Read Doyayo MARKUS 10 Bible Online

MARKUS 10 - Doyayo bible

MARKUS 10

¹Yeesu ɗuk hɔdi hi walɛsɛrɛ ɔ̧ɔ̧ wɔ hi rek a Yahuduya hɛbt du, hi wɛɛ hi rek a Urdum zɛɛ bɛrk zaabɔ ge. Dood saal hi wɛɛ hi mɔks gi dɔŋdi, Yeesu wɛɛ yɛlsihi hingok gɔ anyɔ gɔ gi waanik nɛ faa.

²Farisaya wɔ hi zaa a ge an hi goog dɔgl wa̧a̧nuko. Hi ɛrige: a maak wɛ gaa gbɔnɔ an doo gi hɛɛtin hi nisɔ ya?

³Yeesu ta̧a̧hi: a Muusa raan a ri?

⁴Hi ta̧a̧ a Muusa gaa gbɔnɔ a doo gi bi̧i̧ ɗɛɛrwol hɛɛtinsya an gi ga̧a̧rin nisɔ.

⁵Yeesu wɛɛ raahi: a Muusa bi̧i̧sin hin bɔrɔ a nɛ kpoos ɓaatil dɔŋ ro.

⁶A waal yɛɛliki, Bɛt yɔ kim hin sɛw hi bi̧i̧: a kim doo, walɔ hi nisɛ.

⁷Yɔ anbɔ, wal gi ɔɔ baatɔ hi nɔɔtɔ gi ɔks hi nisɔ;

⁸hi eerɛ hi wɛɛ muul gbunu. Yɔ anbɔ hí gɛ̧ɛ̧y gɛ, hi ɔks muul gbun kpɔd.

⁹Bɔ doo gi gɛ̧ɛ̧ hinyɔ Bɛt ɔksɔ.

¹⁰Yɔ hi gi a raa du, walɛsɛrɛ wɔ hi wɛɛ hi ɛrig dɔglɔ.

¹¹Yeesu raahi: a za̧a̧nyɔ nin nisɔ gi wɛɛ gi lootin hi nis za dɔɔmi, gɔ mansi a zaa biitir bɔ gi zulha.

¹²Nis gi hɛɛtin hi walɔ be, gi wɛɛ gi lootin hi wal za dɔɔmi, gɔ mansi hɛw.

¹³Dood hi kams Yeesu ya̧a̧mwaato an gi ki̧i̧hi. Walɛsɛrɛ ɔ̧ɔ̧ wɔ hi za̧br dood wɔ.

¹⁴Yɔ Yeesu gbɛn anbɔ nɔɔgnɔ, raahi: a ɔɔn ya̧a̧mwaat wɔ hi zaa a beege, bɔnɛ ya̧a̧nihi. Ya̧a̧nɛ Bɛt wáátɔ gi a dood wɔ hi gi an ya̧a̧mwaat hi.

¹⁵Be raasin rɔbo: za̧a̧nyɔ tā̧ā̧ Bɛt wáátɔ an waa yɔ gɔ hi zeg gɛ, taa gulik gedu zaŋ.

¹⁶Wɛɛ kur ya̧a̧mwaat wɔ gi naan du, gbaasihi naan muulɛ rɔbsihi.

¹⁷Yɔ Yeesu gi wa̧a̧k gbɔnɔ, za̧a̧n za zaa hi nɔɔkili zagl gi muutdu warige: a Hingokya rɔbo, be woo nɔ an be dag za̧a̧tig faa nɔ?

¹⁸Yeesu warige: a mɔ elib nɔ a be rɔbo? Doo za taa rɔbo, gɛ Bɛt gi gbun kpɔd.

¹⁹Mɔ mɛɛ Bɛt maakdɔgl wɔ gaa: a bɔmɔ gbɔm zulɛ, bɔmɔ naamansi, bɔmɔ looluurɛ, bɔmɔ gɔ̧ɔ̧s doo ya̧a̧, bɔmɔ loo doo za hin hi maato. Ɗɔbsum baa mɔ hi nàà mɔ.

²⁰Wal bɔ raage: a be fɔb maak wɔrɔ lab sɛw yɔ be gi ya̧a̧mi.

²¹Yeesu sɔ̧ɔ̧ge, ha̧a̧g gi muul be, wɛɛ raage: a zɛ̧rsum hin gbun kpɔd: rekum mɔ zebr hinwɔ mɔ gin sɛw mɔ wɛɛ mɔ gaa ya̧a̧rya wɔ tus bɔ, mɔ dag rɔɔsyɔ gi bɛt ha, kuudu mɔ wɛɛ mɔ fɔbzibe.

