Read Doyayo MARKUS 2 Bible Online

MARKUS 2 - Doyayo bible

MARKUS 2

¹Kuudu yɔ ɔ̧t an eerɛ zaa taarɛ hi talɔ, Yeesu wɛɛz a Kapɛrnayum. Dood hi lag a gi raa du.

²Dood kittɔnɔ hi zaa hi mɔks deder, tuur a lukgbarɔ, lɛl-aakil zɛ̧ɛ̧r gɛ. Yeesu gisihi dɔk Bɛt dɔglɔ.

³Dood zaadɛ hi zaa hi nasɔ hi kamz doo za zaŋgdi hi tɛŋzig tees du.

⁴Yɔ dood saal hi hi̧i̧s deder be, gbɔnɔ daas lɛl taa an hi sɛ̧bsig a Yeesu ge. Hi kar luk zulha, hi mibr lɛlyɔ riitin hi Yeesu der. Hi sis zaŋgd bɔ kus sil ha a tuutir lɛlyɔ hi gɔ gedu.

⁵Yɔ Yeesu gbɛn dood wɔ ɗɔbsigya̧, raa zaŋgd bɔ: a waa be, be bitsum hinha̧a̧l mɔ wɔ bitsɔ.

⁶Bɛtmaakdɔkya zaadɛ hi ɗɔɔt nɛ di hi gi zulya̧ hinwark be:

⁷a wal yɛrɛ yɛɛl ri gi book ya̧a̧ha̧a̧l a Bɛt zulha nɔ! Bɔ ɗɛɛ an gi bis hinha̧a̧l nɔ? Bɛt gii ɗɛɛ gi gbun kpɔd!

⁸Ɓɔrbɔ yɔ Yeesu mɛɛ hinyɔ wɔrɔ hi mɔkig hi kpoos du be, warihi: a nɔ nɛ gin mɔkil anbɔ nɔ?

⁹An be raa doo zaŋgd bɔ a ɗukumɔ mɔ́ loo sil mɔ, mɔ́ ɛmbɔ, hi záá raakɔ a be bitsum hinha̧a̧l mɔ bitsɔ, nɔni ɓaa gi daarlɛl nɔ?

¹⁰Yɛrɛ ha̧a̧be an nɛ mɛɛ a Za̧a̧n Waa bɔ gin tɛŋk a hɛbtdi an gi bits dood hinha̧a̧lɛ. Raa doo zaŋgd bɔ:

¹¹a be raamɔ, ɗukumɔ, loom sil mɔ, mɔ wɛɛ mɔ lɛlɛ!

¹²A ya̧a̧ gbun bɔ gedu wal bɔ ɗukɔ, loo silɔ tuu a dood lɔlgbar sɛw. Yɔ anbɔ, hi sɛw kɔmsihi gɛrsɛ. Hi wɛɛ hi baan Bɛt hi raa a wí gbɛ̄ndir nɛ hinza riitin an yɛrɛ zaŋ gɛ!

¹³Yeesu wɛɛ tuu Kapɛrnayum rek a Galile mɛmbal ya̧. Yɔ dood saal wɔ sɛw hi zaa a ge, goksihi hinɛ.

¹⁴Yɔ gi daako, gbɛn Alfe waawal Lewi ɗɔɔt a toosluk du, raage: a fɔbzibe! Lewi ɗukɔ fɔge.

¹⁵Yɔ Yeesu re gi lekhin a Lewi raa du, tooszekya wɔ hi hinha̧a̧lwookya zaadɛ kittɔnɔ hi lekhin lɛlgbunu hi Yeesu , hi walɛsɛrɛ ɔ̧ɔ̧ wɔ, dood kittɔnɔ hi fɔg nɛ be.

