Read Doyayo MATA 9 Bible Online

MATA 9 - Doyayo bible

MATA 9

¹Yɔ Yeesu re gi kar a lɛmb za du, wɛɛ kar mɛmbal bɔ rek a gi waal gbɔɔl du.

²Yɔ rek anbɔ hi kamsig wal za zaŋgdi a sil ha. Yɔ Yeesu gbɛn dood wɔ ɗɔbsigya̧ be, raa wal zaŋgd bɔ a waa be, ɓaasum muul mɔ, be bitsum hinha̧a̧l mɔ bitsɔ!

³Yɔ anbɔ Bɛtmaakdɔkya zaadɛ hi mɔkig hi kpoos du be a wal yɛrɛ gi book ya̧a̧ha̧a̧l a Bɛt zulha!

⁴Yɔ Yeesu mɛɛ hinyɔ wɔrɔ hi mɔkig hi kpoos du be, warihi a nɔ nɛ gin mɔkil ha̧a̧l wɔrɔ nɛ kpoos du anbɔ nɔ?

⁵An be raa doo zaŋgd bɔ a be bitsim hinha̧a̧l mɔ wɔ bitsɔ, hi zaa ráákɔ a ɗukum ha mɔ ɛmbɔ, nɔni ɓaa gi daarlɛl nɔ?

⁶Yɛrɛ ɔbe zunsin hin an nɛ mɛɛ a Za̧a̧n Waa bɔ gin tɛŋk a hɛbtdi an gi bits dood hinha̧a̧lɛ. Wɛɛ raa doo zaŋgd bɔ a ɗukumɔ mɔ loo sil mɔ mɔ wɛɛ mɔ lɛlɛ!

⁷Wal bɔ ɗundɔ loo silɔ re gi lɛlɛ.

⁸Yɔ dood saal wɔ hi gbɛn hini daa anbɔ hoobha̧a̧hiha̧, hi wɛɛ hi baan Bɛto anyɔ gaa dood tɛŋk anbɔ.

⁹Yɔ Yeesu ɗund hɔdi gi fɔk gbɔnɔ a tooslukya̧ gbarɔ, gbɛn doo za gi ɗɔɔtig a toosluk bɔ gedu nuŋgɔ a Mata, elige, a fɔbzibe. Mata ɗundɔ fɔge.

¹⁰Yɔ Yeesu ɗɔɔt gi hinlek a Mata raa du, tooszekyaadɛ hi dood hinha̧a̧l wookyaadɛ kittɔnɔ hi zaa hi ɗɔɔt hi hinlek elo, hi Yeesu hi walɛsɛrɛ ɔ̧ɔ̧ wɔ be.

¹¹Yɔ Farisaya wɔ hi zaa hi gbɛn anbɔ hi war walɛsɛrɛ ɔ̧ɔ̧ wɔ a hingokya nɛ bɔ gi hinlek nɔ hi tooszekya wɔ hi hinha̧a̧l wookya wɔ nɔ?

¹²Yɔ Yeesu lag anbɔ raa a dood wɔ muulya̧ gi rɔbtɔnɔ ha̧a̧hi gɛr gɛ, ha̧a̧ gumtil wɔ hiya.

¹³Da nɛ gok hinyɔ hi bi̧i̧ a Bɛt ɗɛɛrwol du, an nɛ kɛm hinɔ rɔbtɔnɔ: a Bɛt raa a ha̧a̧be an hi mɛɛtin ya̧a̧rɛ, hā̧ā̧be maaknamb wɔ hi gbɛɛtirgo gɛ. Yɛrɛ bé zāā an be el dood rɔbɛ gɛ, be zaa an be el dood hinha̧a̧lya wɔ hiya.

¹⁴Yohana walɛsɛrɛ ɔ̧ɔ̧ wɔ hi zaa a Yeesu ge hi warige a wiya hi Farisaya wɔ wi hinlilko, nɔ ɔnɛ walɛsɛrɛ mɔ wɔ hi lilhin ya̧nɛ zaŋ gɛ?

¹⁵Yeesu ta̧a̧ raahi a nɛ mɔk a rɔ̀bɛ wɔ hi elzihi a lottins naab du hi ɗɛɛ an hi mimɔ anyɔ hi gi hi nislookya bɔ ket ya? Taa anbɔ! Yɛrɛ ɔ̧tyɔ gɔ hí wa̧a̧ nislookya bɔ hi ha̧sig a hi teesdu, gɔ gi tuurɔ hi lil gɔ.

¹⁶Doo za gɔ lōō gbandil taakil seg yɔ nukt gɛ an gi haktin gbandil wɔm gɛ, à anbɔ gɛ, gbandil seg taakil bɔ nukt gɛ yɔ taar gbandil wɔm bɔ yɔ daarlɛl ɓɛ.

¹⁷Gɔ hi tɔ̧ɔ̧ bum mukt a tik wɔm du gɛ, à anbɔ gɛ, tik wɔm bɔ yɔ foo bum bɔ yɔ gub hɛbtdi. Gɔ hi tɔ̧ɔ̧ bum mukt a tik seg du, bum bɔ hi tik bɔ sɛw hi kɔm rɔbtɔnɔ. Anbɔ hinza yɔ ha̧tir gɛ.

