Read Doyayo MARKUS 11 Bible Online

MARKUS 11 - Doyayo bible

MARKUS 11

¹Yɔ Yeesu hi walɛsɛrɛ ɔ̧ɔ̧ wɔ hi sɛ̧ɛ̧bik tuurik a Urusalima, a Baytifaaze hi Betani raatya̧, hi tuur a Kɔ̧ɔ̧b Ga̧a̧tya̧ dɔŋdi. Yeesu yaa walɛsɛrɛ ɔ̧ɔ̧ wɔ eerɛ hi dorɔ.

²Raahi: a rekinɛ a raa bɔ gi nɛ muutdu bɔ ge. Gɔ nɛ bɛɛ talik gedu, nɛ zɛm pɛɛzum waa za yɔ ha̧ya, doo za kār ɗɔ̄ɔ̄tir a gi yɛl ha kɛn gɛ. Nɛ́ pidige, nɛ́ kamsibege hɛdi.

³Za̧a̧n za gi warinɛ: a nɔ nɛ gɔk hin lab nɔ? Raanɛge a ha̧a̧ Ɗɛnt bɔ giya, gi ɔsinge nɛ kamzig hɛdi nɔɔktɔnɔ.

⁴Walɛsɛrɛ wɔ hi rek hi zɛm pɛɛzum waa bɔ gɔ lakdi a gbɔnɔya̧, ha̧y a raaya̧ gbarɔ, hi pidige.

⁵Dood zaadɛ wɔ hi ginɛ di hi warihi gɔ: a nɛ gɔk nɔ? Nɛ pidig pɛɛzum waa yɛrɛ nɔ?

⁶Hi ta̧a̧nihi hinyɔ Yeesu raa nɛko, wɔrɔ hi wɛɛ hi ɔɔhi hi rekɔ.

⁷Hi kams Yeesu pɛɛzum waa bɔ, hi ɓuu gbandilya̧ a pɛɛzum bɔ gi yɛl ha, Yeesu kar ɗɔɔt hage.

⁸Dood kittɔnɔ hi ɓuu gbandilya̧ a gbɔnɔ du an hi zuun hatya̧.

⁹Wɔ hi ɛmbik a Yeesu muutdu hi wɔ hi gig fɔk hi ya̧a̧ ɓooluko: a Hozana, raakɔ a seko gbɔɔltɔnɔ! An Bɛt gi rɔbs Za̧a̧nyɔ zaa a Waar Bɛt nuŋg du.

¹⁰Bɛt rɔbs baa wɛ Dawda waar umsɔ, waar ums yɔ gi zaako! An bant gi wooy a bɛtha a Bɛt ge!

¹¹Yeesu gul a Urusalima wɛɛ rek a Bɛtluk du. Yɔ sɔ̧ɔ̧ hin wɔ gi dɔŋdi gi dā̧ā̧ sɛwi, wɛɛ rek a Betani hi walɛsɛrɛ ɔ̧ɔ̧ wɔ koobl daa eerɛ. Lɛl da ginɛ bulkbul be.

¹²Yoosugɔ, yɔ hi tuuzig a Betani a̧a̧kil ha̧a̧ Yeesu.

¹³Gbɛn yɔmntnɔɔ za hi kpas a lakilɛ, rek see a kɛnsa huml gi hage be. Hɔnɛyɔ sɛ̧ɛ̧b a tɛ̧ɛ̧ bɔ dɔŋgɔdi zɛm kpas wɔ hii kpɔd. Sɛɛ bɔ gɔ hum nɛ gedu da rı̄ı̄dir gɛ ya̧a̧nɛ.

¹⁴Yeesu raa yɔmntnɔɔ bɔ: a an bɔ̄ doo za gi les nɛ huml mɔ wɔ zaa zaŋ! Walɛsɛrɛ ɔ̧ɔ̧ wɔ hi lag hinɔ be.

¹⁵Yeesu hi walɛsɛrɛ ɔ̧ɔ̧ wɔ hi zaa a Urusalima. Yeesu gul a Bɛtluk du. Yɔ gulɔ zɛm dood hinriŋsya wɔ hi hinzekya wɔ a duhɔ. Wɛɛ yɛɛlihi niniki. Wɛɛ bisil tus-i̧i̧kya wɔ silya̧ wɔ hi gbaak tus hage, hi gutu zebtigya wɔ ɗɔɔtilya̧ lɛl wɔ.

¹⁶Wɛɛ ɔ̄ɔ̄ doo za an gi tan wɔdɔ a Bɛtluk bɔ gedu gɛ.

