Read Doyayo MARKUS 3 Bible Online

MARKUS 3 - Doyayo bible

MARKUS 3

¹Yɔ Yeesu wɛɛ gi gul a mɔksilluk du, wal za gi du gin naanɔ wɔlɛ.

²Dood wɔ hi sɔ̧ɔ̧k Yeesu sɔsɔg a kinsa gi za̧a̧s wal naan wɔlya bɔ a holum-ɔ̧t be, an hi ɗɛɛg dɔgl gɛ̧ɛ̧nuko.

³Yeesu raa wal naan wɔlya bɔ: a ɗukum ha a dood lɔlgbar sɛw.

⁴Kuudu ɛr dood wɔ hi gi sɔ̧ɔ̧ko: a maak wɛ dɔg a ri? An hí gɔ hin rɔb a holum-ɔ̧t ya? Zaa hí gɔ hinha̧a̧l ya ri? Gi an hí za̧a̧s doo za̧a̧s ya? Zaa gi an hí gbɔŋ-gbɔm ya? Hɔnɛ dood wɔ hi wɛɛ hi kɔm hititi, hí gōō hinza gɛ.

⁵Hin nɔɔs Yeesu yɛ̧ltɔnɔ a kpoosya̧ ɓaatil bɔ gi dɔŋgo. Wɛɛ sɔ̧ɔ̧hi sɛw hi nɔɔtig lɔlɛ. Wɛɛ raa wal bɔ gɔ: a yu̧u̧sum naan mɔ. Naanwɔlya bɔ yu̧u̧s naanɔ, naanɔ bɔ wɛɛ bɛrɔ.

⁶Farisaya wɔ hi gbɛn hin bɔ tal anbɔ nɔɔhi hi tuu a mɔksilluk bɔ gedu, ɓɔrbɔ hi eltin hi da hi mɔksa hi waar bɔ Hirudus doodɔ an hi wɔb kɔlk hi gbɔm Yeesu.

⁷Yeesu ɔɔ lɛl bɔ rek hi walɛsɛrɛ ɔ̧ɔ̧ a Galile mɛmbal ya̧. Saal gbɔɔl fɔge. Doodya̧ hi fu̧u̧z a Galile hi a Yahuduya,

⁸a Urusalima, a Udumɛ hɛbt du, a Urdum kasiŋ zaa bɔ ge, hi hɛbt za yɔ sɛ̧ɛ̧b a Tiir dɔŋdi hi Sidɔŋg ge. Saal gbɔɔl bɔ gi zaak Yeesu ge anyɔ hi lag hinyɔ gi wook sɛw.

⁹Yɔ anbɔ Yeesu raa walɛsɛrɛ ɔ̧ɔ̧ wɔ an hi tɛbsig lɛmb wansɛ gi ɗɔɔt gedu, an bɔ saal wɔ hi ɓɔ̧ɔ̧g hɛbtdi.

¹⁰Anyɔ gi za̧a̧sig dood kittɔnɔ, wɔ gums gi hi tɔk sɛw hi zaak ge hi beet an hi ki̧i̧ge.

¹¹Loorɛha̧a̧l wɔ gɔ hi bɛɛg gbɛnko, hi gbuut gi muutdu, hi ɓoo kaalɛ: a mɔɔ gi Bɛt waaɔ!

¹²Hɔnɛ Yeesu wɛɛ ɓaasihi a bɔ hi raa a bee gi Za̧a̧nɔ.

¹³Yɔ Yeesu kar a ga̧a̧t ha elz dood wɔ ha̧a̧ge, hi zaa a ge.

¹⁴Her dood kooblɛ daa eer gaati wɛɛnihi tɔmsyaadɛ an hi waatin elo, gí yaahi hí dɔg Bɛt dɔglɔ,

¹⁵hí wɛɛ hí dag tɛŋk an hí nin loorɛha̧a̧l wɔ.

¹⁶Dood koobl daa eerɛ wɔ herihi nuŋgya̧ gɛrɛ: Simɔŋ yɔ Yeesu dɔ̧ɔ̧sig nuŋgɔ zaa a Piyɛr ,

¹⁷Zebede waatɔ walɛ wɔ Yakuba hi yɛ̧ɛ̧tɔ Yohana, dood wɔ Yeesu dɔ̧́ɔ̧́sihi nuŋgya̧ a Bowanɛr, hinɔ raakɔ a bɛlya̧a̧sɛɛk-waatwalɛyɔ.

