Read Doyayo MARKUS 7 Bible Online

MARKUS 7 - Doyayo bible

MARKUS 7

¹Farisaya wɔ hi Bɛtmaakdɔkya wɔ zaadɛya̧ hi fu̧u̧z a Urusalima hi mɔks a Yeesu ge.

²Hi gbɛn walɛsɛrɛ ɔ̧ɔ̧ wɔ zaadɛya̧ hi lek kok hi naan ɓi̧i̧limyɔ, raakɔ a hí nɛ̄ɛ̄ naanya̧ anyɔ Farisayaadɛ maak dɔg gɛ.

³Ya̧a̧nɛ, Farisaya wɔ hi Yahuduya wɔ zaadɛya̧ sɛw hi wa̧a̧k maak yɔ ɗɛntɛya̧ ɔnihi: gid hí nɛ̄ɛ̄ naanya̧ rɔbtɔnɔ gɛ, hí lēhin gɛ.

⁴Gɔ hi fu̧u̧z a luumha, hi zaa hi hot maakhotil kete ɓɔr hi ɔɔ hinleko. Hi wa̧a̧k maak zaadɛ wɔ hi dag kittɔnɔ: an mɛmdak wɔ nɛɛtugɔ, hi zaa hi gedig wɔ hi dɔn tus wɔ nɛɛtugɔ.

⁵Farisaya wɔ hi Bɛtmaakdɔkya wɔ hi ɛr Yeesu gɔ: a nɔ nɛ walɛsɛrɛ mɔ wɔ hí fɔ̄b maak yɔ ɗɛntɛ hi gog gɛ, hi lek kokya̧ hi naan ɓi̧i̧lim nɔ?

⁶Yeesu goohi: a nɛya, dood mɛlya wɛ, Esaya da dɔgsin rɔbo a Bɛt dɔgl du, anyɔ bi̧i̧: a Bɛt raa: a dood wɛrɛ hi gib ɗɔbsig hi dɔgl tɔsyɔ, wɛɛ kpoosya̧ hɛ̧ml hi beeya.

⁷Ɗɔbsig yɔ hi gib fɔmnuko gi hin tɔsyɔ. Hi gok dɔgl yɔ dood waal du hi woo hi zulya̧ hi wɛɛ hi gogsingo an ginɛ Bɛt dɔgl ɔ̧ɔ̧n giya.

⁸Yeesu raa: a nɛ in dɔgl yɔ Bɛt gaa an nɛ wɛɛ nɛ fɔb hinyɔ dood hi gogsinɛ.

⁹Wɛɛ raahi ɓɛ: a nɛ nɛ mɛɛ dɔgl yɔ Bɛt gaa bisig yɛ̧ltɔnɔ an nɛ wɛɛ nɛ fɔb maak nɛnɛ ma mi?

¹⁰Ya̧a̧nɛ Muusa gi raa: a ɗɔbsum baa mɔ hi nàà mɔ; wɛɛ: a za̧a̧nyɔ nii baatɔ, zaa lab gɛ nɔɔtɔ, hi gbɔŋge.

¹¹Yɛrɛ nɛya, nɛ dɔk a doo gi raa baatɔ, zaabe nɔɔtɔ: a hinyɔ gɔ be kamsum an be ɗansumɔ, be gaa Bɛt gaasɛ, hinɔ gi kɔrbaŋyɔ (raakɔ a gaas yɔ hi gaa Bɛto).

¹²Nɛ́ tā̧ā̧ an za̧a̧n gi ɗaas baatɔ hi nɔɔtɔ gɛ.

¹³An bɔrɔ labɔ, nɛ ha̧tirgo Bɛt dɔgl ɔ̧ɔ̧nɛ a baa nɛ maak bɔ ɔsin nɛ gogsig dood zaadɛ gi dɔŋgo. Nɛ wɛɛ nɛ wook hin zaadɛ anbɔ kittɔnɔ hɛw.

¹⁴Kuudu Yeesu wɛɛ elz dood saal wɔ raahi: a lagsinbe dɔgl be nɛ sɛw, kɛn hin yɛrɛ:

¹⁵Hinza ɗɛ̄ɛ̄ an gi gul doo buu du gi wɛɛnig ɓi̧i̧limya gɛ. Hinyɔ gi tuuzig a doo kpoos du be, gii gi wɛɛnik doo ɓi̧i̧limya. [

¹⁶Za̧a̧ni gin tɔn an gi kɛmɔ, gi kɛmɔ! ]

¹⁷Yɔ Yeesu ɔɔ dood saal wɔ gi gul a raa du, walɛsɛrɛ ɔ̧ɔ̧ wɔ hi ɛrige an gi wadsihi ya̧a̧daanik bɔ hinɔ.

