Read Doyayo MARKUS 4 Bible Online

MARKUS 4 - Doyayo bible

MARKUS 4

¹Yeesu wɛɛ yɛɛl hingok ɓɛ a mɛmbal ya̧. Yɔ dood saal wɔ hí mɔks a gi dɔŋdi, gii kar a lɛmb du a mɛm ha ɗɔɔtɔ. Wɛɛ saal wɔ hi gi hɛbtdi a mɛmya̧.

²Yeesu gogsihi hin kittɔnɔ hi ya̧a̧daaniki. Raasihi a hingokɔ bɔ duge:

³a kɛnɛ! Bakbalkya za tuu an gi dɔ̧ɔ̧ dɔ̧ɔ̧to.

⁴Hɔnɛyɔ gi dɔ̧ɔ̧k dɔ̧ɔ̧t bɔ, dɔ̧ɔ̧t wɔ zaadɛya̧ hi mɛɛl a gbɔnɔya̧, nɔɔs hi zaa hi sɛ̧ɛ̧.

⁵Dɔ̧ɔ̧t zaadɛ hi mɛɛl a betwaat lɛl du, a lɛlyɔ hɛbt tɔɔ ge gɛ; anyɔ hɛbt ɗɔ̄b lɛlɔ ge gɛ dɔ̧ɔ̧t wɔ hi pir nɔɔktɔnɔ.

⁶Yɔ ɔ̧t haa, dɔ̧ɔ̧t wɔ hi pirɔ hí yāā yɛ̧ɛ̧s gɛ hi dɔ̧ɔ̧, hi wɛɛ hi kootɔ.

⁷Dɔ̧ɔ̧t zaadɛ hi mɛɛl a tɛ̧ɛ̧ kobsyaadɛ tees du. Tɛ̧ɛ̧ kobsya wɔ hi hɔɔ hi gbaa dɔ̧ɔ̧t wɔ hi pirɔ. Hinɔ gii dɔ̧ɔ̧t wɔ hi pirɔ hí hum gɛ.

⁸Hɔnɛ dɔ̧ɔ̧t zaadɛ wɔ hi mɛɛl a hɛbt rɔb lɛl du be, hi pirɔ hi hɔɔ hi hibɔ. Zaadɛ hi tuus gaat dumbili taarɛ, zaadɛ gaat dumbili nɔɔngbunu, wɛɛ zaadɛ wɔ be gaat yɔ̧ɔ̧lɔ nɔɔnɛ.

⁹Yeesu wɛɛ raa: a za̧a̧ni gin tɔn an gi kɛmɔ, gi kɛmɔ!

¹⁰Yɔ Yeesu hɛml hi saal bɔ, dood wɔ hi er nɛ el hi walɛsɛrɛ ɔ̧ɔ̧ wɔ koobl daa eerɛ, hi zɔ̧ge an gi wad ya̧a̧daanik wɔ hinya̧.

¹¹Yeesu goohi: a Bɛt zuns nɛɛ hinyɔ gi gi wáát du doosɛ, yɛrɛ dood zaadɛ hi kɛŋk hin wɛrɛ sɛw dɔglya̧ an ya̧a̧daanikyɔ, ya̧a̧nɛ.

¹²An dood wɔ hi gbor lɔlseeki, wɛɛ hí gbɛ̄n hinɔ gɛ, hi gbor tɔnlaki, wɛɛ hí kɛ̄m gɛ; an bɔ̄ dood wɔrɔ hi zɛmr kpoosya̧ a Bɛt ge, gi bitsihi hinha̧a̧lya̧.

¹³Yeesu wɛɛ raahi: a nɛ́ kɛ̄m ya̧a̧daanik yɛrɛ hinɔ gɛ ya? Nɛ yɛrɛ nɛ́ kɛm ya̧a̧daanik wɔ sɛw hinɔ ri?

¹⁴Bakbalkya gi an za̧a̧nyɔ gi raak Bɛt dɔglɔ.

¹⁵Dood zaadɛ hi riitin an gbɔnɔya̧yɔ. À lɛlyɔ Bɛt dɔglɔ tuur ge: yɔ hi bɛɛ Bɛt dɔglɔ lako, Saydanu zaa wɔɔ dɔgl lukt bɔ hi kpoos du.

¹⁶Gbunɔ, zaadɛ hi dag dɔ̧ɔ̧t a hɛbt betya ha. Hi kɛm Bɛt dɔglɔ hi ta̧a̧ nɔɔktɔnɔ hi hato.

¹⁷Hɔnɛ hí ɔ̄ɔ̄ an dɔglɔ gi yaa yɛ̧ɛ̧sɔ hi kpoos du gɛ. Hi wa̧a̧ dɔglɔ hi kpoos du am kaasi. Ya̧a̧rhant gɔ bɛɛ tuuruko, zaa be zɛksil a Bɛt dɔglɔ dɔŋgo, ɓɔrbɔ hi maatɔ.

¹⁸Dood zaadɛ be, hi dag dɔ̧ɔ̧t a tɛ̧ɛ̧ kobsya teesdu, hi kɛm Bɛt dɔglɔ;

¹⁹waal mɔkilɔ wɔ, hi rɔɔs ɗɔkum maatilya, hi ɗɔkum zaadɛ gaŋsɛ gaŋsɛ hi gul hi yɛ̧g dɔgl bɔ hi kpoos du, dɔgl bɔ wōō hinza ma hi kpoos du gɛ.

