Read Doyayo MARKUS 5 Bible Online

MARKUS 5 - Doyayo bible

MARKUS 5

¹Hi wɛɛ hi tuur a mɛmbal kasiŋ zaabɔ a Gerezanɛ hɛbt du ge.

²Anyɔ Yeesu gi silk a lɛmb du, wɛɛ ɓɔrbɔ doo za yɔ gin loorɛha̧a̧l muul ɗu tuuz a loorlɛlɛ zaa dagtin hi giya.

³Za̧a̧n bɔ gɔ gi waak a loorlɛlɛ. Doo za ɗɛ̄ɛ̄ an gi wa̧a̧ge gi wɔg hi ba̧a̧ntus hɛw gɛ.

⁴Gɔ hi wɔb dɔɔɔ wɔ hi gbɔɔsi, naanɔ wɔ hi ba̧a̧ntusɛ, wɛɛ kaatir ba̧a̧ntus wɔ. Za̧a̧n za tɛŋkya taa an gi daarig be.

⁵Faa, yɛms bed hi lurk bed gi lɛɛlik a loor lɛlɛ, a ga̧a̧t ha, gi ya̧a̧ɓoolik be, wɛɛ gi muulɔ ɓuukig hi bet be.

⁶Yɔ gbɛn Yeesu lakyɔ̧ɔ̧rɛ, nɔɔz zaa zagl gi muutdu.

⁷Ɓooya̧a̧ ha̧a̧ltɔnɔ raage: a dɔgl be gidu hi mɔɔ ya, Yeesu Bɛt Yɔ Gi Gbɔɔl Gi Daarlɛl waaɔ? Be zɔ̧mɔ hi ya̧a̧ hɛmnt a Bɛt nuŋg du an bɔmɔ ha̧a̧nib ya̧a̧rɛ.

⁸Yɔ Yeesu raa nɛ: a loorɛha̧a̧lɛ tuum za̧a̧n yɛrɛ gi muuldu ro! Za̧a̧n bɔ gi dɔg anbɔ.

⁹Yeesu wɛɛ ɛr za̧a̧n bɔ: a nuŋg mɔ a ri? Za̧a̧n bɔ goo raa ge: a nuŋg be a Saalɛ, anyɔ wi gi kittɔnɔ.

¹⁰Za̧a̧n bɔ zɔ̧ Yeesu hi tɛŋko, an bɔgi yaa loorɛ-ha̧a̧l wɔ a hɛbt za dɔɔmi.

¹¹A lɛlɔdi hab kittɔnɔ hi tɔk hɛt a ga̧a̧t dɔŋya̧di.

¹²Wɛɛ loorɛha̧a̧l wɔ hi zɔ̧ge: a yaawi a hab wɛrɛ hi, an wi da wi gul hi muul du.

¹³Yɔ Yeesu ta̧a̧ a rekinɛ, hi tuu za̧a̧n bɔ muulɛ, hi rek hi gul a hab wɔ hi muul du. Hab wɔ sɛw hi sɛ̧ɛ̧b hin duk eerɛ, hi bindɔ hi nɔɔ hi tii a kasiŋ disɛ, hi re hi gi̧i̧l a mɛmbal du, hi wɔrɔ.

¹⁴Hab nɛɛrɛwaat wɔ hi nɔɔ hi ren ramsɔ, hi fɔk a waal gbɔɔl du hi a raat dɛɛt wɔ du. Dood hi zaa hi sɔ̧ɔ̧ hinyɔ tuurɔ.

¹⁵Yɔ hi tuur a Yeesu dɔŋdi hi gbɛn za̧a̧n bɔ gin nɛ loorɛ ha̧a̧l wɔ muul du yɔ raa nɛ a nuŋg be a Saalɛ, gi ɗɔɔtugo. Heg gbandilɔ hamad, mɔkilɔ gi rɔbtɔnɔ. Yɔ hi gbɛn anbɔ hoob ha̧a̧hiha̧.

¹⁶Wɔ hi gbɛn hinyɔ tuur anbɔ sɛw hi fɔks wɔrɔ hinyɔ tuur a loorɛha̧a̧lya bɔ gi muulɛ, hi hinyɔ tuur a hab wɔ hi muulɛ.

¹⁷Yɔ anbɔ hi wɛɛ hi zɔ̧ Yeesu an gi ɗuk gi ɔɔ hɛbtya̧ bɔ.

¹⁸Yɔ Yeesu gi kark lɛmb du, za̧a̧n bɔ gin nɛ loorɛha̧a̧l wɔ muul du zɔ̧ge an gi kɔm elo.

¹⁹Yeesu tā̧ā̧ gɛ. Wɛɛ raage: a wɛɛm mɔ lɛlɛ, a dood mɔ hi; mɔ fɔksihi hinyɔ Waar woosum sɛw hi kpoosɔ gaattɔnɔ.

²⁰Za̧a̧n bɔ rek yɛɛl hinyɔ Yeesu woosig nɛ fɔkig a lɛlyɔ gɔ hi el a Waal Gbɔlɛ Koobl ge. Hi sɛw kɔmsihi gɛrsɛ.