¹⁸Yeesu ɛrihi: a nɛɛ hɛw zul nɛ taa an nɛ kɛm hinza zaŋ ya? Nɛ́ mɛ̄ɛ̄ a hinyɔ fu̧u̧ a lakdi gi gul a doo buu du ɗɛ̄ɛ̄ an gi wɛɛnig ɓi̧i̧limya gɛ gɛ ya?

¹⁹Anyɔ hin bɔ labɔ taa gulk a kpoos du gɛ, gi tiik a ha̧d du wɛɛ gi tuuzig a yaatillɛl du. Hin bɔ lab gi raak a lees wɔ sɛw hi taa ɓi̧i̧limyaadɛ.

²⁰Wɛɛ raa ɓɛ: a hinyɔ gi fu̧u̧zig a doo kpoos du, gii gi wɛɛnik doo ɓi̧i̧limya.

²¹Yɔ anbɔ, a dood kpoos bɔ gedu ro mɔkil ha̧a̧l wɔ hi fu̧u̧zugo: an zɛlko, luurɛ, zulgbɔŋki,

²²mansi, ɗɔkum ha̧a̧lɛ, ha̧a̧lwooki, maatili, ya̧a̧kɛtili, lɔlha̧a̧lɛ, ya̧a̧ha̧a̧lɛ, zulpɛɛki, hi yooya̧a̧.

²³Hinha̧a̧l wɔrɔ sɛw hi fu̧u̧zig a doo kpoos du ro hi wɛɛnik doo ɓi̧i̧limya.

²⁴Kuudu Yeesu ɗuk hɔdi rek a Tiir hɛbt du, re da sil a raa za du, hā̧a̧g an doo za gi mɛɛ a gi raa bɔ gedu gɛ, wɛɛ ɗɛ̄ɛ̄ an gi yaat gɛ be.

²⁵Ànyɔ nis za waaɔsiŋ ya̧a̧m gin loorɛha̧a̧l muul du be, yɔ kɛm hi book Yeesu nuŋggɔ anbɔ, zaa zagl gi dɔŋdi.

²⁶(Nis bɔ be, rɔ̀byɔ, taa Yahuduya, hi mɔɔg a Femisi, a Siriya hɛbt du. ) Zɔ̧ Yeesu an gi nin loorɛha̧a̧l bɔ gi a waaɔ siŋg bɔ gi muul du.

²⁷Yeesu raage: a ɔɔm ya̧a̧mwaat wɔ hi hi̧i̧ kɛnɛ, hinɔ bɛ̄r an hi loo ya̧a̧mwaat leesya̧ hi bits kaawaat gɛ.

²⁸Nis bɔ googe: a hɔɔ, mɔ dɔg rɔbo, Ɗɛntyɔ, kaawaat wɔ hi gi a sil ya̧di, hi lek kok rumnt wɔ ya̧a̧mwaat hi zaasil be.

²⁹Yeesu raage: a hin bɔrɔ mɔ goo hage, wɛɛm mɔ lɛlɛ; loorɛha̧a̧l bɔ tuutu ma a waa mɔ muul du.

³⁰Nis bɔ wɛɛ wɛɛ gɔ gi lɛlɛ, zɛm waaɔ bɔ gi kusig sil ha. Loorɛha̧a̧l bɔ tuu gi muul du ma da̧a̧da̧.

³¹Hɔnɛyɔ Yeesu ɔɔ Tiir hɛbtɔ, tal a Sidɔŋg, wɛɛ daa a lɛlyɔ gɔ hi el a Waal Gbɔlɛ Koobl ge, wɛɛ wɛɛz a mɛmbal bɔ Galile ge.

³²Hi kamsig wal za lag-su̧u̧ki, hi zɔ̧g an gi gbaasig naan muulɛ.

³³Yeesu sɔɔnig aakil du gi gbunu; yɔ hi hɛ̧mltin hi saal bɔ, yaa naanwalɔ a wal bɔ tɔn du, tus seto ki̧i̧n wal bɔ mɛlɔ.

³⁴Wɛɛ pɛɛ lɔlɔ wɛɛha, holɔ, wɛɛ raa wal bɔ: a ꞋꞋEfataꞋꞋ, raakɔ a kpɛ̧ɛ̧rumɔ!

³⁵Ɓɔrbɔ wal bɔ tɔnɔ kpɛ̧ɛ̧rɔ, mɛlɔ wadɔ, wɛɛ yɛɛl ya̧a̧book rɔbtɔnɔ.

³⁶Yeesu ɓaas dood sɛw an bɔhi raas hin bɔ lab za̧a̧n za. Wɛɛ gi hi gbork ɓaasigi, hii be hi gbosig dɔglɔ book be.

³⁷Yɔ hin bɔ lab kɔms dood gɛrs gbɔɔltɔnɔ, hi wɛɛ hi raa: a hinyɔ gi wook sɛw bɛɛrɔ. Gi wook an lagɛ wɔ hi lagtɔnɛ, su̧u̧kɛ wɔ be hi booya̧a̧!