¹⁸Yɔ Yeesu gisihi hin wɔrɔ dɔk anbɔ Yahuduya mɔk-silluk zulya za zaa zagl gi muutdu raage a waa be siŋg wɔr ɓɔryɔ, yɛrɛ zaamɔ mɔ gbaasig naan muulɛ gi za̧a̧.

¹⁹Yeesu ɗukɔ hi walɛsɛrɛ ɔ̧ɔ̧ wɔ hi fɔ wal bɔ.

²⁰Nis za lis gig fɔk wɛl kooblɛ daa eerɛ, zaa pɛt gi kuudu, ki̧i̧ gbandilɔ tɔlya̧ bɔ.

²¹Da gi mɔkig a gi kpoos du be a à be ki̧i̧ nɛ gbandilɔ bɔ gii mɔɔti, be mɛɛ a be za̧a̧za̧.

²²Yɔ nis bɔ zɛmr gi ki̧i̧ gbandilɔ bɔ anbɔ Yeesu zɛmr seege wɛɛ raage a waa be siŋgo, ɓaasum muul mɔ, yɔ mɔ ɗɔbs a mɔ kpoos du a be za̧a̧, mɔ za̧a̧za̧. Yɔ anbɔ nis bɔ lisɔ bɔ da̧a̧ gɔ ɓɔrbɔ be.

²³Yɔ Yeesu zaa a mɔksilluk zulya bɔ gi raa du gi zɛm dood hi waŋgoor utugo, zaadɛ hi ya̧a̧ɓooluko hi kaal be,

²⁴raahi a tuunɛ, yɛrɛ waa bɔ wɔr gɛ, gi yokyo. Yɔ dood wɔ hi lag anbɔ hi kpɛ̧ɛ̧lig-kpɛ̧ɛ̧lɔ.

²⁵Hɔnɛyɔ hi yaa dood saal wɔ hi tuu lakdi, Yeesu gul gɔ a luk bɔ gedu wa̧a̧ waasiŋ bɔ naan muulɛ, waa bɔ ɗund gɔ ha.

²⁶Dɔglɔ hɛks gɔ waal bɔ gedu sɛw.

²⁷Yɔ Yeesu ɗuk hɔdi gi daak gi rek lɛlza, yɔ̧ɔ̧rɛ eerɛ hi fɔge hi ya̧a̧ɓooliki a Dawda waawalɔ, mɛɛsiwi ya̧a̧rɛ!

²⁸Yɔ Yeesu re gi tuur raa du, yɔ̧ɔ̧rɛ wɔ eerɛ hi sɔɔ gi dɔŋdi, gii wɛɛ warihi a nɛ ɗɔbs nɛ kpoos du a be gin tɛŋk an be woo hinɔ ya? Wɔrɔ hi wɛɛ hi ta̧a̧ge a hɔɔ, Waar i, wi ɗɔbsɔ!

²⁹Yeesu gbaa naan hi lɔl du dɔgɔ a an hinɔ gi wooy anyɔ nɛ ɗɔbs nɛ kpoos du!

³⁰Dood eerɛ wɔ lɔlya̧ wɛɛ gaa hi gbɛn gɔ, Yeesu wɛɛ raahi hi naati a lagin bɛttɔnɔ, bɔ doo gi mɛɛ hinɔ.

³¹Hɔnɛ yɔ̧ɔ̧rɛ wɔ hí bɛɛ tuuko hi rek hi ɛmbin nuŋgɔ a waal bɔ gedu sɛw.

³²Yɔ Yeesu tuu gi rek hi walɛsɛrɛ ɔ̧ɔ̧ wɔ, dood hi kams Yeesu za̧a̧nza yɔ gin loorɛha̧a̧l gi muul du gi wɛɛnig su̧u̧ki.

³³Yɔ tuus loorɛha̧a̧l bɔ a za̧a̧n bɔ gi muul du, za̧a̧n bɔ baar ya̧a̧booko. Yɔ dood saal wɔ hinkɔmsihi gɛrs be hi raa a hi gbɛn hinza tuudir a Israhila hɛbt du gi riitin an yɛrɛ gɛ.

³⁴Hɔnɛ wɛɛ Farisaya wɔ hi dɔg be a loorɛha̧a̧l wɔ waar ya̧ bɔ gii gaa Yeesu tɛŋko gi tuusin loorɛha̧a̧lɛ!

³⁵Yeesu ɛmb gbɛ̧ɛ̧ka a waal gbɔlɛ wɔ du hi raat dɛɛt wɔ du sɛw gi hingok a mɔksilluk wɔ duge gi dɔk Bɛt wáátɔ Dɔgl Rɔb bɔ, gi tuusilgo gums sɛw hi gums sa̧ytya zaadɛ kittɔnɔ.

³⁶Yɔ Yeesu gbɛn dood saal wɔ hi mɔɔ be, muulya̧ gi wɔlihi an tam wɔ hi taan nɛɛrawaa be, hi ha̧a̧sig ya̧a̧rɛ.

³⁷Raa walɛsɛrɛ ɔ̧ɔ̧ wɔ a totɓɛs bɔ woosɔ tɔɔtɔ, wɛɛ woosya hi kit gɛ be.

³⁸Da nɛ zɔ̧b wooszulya bɔ gi yaaz woosya kittɔnɔ hi zaa a totɓɛsɔ bɔ gedu.