²²Yɔ wal bɔ lag dɔgl wɔrɔ anbɔ miimɔ, yɔ gin rɔɔs gbɔɔltɔnɔ be, wa̧a̧ gbɔnɔ, reekɔ.

²³Yɔ Yeesu see walɛsɛrɛ ɔ̧ɔ̧ wɔ hi er hi gɔ̧ɔ̧ge raa: a ɓaaɓa an dood rɔɔsya hi tal a Bɛt wáát du.

²⁴Dɔgl wɔrɔ kɔms walɛsɛrɛ wɔ gɛrsɛ. Yeesu wɛɛ raahi ɓɛ: a waat be wɛ, talkɔ a Bɛt wáát du ɓaaɓa.

²⁵Ɓaaɓa an gɛloba gi gul zel gɔ̧ɔ̧s du. Ɓaaɓa zaŋ be an doo rɔɔsya gi gul a Bɛt wáát du.

²⁶Yɔ dɔgl wɔrɔ wɛɛs walɛsɛrɛ wɔ gɛrs yɛ̧ltɔnɔ ɓɛ, hi wɛɛ hi ɛtinu: a ɔnɛ bɔ ɗɛɛ an gi za̧a̧ nɔ?

²⁷Yeesu seehi, wɛɛ raahi: a hin bɔ lab ɓaas dood ɓaas nɛ zaŋ; Bɛt ɔnɛ ɓāāsig gɛ. Ɔnɛ ɗɛɛ hin sɛw.

²⁸Piyɛr wɛɛ raage: a kɛmɔ, wi ɔɔ hin sɛw, wi fɔbz mɔya.

²⁹Yeesu gòòge: a be raasin rɔbo: za̧a̧nyɔ ɔɔ raaɔ, yɛ̧ɛ̧dɛ ɔ̧ɔ̧, siŋdɛ ɔ̧ɔ̧, nɔɔtɔ, baatɔ, waatɔ, zaa bakɔ a be dɔŋgo hi a Dɔgl Rɔb bɔ gi dɔŋgo,

³⁰gi dag raato, hi yɛ̧ɛ̧dɛ, hi siŋdɛ, hi nàa, hi waato hi bak yɔ̧ɔ̧lɔ nɔɔnɛ nɔɔnɛ gi daarlɛlɛ a waabil yɔ ɓɔryɔ gedu, hi ya̧a̧kɛtil hɛw. A waabil yɔ gɔ gi zaa gedu be, gi dag za̧a̧tig faa.

³¹Wɔ hi dor kittɔnɔ hi wɛɛ kuudɛ. Kuudɛ wɔ be hi wɛɛ doosɛdɛ.

³²Yeesu hi walɛsɛrɛ ɔ̧ɔ̧ wɔ hi gi a gbɔnɔ du an hi dɔɔ a Urusalima. Yeesu gisihi gbɔnɔ dorko. Walɛsɛrɛ wɔ kpoosya̧ naamɔ, dood zaadɛ wɔ hi gihi nɛ fɔko hoobha̧a̧hiha̧ be. Yeesu wɛɛ loo walɛsɛrɛ wɔ koobl daa eerɛ wɛɛ yɛlsihi raak hinyɔ gɔ gi tursige.

³³Raa: a yɛrɛ wɛ dɔɔk a Urusalima, hi wa̧a̧ Za̧a̧n Waa bɔ ma a Bɛtmaakwookya hi Bɛtmaakdɔkya wɔ hi naan du, an hi gbaasig dɔgl gi wɔrɔ, hi wɛɛ hi gaage dood wɔ hi mɛɛ Bɛt gɛ hi naan du.

³⁴Hi kpɛ̧ɛ̧lige, hi tusil set gi muulɛ, hi lɛge hi wɛɛ hi gbɔ̧ŋge. Gɔ gi kuudu ɔ̧t taarɛ gi rɛml a wɔrk du.

³⁵Kuudu Zebede waatɔ Yakuba hi Yohana hi sɔɔ a Yeesu dɔŋdi hi raage: a Hingokya , ha̧a̧wi an mɔ woosiw hinyɔ gɔ wi ɛrumɔ.

³⁶Yeesu warihi: a ha̧a̧n an be woosin nɔ.