²⁰Dood zaadɛ hi dag hin dɔ̧ɔ̧t bɔ a hɛbt rɔb lɛl du; doodya̧ hii kɛm Bɛt dɔgl bɔ dɔ̧ɔ̧tɔ hi dag hi kpoos du, hi tuus gaato; zaa tuus gaat dumbili taarɛ, zaadɛ hi tuus gaat dumbili nɔɔn-gbunu, zaadɛ be hi tuus gaat yɔ̧ɔ̧lɔ nɔɔnɛ.

²¹Yeesu raa: a doo za gɔ kamz pitila kpook kubt a dɔn du ya? Zaa lab gɛ yaat a leeso wɛɛdis ya? Nɛ wii ma a lɛlyɔ gɔ hi wiik pitila ge mi?

²²Nɛ hinza yaatilya taa an hi ɔɔg midigɔ; wɛɛ hinza luurya taa an hi ɔɔg mɛksigɔ a dood lɔlgbar sɛw du.

²³Za̧a̧ni gin tɔn an gi kɛmɔ, gi kɛmɔ.

²⁴Yeesu raahi ɓɛ: a oon hinyɔ nɛ kɛŋkyɔ bɛttɔnɔ. Bɛt gi goonsin hin hi kɔlwaa yɔ nɛ gis dood zaadɛ hin goonik be; hí wɛɛ hí gaan zaa ha.

²⁵Gɔ gi anbɔ za̧a̧nyɔ gin hinza, gi dag zaa ha. Wɛɛ za̧a̧nyɔ taan gɛ be, hi ha̧s fɛŋwaa bɔ da gin nɛ hɛw.

²⁶Yeesu raa ɓɛ: a hinyɔ riitin hi Bɛt wáátɔ gɛrɛ: doo za dɔ̧ɔ̧ dɔ̧ɔ̧t a gi bak du.

²⁷Gi gi yokyo, gi gi lɔlɛ, yɛms du hi lurk du, dɔ̧ɔ̧t bɔ gi pirko gi hɔɔko, mɛ̄ɛ̄ an ri gɛ.

²⁸Hɛbt bɔ hi zulɔ pis dɔ̧ɔ̧t wɔ. Yɛɛlɔ, dɔ̧ɔ̧t bɔ tɛŋtigɔ pirɔ, wɛɛ hɔɔ hibɔ kɛ̧ɛ̧ lɔlɛ,

²⁹gaatɔ wɔ gɔ hi bɛɛ raŋko, wal bɔ baar woosɔ hi rɔŋsɔ anyɔ ɓɛsɔ rii.

³⁰Yeesu raa ɓɛ: a wɛ gogsin nɔ hinɔ gi riitin hi Bɛt wáátɔ nɔ? Wɛ gogsin hi nɔ ya̧a̧daanikɔ nɔ?

³¹Bɛt waar umsɔ riitin an sitahi lɛŋksɛ: gɔ hi lugig a hɛbtdi, dɛɛb daar hin lɛŋks zaadɛ wɔ waal du sɛw.

³²Hɔnɛ gɔ hi lugige, pirɔ, hɔɔ, tɔɔ daar tɛ̧ɛ̧ wɛl gbunya zaadɛ wɔ sɛw. Yaa yā̧a̧n gbɔlɛ an nɔɔs hi nɛbt zɛk a zeksɔ gedu.

³³Yeesu gaa hingokɔ wɔ sɛw hi ya̧a̧daanik kittɔnɔ anbɔ labɔ; gog an wɔ hi gisig lako, hi ɗɛɛ kɛŋko.

³⁴Gɔ́ bōōsihi hinza gi ɔsihi ya̧a̧daanik dɔk du gɛ. Hɔnɛ yɔ gɔ gi nɛ hi walɛsɛrɛ ɔ̧ɔ̧ wɔ hi ɔ̧ɔ̧kya̧, gisihi wadig hin sɛw.

³⁵A lɛɛsig du yɔ ɔ̧t legɔ, a ɔ̧t gbuna bɔ duge, Yeesu raa walɛsɛrɛ ɔ̧ɔ̧: a wɛ tal a mɛmbal kasiŋ zaa bɔ ge.

³⁶Yɔ hi ɔɔ saal bɔ, walɛsɛrɛ ɔ̧ɔ̧ wɔ hi kam Yeesu a lɛmb du, a lɛmb bɔ da giz nɛ gedu. Lɛmb zaadɛ hi sɛ̧ɛ̧b nɛ hi gi di be.

³⁷Wɛɛ zɛk za ha̧a̧l yɛɛl fɛk hi tɛŋko; yɔ mɛmɗukil wɔ hi ga̧a̧y a lɛmb du gi daarlɛlɛ, lɛmb bɔ yɛɛl hi̧i̧sigyɔ.

³⁸Yeesu gi yok nɛ a lɛmb kuudu, gbaa zulɔ a kal ha. Walɛsɛrɛ ɔ̧ɔ̧ wɔ hi kpooge, hi raage: a Hingokya! Wɛ wɔrɔ! Hin yɛrɛ lɛ rɛ gɔsum hinza gɛ ya?

³⁹Yeesu rɛmɔ, ya̧a̧l zɛk bɔ, wɛɛ raa mɛmbal bɔ: a sēemɔ! Kɔm sob, bɔmɔ namɔ! Zɛk bɔ kɔmɔ, lɛl ɗagl gɔ.

⁴⁰Wɛɛ raa walɛsɛrɛ wɔ: a hoob gin ha̧a̧k nɔ? Nɛ taan ɗɔbsil ket ya?

⁴¹Hɔnɛyɔ hoob ha̧a̧hi yɛ̧ltɔnɔ be hi wɛɛ hi watin hi tees du: a bɔ za̧a̧n yɛrɛ ɔ̧nɛ, zɛk hɛw hi mɛm hi lagsig tɔn yɔ?