¹⁶Yɔ Bɛtmaakdɔkya wɔ hi gi a Farisaya wɔ hi teesdu hí gbɛ̄n Yeesu gi lekhin hi tooszekya wɔ hi hinha̧a̧lwookya wɔ, hi war walɛsɛrɛ ɔ̧ɔ̧ wɔ: a nɔ ɗɛnt nɛ gi lek hin hi tooszekya wɛrɛ hi hinha̧a̧lwookya wɛrɛ nɔ?

¹⁷Yɔ Yeesu kɛmɔ, wɛɛ raahi: a dood wɔ muulya̧ gi rɔbtɔnɔ hā̧ā̧hi gɛr gɛ, ha̧a̧ gumtil wɔ hiya. Bé zāā an be el dood rɔbɛ gɛ, be zaa an be el hinha̧a̧lya wɔ hiya.

¹⁸Ɔ̧tza ma Yohana Bɛtmɛm Hotingoya walɛsɛrɛ ɔ̧ɔ̧ wɔ hi Farisaya wɔ hi lisig Bɛt leesɛ. Dood hi zaa hi war Yeesu : a dood wɛrɛ hi hinlilko, nɔ fɔkya mɔ wɔ hí lı̄l ya̧nɛ gɛ nɔ?

¹⁹Yeesu wɛɛ goohi: a za̧a̧n nislookya bɔ sa̧a̧mɔ wɔ hi ɗɛɛ hinlilk anyɔ nislookya bɔ gitin hi hii a lottins naab-ɔ̧t ya? Yɔ gitin hi hii be, hí ɗɛ̄ɛ̄ an hi lil gɛ.

²⁰Yɛrɛ ɔ̧tyɔ Bɛt gɔ gi ha̧s nis lookya bɔ du gi tuurɔ, hi lil ɔ̧tɔ ge.

²¹Doo za gɔ sub gban taakil seg nuktig a gban haŋsil ha gɛ; à labɔ, gban seg bɔ yɔ kpaar gban haŋsil bɔ kpaar gbaŋ za, taakil lɛl bɔ yɔ fɛɛfɛ.

²²Wɛɛ doo za gɔ kpēl bumhob mukt a tik wɔm du gɛ; à labɔ, bum bɔ nɔɔlɔ yɔ gbɔmr tik bɔ gbɔmrɔ. Bum bɔ hi tik bɔ yɔ hi ha̧tir lɛl gbunu. Yɛrɛ bɛr an hi kpel bum mukt a tik seg du.

²³Ɔ̧tza a Yahuduyaadɛ holum-ɔ̧ti, Yeesu hi walɛsɛrɛ ɔ̧ɔ̧ hi talik a tot bak wɔ du. Yɔ hi gi reko, walɛsɛrɛ ɔ̧ɔ̧ wɔ hi yɛɛl tot wɔ halkigi.

²⁴Farisaya wɔ hi war Yeesu gɔ: a sɔ̧ɔ̧mɔ, nɔ walɛsɛrɛ mɔ wɔ hi wook hinyɔ Bɛt maakɔ gāā gbɔnɔ geha a holum-ɔ̧t gɛ nɔ?

²⁵Yeesu warihi a nɛ́ zaŋgir nɛ hinyɔ Dawda woo ɔ̧tza yɔ dag hinza gɛ, a̧a̧kil gi ha̧a̧g hi doodɔ gɛ ya?

²⁶Dawda gul Bɛtluk du, le kok kiml wɔ hi gbaas Bɛto. Maak wɛ dɔg a Bɛtmaakwookya wɔ hii hi le kok kiml wɔrɔ kpɔd. Dawda be loo kok kiml wɔ gaa doodɔ be. Abiyata gii gi Bɛtmaak-wookya gbɔɔl mɔɔt bɔ a ɔ̧tɔ ge.

²⁷Yeesu raahi ɓɛ: a holum-ɔ̧t gɔys doodɛ; dood hí gɔys holum-ɔ̧t gɛ.

²⁸Yɔ anbɔ, Za̧a̧n Waa bɔ gii gi holum-ɔ̧t waar i hɛw.