɛsig gɛrsɛ, raa dood wɔ hi gig fɔko a be raasin hi rɔbo: a Israhila du hɛw, be zɛmdir doo za ɗɔbs Bɛt an wal yɛrɛ gɛ zaŋ.

¹¹Be gisin raak rɔbo a dood kittɔnɔ hí fu̧u̧z a ɔ̧tkazigi, zaa a ɔ̧tleki hi le lees lɛlgbunu hi Abraham hi Isaaku hi Yakuba a Bɛt wáát du.

¹²Yɛrɛ Bɛt wáátɔ ginɛ Yahuduya wɔ yaanɛ, Bɛt bilsihibils a lɛlwil du a lakdi; a hɔ, dood hi kaa hi gboo nuŋya̧.

¹³Yeesu wɛɛ raa laaya gbɔɔl bɔ a rekum mɔ lɛlɛ, Bɛt gi woosum anyɔ mɔ ɗɔbsɔ. Yɔ Yeesu gi raak anbɔ be, laaya gbɔɔl bɔ walsɛrɔ bɔ gi za̧a̧k be.

¹⁴Yɔ Yeesu rek a Piyɛr raa du, zɛm Piyɛr gɔnsiŋ zul gig laak gi kusig a leeso ha, sɔɔ gi dɔŋdi,

¹⁵ki̧i̧ naanɔ, nis bɔ muulɔ sa̧a̧k bɔ da̧a̧. Wɛɛ ɗundɔ gaa Yeesu leesɛ le.

¹⁶Yɔ ɔ̧t legɔ, hi kams Yeesu dood kittɔnɔ hi gin loorɛ-ha̧a̧l muul du. Dɔg dɔgl gbunu gi tuusil loorɛha̧a̧l wɔ hi gi a dood muul du, wɛɛ za̧a̧sil gumtil zaadɛ wɔ sɛw.

¹⁷Yeesu woo anbɔ an hinyɔ Bɛtya̧a̧kɛŋkya bɔ Esaya dɔgɔ a Yeesu zulha gi wooyyɔ a gii hi zulɔ loo zaŋgdums wɛ yɔ wɛ gi nɛ waanuko, wɛɛ pɛrsɛ gums wɛnɛ.

¹⁸Yɔ Yeesu gbɛn dood saal kittɔnɔ hi rɔge, wɛɛ raa walɛsɛrɛ ɔ̧ɔ̧ wɔ a wɛ́ tal a mɛmbal kasiŋ zaa bɔ ge.

¹⁹Bɛtmaakdɔkya za zaa a ge raage a hingokya , bé fɔmɔ a lɛl yɔ gɔ mɔ rek ge sɛw.

²⁰Yeesu ta̧a̧ raage a bɛrtɔkgɛ hi gin luko, nɔɔs wɔ bɛtha hi gin zɛko. Yɛrɛ Za̧a̧n Waa bɔ taan lɛlyɔ gɔ gi kus gi gbaa zulɔ du.

²¹Walsɛrɔ zaa gbun raage a Waar i, gaabe gbɔnɔ an be rek be i̧i̧z baa be wɔrkɔ kete.

²²Yeesu wɛɛ ta̧a̧ raage a mɔnɛ fɔbzibe, ɔɔm wɔrkɛ wɔ hi i̧i̧ wɔrkɛya̧ hɔ.

²³Yɔ Yeesu re gi kar a lɛmb du, walɛsɛrɛ ɔ̧ɔ̧ wɔ hi fɔg duhɔ.

²⁴Zɛk za ha̧a̧l yɛɛl fɛk a mɛmbal bɔ geha, mɛmɗukil wɔ hi zɛks lɛmb bɔ an hi imsige. Yɔ anbɔ Yeesu gi nɛ yok be,

²⁵hi sɔɔ hi kpooge hi raage a Waar i, za̧a̧siwi! Wɛ wɔrkwɔrɔ!

²⁶Yɔ Yeesu rɛmɔ warihi a hoob gin ha̧a̧k nɔ? Nɛɛ dood Bɛt ɗɔbsig kaasiya wɛ! Gɔma wɛɛ ɗund ya̧a̧l zɛk ha̧a̧l bɔ hi mɛmbal bɔ, lɛl kɔm gɔ seseg.

²⁷Yɔ dood hinkɔmsihi gɛrs be hi warɔ a nɔ nɛ za̧a̧nɔ anyɔ zɛk hɛw hi mɛmɛ hi lagsig nɛ tɔn anyɔ be?

²⁸Yɔ Yeesu tuur a mɛmbal kasiŋ zaabɔ ge a Gadarɛnɛ hɛbt du, dood loorɛha̧a̧lya zaadɛ eerɛ hi tuuz a loorlɛlɛ hi zaa hi dagtin hi giya. Doodya̧ hi ha̧a̧hoob ha̧a̧ltɔnɔ, doo za ɗɛɛ an gi fɔb gbɔnɔ bɔ hɔ gɛ.

²⁹Hi ɓooya̧a̧ hi war Yeesu a dɔgl wi nɔ du hi mɔya, Bɛt waaɔ? Mɔ zaa hɛdi an mɔ ha̧a̧niw ya̧a̧r anyɔ ya̧a̧rhant bɔ ɔ̧tɔ hi dɛ̧ɛ̧ du tuur hɛw gɛ ya?

³⁰Hɔnɛ hab kittɔnɔ hi tɔk hɛto, hɛml hi lɛlyɔ hi gi ge kaasi.

³¹Loorɛha̧a̧l wɔ hi zɔ̧ Yeesu hi raage a mɔ giw niniko, yaawi a hab wɛrɛ hi muul du.

³²Yeesu raahi a tuunɛ nɛ rekɔ. Hi tuu gɔ dood eerɛ wɔ hi muul du hi re hi gul a hab wɔ hi muul du be. Ɓɔrbɔ hab wɔ maasya̧ sɛw hi nɔɔ hi tii a kasiŋ disɛ hi da hi gi̧i̧l a mɛmbal du hi wɔrɔ.

³³Hab nɛɛrɛwaat wɔ hí gbɛn anbɔ be hi nɔɔ hi rek a waal gbɔɔl du hi fɔk hinyɔ tal sɛw, hi hinyɔ daa a dood loorɛha̧a̧lya eerɛ wɔ hi muulɛ.

³⁴Yɔ anbɔ dood wɔ a waal bɔ gedu sɛw hi tuuz hi zaa a Yeesu ge, yɔ hi zɛŋge hi zɔ̧ge an gi ɗund gi ɔɔ hɛbtya̧ bɔ.