¹⁷Kuudu wɛɛ gogsihi hin an yɛrɛ lɛ: a Bɛt ɗɛɛrwolɔ raa a hi el luk be a dood dɔ̧ɔ̧t sɛw Bɛtzɔ̧kluk ma mi? Yɛrɛ nɛya, nɛ wɛɛn an luurɛ wa̧lɔ.

¹⁸Yɔ Bɛtmaakwookya gbɔlɛ wɔ hi kɛmɔ hi Bɛtmaakdɔkya wɔ, ha̧a̧hi ka̧a̧syɔ. Hi ɓɛɛ gbɔnɔ an hi gbɔŋge, wɛɛ hoob ha̧a̧hige be, yɔ hingokɔ bɔ kɔms saal wɔ gɛrs giya.

¹⁹Yɔ ɔ̧t legɔ, Yeesu hi walɛsɛrɛ wɔ hi tuu hi ɔɔ waal bɔ gɔ.

²⁰Bi̧i̧l du yɔ hi daako, hi gbɛn yɔmntnɔɔ bɔ Yeesu boog nɛ koot hi yɛ̧ɛ̧s elo.

²¹Yɔ Piyɛr mɛks hinyɔ daa nɛko, wɛɛ raa Yeesu : a Hingokya , seem yɔmntnɔɔ bɔ mɔ booge kootɔ.

²²Yeesu ta̧a̧ raahi: a ɗɔbsin Bɛto. Be raasin rɔbo:

²³za̧a̧nyɔ raa ga̧a̧t yɛrɛ, a ha̧sum hɛdi mɔ re mɔ gi̧i̧ a mɛmbal du, gí fāā a gi kpoos du gɛ, gi ɗɔbs a hinyɔ gi raako gi tuurɔ, hinɔ gi tursige.

²⁴Ya̧a̧nɛ be raanɛ: a hinyɔ nɛ ɛrk sɛw hi zɔ̧ki, ɗɔbsin a nɛ dag hinɔ da̧a̧da̧, wɛɛ hinɔ gi tursin be.

²⁵Gɔ nɛ gi a erkillɛl ha an nɛ zɔ̧bɔ, doo za gi woosin nɛ hin a̧a̧bi, bitsinɛge an Baa nɛ yɔ bɛtha gi bitsin hinha̧a̧l nɛ hɛw be. [

²⁶Gid nɛ́ bı̄ts dood zaadɛ gɛ, Baa nɛ yɔ gi a bɛtha taasin hinha̧a̧l nɛ wɔ bisig be. ]

²⁷Yeesu hi walɛsɛrɛ ɔ̧ɔ̧ wɔ hi wɛɛ a Urusalima. Yɔ Yeesu gul a Bɛtluk du gi ɛmbiko, Bɛtmaakwookya gbɔlɛ wɔ hi Bɛtmaakdɔkya wɔ hi ɗɛntɛ Bɛtlukya wɔ hi zaa a ge,

²⁸hi warige: a mɔ wook hin wɛrɛ hi nɔ tɛŋkɔ nɔ? Bɔ gaam tɛŋkɔ an mɔ woon hin wɛrɛ lɛ nɔ?

²⁹Yeesu raahi: a ɔbe warin hin gbunu, nɛ́ gòòsibe, gid nɛ gòòbe, bee be raasin za̧a̧nyɔ gaazib tɛŋk yɔ be woonik hin wɛrɛ be.

³⁰Wɛɛ ɛrihi: a nɛ bɔ yaaz Yohana an gi hotin dood Bɛtmɛm nɔ? Bɛt gii ya, dood ya ri? Goosinbe ma!

³¹Wɔrɔ hi watin gɔ hi tees du: a nɛ an wɛ raa a Bɛt gii yaazig be, yɔ raa a nɛ nɛ ɔɔg ɗɔbsig ma nɔ?

³²Wɛɛ an wɛ raa a dood be ..., hoob ha̧a̧wɛ saal bɔ ha̧a̧, à hi lag anbɔ be, anyɔ hi mɔkig sɛw a Yohana gi Bɛtya̧a̧kɛŋkya hi rɔbo yɔ hi ɔɔwɛ gɛ.

³³Hi wɛɛ hi raa Yeesu gɔ: a wi mɛ̄ɛ̄ gɛ. Yeesu wɛɛ raahi gɔ be: a nɛ gi lab be, bee be taasin dɔk tɛŋk yɔ be woonik hin wɔrɔ be.