²¹Yɔ Yeesu wɛɛ gi siz lɛmb du a mɛmbal kasiŋ zaabɔ fu̧u̧nɛ ge, saal za nɔ gbɔɔl hi zaa hi mɔks gi dɔŋdi. Gii be gi erk a mɛm ya̧di.

²²Yɔ mɔksillukya gbɔlɛ wɔ zaaya̧ gbun bɔ nuŋgɔ a Yayirus tuur gi gbɛn Yeesu , zagl gi dɔŋdi.

²³Zɔ̧ge hi ya̧a̧ hɛmnti, raa a waa be siŋg gum ha̧a̧ltɔnɔ sɛ̧ɛ̧b tɔdigyɔ. Zaam mɔ gbaasig naan muulɛ an gums bɔ gi gogsige gi za̧a̧!

²⁴Yeesu retin hi giya. Saalzanɔ gbɔɔl fɔge hi gig ɓɔ̧ɔ̧k tees du be.

²⁵Nis za lis gig fɔk wɛl koobl daa eerɛ.

²⁶Ha̧a̧ nɛ ya̧a̧r gbɔɔltɔnɔ a gɛr kitɛ naan du, waks tusɔ kpɔkkrɔ; gumsɔ bɔ da̧a̧ gɛ be, wɛɛ gi yɛ̧sugo yɛ̧sugo.

²⁷Hɔnɛyɔ kɛm hi book Yeesu nuŋgɔ, zaa a saal bɔ gedu, zaa gi kuudu ɓi̧i̧ gbandilɔ.

²⁸Da raa nɛ be a à be ki̧i̧ gbandilɔ bɔ gii mɔɔti, yɔ be za̧a̧za̧.

²⁹Yɔ ɓi̧i̧ Yeesu gbannɔ bɔ anbɔ, lisɔ bɔ da̧a̧ ɓɔrbɔ, kɛm hinza a gi muul du an kosgumnɔ bɔ da̧a̧da̧.

³⁰Ɓɔrbɔ Yeesu mɛɛmɛ a tɛŋk za tuu be muul du. Zɛ̧mr a saal tees bɔ gedu, warɔ: a bɔ ki̧i̧ gbandil be nɔ?

³¹Walɛsɛrɛ ɔ̧ɔ̧ wɔ hi raage: a mɔ gbɛn saal gi mɔ ɓɔ̧ɔ̧k be, mɔ wɛɛ mɔ wark bɔ ma a bɔ ki̧i̧ be?

³²Hɔnɛ Yeesu zɛ̧btir lɛl hi lɔl gi dɔŋdi an gi gbɛn za̧a̧nyɔ gɔ hinɔ.

³³Yɔ nis bɔ mɛɛ hinyɔ tursige, bee hoobo, zaa zagl Yeesu dɔŋg di raasig hin sɛw hi rɔbo.

³⁴Yeesu raage: a waa be siŋgo, ɗɔbsig mɔ za̧a̧sumza̧a̧sɔ. Rekum bɛttɔnɔ, bɔ gums mɔ bɔ gi wɛɛsum zaa.

³⁵Yɔ Yeesu gi dɔk anbɔ tɛ̧, ramsyaadɛ hi fu̧u̧z a Yayirus raa du hi zaa hi raa Yayirus: a waa mɔ bɔ wɔɔrɔ. Mɔ mɔɔsig Hingokya bɔ nɔ?

³⁶Yeesu kɛ̄msihi dɔglya̧ bɔ hi book gɛ. Wɛɛ raa Yayirus: a bɔ hoob gi ha̧a̧mɔ, ɗɔbsum kpɔd.

³⁷Gāā doo za gbɔnɔ an gi fɔg ma gɛ, gɛ Piyɛr , hi Yakuba, hi yɛ̧ɛ̧tɔ Yohana.

³⁸Yɔ hi tuur a Yayirus raa du, a lɛlyɔ gbɛn saal ɗɔbtɛ ge, hi gɔk namsɛ; dood hi kaako, hi sɛɛbik be.

³⁹Yeesu gul raa bɔ gedu, warihi a nɛ gɔk namsɔ nɔ be? Nɛ kaak nɔ? Waa bɔ wɔ̄r gɛ, gi yokyo.

⁴⁰Dood hi kpɛ̧ɛ̧lig-kpɛ̧ɛ̧lɔ. Yeesu tuusihi lak di sɛw. Loo waa wɔrk bɔ baatɔ hi nɔɔtɔ, hi wɔ hi gitin elo, hi gul a lɛlyɔ waa bɔ gi gedu.

⁴¹Rek wa̧a̧ waa bɔ naan muulɛ raage: a ꞋꞋTalita kumꞋꞋ, hinɔ raakɔ: a wawayɔ, be raamɔ, ɗukum ha!

⁴²Ɓɔrbɔ wawa bɔ ɗuk yɛɛl ɛmbikyɔ. Wawa bɔ gin wɛl kooblɛ daa eerɛ. Yɔ dood hi gbɛn hin bɔ lab kɔmsihi gɛrs yɛ̧ltɔnɔ.

⁴³Yeesu wɛɛ ɓaasihi an bɔhi raas za̧a̧n za hinɔ. Kuudu wɛɛ raahi ɓɛ: a gaan wawa bɔ lees gi le.