¹⁸Andrɛ, Filib, Bartelemi, Mata, Tumas, Alfe waa wal Yakuba, Taadeyus, Simɔŋ Hɛbtwaa Gabs bɔ

¹⁹hi Yahuda Iskaryudi za̧a̧nyɔ rɛ̧ɛ̧ Yeesu.

²⁰Yeesu wɛɛ wɛɛ a raa du. Yɔ dood saal wɔ hi wɛɛ hi mɔks a ge gi daarlɛlɛ, dāg gbɔnɔ an gi lehin hi walɛsɛrɛ ɔ̧ɔ̧ hɛw gɛ.

²¹Yɔ Yeesu nɛsɛ ɔ̧ɔ̧ wɔ hi lag anbɔ hi zaa an hí loog hi tɛŋko. Yɔ anbɔ, dood wɔ hi raak be: a taan kol ha.

²²Yɔ Bɛtmaakdɔkya wɔ hi tiiz a Urusalima hi raa: a Yeesu gin loorɛha̧a̧l waar Belzebili a gi muul du. Gii gaag tɛŋk an gi ninin loorɛha̧a̧l wɔrɔ.

²³Yɔ anbɔ Yeesu wɛɛ elihi, dɔgsihi dɔgl hi ya̧a̧daaniki: a Saydanu ɗɛɛ an gi nin zulɔ ri nɔ?

²⁴À waar ums za gɛ̧ɛ̧ zulɔ, waar umsɔ ɗɛ̄ɛ̄ an gi er gɛ.

²⁵À nɛsums za gɛ̧ɛ̧yyɔ, nɛsums bɔ ɗɛ̄ɛ̄ an gi er gɛ.

²⁶À Saydanu ha̧tir zulɔ, gɛ̧ɛ̧ zul ɔ̧ɔ̧nɛ; waar umsɔ bɔ ɗɛ̄ɛ̄ an gi er gɛ, tɛŋkɔ yɔ da̧a̧da̧.

²⁷Doo za ɗɛ̄ɛ̄ an gi gul a za̧a̧nza tɛŋkya raa du an gi wɔɔl wɔdɔ gɛ, gid wɔ̄b za̧a̧n tɛŋkya bɔ kɛn gɛ. À wɔge, ɗɛɛ an gi loo wɔdɔ sɛw a gi raa du.

²⁸Be raasin rɔbo: dood hi ɗɛɛ an hi dag hinha̧a̧lya̧ bisigi hi ya̧a̧ya̧ ha̧a̧l yɔ gɔ hi boo a Bɛt zulha sɛw.

²⁹Yɛrɛ za̧a̧nyɔ boo ya̧a̧ha̧a̧l a Bɛt Mɔkilɔ zulha, Bɛt taasig nɛ hinha̧a̧lɔ zaa bisig zaŋ; yɔ anbɔ, woo hinha̧a̧l yɔ gɔ gi waa faa giya.

³⁰Yeesu dɔgsihi hin bɔrɔ anbɔ yɔ hi raa: a gin loorɛha̧a̧l gi muul du giya.

³¹Yeesu nɔɔtɔ hi Yeesu yɛ̧ɛ̧dɛ ɔ̧ɔ̧ hiya hi zaa hi er a lak di, hi yaas Yeesu ya̧a̧ hi elzige.

³²Saal wɔ hi ɗɔɔt gi dɔŋdi hi raage: a ɗɛntyɔ, kɛmɔ: nàà mɔ hi yɛ̧ɛ̧dɛ mɔ hi gi mɔ ɛrk lakɗi.

³³Yeesu goohi: a bɔ gi nàà be hi yɛ̧ɛ̧dɛ be nɔ?

³⁴Kuudu wɛɛ sɔ̧ɔ̧ dood wɔ hi ɗɔɔt elo, raa: a nàà be hi yɛ̧ɛ̧dɛ be hi gi gɛrɛ.

³⁵Za̧a̧nyɔ woo hinyɔ Bɛt ha̧a̧ge, gi yɛ̧ɛ̧ be, siŋg be hi nàà be.