³⁷Hi raage: a gɔ wí gi a mɔ gbɔlums du, mɔ gaaw gbɔnɔ an wi ɗɔɔt a mɔ naanrɔbo, zaa gbun a mɔ naanyɛ̧li.

³⁸Hɔnɛ Yeesu wɛɛ ta̧a̧ raa: a nɛ́ mɛ̄ɛ̄ hinyɔ nɛ ɛrik gɛ. Nɛ ɗɛɛ an nɛ yɔ̧ ya̧a̧rhant a dakwaa bɔ gɔ be yɔ̧ gedu ya? Nɛ ɗɛɛ an nɛ dag Bɛtmɛm yɔ gɔ be dag ya?

³⁹Hi googe: a yɔ wi ɗɛɛɗɛ. Yeesu goohi: a oo! nɛ gɔ nɛ yɔ̧ ma a dakwaa bɔ gɔ be yɔ̧ gedu, nɛ dag Bɛtmɛm yɔ gɔ be dagɔ.

⁴⁰Ɗɔɔtigɔ a be naanrɔbo, hi a be naanyɛ̧li, taa a be naan du an be gaanɛ; gis wɔ Bɛt gɛmtsihi ya̧a̧nɛ.

⁴¹Yɔ walɛsɛrɛ koobl zaadɛ wɔ hi kɛm hin bɔrɔ anbɔ, kpoosya̧ nɔɔhinɔ a Yakuba hi Yohana hi zulha.

⁴²Yeesu elzihi wɛɛ raahi: a nɛ mɛɛ a wɔ hi gihi seek a waar ɛ hɛbtyayɔ a dood wɔ hi mɛɛ Bɛt gɛ hi teesdu hi wɛɛk gbɔɔl a dood zulha, dood gbɔlɛ wɔ be hi gisihi zuunik tɛŋk be.

⁴³Hin bɔ lab bɛ̄r an gi tal a nɛ teesdu gɛ. Za̧a̧nyɔ ha̧a̧g an gi wɛɛ gbɔɔl a nɛ teesdu, gi wɛɛsin woosya nɛ.

⁴⁴Za̧a̧nyɔ ha̧a̧g an gi wɛɛ doosi a nɛ teesdu, gi wɛɛ gbaar nɛ nɛ sɛw.

⁴⁵Ya̧a̧nɛ, Za̧a̧n Waa bɔ hi zulɔ, zāā an dood hí wɛɛsig woosyaadɛ gɛ, zaa an gi wɛɛs dood woosyaya̧ an gi gaa kolɔ i̧i̧nisɛ a dood kit dɔŋgo.

⁴⁶Hi tuur a Zeeriko. Yɔ̧ɔ̧r za nuŋggɔ a Bartimɛ, Timɛ waawal giya, gi ɗɔɔtig a gbɔnɔya̧ gi hin zɔ̧kugo. Yeesu hi walɛsɛrɛ ɔ̧ɔ̧ wɔ, hi saalzanɔ gbɔɔl hi tuuk a waal bɔ gedu.

⁴⁷Yɔ kɛm a Yeesu Nazarɛdya bɔ gii gi daako, wɛɛ yɛɛl ya̧a̧ɓoolikyɔ: a Yeesu Waar Dawda waawalɔ mɛɛsibe ya̧a̧rɛ.

⁴⁸Dood kittɔnɔ hi yɛɛlig ya̧a̧lik a wagsige! Gii be wɛɛ ɓoolya̧a̧ ha̧a̧ltɔnɔ daarin lɛlɛ: a Dawda waawalɔ, mɛɛsibe ya̧a̧rɛ!

⁴⁹Yeesu lagɔ erɔ, raa dood a elsinbege. Hi el yɔ̧ɔ̧r bɔ hi raage: a ɓaasum kpoos mɔ, ɗukum ha, Ɗɛnt bɔ gimɔ elko.

⁵⁰Yɔ̧ɔ̧r bɔ bis gbandilɔ hɛbtdi ɗuk rek a Yeesu ge.

⁵¹Yeesu warig gɔ: a ha̧a̧mɔ an be woosum nɔ? Yɔ̧ɔ̧r bɔ googe: a Ɗɛntyɔ, gɔmɔ an be gbɛn lɔlɛ.

⁵²Yeesu wɛɛ raage: a rekumɔ, anyɔ mɔ ɗɔbsibe, mɔ za̧a̧za̧! Wal bɔ lɔlɔ gaa ɓɔrbɔ fɛfɛd. Yeesu yɔ wɛɛ gi reko fɔge.